१ साच्चैँ नै, परमप्रभु तिमीलाई यसो भन्नुहुन्छ, मेरा सेवक जोसेफ स्मिथ, म तिम्रो अर्पण र स्वीकृतिमा अति नै खुसी छु जुन तिमीले गरेका छौ; किनकि यसको अन्तका लागि मैले तिमीलाई हुर्काएको हुँ, ताकि पृथ्वीका कमजोर विषयहरूद्वारा म मेरो ज्ञान देखाउन सकूँ ।

२ तिम्रो प्रार्थना मेरासामु स्वीकारयोग्य छ; र तिनीहरूको उत्तरमा म तिमीलाई भन्छु, कि अब तिमीलाई मेरो सुसमाचारको गम्भीर घोषणा गर्न तत्कालै बोलावट गरिएको छ र यो किलाको जुन मैले सियोनको कोसे-ढुङ्गा बन्न स्थापना गरेको छु, जुन एक दरबारको समानताअनुसार परिष्करणले पालिश गरिने छ ।

३ यो घोषणा संसारका सबै राजाहरू, संसारका सबै भागहरूमा, माननीय निर्वाचित-राष्ट्रपति र तिमी बस्ने राष्ट्रका उच्च विचारधाराका राज्यपालहरू र वृहत् रूपमा छरिएका पृथ्वीका सबै राष्ट्रहरूलाई दिइनु पर्छ ।

४ यो विनम्रताको आत्मामा र पवित्र आत्माको शक्तिद्वारा लेखिनु पर्छ, जुन लेख्ने समयमा ती तिमीमा हुने छन्;

५ किनकि आगामी दिनहरूमा तिनीहरूलाई जे भए तापनि ती राजाहरू र अधिकारीहरूका सम्बन्धमा मेरो चाहना बुझ्नका लागि पवित्र आत्माद्वारा तिमीलाई दिइने छ ।

६ किनकि, हेर, म तिनीहरूलाई सियोनको ज्योति र महिमामा ध्यान दिन बिन्ती गर्न लागेको छु, किनकि तोकिएको समय उनको पक्षमा आएको छ ।

७ त्यसकारण, तिनीहरूलाई चर्को घोषणाका साथ र तिम्रो गवाहीका साथ बिन्ती गर, तिनीहरूसँग नडराईकन, किनकि तिनीहरू घाँसजस्तै छन् र तिनीहरूका सबै महिमा फूलजस्तै छन् जुन चाँडै झर्छन्, ताकि तिनीहरूलाई पनि कुनै बहानाबिना छोड्न सकियोस्—

८ अनि ताकि म तिनीहरूलाई कृपा दृष्टिको दिनमा भेट्न सकूँ, जब म, कपटीहरूका माझ अत्याचारीको अंश नियुक्त गर्न मेरो आवरणको मुहार खोल्ने छु, जहाँ दाह्रा किटिने छ, यदि तिनीहरूले मेरा सेवकहरू र मेरो गवाहीलाई अस्वीकार गर्छन् भने जुन मैले तिनीहरूलाई प्रकट गरेको छु ।

९ अनि पुनः, म तिनीहरूको हृदयलाई भेट्ने छु र कोमल बनाउने छु, तिनीहरूमध्ये धेरै तिमीहरूको भलाइका लागि, ताकि तिमीहरूले तिनीहरूका दृष्टिमा अनुग्रह प्राप्त गर्ने छौ, ताकि तिनीहरू सत्यको ज्योतिमा आउन र गैह्र यहूदीहरूलाई उत्कर्षमा अनि सियोनलाई माथि उठाउन सकून् ।

१० किनकि मेरो कृपा दृष्टिको दिन छिट्टै आउँदै छ, त्यस समयमा जुन तिमीहरूले सोचेका हुँदैनौ; अनि मेरा मानिसहरूको सुरक्षा अनि तिनीहरूद्वारा छोडिएकाहरूका लागि आश्रय कहाँ हुने छ?

