1 Natan agawa ed komatalumplo a taon ya oley na saray okom ed saray totoo nen Nephi, kayari a naawat tan binasa nen Moroni so sulat nen Helaman, sikato so nangayaga a mapalalo lapu ed maong a kipapasen da, on, say maong a nansumpalan da ya agamoran nen Helaman, ed impakabawi to ed saray dalin ya abalang da.

2 On, tan saya so impakabat to ed amin a totoo to, ed amin a pasen na saman a dalin ed kaliber-liber a kawalaan to, pian mangayaga ra met.

3 Tan agawa a sikato so nansulat a tampol ed si Pahoran, a pilalek to a mantipon na saray totoo a mamabiskeg ed si Helaman, odino ed saray ñgayew nen Helaman, pian mainomay to a bembenan a pagnayonen so saman a biang na dalin a makapakelkelaw so impakabawi ra.

4 Tan agawa sanen impawit nen Moroni so saya a sulat ed dalin na Zarahemla, ginapoan to lamet so mannunot na plano pian nagamoran to so saray nakekeraan ed saraman so kayarian da tan saray ciudad a naala na saray Lamanite ed sikara.

5 Tan agawa legan nen Moroni so mangagawa na paraan ya onla sumpa ed saray Lamanite ed bakal, nia, saray totoo ed Nephihah, so nantitipon a nanlapu ed ciudad na Moroni tan ciudad na Lehi tan ciudad na Morianton, lapu ed dinugpaan ira na saray Lamanite.

6 On, angan saraman so apasuotan ya ombatik manlapu ed dalin na Manti, tan dia ed dalin a kaliber-liber, sikara so linma tan akitipon ed saray Lamanite ed saya a pasen na dalin.

7 Tan dia ed onia lapu ed mapalalo so kinarakel da, on, tan sikara so makakaawat na biskeg ya inagew-agew, ed silong na gangan nen Ammoron sikara so linma sumpa ed saray totoo na Nephihah, tan sikara so ginapoan da a pateyen ed mapalalo a baleg a panagpatey.

8 Tan saray ñgayew da so dakel kanian say akeraan a totoo na Nephihah apasuotan ira ya ombatik ed arap da; tan sikara so sinmabi tan akitipon ed ñgayew nen Moroni.

9 Tan natan lapu ed si Moroni impasen to a wala so saray totoo a nibaki ed ciudad na Nephihah, ya ontulong ed saray totoo pian pagnayonen da so ciudad, tan lapu ed kabat to a mas mainomay ya iagel so ciudad no ag napelag ed lima na saray Lamanite nen say pambawi ed saya ed sikara, impasen to a mainomay da a pagnayonen so ciudad.

10 Dia ed ontan binembenan to so amin a ñgayew to pian napagnayon to so saraman so pasen ya abawi to.

11 Tan natan, sanen anengneng nen Moroni a say ciudad na Nephihah so atalo mapalalo so ermen to, tan ginapoan to so manduarua, lapu ed karelmeñgan na saray totoo, no sikara kasi so ag napelag ed lima na saray kaagian da.

12 Natan saya so kipapasen ed amin a pañgulo a kapitan to. Sikara met so nanduarua tan mankelaw lapu ed karelmeñgan na saray totoo, tan saya lapu ed impantaluna na saray Lamanite ed sikara.

13 Tan agawa a si Moroni akapasnok ed saray manuoley, lapu ed angapo so panañgiansakit da nipaakar ed kawayañgan na bansa ra.