1 Tan natan agawa sanen naawat nen Moroni so saya a sulat awalaan na kasil na linawa so puso to, tan napno na mapalalo a baleg a gayaga lapu ed inkamatuor nen Pahoran, ya aliwa met manaya a traidor ed kawayañgan tan pankaabigan na bansa to.

2 Balet sikato met so maermen a maong lapu ed karelmeñgan na saraman so anagdag ed si Pahoran ed yuroñgan na panañgokoman, on, dia ed arum a salita lapu ed saraman so inmalsa sumpa ed bansa ra tan ontan met ed Dios da.

3 Tan agawa a si Moroni añgala na pigara a totoo, unong ed pilalek nen Pahoran, tan initer to ed si Lehi tan si Teancum so sankaatageyan a pakapanyari ed nakekeraan a ñgayew to, tan sikato so kinmurang ya amaarap ed dalin na Gideon.

4 Tan intagey to so laylay na kawayañgan ed inerman a pasen a looban to, tan inawat to so antokaman a mamabiskeg ed ñgayew to legan na impankurang to ya amaarap ed dalin na Gideon.

5 Tan agawa a nilibo so linma ed silong na laylay to, tan inala ra so saray espada da a mañgiagel ed kawayañgan da, pian ag ira napelag ed inkaaripen.

6 Tan dia ed onia, sanen atipon la nen Moroni so siopaman a too a naala to ed amin a kurang to, sikato so linma ed dalin na Gideon; tan dia ed impañgitipon to na ñgayew to ed saray totoo nen Pahoran sikara so nanmaliw a mapalalo a mabiskeg, angan mas mabiskeg nen saray totoo nen Pachus, a sikato so ari na saray sinmisian a sikara so nandagdag ed saray bulos a totoo ed paway na dalin na Zarahemla tan kinayarian da so saman a dalin.

7 Tan agawa a si Moroni tan si Pahoran so linma a kaiba ra so saray ñgayew da ed dalin na Zarahemla, tan linma ra sumpa ed ciudad, tan inabet da so saray totoo nen Pachus, ya anga ed sikara so nanlalaban.

8 Tan nia, si Pachus so apatey tan saray totoo to so inala ra ya adakep, tan si Pahoran so nipawil ed yuroñgan na panañgokoman to.

9 Tan saray totoo nen Pachus so asalaysay, unong ed gangan, tan ontan met ed saray totoo na ari a sikara so adakep tan nipisok ed pañgawan; tan sikara so pinatey unong ed gangan; on, saraman so totoo nen Pachus tan saraman so totoo na ari, siopaman ya ag to labay a demeten so ayura to ed pañgiagel ed bansa to, balet milaban ni sumpa ed saya, so pinapatey da.

10 Tan dia ed onia akaukolan a saya a gangan so mapeget a sinumpal da onkana ed kiagel na bansa ra; on, siopaman a naalmo a mañgiburi ed kawayañgan da so tampol da a pateyen unong ed gangan.

11 Tan dia ed onia so impansampot na komatalumplo a taon ya oley na saray okom ed saray totoo nen Nephi; si Moroni tan si Pahoran apapawil da so kareenan ed dalin na Zarahemla, ed limog na dili a totoo ra, tan initer da so patey ed amin ya aliwa a matua ed pankaabigan na kawayañgan.

12 Tan agawa a dia ed gapo na komatalumplo tan sakey a taon ya oley na saray okom ed saray totoo nen Nephi, si Moroni tampol ya ingangan to a say tagano so ipawit, tan ontan met ed ñgayew ya anem a libo a totoo so ipawit ed Helaman, ya ontulong ed sikato ed pañgiagel to ed saman a kabiañgan na dalin.

13 Tan ingangan to met so ñgayew na anem a libo a totoo, kaiba so magenap a tagano, so ipawit ed saray ñgayew nen Lehi tan si Teancum. Tan agawa a saya so asumpal pian napabiskeg so saman a dalin sumpa ed saray Lamanite.

