1 Tan natan agawa a dia ed gapo na komatalumplo a taon ya oley na saray okom, dia ed komadua ya agew na unaan a bulan, si Moroni akaawat na sulat a nanlapu ed si Helaman, ya insalaysay to so kipapasen na saray totoo ed saman a sukong na dalin.

2 Tan saraya so salita ya insulat to, a nankuan: Inararok a pinabpablik ya agi, Moroni, dia ed Katawan tan ontan met ed saray kairapan ed bakal tayo; nia, inararok ya agi, wala so siñga labay ko ya ibaga ed sika a nipaakar ed pibabakal mi ed saya a kabiañgan na dalin.

3 Nia, duara a libo ed saray lalaki ya anak na saraman so totoo ya inawit nen Ammon ya impaway ed dalin na Nephi—natan kabat mo a sikara so kapolian nen Laman, a sankapañguloanan a laki ya anak nen ama tayo a Lehi;

4 Natan ag ko la uliten ed sika so nipaakar ed saray sisia ra a tawir odino say ag da pananisia, lapu ed kabat mo so nipaakar ed saraya ya amin a beñgatla—

5 Dia ed ontan masarag la ed siak so pañgibagak ed sika a saraya a duara a libo a malangwer a lalaki so añgala na saray agamil da ed bakal, tan pilalek da a siak so pañgulo ra; tan sikami so linma a mañgiagel ed bansa mi.

6 Tan natan kabat mo met so nipaakar ed paknaan a ginawa na kaamaan da, ya ag da labay ya alaen so saray agamil da ed bakal sumpa ed saray kaagian da pian mamaterter na dala.

7 Balet dia ed komaduamplo tan anem a taon, sanen anengneng da so saray kairapan tayo tan saray dusa ya asalsali tayo niseseñgeg ed sikara, ñgalñgali da la deralen so paknaan a ginawa ra tan alaen da so saray agamil da ed bakal ed pañgiagel da ed sikatayo.

8 Balet ag ko nitepel a deralen da so paknaan a ginawa ra, tan ipapasen ko a pabiskegen tayo na Dios, makaseñgeg ed saya ag la naaruman so paniirap tayo lapu ed panumpal da ed samba a ginawa ra.

9 Balet nia, saya so sakey a beñgatla a dia awalaan tayo na baleg a gayaga. Tan nia, dia ed komaduamplo tan anem a taon, siak, Helaman, so kinmurang ed unaan na saraya a duara a libo a malangwer a lalaki ya amaarap ed ciudad na Judea, pian tuloñgan mi si Antipus, a sikato so tinurom a pañgulo na saray totoo ed saman a kabiañgan na dalin.

10 Tan intipon ko so saray duara a libo ya anak ko a lalaki, (tan manepeg ira a tawagen ya anak a lalaki) ed ñgayew nen Antipus, a dia ed saya a say biskeg si Antipus so nangayaga a mapalalo; tan nia, say ñgayew to so abawasan na saray Lamanite ed saray ñgayew da dakel a bilang so apatey da ed saray totoo tayo, a lapu ed saya a pamaakaran sikami so maermen.

11 Manwari ya ontan, nayari tayo a ligliwaen so sikatayo a dili ed saya, tan sikara so inatey lapu ed bansa ra tan say Dios da, on, tan sikara so maliket.

12 Tan saray Lamanite intilak da met so dakel ya adakep, ya amin da so pañgulo a kapitan, tan angapo la so arum ya inkera ra a mabilay. Tan ipapasen mi a sikara natan ed saya a panaon so wala ed dalin na Nephi; saya no ag da ra pinatey.

13 Tan natan saraya so ciudad ya agamoran a kinayarian na saray Lamanite dia ed impamaterter da na dala na dakel ed saray mabayani a totoo tayo:

14 Say dalin na Manti, odino say ciudad na Manti, tan say ciudad na Zeezrom, tan say ciudad na Cumeni, tan say ciudad na Antiparah.

15 Tan saraya so ciudad a kinayarian da sanen sinmabi ak ed ciudad na Judea; tan nalmok si Antipus tan saray totoo to a mankikimey ed angaan na pakayari ra pian salimbeñgan da so ciudad.

