1 Tan agawa a si ari Lamoni kinaukolan to so italindeg na saray igagangan to tan paneknekan da so amin a beñgatla ya anengneng da nipaakar ed saya a pamaakaran.

2 Tan sanen sikara la ya amin so akapampaneknek ed saray beñgatla ya anengneng da, tan akabatan to so inkamatuor nen Ammon ed impañgiagel to ed saray ayayep to, tan ontan met ed baleg a pakapanyari to ya onsumpa ed saray nampilalek a mamatey ed sikato, sikato so mapalalo a mankelaw, tan inkuan to: Petepeteg, saya so aliwa a too labat. Nia, ag kasi saya so Makapanyari ya Espiritu a sikato so añgipalasur na baleg a kadodusa ed saraya a totoo, lapu ed panagpatey da?

3 Tan inmebat ira ed ari, tan kuan da: No sikato bilang so Makapanyari ya Espiritu odino sakey a too, ag mi amta; balet saya lambeñgat so amta mi; a sikato so ag napatey na saray kalaban na ari; ni say ag da nayarian ya itayak so ayayep na ari sano sikato so kaiba mi, lapu ed naspot a kamaoñgan to tan baleg a biskeg to; dia ed ontan, kabat mi a sikato so kaaro na ari. Tan natan, O ari, ag kami manisia a say sakey a too nawalaan na ontan la a kabaleg na pakapanyari, lapu ed kabat mi a sikato so ag napatey.

4 Tan natan, sanen say ari nadñgel to so saraya a salita, inkuan to ed sikara: Natan kabat ko la a sikato so Makapanyari ya Espiritu; tan sikato so linmasur ed saya a panaon pian iagel to so saray bilay yo, pian sikayo so ag ko pateyen a siñga unong ed ginawak ed saray kaagian yo. Natan saya man so Makapanyari ya Espiritu a sinalita na saray ama tayo.

5 Natan saya so sisia a tawir nen Lamoni, ya inawat to a nanlapu ed si ama to, a wala so sakey a Makapanyari ya Espiritu. Angaman mananisia ra ed sakey a Makapanyari ya Espiritu, ya ipapasen da ya amin a gagawaen da so maong; manwari ya ontan, si Lamoni ginapoan to so ontakot a mapalalo, natatakot ag la piga akagawa na mauges makaseñgeg ed impamatey to ed saray igagangan to;

6 Lapu ed dakel la so impapatey to ed sikara lapu ed saray kaagian da intaytayak da so saray ayayep to ed pasen a kawalaan na danum; tan lapu ed onia, ya inkataytayak na saray papastolan da sikara so impapatey to.

7 Natan saya so kagagawa na saray Lamanite ya manayam ed asinger na danum na Sebus pian itayak da so saray ayayep na saray totoo, pian dia ed ontan nadagdag da ed arawi so dakel ed saray ataytayak ya ayayep ed dili a dalin da, a saya so kagagawa na saray managsamsam ed limog da.

8 Tan agawa a si ari Lamoni tinepet to ed saray igagangan to, a nankuan: Iner so kawalaan to nia so too ya awalaan na baleg a pakapanyari?

9 Tan inkuan da ed sikato: Nia, papakanen to so saray kabayom. Natan si ari ingangan to so saray igagangan to, sakbay na panagpainum da ed saray ayayep to, ya iparaan da so saray kabayo tan karwahe to, tan sikato so olopen da ya onla ed dalin na Nephi; lapu ed wala diman so baleg a pista a nigetar ed saman a dalin na Nephi, ya ingena na ama nen Lamoni, a sikato so ari ed amin a sakop na dalin.

10 Natan sanen si ari Lamoni nadñgelan to a si Ammon so mañgipaparaan ed saray kabayo tan karwahe to sikato so lalo a kinmelaw lapu ed inkamatuor nen Ammon, a kuan to: Petepeteg angapo so angan sakey ya igagangan ed limog na saray igagangan ko ya awalaan na onia ya inkamatuor a siñga saya a too; no iñgen anunotan to so amin a gangan ko a sumpalen to.

11 Natan kabat ko a petepeteg a saya so Makapanyari ya Espiritu, tan pilalek ko a saya so ondago ed siak, balet ag ko nayari a gawaen.