14 Tan agawa a si Moroni tan si Pahoran, intilak da so baleg ya olop na totoo ed dalin na Zarahemla, kinmurang ira a kaiba ra so baleg a tipon na totoo ya amaarap ed dalin na Nephihah, lapu ed mabiskeg so linawa ra a nadaeg da so saray Lamanite ed saman a ciudad.

15 Tan agawa sanen sikara so mamapaarap ed saman a dalin, inala ra so baleg ya olop na lalaki a Lamanite, tan dakel so pinatey da ed sikara, tan inala ra so saray tagano ra tan saray agamil da ed bakal.

16 Tan agawa a kayari ra ya inala so saraya, pinasuot da ra ya onloob ed sakey a paknaan ya ag da la alaen so saray agamil da ed bakal sumpa ed saray Nephite.

17 Tan sanen sikara la so akaloob ed saya a paknaan imbaki da ra a manayam ed kawalaan na saray totoo nen Ammon, tan say bilang da so ñgalñgali apat a libo a sikara so ag apatey.

18 Tan agawa sanen sikara la so imbaki ra intuloy da so kurang da a paarap ed dalin na Nephihah. Tan agawa sanen akasabi ra ed ciudad na Nephihah, impaalagey da so saray abong-abong da ya abel ed patar na Nephihah, a saya so asinger ed ciudad na Nephihah.

19 Natan pilalek nen Moroni a saray Lamanite so ompaway a milaban sumpa ed sikara, dia ed patar; balet saray Lamanite, lapu ed kabat da so mapalalo a kasil na linawa ra, tan lapu ed anengneng da so ontan la a kinarakel na bilang da, dia ed ontan ag ira pinmaway sumpa ed sikara; dia ed ontan ag ira linma ya akilaban ed saman ya agew.

20 Tan sanen sinmabi so labi, si Moroni so linma ed kabiluñgetan na labi, tan sikato so linma ed tuktok na padir pian nengneñgen to no iner a pasen na ciudad so nancampoan na saray ñgayew na Lamanite.

21 Tan agawa a wala ra ed bokig, ya asinger ed lolooban; tan sikara ya amin so naugip. Tan natan si Moroni so pinmawil ed ñgayew to, tan ingangan to a sikara so masiglat a mañgiparaan na saray malet a lubir tan takayan, ya ipelag da a manlapu ed tuktok na padir paloob ed dalem a kabiañgan na padir.

22 Tan agawa a si Moroni ingangan to ed saray totoo to ya onkurang ira tan onla ra ed tuktok na padir, tan sikara so onlasur ed saman a pasen na ciudad, on, angan diman ed sagur, no iner ag nancampoan na saray ñgayew na Lamanite.

23 Tan agawa a sikara ya amin so akaloob ed dalem na ciudad legan na labi, dia ed panamegley na saray malet a lubir tan saray takayan da; dia ed onia sanen sinmabi so kabuasan wala la ra ya amin ed loob na padir na ciudad.

24 Tan natan, sanen binmañgon la so saray Lamanite tan anengneng da a saray ñgayew nen Moroni so wala ed dalem na padir, sikara so ataktakot a maong, dia ed onia sikara so binmatik ed paway a lalabasan.

25 Tan natan sanen anengneng nen Moroni a sikara so ombabatik ya ontaynan ed arap to, ingangan to ed saray totoo to ya onla ra sumpa ed sikara, tan dakel so apatey da, tan niliktob da so dakel ni ya arum, tan sikara so inala ra ya adakep; tan say akeraan ed sikara so binmatik ed dalin na Moroni, a wala ed ketegan ed gilig na dayat.

26 Dia ed onia si Moroni tan si Pahoran agamoran da so pankayarian ed ciudad na Nephihah ya angapo so angan sakey ya abalang a kamarerua; tan dakel ed saray Lamanite so apatey.

27 Natan agawa a dakel ed saray Lamanite ya adakep nampilalekan da so mikasakey ed saray totoo nen Ammon tan manmaliw a bulos a totoo.