११ हे पृथ्वीका राजाहरू हो, जाग! तिमीहरू आओ, हे, तिमीहरू आओ, आफ्ना सुन र चाँदीसहित, मेरा मानिसहरूको सहयोग गर्न, सियोनका छोरीहरूको घरमा ।

१२ अनि पुनः, म तिमीलाई साच्चैँ भन्छु, मेरा सेवक रोबर्ट बी. थम्पसनले तिमीलाई यो घोषणा लेख्न सहयोग गर्नु पर्छ, किनकि म उनीसँग धेरै खुसी छु र उनी तिमीसँग हुनु पर्छ;

१३ त्यसकारण, उनले तिम्रो सल्लाह सुन्नु पर्छ र म उनलाई धेरै आशीर्वादहरूले आशीष दिने छु; उनी अबदेखि सबै विषयहरूमा आस्थावान् र सत्य हुनु पर्छ र उनी मेरो दृष्टिमा महान् हुने छन्;

१४ परन्तु उनले सम्झनु पर्छ कि म उनको हातमा उनको रखवारी चाहने छु ।

१५ अनि पुनः, म तिमीहरूलाई साच्चैँ नै भन्छु, आशीषित छन् मेरा सेवक हाइरम स्मिथ; किनकि म, परमप्रभु, उनको हृदयको इमानदारिताका कारण र उनले मेरासामु जे ठीक छ त्यसलाई मन पराएका कारण उनलाई प्रेम गर्छु, परमप्रभु भन्नुहुन्छ ।

१६ पुनः, मेरा सेवक जोन सी. बेनेटले तिमीलाई पृथ्वीका राजाहरू र जनहरूलाई मेरा वचन पठाउनका लागि तिम्रो मिहिनेतमा सहयोग गर्नु पर्छ र तिमी, मेरा सेवक जोसेफ स्मिथसँगै पनि उभिनु पर्छ, कष्टको घडीमा; र यदि उनले सल्लाह लिए भने उनले पुरस्कार गुमाउने छैनन् ।

१७ अनि उनको प्रेमका लागि उनी महान् हुने छन्, किनकि उनले यसो गरेमा उनी मेरा हुने छन्, परमप्रभु भन्नुहुन्छ । मैले उनले गरेका कार्य देखेको छु, यदि उनले जारी राखे भने म स्वीकार गर्छु र उनलाई आशीर्वाद र महान् महिमाको मुकुट पहिराउने छु ।

१८ अनि पुनः, म तिमीलाई भन्छु कि यो मेरो चाहना हो कि मेरा सेवक लाइमन वाइटले सियोनका लागि प्रचारको कार्यलाई निरन्तरता दिनु पर्छ, विनम्रताको आत्मामा, संसारका अगाडि मेरो गवाही दिँदै; अनि म उनलाई चीलका पखेटाहरूमा जस्तै बोक्ने छु; अनि उनले आफ्नो र मेरो नामका लागि महिमा र सम्मान उत्पन्न गर्ने छन् ।

१९ कि जब उनले आफ्नो कार्य पूरा गर्ने छन्, म उनलाई आफैँमा ग्रहण गर्न सक्छु, जसरी मैले मेरा सेवक डेभिड प्याटेनलाई गरेँ, जो यस समयमा मसँग छन् र मेरा सेवक एड्वार्ड पाट्रिज र मेरा वृद्ध सेवक जोसेफ स्मिथ सिनियर, जो अब्राहामसँग उनको दाहिने हातमा बस्छन् र उनी आशीषित र पवित्र छन् किनकि उनी मेरा हुन् ।

२० अनि पुनः, म तिमीलाई साच्चैँ नै भन्छु, मेरा सेवक जर्ज मिलर कुनै छलकपटबिनाका छन्; उनका हृदयको सत्यनिष्ठाका कारणले उनलाई विश्वास गर्न सकिन्छ; र मेरो गवाहीमा उनले गरेको प्रेमका लागि म, परमप्रभु, उनलाई प्रेम गर्छु ।

२१ त्यसकारण म तिमीलाई भन्छु, म उनको शिरमा मेरा सेवक एड्वार्ड पाट्रिजलाई जस्तै बिशपरिकको कार्यालयको मोहर लगाउँछु ताकि उनले मेरो घरको पवित्रीकरण प्राप्त गर्न सकून्, ताकि उनले मेरा गरिब जनहरूको शिरमा आशीर्वादहरू प्रदान गर्न सकून्, परमप्रभु भन्नुहुन्छ । मेरा सेवक जर्जलाई कसैले तुच्छ ठान्नु हुँदैन, किनकि उनले मलाई सम्मान गर्ने छन् ।