16 On, tan sikara so kinmapoy ed laman ontan met ed espiritu, lapu ed sikara so akilaban a mabayani ed agew tan sikara so nankimey ed labi pian pagnayonen da so saray ciudad da; tan dia ed onia sikara so nantepel na baleg a kairapan ed nambabañgil a kanengneñgan.

17 Tan natan sikara so mapilit ya ontaluna ed saya a pasen odino ompatey; dia ed ontan nayarian mo ya ipasen a saya a melag a ñgayew ya inawit ko, on, saraman so anak ko a lalaki, so akapañgiter ed sikara na baleg ya ilalo tan gayaga.

18 Tan natan agawa a sanen anengneng na saray Lamanite a si Antipus so akaawat na babaleg a biskeg ya inmarum ed ñgayew to, sikara so apasuotan dia ed gangan nen Ammoron ya ag ira onla sumpa ed ciudad na Judea, odino sumpa ed sikami, ed bakal.

19 Tan dia ed onia sikami so pinalaboan na Katawan; tan no bilang sikara so dinmugpa ed sikami ed kakapuyan mi ompano dineral da so melag a ñgayew mi; balet lapu ed onia sikami so niagel.

20 Sikara so ingangan nen Ammoron a pagnayonen da so saray ciudad a naala ra. Tan dia ed onia nansampot so komaduamplo tan anem a taon. Tan dia ed gapo na komaduamplo tan pito a taon imparaan mi so ciudad mi tan sikami a dili ed pañgiagel.

21 Natan pilalek mi a saray Lamanite so ondugpa ed sikami; tan ag mi pilalek so ondugpa ed sikara ed saray salimbeñgan da.

22 Tan agawa ya añgipasen kami na saray espiya ed paway a kaliber-liber, pian bantayan da so kiwas na saray Lamanite, pian ag da kami nalabasan ed labi odino agew a mangawa na dugpa ed saray arum a ciudad a wala ed mamabaybay.

23 Lapu ed kabat mi a dia ed saraman a ciudad ag ira awalaan na magenap a biskeg a miarap ed sikara; dia ed ontan pilalek mi, no sikami so labsanan da, dugpaen mi ra ed beneg, tan dia ed onia awiten mi ra ed beneg ed saman lamlamang a panaon a sikara so naabet ed arap. Impasen mi a sikara so taloen mi; balet nia, sikami so abaiñgan ed saya a pilalek mi.

24 Sikami so ag da labay a labsanan na amin a ñgayew da, ni say saya so gawaen da ed kabiañgan da, ag la piga ag magenap so biskeg da tan sikara so napelag.

25 Ni say gawaen da so mankurang sumpa ed ciudad na Zarahemla; ni say gawaen da so ombasil ed ulo na Sidon, dia ed ciudad na Nephihah.

26 Dia ed onia, saray ñgayew da, mabiskeg so gagala ra a pagnayonen da so saray ciudad a naala ra.

27 Tan natan agawa ed komadua a bulan ed saya a taon, dakel so saray tagano a sinmabi ed sikami a nanlapu ed kaamaan na saray duara a libo ya anak ko a lalaki.

28 Tan ontan met wala so duara a libo a lalaki ya imbaki ra ed sikami a nanlapu ed dalin na Zarahemla. Tan dia ed onia sikami so akaparaan ed samplora a libo a lalaki, tan say tagano ya onkana ed sikara, tan ontan met ed saray kaasawaan ra tan saray anak da.

29 Tan saray Lamanite, nen nanenengneng da so saray ñgayew mi a nanaaruman ya inagew-agew, tan saray tagano ya onsasabi onkana ed pambilay mi, ginapoan da so ontakot, tan ginapoan da met so mampawil-pawil, a no nayari patondaen da so pakakaawat mi na saray tagano tan biskeg mi.

30 Natan sanen anengneng mi a saray Lamanite ginapoan da so onaburido ed saya a nagagawa, nampilalekan mi so mangawa na sakey a kasiliban ed sikara; dia ed ontan si Antipus ingangan to ak ya onkurang a kaibak so saray anak ko ya ankelag a lalaki dia ed kaabay a ciudad, a siñga mañgaawit kami na tagano ed kaabay a ciudad.

