1 Tan natan agawa a kayari ya imbaga nen Alma so saraya a salita ed sikara sikato so inmirong ed dalin, tan inmalagey si Amulek tan ginapoan to so mambañgat ed sikara, a nankuan:

2 Kaagian ko, dia ed nunot ko ag nayari a sikayo so ag makapikabat ed saray beñgatla ya asalita nipaakar ed isabi nen Cristo, a saya so imbañgat mi ya Anak na Dios; on, kabat ko a saraya a beñgatla so nibañgat la ed sikayo a malaelaem sakbay na insian yo manlapu ed limog mi.

3 Tan unong a nampilalekan yo ed inararok ya agik ya ipakabat to ed sikayo no anto so gawaen yo, lapu ed saray irap yo; tan sikato so nansalita ed sikayo pian iparaan to so kanunotan yo; on, tan sikato so nankuyong ed sikayo nipaakar ed pananisia tan anos—

4 On, angan pian nawalaan kayo na baleg a pananisia ya angan itanem yo so salita ed saray puso yo, pian nasali yo so kaabigan to nia.

5 Tan anengneng mi a say baleg a tepet so wala ed kanunotan yo no kasi say salita wala ed Anak na Dios, odino angapo so Cristo.

6 Tan anengneng yo met a si agik pinaneknekan to ed sikayo, ed dakel a pamaakaran, a say salita wala ed Cristo onkana ed kilalaban.

7 Si agik binitla to so saray salita nen Zenos, a say pananundon onsabi ed panamegley na Anak na Dios, tan ontan met ed saray salita nen Zenock; tan ontan met sikato so dinmoñget ed si Moises, pian paneknekan to a saraya a beñgatla so tua.

8 Tan natan, nia, paneknekan ko ed sikayo ed siak a dili a saraya a beñgatla so tua. Nia, ikuan ko ed sikayo, kabat ko a si Cristo so onsabi ed limog na saray anak na totoo, pian akoen to ed inkasikato so saray kasalanan na totoo to, tan sikato so mamaandi ed saray kasalanan na mundo; lapu ed say Katawan a Dios saya so sinalita to.

9 Lapu ed kaukolan a sakey a bagat a pamaandi na kasalanan so nagawa; tan unong ed makana a plano na Andi-angaan a Dios kaukolan wala so bagat a pamaandi na kasalanan a nagawa, odino amin a katooan so andi-saew a nabalang; on, amin da so inmawet; on, amin da so nigapol tan abalang, tan sikara so nabalang likud ed panamegley na bagat a pamaandi na kasalanan a saya so kaukolan a nagawa.

10 Lapu ed kaukolan a wala so baleg tan sampot a bagat; on, aliwa a bagat na sakey a too, ni say ayep, ni say dinanman a nengneng na manok; tan saya so aliwa a bagat na too; balet saya so kaukolan a malaknab tan andi-angaan a bagat.

11 Natan angapo so angan sakey a too a nayarian to ya ibagat so dili a dala to ya onkana a pamaandi na kasalanan na sananey. Natan, no say sakey a too so akapatey, nia say gangan tayo, a saya so maptek, ekalen to so bilay na agi to? Ikuan ko ed sikayo, Andi.

12 Balet say gangan kaukolan to so bilay na saman so akapatey; dia ed ontan angapo so sakey a malaknab a bagat a pamaandi na kasalanan a nagnap ya onkana ed saray kasalanan na mundo.

13 Dia ed ontan, kaukolan sirin a wala so sakey a baleg tan sampot a bagat, tan dia ed saya wala so, odino kaukolan so, itonda na pamaterter na dala; dia ed saya say gangan nen Moises so asumpal la; on, amin so nasumpal, balang sakey a tulnek tan melag a tanda, tan angapo so ompatey.

14 Tan nia, saya so katibukelan a kabaliksan na gangan, balang sakey a sankamelagan a beñgatla so mañgitoturo ed saya a baleg tan sampot a bagat; tan saman so baleg tan sampot a bagat so say Anak na Dios, on, malaknab tan andi-angaan.