२२ मेरा सेवक जर्ज र मेरा सेवक लाइमन र मेरा सेवक जोन स्नाइडर र अरूले मेरा नाममा एउटा गृह निर्माण गर्नु पर्छ, त्यस्तो गृह जुन मेरा सेवक जोसेफले उनीहरूलाई देखाउने छन्, त्यस स्थानमा जहाँ उनले तिनीहरूलाई पनि देखाउने छन् ।

२३ अनि यो आवासका लागि एउटा गृह हुने छ, एउटा गृह जहाँ टाढाबाट आउने आगन्तुकहरू बास बस्ने गृह हुन सक्ने छ; त्यसकारण यो राम्रो गृह हुनु पर्छ, सबै स्वीकृति योग्य, ताकि थकित यात्रीले स्वास्थ्य र सुरक्षा प्राप्त गर्न सक्छ जब तिनले परमप्रभुका वचनलाई मनन गर्छ; र मैले सियोनका लागि कोसे ढुङ्गा नियुक्त गरेको छु ।

२४ यदि यो गृह मेरो नाममा निर्माण गरियो र यदि यसमा नियुक्त गरिने व्यवस्थापकले यसमा कुनै अपवित्रता छिर्न दिएनन् भने यो स्वस्थ बासस्थान हुने छ । यो पवित्र हुनु पर्ने छ अन्यथा परमप्रभु तिम्रा परमेश्वर त्यसमा बास गर्नु हुने छैन ।

२५ अनि पुनः, साच्चैँ नै म तिमीलाई भन्छु, मेरा सबै सन्तहरू टाढाबाट आउनु पर्छ ।

२६ अनि तिमीहरूले तत्कालै सन्देशवाहकहरू पठाओ, हो, छनोट गरिएका सन्देशवाहकहरू र तिनीहरूलाई भन: तिमीहरूका सबै सुन र तिमीहरूका चाँदी र तिमीहरूका बहुमूल्य पत्थरहरू र आफ्ना सबै प्राचीन वस्तुहरू लिएर तिमीहरू आओ; र प्राचीन वस्तुहरूको ज्ञान भएका सबैजना, जो आउने छन् र बक्ससको रूख, धूपीको रूख र सल्लाको रूख, पृथ्वीका सबै बहुमूल्य रूखहरू साथै लिएर आउन सक्छन्;

२७ अनि फलामसँगै, तामासँगै, पित्तलसँगै, जस्तासँगै र पृथ्वीका तिमीहरूका सबै बहुमूल्य वस्तुहरूसँगै; अनि त्यहाँ सर्वोच्चलाई वास गराउन मेरा नाममा एउटा गृह बनाओ ।

२८ किनकि त्यहाँ पृथ्वीमा कुनै स्थान भेटिएको छैन कि जहाँ उहाँ आउन सक्नुहुने छ र तिमीहरूबाट हराएका वस्तुहरूलाई पुन: स्थापित् गर्न सक्नुहुने छ, अथवा जुन उहाँले लैजानु भएको थियो, जुन पादरित्वको परिपूर्णता थियो ।

२९ किनकि पृथ्वीमा कुनै बप्तिस्मा कुण्ड छैन, ताकि तिनीहरू, मेरा सन्तहरूले, मृतकहरूका लागि बप्तिस्मा लिन सक्छन्—

३० किनकि तिमीहरूका गरिबीका दिनहरूमा, जहाँ तिमीहरूले मेरा लागि गृह निर्माण गर्न सक्षम नहुँदा बाहेक यो विधि मेरो गृहमा निर्वाह गरिनु पर्छ र अन्यथा मलाई स्वीकार्य हुन सक्दैन ।

३१ परन्तु तिमीहरू मेरा सबै सन्तहरू, म तिमीहरूलाई मेरा लागि गृह निर्माण गर्ने आज्ञा दिन्छु; अनि म तिमीहरूलाई मेरा लागि गृह निर्माण गर्नका लागि पर्याप्त समय दिन्छु; र यस समययावधिभित्रमा तिमीहरूका बप्तिस्माहरू मलाई स्वीकार्य हुने छन् ।