31 Tan sikami so onkurang ed asinger na ciudad na Antiparah, a siñga say laen mi dia ed ciudad a wala ed labas to, dia ed ketegan a wala ed gilig na dayat.

32 Tan agawa a sikami so kinmurang, a kunwari sankaawit mi so saray tagano mi, ya onla ed saman a ciudad.

33 Tan agawa a si Antipus so nankurang a kaiba to so kabiañgan na ñgayew to, ya intilak to so nakekeraan a mañgiagel ed ciudad. Balet sikato so ag ni kinmurang anga ed sikami so akaarawi a kaibak so saray melag a ñgayew ko, tan sinmabi kami ed asinger na ciudad na Antiparah.

34 Tan natan, diman ed ciudad na Antiparah so kawalaan na sankabiskegan a ñgayew na saray Lamanite; on, say sankarakelan ed bilang.

35 Tan agawa a sanen sikara so pinakabatan na saray espiya ra, sikara so sinmalong ed sikami a kaiba ra so ñgayew da tan dinmugpa ra sumpa ed sikami.

36 Tan agawa a sikami so binmatik ya inmarawi ed sikara, ed mamabaybay. Tan dia ed onia naayat mi ya iniarawi so sankamapakapanyarian a ñgayew na saray Lamanite;

37 On, angan dia ed ontan la a kaarawi, ya anga ed sanen anengneng da so ñgayew nen Antipus ya onoosil ed sikara, ed angaan na pakayari ra, ag ira linmiko ed kawanan odino dia ed kawigi, balet intuloy da so kurang da ed maptek a dalan ya ontumbok ed sikami; tan, sanen ipasen mi, a say gagala ra so pateyen da kami sakbay a sikara so naabotan nen Antipus, tan saya pian ag ira naliktob na saray totoo mi.

38 Tan natan si Antipus, dia ed impakanengneng to ed kaatapan mi, ginanatan to so kurang na ñgayew to. Balet nia, sinmabi so labi; dia ed ontan ag da kami naabotan, ni say naabotan ira nen Antipus; dia ed ontan sikami so nancampo a mamalabas na labi.

39 Tan agawa sakbay na palbañgon ed saman a kabuasan, nia, saray Lamanite oosilan da kami la. Natan say biskeg mi ag magenap a milaban ed sikara; on, ag ko nitepel a saraman so ankelag ya anak ko a lalaki so napelag ed lima da; dia ed ontan intuloy mi so kurang mi, tan sikami so kinmurang ya amaarap ed kalawakan.

40 Natan ag ira onliko ed kawanan ni say dia ed kawigi ag la piga sikara so naliktob; ni say siak met ag ak onliko ed kawanan odino dia ed kawigi ag la piga sikami so naabotan da, tan angapo so pakayari mi ya onlaban sumpa ed sikara, no ag say napatey, tan sikara so makabatik; tan dia ed onia sikami so binmatik ed saman a sanagew ed kalawakan, anga ed binmiluñget.

41 Tan agawa lamet, sanen say liwawa na kabuasan so sinmabi anengneng mi so saray Lamanite a mamapaarap la ed sikami, tan sikami so binmatik ya inmarawi ed sikara.

42 Balet agawa ya ag da kami la inosilan na arawi sakbay a sikara so tinmonda; tan saya dia ed kabuasan na komatlo ya agew ed komapito a bulan.

43 Tan natan, no bilang naabot ira nen Antipus ag mi kabat, balet inkuan ko ed saray totook: Nia, ag tayo kabat balet sikara so tinmonda lapu ed sakey a gagala pian sikatayo so ondugpa ed sikara, pian sikatayo so naerel ed pasiklong da;

44 Dia ed ontan anto so nibaga yo, anak ko, labay yo so onla sumpa ed sikara ed bakal?

45 Tan natan ikuan ko ed sika, inararok ya agi a Moroni, ya ag ak ni akanengneng na onia ya agay la a kasil na linawa, andi, ni say dia ed limog na amin a Nephite.