15 Tan dia ed onia awiten to so kilalaban ed amin a manisia ed ñgaran to; tan saya so gagala na sampot a bagat, say pañgawit to ed sankaaraleman a panañgasi, ya ontaluna ed kaptekan, tan awiten to so agamil ed saray totoo pian nawalaan ira na pananisia ya onkana ed pambabawi.

16 Tan dia ed onia say panañgasi peneken to so pankaukolan na kaptekan, tan liktoben to ra ed taklay na andi-kaatapan, balet saman so ag mañgikana na pananisia ya onkana ed pambabawi so akaparungtal ed tibukel a gangan na pankaukolan na kaptekan; dia ed ontan saman labat so awalaan na pananisia ya onkana ed pambabawi so naawit ed baleg tan andi-angaan a plano na pananundon.

17 Dia ed ontan say Dios komon iter to ed sikayo, kaagian ko, pian komon gapoan yo ya ikana so pananisia yo ed pambabawi, a gapoan yo so ontawag ed masanto a ñgaran to, pian sikato so nawalaan na panañgasi ed sikayo;

18 On, kerew kayo ed sikato na panañgasi; lapu ed sikato so makapanyari a mañgilaban.

19 On, mampaabeba kayo ed inkasikayo, tan ituloy yo so pampikasi ed sikato.

20 Manpikasi kayo ed sikato sano wala kayo ed kaumaan yo, on, onkana ed amin ya ayayep yo.

21 Manpikasi kayo ed sikato dia ed loob na saray abong yo, on, onkana ed amin a kabobung yo, mandapag dia ed kabuasan, kaaguan, tan dia ed labi.

22 On, manpikasi kayo ed sikato sumpa ed pakapanyari na saray kabusol yo.

23 On, manpikasi kayo ed sikato sumpa ed demonyo, a sikato so kabusol na amin ya inkamatunong.

24 Manpikasi kayo ed sikato ya onkana ed saray tanem yo ed kaumaan yo, pian komon sikayo so onaliguas lapu ed saraya.

25 Manpikasi kayo ya onkana ed saray ayayep yo a wala ed kaumaan, pian komon saraya so ondakel.

26 Balet aliwa ni a saya ya amin; kaukolan ya ibesñgaw yo so pikakasi na saray kamarerua yo dia ed saray silir yo, tan dia ed saray maamot a pasen yo, tan dia ed saray kalawakan yo.

27 On, tan sano ag kayo onnañgis ed Katawan, pano yo so saray puso yo, na pikakasi ed sikato ya andi-tonda onkana ed pankaabigan yo, tan ontan met ed pankaabigan na saray wala ed kaliber-liber yo.

28 Tan natan nia, inararok a kaagian, ikuan ko ed sikayo, ag yo ipapasen a saya la ya amin; tan kayari yo a ginawa so saraya ya amin a beñgatla, no ipulisay yo a paarawien so saray mankakaukolan, tan saray alakseban, tan ag yo dalawen so saray mansasakit tan manlilikna na kairapan, tan iapag yo so saray tagano yo, no wala ed sikayo, ed saraman so wala ed pankaukolan—ikuan ko ed sikayo, no ag yo gawaen so saraya a beñgatla, nia, saray pikakasi yo angapo so kakanaan da, tan angapo so gungona yo, tan kapara yo so saray mankonkonwari ya iboburi ra so pananisia.

29 Dia ed ontan, no ag yo nunoten so panmaliw a matulong, sikayo so siñga gaer, ya ibantak na saray managsuri, (lapu ed angapo so kana to nia) tan saya so gatin-gatinan na sali na saray totoo.

30 Tan natan, kaagian ko, pirawat ko, kayari yo a naawat so dakerakel a tasi, ya anengneng yo a say masanto a kasulatan so mamaneknek ed saraya a beñgatla, dago kayo tan mamapaway kayo na buñga ya onkana ed pambabawi.