३२ परन्तु हेर, यो पर्याप्त समयको अन्त्यमा तिमीहरूका मृतकहरूका लागि तिमीहरूको बप्तिस्मा मलाई स्वीकार्य हुने छैन; अनि यदि तिमीहरूले त्यो पर्याप्त समयको अन्त्यमा यी कार्यहरू गरेनौ भने तिमीहरूका मृतकहरूसँगै तिमीहरूलाई चर्चका रूपमा अस्वीकार गरिने छ, परमप्रभु तिमीहरूका परमेश्वर भन्नुहुन्छ ।

३३ किनकि साच्चैँ नै म तिमीहरूलाई भन्छु, कि तिमीहरूले मेरा लागि गृह निर्माण गर्नका लागि पर्याप्त समय प्राप्त गरेपछि, जहाँ मृतकहरूका लागि बप्तिस्माको विधि निर्वाह गरिनु पर्छ, अनि जसका लागि संसारको सृष्टि हुनुपूर्व देखि नै यसको प्रारम्भ भएको थियो, यदि त्यसमा नगरिएमा तिमीहरूका मृतकहरूका बप्तिस्मा मलाई स्वीकार्य हुन सक्दैन;

३४ किनकि त्यसमा नियुक्त गरिएका पवित्र पादरित्वका साँचाहरू छन्, ताकि तिमीहरूले सम्मान र महिमा प्राप्त गर्न सक्ने छौ ।

३५ अनि यस समयपछि, टाढासम्म छरिएकाहरूद्वारा मृतकहरूका लागि गरिएका तिमीहरूको बप्तिस्मा, मलाई स्वीकार्य हुने छैन, परमप्रभु भन्नुहुन्छ ।

३६ किनकि यसको स्थापना गरिएको छ कि सियोनमा र तिनका किलाहरूमा र यरूशलेममा, ती स्थानहरूमा जुन मैले आश्रयका लागि नियुक्त गरेको छु, तिम्रा मृतकहरूका लागि बप्तिस्मा गर्ने स्थानहरू हुने छन् ।

३७ अनि पुनः, साच्चैँ नै म तिमीहरूलाई भन्छु, तिमीहरूले मेरा नाममा निर्माण गरेको गृहमा ती कार्यहरूको निर्वाह नगरेसम्म, तिमीहरूका धुलाईहरू कसरी मलाई स्वीकार्य हुने छन्?

३८ किनकि, यस कारणले गर्दा मैले मोशालाई आज्ञा दिएँ कि उनले एउटा मण्डप निर्माण गर्नु पर्छ, ताकि तिनीहरूले यसलाई उजाड-स्थानमा आफूसँग लैजानु पर्छ अनि प्रतिज्ञाको भूमिमा एउटा गृह निर्माण गर्नु पर्छ, ताकि ती विधिहरू प्रकट हुन सक्छन्, जुन संसारको सृष्टिपूर्व देखि लुकाइएका थिए ।

३९ त्यसकारण, साच्चैँ नै म तिमीहरूलाई भन्छु, कि तिमीहरूका अभिषेकहरू र तिमीहरूका धुलाईहरू र मृतकहरूका लागि तिमीहरूका बप्तिस्माहरू र तिमीहरूका पवित्र सभाहरू र लेवीका सन्तानहरूद्वारा तिमीहरूका बलिदानहरूका लागि तिमीहरूका सम्झनाहरू र तिमीहरूका अति पवित्र स्थानहरूमा तिमीहरूका देववाणीहरूका लागि जहाँ तिमीहरू वार्तालाप प्राप्त गर्छौ र तिमीहरूका व्यवस्थाहरू र फैसलाहरू प्राप्त गर्छौ सियोनको प्रकाश र आधारको सुरुवातका लागि र यसका सबै बासिन्दाहरूका महिमा, सम्मान र अभिदानका लागि, मेरो पवित्र गृहका विधिद्वारा नियुक्त गरिएको छ, जुन मेरा मानिसहरूलाई सदैव मेरा पवित्र नाममा निर्माण गर्न आज्ञा दिइएको छ ।