12 Tan agawa a sanen si Ammon ayari to la ya imparaan so saray kabayo tan karwahe ya ikana na ari tan saray igagangan to, sikato so linma ed kawalaan na ari, tan anengneng to a say kanengneñgan na ari so nauman; kanian ñgalñgali a sikato la so ontaynan ed arap to.

13 Tan sakey ed saray igagangan na ari inkuan to ed sikato, Rabbanah, a saya, no ipatalus, makapanyari odino baleg ya ari, lapu ed ipapasen da a saray ari ra so makapanyari; tan dia ed onia inkuan to ed sikato: Rabbanah, say ari pilalek to a sika so natilak.

14 Dia ed ontan si Ammon inmarap ed ari, tan inkuan to ed sikato: Anto so labay mo a gawaen ko ya onkana ed sika, O ari? Tan say ari ag to inebatan ed loob na sakey ya oras, unong ed panaon da, lapu ed ag to amta so iebat to ed sikato.

15 Tan agawa a si Ammon inkuan to ed sikato lamet: Anto so pilalek mo ed siak? Balet say ari so ag inmebat.

16 Tan agawa a si Ammon, lapu ed sikato so napno na Espiritu na Dios, dia ed ontan atalusan to so wala ed kanunotan na ari. Tan inkuan to ed sikato: Makaseñgeg ed impakadñgel mo ed impañgiagel ko ed saray igagangan mo tan saray ayayep mo, tan pinatey ko so pitora ed saray kaagian da ed panamegley na palsot tan espada, tan siningwat ko so taklay na saray arum, pian iagel ko so saray ayayep mo tan saray igagangan mo; nia, niseñgeg kasi ed saya so gapo na pankelkelaw mo?

17 Ikuan ko ed sika, anto so saya, a say pankelaw mo ontan la a kinabaleg? Nengneng mo, sakey ak a too, tan siak so igagangan mo; dia ed ontan, antokaman a pilalek mo a matunong, saya so gawaen ko.

18 Natan sanen say ari nadñgel to so saraya a salita, sikato so mankelaw lamet, lapu ed anengneng to a si Ammon nabasa to so saray kanunotan to; balet manwari ya onia, si ari Lamoni binisuat to so sañgi to, tan inkuan to ed sikato: Siopa ka? Sika kasi iman so Makapanyari ya Espiritu, a kabat to so amin a beñgatla?

19 Si Ammon inmebat tan inkuan to ed sikato: Aliwa a siak.

20 Tan say ari inkuan to: Panon a kabat mo so saray nonunoten na pusok? Nayarian mo so mansalita ya andi-takot, tan ibagam ed siak so nipaakar ed saraya a beñgatla; tan ontan met ibagam ed siak no anto a pakapanyari so impamatey mo tan impansisingwat mo ed saray taklay na saray kaagian ko ya añgitaytayak ed saray ayayep ko—

21 Tan natan, no ibagam ed siak so saraya a beñgatla, antokaman a labay mo iter ko ed sika: tan no nakaukolan, sika so pabantayan ko ed saray ñgayew ko; balet amtak a lalo a makapanyari ka nen say sikara ya amin; angaman ontan, antokaman a labay mo ed siak iter ko ed sika.

22 Natan si Ammon lapu ed sikato so makabat, balet sikato so maoyamo, inkuan to ed si Lamoni: Deñgelen mo kasi so saray salitak, no ibagak ed sika no anto a pakapanyari a ginawak so saraya a beñgatla? Tan saya so beñgatla so pirawat ko ed sika.

23 Tan say ari inmebat ed sikato, tan nankuan: On, manisia ak ed amin a salitam. Dia ed ontan sikato so naerel ed kasiliban.

24 Tan si Ammon ginapoan to so mansalita ed sikato ya andi-takot, tan inkuan to ed sikato: Manisia ka kasi a wala so Dios?

25 Tan sikato so inmebat, tan inkuan to: Ag ko kabat so kabaliksan to tan.

26 Tan dia ed onia si Ammon inkuan to: Manisia ka kasi a wala so sakey a Makapanyari ya Espiritu?

27 Tan inkuan to: On

28 Tan si Ammon inkuan to: Sikato so Dios. Tan si Ammon inkuan to ed sikato lamet: Manisia ka kasi a saya a Makapanyari ya Espiritu, a sikato so Dios, pinalsa to so amin a beñgatla a wala ed tawen tan dalin?