28 Tan agawa a no kaonoñgan so kinarakel na saray nampilalek, dia ed sikara niiter so unong ed saray pilalek da.

29 Dia ed ontan, amin ya adakep a Lamanite so akikasakey ed saray totoo nen Ammon, tan ginapoan da so mansagpot a mapalalo, a mandalos ed dalin, tan mantanem ira na amin a nengneng na dawa, tan amin a nengneng na ayep tan olop na manok; dia ed onia alemewan so saray Nephite ed belat na sasakbaten da; on, dia ed onia alemewan ira ed amin ya adakep a Lamanite.

30 Natan agawa a si Moroni, kayari ya agamoran to so pankayarian ed ciudad na Nephihah, lapu ed dakel so naala to ya adakep, a saya so akabawas ed saray ñgayew na Lamanite a mapalalo, tan lapu ed dakel a Nephite ya adakep so abawi to, saya so amabiskeg ed ñgayew nen Moroni a mapalalo; dia ed ontan si Moroni so tinmaynan ed dalin na Nephihah tan linma ed dalin na Nephi.

31 Tan agawa a sanen anengneng na saray Lamanite a si Moroni so onsasabi sumpa ed sikara, sikara lamet so ataktakot tan sikara so binmatik ed arap na ñgayew nen Moroni.

32 Tan agawa a si Moroni tan saray ñgayew to inosilan da ra a manlapu ed sakey a ciudad ya anga ed sananey a ciudad, anga ed sikara so naabet nen Lehi tan si Teancum; tan saray Lamanite so binmatik ed arap nen Lehi tan si Teancum, anga diman ed ketegan ed gilig na dayat, anga ed impakasabi ra ed dalin na Moroni.

33 Tan saray ñgayew na Lamanite so nantitipon ira ya amin a nankakasakey, angan sikara ya amin so atipon ed sakey ya olop ed dalin a Moroni. Natan si Ammoron, ya ari na saray Lamanite, so kaiba ra met.

34 Tan agawa a si Moroni tan si Lehi tan si Teancum so nancampo a kaiba ra so saray ñgayew da ed kaliber-liber a ketegan na dalin na Moroni, dia ed onia saray Lamanite so aliktob ed ketegan ya abalaten na kalawakan, tan dia ed ketegan a bokig na kalawakan.

35 Tan dia ed onia sikara so nancampo legan na labi. Tan nia, saray Nephite tan saray Lamanite met so abanalan lapu ed kaarawi na kinurang da; dia ed ontan ag da ninunot so mangawa na beñgatla a kasiliban ed panaon na labi, likud labat ed si Teancum; lapu ed mapalalo so pasnok to ed si Ammoron, a dia ed saya impasen to a si Ammoron, tan si Amalickiah ya agi to, so nanseñgegan na saya a baleg tan andi-angaan a bakal ed baetan da tan ed saray Lamanite, a saya so akaseñgeg na dakel a bakal tan interter na dala, on, tan baleg ya eras.

36 Tan agawa a si Teancum lapu ed pasnok to sikato so linma ed campo na saray Lamanite, tan sikato so linmasur ed loob na padir na ciudad. Tan sikato so linma a sankaawit to so lubir, ed balang sakey a pasen, anga ed arumog to so ari; tan indoyuk to so sankaawit to a gayang, a saya so tinmurok ed asinger na puso to. Balet nia, say ari aliing to so saray igagangan to sakbay a sikato so inatey, dia ed onia inosilan da si Teancum, tan sikato so pinatey da.

37 Natan agawa sanen akabatan nen Lehi tan si Moroni a si Teancum so inatey sikara so mapalalo a maermen; tan nia, sikato so sakey a too ya akilaban a bayani onkana ed bansa to, on, sakey a matua a kaaro na kawayañgan; tan sikato so nantepel na dakerakel a mapalalo ya ansakit a kairapan. Balet nia, sikato so inatey, tan sikato so linma la ed dalan na amin ed dalin.

38 Natan agawa a si Moroni so kinmurang ed kaimbuasan, tan sinmabi ed kawalaan na saray Lamanite, a dia ed saya sikara so pinapatey da ed baleg a panagpatey; tan dinagdag da ra ed paway na saman a dalin; tan sikara so binmatik, anga ed ag la ra pinmawil ed saman a panaon sumpa ed saray Nephite.