४० अनि साच्चैँ नै म तिमीहरूलाई भन्छु, यो गृह मेरो नाममा निर्माण हुनु पर्छ, ताकि म त्यहाँ मेरा विधिहरू मेरा जनहरूलाई प्रकट गर्न सक्छु;

४१ किनकि म मेरो चर्चलाई संसारको सृष्टि भएको समय देखि लुकाइएका विषयहरू, समयको पूर्णताको समयावधिसँग सम्बन्धित विषयहरू प्रकट गर्न उचित ठान्छु ।

४२ अनि म मेरा सेवक जोसेफलाई यस गृह र यसको पादरित्व र यसलाई निर्माण गरिने स्थानसँग सम्बन्धित सबै विषयहरू देखाउने छु ।

४३ अनि तिमीहरूले त्यो स्थानमा निर्माण गर्नु पर्ने छ जहाँ तिमीहरूले यसलाई निर्माण गर्ने सोचेका छौ, किनकि यो त्यही स्थान हो जुन मैले तिमीहरूका लागि यो निर्माण गर्नका लागि रोजेको छु ।

४४ यदि तिमीहरूले आफ्नो सम्पूर्ण सामर्थ्यले परिश्रम गर्‍यौ भने, म त्यो स्थानलाई पवित्र पार्ने छु ताकि यो पवित्र बनाइने छ ।

४५ अनि यदि मेरा जनहरूले मेरो वाणी र मेरा सेवकहरूको आवाजलाई सुनेमा जसलाई मैले मेरा जनहरूलाई अगुवाइ गर्न नियुक्त गरेको छु, हेर, म साच्चैँ नै तिमीहरूलाई भन्छु, उनीहरूलाई आफ्नो स्थानबाट हटाइने छैन ।

४६ परन्तु यदि तिनीहरूले मेरो वाणी अथवा मैले नियुक्त गरेका यी मानिसहरूका आवाजलाई सुनेनन् भने, तिनीहरूले आशीर्वाद प्राप्त गर्ने छैनन्, किनभने मैले उनीहरूलाई दिएका मेरा पवित्र भूमिहरू, मेरा पवित्र विधिहरू र विधान पत्रहरू र मेरा पवित्र वचनहरू तिनीहरूले अपवित्र पार्छन् ।

४७ अनि यस्तो हुन जाने छ कि यदि तिमीहरूले मेरो नाममा गृह निर्माण गरेमा र मैले भनेका कार्यहरू नगरेमा, म मैले तिमीहरूसँग गरेको करार निर्वाह गर्ने छैन, न त तिमीहरूले मेरा बाहुहरूबाट अपेक्षा गरेका प्रतिज्ञाहरू नै पूरा गर्ने छु, परमप्रभु भन्नुहुन्छ ।

४८ किनकि आशीर्वादहरूको सट्टामा, तिमीहरूले, आफ्नै कार्यहरूद्वारा, श्राप, रिस, क्रोध र फैसलाहरू आफ्नै शिरमा ल्याउँछौ, आफ्ना मूर्खताहरूद्वारा र तिमीहरूका सबै कुकर्महरूद्वारा, जुन तिमीहरूले मेरा सामु अभ्यास गर्छौ, परमप्रभु भन्नुहुन्छ ।

४९ साच्चैँ नै, साच्चैँ नै, म तिमीहरूलाई भन्छु, कि जब म कुनै मानिसका सन्तानलाई मेरो नाममा एउटा कार्य गर्न आज्ञा दिन्छु र ती मानिसहरूका छोराहरू आफ्नो सम्पूर्ण सामर्थ्य र आफूसँग भएको सबै लिएर त्यो कार्य गर्नका लागि जान्छन् र तिनीहरूको लगनशीलता छोड्दैनन् र तिनीहरूका शत्रुहरू तिनीहरूमाथि आउँछन् र तिनीहरूलाई त्यो कार्य गर्नबाट रोक्छन्, हेर, ती मानिसहरूका छोराहरूका हातबाट त्यो कार्य नगराउने तर तिनीहरूका अर्पणहरू स्वीकार गर्ने मेरो चाहना छ ।