31 On, pirawat ko ya ondago kayo tan ag yo la papaaweten so saray puso yo; tan nia, natan so panaon tan agew na kilalaban yo; tan dia ed ontan, no sikayo so mambabawi tan ag yo paaweten so saray puso yo, tampol a say baleg a plano na pananundon so onsabi ed sikayo.

32 Tan nia, saya a bilay so panaon na saray totoo a mamparaan a miarap ed Dios; on, nia say agew ed saya a bilay so agew ed saray totoo a mangawa na saray kimey da.

33 Tan natan, unong ed asalitak la ed sikayo ya inmuna, lapu ed awalaan kayo na dakerakel a tasi, dia ed ontan, pikasik ed sikayo ya ag yo la ipapaleen so agew na pambabawi yo ya anga ed kasampotan; tan dia ed kayari na saya ya agew na bilay, a niiter ed sikatayo a mamparaan onkana ed andi-angaan, nia, no ag tayo paabigen so saray panaon tayo legan a wala tayo ed saya a bilay, dia ed saya onsabi so labi na kabiluñgetan ya angapo la so kimey a nagawaan.

34 Ag yo nibaga, no sikayo so naawit ed saman so makapataktakot a kairapan, a siak so mambabawi, a siak so ompawil ed Dios ko. Andi, ag yo nibaga so saya; lapu ed saya met lamlamang ya espiritu a makankayarian na laman yo ed saya a panaon na ipaway yo ed saya a bilay, saman met lamlamang ya espiritu so walaan na pakapanyari a mankayarian ed laman yo diman ed andi-angaan a mundo.

35 Tan nia, no impaleen yo so agew na pambabawi yo anga ed patey, nia, sikayo so manmaliw ya oleyan na espiritu na demonyo, tan sikayo la so tatakan to a kayarian to; dia ed ontan, say Espiritu na Katawan so ontaynan la ed sikayo, tan angapo la so pasen to ed sikayo, tan say demonyo wala la ya amin so pakapanyari to ed sikayo; tan saya so sankasampotan a kipapasen na saray marelmeng.

36 Tan saya so kabat ko, lapu ed say Katawan inkuan to ya ag to manaayam ed dalem na saray aliwa a masanto a templo, balet dia ed puso na saray matunong so panayaman to; on, tan inkuan to met a saray matunong so onyurong ed panarian to, ya ag la ra ompaway; balet saray kawes da so nagawa ya amputi ed panamegley na dala na Cordero.

37 Tan natan, inararok a kaagian, pilalek ko a tandaan yo so saraya a beñgatla, tan nepeg a panseetan yo so mankimey ed kilalaban yo a sitatakot ed arap na Dios, tan ag yo la iboburi so isabi nen Cristo;

38 Tan ag kayo la onsasaluñgat sumpa ed Espiritu Santo, balet sikato so awaten yo, tan akoen yo ed inkasikayo so ñgaran nen Cristo; ya ipaabeba yo so inkasikayo anga ed sapok, tan igalang yo so Dios, ed inerman a pasen a kawalaan yo, ed espiritu tan dia ed katuaan; tan mambilay kayo ed pisasalamat ed inagew-agew, onkana ed saray dakel a panañgasi tan saray bendicion ya initer to ed sikayo.

39 On, tan bilinen takayo met, kaagian ko, a manalwar kayo ed panamegley na pikakasi ya andi-tonda, pian ag kayo niarawi ed saray tukso na demonyo, pian ag to kayo taloen, pian ag kayo manmaliw ya oleyan to ed sampot ya agew; tan nia, tumañgan to kayo na aliwa a maabig a beñgatla.

40 Tan natan inararok a kaagian, bilinen takayo a mananos, tan mantepel kayo ed amin a kanengneñgan na irap; ya ag yo la balawen so saraman so amapaway ed sikayo lapu ed mapalalo ya inkaduka yo, ag la piga a manmaliw kayo a managkasalanan a siñga sikara;

41 Balet sikayo so nawalaan na anos, tan itepel yo so saray irap, tekep na ag-nagiing ya ilalo ya onsabi so agew sikayo so mampainawa manlapu ed saray kairapan yo.