46 Tan unong ed impantawag ko ed sikara ya anak ko (lapu ed sikara ya amin so malangwer ni) iñgen inkuan da ed siak: Ama, nengneng mo say Dios tayo wala ed sikatayo, tan ag to nitepel a sikatayo so napelag; dia ed onia sikatayo so onla; ag tayo pateyen so saray kaagian tayo no paulyan da itayo a bukor; dia ed ontan sikatayo so onla, ag la piga a taloen da so ñgayew nen Antipus.

47 Natan ag da ni asalsali so akilaban, balet ag da antakot so patey; tan malaglaem so nunot da ed kawayañgan na kaamaan da nen say dili a bilay da; on, sikara so imbañgat na saray ina ra, no ag ira manduarua, say Dios ilaban to ra.

48 Tan inulit da ed siak so saray salita na saray ina ra, a kuan da: Ag kami manduarua ed saray ina mi lapu ed kabat da so saya.

49 Tan agawa a pinmoliktar ak a kaibak so saray duara a libo sumpa ed saray Lamanite ya inmosil ed sikami. Tan natan nia, saray ñgayew nen Antipus so akaabot ed sikara, tan ginmapo so makapataktakot a bakal.

50 Say ñgayew nen Antipus lapu ed sikara so abanalan, makaseñgeg ed andukey ya impankurang da ed ontan la a kinatikey na panaon, ñgalñgali la ra napelag ed lima na saray Lamanite; tan no ag ak pinmawil a kaibak so saray duara a libo agamoran da so gagala ra.

51 Tan si Antipus so niparukol ed panamegley na espada, tan dakel met ed saray pañgulo to, lapu ed banal da, makaseñgeg ed siglat na impankurang da—dia ed ontan saray totoo nen Antipus, so agulo-gulo lapu ed inkaparukol na saray pañgulo ra, ginapoan da so onsener ed arap na saray Lamanite.

52 Tan agawa a saray Lamanite binmiskeg so linawa ra, tan ginapoan da ra ya osilan; tan dia ed onia saray Lamanite inosilan da ra ed baleg a biskeg sanen si Helaman so sinmabi ed benegan da a kaiba to so saray duara a libo to, tan ginapoan da so nampatey ed sikara a mapalalo, dia ed onia say tibukel a ñgayew na saray Lamanite so tinmonda tan pinmoliktar ira ed si Helaman.

53 Natan sanen saray totoo nen Antipus anengneng da so saray Lamanite a pinmoliktar, tinipon da so saray totoo ra tan sikara so dinmugpa lamet ed benegan na saray Lamanite.

54 Tan natan agawa a sikami, a totoo nen Nephi, saray totoo nen Antipus, tan siak a kaibak so saray duara a libo, niliktob mi so saray Lamanite, tan sikara so pinapatey mi; on, kanian apasuotan ira a mañgisuko ed saray agamil da ed bakal tan ontan met ed inkasikara ya adakep ed bakal.

55 Tan natan agawa a sanen insuko ra so inkasikara a dili ed sikami, nia, binilang ko so saray kalangweran a lalaki ya akilaban a kaibak, tan mapaga ak ompano dakel so apatey ed sikara.

56 Balet nia, dia ed mapalalo a gayagak, angapo so angan sakey a kamarerua ed sikara so niparukol ed dalin; on, tan sikara so akilaban a siñga kaiba ra so biskeg na Dios; on, angapo ni ed saray totoo so akabkabatan ya akilaban ed ontan la a makapakelaw a biskeg; tan baleg a pakapanyari ed indugpa ra ed saray Lamanite, ya ataktakot da ra; tan lapu ed saya saray Lamanite insuko ra so inkasikara ya adakep ed bakal.

57 Tan lapu ed angapo so pasen na saray adakep mi, pian nabantayan mi ra ya iarawi ed saray ñgayew na Lamanite, dia ed ontan sikara so imbaki mi ed dalin na Zarahemla, tan kabiañgan na saray totoo ya ag apatey nen Antipus, kaiba ra; tan say nakdaan inalak tan intipon ko ed saraman so malangwer ya Ammonite, tan sikami so kinmurang a papawil ed ciudad na Judea.