५० अनि मेरा पवित्र नियमहरू र आज्ञाहरूको अधर्म र उल्लङ्घनका लागि म तिनीहरूलाई भेट्ने छु जसले मेरो कार्यमा अवरोध पुर्‍यायो, तेस्रो र चौथो पिँढीसम्म, जबसम्म तिनीहरूले पश्चात्ताप गर्दैनन् र मलाई घृणा गर्छन्, परमप्रभु परमेश्वर भन्नुहुन्छ ।

५१ त्यसकारण, यस कारणका लागि, मैले ज्याक्सन प्रदेश, मिजोरीमा एउटा सहर र मेरा नाममा एउटा आवाश बनाउन आज्ञा दिएका मानिसहरूका अर्पणहरू स्वीकार गरेको छु र तिनीहरूका शत्रुहरूद्वारा अवरोध गरिएको थियो, परमप्रभु तिमीहरूका परमेश्वर भन्नुहुन्छ ।

५२ अनि म तिनीहरूका शिरमा फैसला, रिस र क्रोध, विलाप र वेदना र दाह्रा किट्ने जवाफ दिने छु, तेस्रो र चौथो पिँढीसम्म, जबसम्म तिनीहरूले पश्चात्ताप गर्दैनन् र मलाई घृणा गर्छन्, परमप्रभु तिमीहरूका परमेश्वर भन्नुहुन्छ ।

५३ अनि यो म तिमीहरूका लागि एउटा उदाहरण बनाउँछु, तिमीहरूका सान्त्वनाका लागि ती सबैका सम्बन्धमा जसलाई एक कार्य गर्न आज्ञा दिइएको छ र तिनीहरूका शत्रुहरूका हातहरूबाट र दमनद्वारा बाधा गरिएको छ, परमप्रभु तिमीहरूका परमेश्वर भन्नुहुन्छ ।

५४ किनकि म परमप्रभु तिमीहरूका परमेश्वर हुँ र तिमीहरूका सबै बन्धुहरूलाई मुक्ति दिने छु जो हृदयमा शुद्ध छन् र मिजोरीको भूमिमा मारिएका छन्, परमप्रभु भन्नुहुन्छ ।

५५ अनि पुनः, साच्चैँ नै म तिमीहरूलाई भन्छु, म तिमीहरूलाई मेरो नाममा एक गृह निर्माण गर्नका लागि पुनः आज्ञा गर्छु, यस स्थानमा समेत, ताकि मैले तिमीहरूलाई आज्ञा गरेका सबै विषयहरूमा तिमीहरू आस्थावान् छौ भनी मलाई प्रमाणित गर्न सक्ने छौ, ताकि म तिमीहरूलाई आशीर्वाद दिन सकूँ र तिमीहरूलाई सम्मान, अमरत्व र अनन्त जीवनको मुकुट लगाउन सकूँ ।

५६ अनि अब म तिमीहरूलाई भन्छु, मेरो आवासीय गृहको सम्बन्धमा जुन मैले तिमीहरूलाई आगन्तुकहरूको आवासका लागि निर्माण गर्न आज्ञा दिएको छु, त्यो मेरो नाममा निर्माण गरिनु पर्छ र त्यसमा मेरो नाम राखिनु पर्छ र मेरा सेवक जोसेफ र उनका परिवारका लागि एउटा पिँढीदेखि अर्को पिँढीसम्म त्यहाँ स्थान हुनु पर्छ ।

५७ यस अभिषेकका लागि मैले उनको शिरमा राखेको छु, ताकि उनको आशीर्वाद उनीपछि तिनका सन्ततिका शिरमा पनि राखिने छ ।

५८ अनि जसरी मैले अब्राहामलाई पृथ्वीका कुटुम्बहरूका सम्बन्धमा भनेँ, त्यसै गरी म मेरा सेवक जोसेफलाई भन्छु: तिमी र तिम्रा घरानामा पृथ्वीका कुटुम्बहरूले आशीर्वाद प्राप्त गर्ने छन् ।

५९ त्यसकारण, मेरा सेवक जोसेफ र तिनी पछिको उनको सन्तानलाई त्यो गृहमा, एउटा पिँढी देखि अर्को पिँढीसम्म, सदासर्वदा र सदाका लागि स्थान हुनु पर्छ, परमप्रभु भन्नुहुन्छ ।