39 Tan dia ed onia so impansampot na komatalumplo tan sakey a taon ya oley na saray okom ed saray totoo nen Nephi; tan dia ed onia sikara so awalaan na saray bakal, tan interter na dala, tan eras, tan kairapan, ed loob na dakel a taon.

40 Tan wala so saray pateyan, baliñgaan, tan sinmisian, tan amin a nengneng na karelmeñgan ed limog na saray totoo nen Nephi; angaman ontan lapu ed saray matunong, on, lapu ed pikakasi na saray matunong, sikara so niligyas.

41 Balet nia, lapu ed mapalalo a karukey na bakal na saray Nephite tan saray Lamanite dakel so inmaawet, makaseñgeg ed mapalalo a kinarukey na bakal; tan dakel so saray linmemek lapu ed saray irap da, a dia ed onia sikara so nampaabeba ed inkasikara a dili ed arap na Dios, angan dia ed kaaraleman na panagpaabeba.

42 Tan agawa a kayari nen Moroni a sinalimbeñgan so saraman so kabiañgan na dalin a saraya so mapalaway ed saray Lamanite, anga ed magenap la so biskeg da, sikato so pinmawil ed ciudad na Zarahemla; tan si Helaman met so pinmawil la ed pasen a tawir to; tan aminsan ni lamet a niletneg so kareenan ed limog na saray totoo nen Nephi.

43 Tan iniawat nen Moroni so sankaatageyan a pakapanyari ed saray ñgayew to ed lima na anak to a laki, a say ñgaran to Moronihah; tan sikato so nampainawa la ed dili ya abong to pian palabasen to so saray nakekeraan ya agew to ed kareenan.

44 Tan si Pahoran so pinmawil ed yuroñgan na panañgokoman to; tan si Helaman pinili to ed sikato a dili lamet so mampulong ed saray totoo na salita na Dios; lapu ed kinarakel na saray bakal tan baliñgaan nakaukolan a say tutuntonen so gawaen lamet ed simbaan.

45 Dia ed ontan, si Helaman tan saray kaagian to so linma, ya añgibawag na salita na Dios a tekep na baleg a pakapanyari a mañguyong ed dakel a totoo nipaakar ed saray karelmeñgan da, a saya so señgeg na impambabawi ra ed saray kasalanan da tan sikara so abiniagan ed Katawan a Dios da.

46 Tan agawa ya inletneg da lamet so simbaan na Dios, ed amin a lapag na dalin.

47 On, tan saray tutuntonen so ginawa ra nipaakar ed gangan. Tan saray okom da, tan saray pañgulo ya okom da so apili.

48 Tan saray totoo nen Nephi ginmapo ra ya onaliguas lamet ed dalin, tan ginapoan da so ondakel tan ombiskeg lamet a mapalalo ed dalin. Tan sikara so ginmapo a manmaliw a mapalalo a mayaman.

49 Balet manwari ya ontan so kayamanan da, odino say biskeg da, odino say aliguas da, sikara so ag nipaatagey ed kinon na saray mata ra; ni say matantan ira a makanunot ed Katawan a Dios da; balet sikara so nampaabeba a mapalalo ed inkasikara a dili ed arap to.

50 On, ninunot da so ontan la a kinabaleg na saray beñgatla a ginawa na Katawan ed sikara, lapu ed sikara so inlaban to ed patey, tan manlapu ed inkaaripen, tan dia ed pañgawan, tan dia ed amin a nengneng na kairapan, tan inlaban to ra ed lima na saray kabusol da.

51 Tan sikara so nampikasi ed Katawan a Dios da ya andi-tonda, a dia ed onia benindicionan ira na Katawan unong ed salita to, kanian sikara so binmiskeg tan inmaliguas ed dalin.

52 Tan agawa a saraya ya amin a beñgatla so agawa. Tan si Helaman so inatey, ed komatalumplo tan lima a taon ya oley na saray okom ed saray totoo nen Nephi.