29 Tan inkuan to: On, manisia ak a pinalsa to so amin a beñgatla a wala ed dalin; balet ag ko amta so saray tawen.

30 Tan si Ammon inkuan to ed sikato: Saray tawen so pasen a panaayaman na Dios tan amin a masanto ya angeles to.

31 Tan si ari Lamoni inkuan to: Saya kasi so wala ed tagey na dalin?

32 Tan si Ammon inkuan to: On, tan osusdoñgan to ya amin so saray anak na totoo; tan kabat to ya amin so wala ed kanunotan tan gagala na puso ra; a dia ed panamegley na lima to sikara ya amin so pinalsa a nanlapu la ed gapo.

33 Tan si ari Lamoni inkuan to: Manisia ak ed saraya ya amin a beñgatla a sinalitam. Sika kasi so imbaki a nanlapu ed Dios?

34 Si Ammon inkuan to ed sikato: Sakey ak a too; tan say too dia ed gapo pinalsa unong ed indeñgan na Dios, tan siak so atawag na Masanto ya Espiritu a mambañgat na saraya a beñgatla ed saya a totoo, pian sikara so naawit ed sakey a pikakabat ed saman so maptek tan tua;

35 Tan sakey a kabiañgan na saman ya Espiritu so manaayam ed siak, a sikato so mañgiiter ed siak na pikakabat, tan ontan met ed pakapanyari unong ed pananisiak tan saray pilalek ko a wala ed Dios.

36 Natan sanen si Ammon imbalikas to so saraya a salita, ingapo to ed impamalsa na mundo, tan ontan met ed impamalsa ed si Adan, tan imbaga to ed sikato so amin a beñgatla nipaakar ed inkigapol na too, tan inulit to tan imparungtal to ed arap to so saray kasulatan tan saray masanto a kasulatan na saray totoo, a saraya so sinalita na saray masanto a profeta, ya angan mampaleksab ed saman so panaon a say ama ra, si Lehi, so tinmaynan ed Jerusalem.

37 Tan ontan met inulit to ed sikara (a saya so onkana ed ari tan saray igagangan to) so amin ya impambaroy na kaamaan da ed kalawakan, tan amin a kairapan da ed eras tan inkapgaan, tan saray nililikna ra a kairapan, tan arum ni.

38 Tan inulit to met ed sikara so nipaakar ed impanalsa nen Laman tan si Lemuel, tan saray lalaki ya anak nen Ishmael, on, amin ya impanaalsa ra so imbaga to ed sikara; tan impaliwawa to ed sikara so amin a kasulatan tan masanto a kasulatan a nanlapu ed panaon ya intaynan nen Lehi ed Jerusalem ya anga ed saya a peles a panaon.

39 Balet aliwa a saraya labat ya amin; lapu ed impaliwawa to ed sikara so plano na pananundon, a saya so niparaan a nanlapu la ed inletneg na mundo; tan impakabat to met ed sikara so nipaakar ed isabi nen Cristo, tan amin a kimey na Katawan so impaamta to ed sikara.

40 Tan agawa a kayari to ya imbaga so saraya a beñgatla, tan impaliwawa to so saraya ed ari, say ari anisia ed amin a salita to.

41 Tan ginapoan to so onnañgis ed Katawan, a nankuan: O Katawan, mañgasi ka; unong ed ag nasabsabaan a panañgasim ed saray totoo nen Nephi, iter mo ed siak, tan saray totook.

42 Tan natan, sanen nibalikas to so saya, sikato so niparukol ed dalin, a siñga inatey.

43 Tan agawa a saray igagangan to so inala ra tan inawit da ed si asawa to, tan imparukol da ed dukolan; tan sikato so akarukol a siñga inatey ed loob na duara ya agew tan duara a labi; tan si asawa to, tan saray anak to a lalaki, tan saray anak to a bibii so nanermen ed sikato, unong ed kagagawa na saray Lamanite, ya agay la so ermen da ed inkaandi to.