६० अनि त्यो गृहको नाम नाभू गृह हुनु पर्छ; र यो मानिसकालागि रोचक बासस्थान हुनु पर्छ र थकित यात्रीका लागि विश्राम-स्थल हुनु पर्छ, ताकि उनले सियोनको महिमा र यसको कुने ढुङ्गाको महिमालाई मनन गर्न सक्छन्;

६१ ताकि उनले तिनीहरूबाट सल्लाह पनि प्राप्त गर्न सक्छन् जसलाई मैले प्रसिद्ध बिरुवाहरू र यसका पर्खालहरूमा पहरेदारहरू रूपमा नियुक्त गरेको छु ।

६२ हेर, साच्चैँ नै म तिमीहरूलाई भन्छु, मेरा सेवक जर्ज मिलर र मेरा सेवक लाइमन वाइट र मेरा सेवक जोन स्नाइडर र मेरा सेवक पिटर हजले, आफूलाई व्यवस्थित गर्नु पर्छ र त्यो गृह निर्माण गर्नका लागि तिनीहरूमध्ये एक जनालाई उनीहरूको गणको अध्यक्ष बन्नका लागि नियुक्त गर्नु पर्छ ।

६३ अनि तिनीहरूले एक संविधान बनाउनु पर्छ, जसद्वारा उनीहरूले त्यो गृहको निर्माणको लागि पैसा प्राप्त गर्न सक्छन् ।

६४ अनि उनीहरूले त्यो गृहमा सम्पत्तिको शेयरका लागि पचास डलर भन्दा कम प्राप्त गर्नु हुँदैन र उनीहरूलाई त्यो गृहमा सम्पत्तिका लागि कुनै एक व्यक्तिबाट पन्ध्र हजार डलर प्राप्त गर्न अनुमति दिइने छ ।

६५ परन्तु उनीहरूलाई कुनै एक व्यक्तिबाट पन्ध्र हजार डलरभन्दा बढी पैसा लिन अनुमति दिइने छैन ।

६६ परन्तु उनीहरूलाई त्यो गृहको कुनै एक व्यक्तिबाट सम्पत्तिको अंशका लागि पचास डलर भन्दा कम लिन अनुमति दिइने छैन ।

६७ अनि उनीहरूलाई यस गृहमा सम्पत्तिबाहकका रूपमा कुनै पनि व्यक्तिलाई ग्रहण गर्न अनुमति दिइने छैनन्, जबसम्म उसले आफ्नो सम्पत्ति प्राप्त गर्दा तिनीहरूका हातमा आफ्नो सम्पत्ति तिर्ने छ;

६८ अनि उनले तिनीहरूको हातमा तिरेको सम्पत्तिको मात्राको अनुपातमा उनले त्यो गृहमा सम्पत्ति प्राप्त गर्ने छन्; तर यदि उनले तिनीहरूको हातमा केही तिरेका छैन भने उनले त्यो गृहमा कुनै सम्पत्ति प्राप्त गर्ने छैन ।

६९ अनि यदि कसैले तिनीहरूको हातमा सम्पत्ति तिरेमा, त्यो गृहको सम्पत्तिका लागि, उनका लागि र उनी पछिका पिँडीका लागि हुने छ, एउटा पिँडी देखि अर्को पिँडी सम्म, जब सम्म उनले र उनका उत्तराधिकारीहरूले त्यो सम्पत्ति राख्छन् र तिनीहरूको आफ्नै चाहना र कार्यले तिनीहरूका हातबाट सम्पत्ति बेच्ने वा हटाउने छैनन्, यदि तिमीहरूले मेरो चाहना पूरा गर्‍यौ भने, परमप्रभु तिमीहरूका परमेश्वर भन्नुहुन्छ ।

७० अनि पुनः, साच्चैँ नै म तिमीहरूलाई भन्छु, यदि मेरा सेवक जर्ज मिलर र मेरा सेवक लाइमन वाइट र मेरा सेवक जन स्नाइडर र मेरा सेवक पिटर हजले कुनै पनि सम्पत्ति उनीहरूको हातमा, पैसा वा सम्पत्तिहरूका रूपमा प्राप्त गर्छन् जहाँ तिनीहरूले पैसाको वास्तविक मूल्य प्राप्त गर्छन् भने, तिनीहरूले त्यो सम्पत्तिको कुनै पनि अंशलाई त्यो गृहमा बाहेक, अन्य प्रयोजनका लागि उपयोग गर्नु हुँदैन ।

७१ अनि यदि उनीहरूले उक्त सम्पत्तिको कुनै अंश, त्यो गृहमा बाहेक, शेयरबाहकको सहमति बिना अन्यत्र प्रयोग गरे र त्यो गृहमा बाहेक उनीहरूले अन्य कतै उपयोग गरेको सम्पत्तिको चार गुणा फिर्ता गरेनन् भने, उनीहरूलाई श्राप दिइने छ र तिनीहरूको स्थानबाट बाहिर निकालिने छ, परमप्रभु परमेश्वर भन्नुहुन्छ; किनकि म, परमप्रभु, परमेश्वर हुँ र यी कुनै पनि विषयहरूमा उपहास गरिनु हुँदैन ।

७२ साच्चैँ नै म तिमीहरूलाई भन्छु, मेरा सेवक जोसेफले त्यो गृहको निर्माणका लागि तिनीहरूको हातमा सम्पत्ति फिर्ता लिनु पर्छ, जसरी उनलाई उचित लाग्छ; परन्तु मेरा सेवक जोसेफले त्यो गृहमा पन्ध्र हजार डलर भन्दा बढी सम्पत्ति तिर्न सक्दैन, न त पचास डलर भन्दा कम; न त अरू कुनै मानिसले गर्न सक्छ, परमप्रभु भन्नुहुन्छ ।

७३ अनि त्यहाँ अरू पनि छन् जो तिनीहरूका सम्बन्धमा मेरा चाहना बुझ्न चाहन्छन्, किनकि तिनीहरूले यो मबाट मागेका छन् ।

७४ त्यसकारण, म तिमीहरूलाई मेरा सेवक भिन्सन नाइटका सम्बन्धमा भन्छु, यदि उनले मेरो चाहना पूरा गरेमा उनले त्यो गृहमा आफ्नो लागि र उनी पछिका पिँढीका लागि, एउटा पिँढी देखि अर्को पिँढी सम्म सम्पत्ति राख्नु पर्छ ।

७५ अनि उनले आफ्नो आवाज लामो र चर्को स्वरमा, जनहरूका माझ, गरिब र आवश्यकतामा परेकाहरूको पक्षमा बिन्ती गर्नका लागि उचाल्नु पर्छ; र उनी असफल हुनु हुँदैन, न त उनको हृदय निरुत्साहित नै हुनु हुन्छ; र म उनका अर्पणहरू स्वीकार गर्ने छु, किनकि ती मेरा लागि यिनका भेटीहरू जस्तै हुने छैनन्, किनकि उनी मेरा हुने छन्, परमप्रभु भन्नुहुन्छ ।

७६ उनको परिवार रमाउनु पर्छ र उनीहरूले आफ्नो हृदयलाई दुःखबाट अलग गर्नु पर्छ; किनकि मैले उनलाई छनोट गरेको छु र अभिषेक गरेको छु र उनको परिवारका माझ उनलाई सम्मान गरिने छ, किनकि म उनका सबै पापहरू क्षमा गर्ने छु, परमप्रभु भन्नुहुन्छ । आमीन ।

७७ साच्चैँ नै म तिमीहरूलाई भन्छु, मेरा सेवक हाइरमले उनलाई उचित लागेअनुसार त्यस गृहमा सम्पत्ति राख्नु पर्छ, आफ्नो र उनी पछिका पिँढीका लागि, एउटा पिँढी देखि अर्को पिँढीसम्म ।

७८ मेरा सेवक आइजेक गल्याण्डले त्यस गृहमा सम्पत्ति राख्नु पर्छ; किनकि म, परमप्रभु, उनले गरेको कार्यका लागि उनलाई प्रेम गर्छु र उनका सबै पापहरू क्षमा गर्ने छु; त्यसकारण, उनलाई त्यस गृहमा भएको लगानीका लागि एउटा पिँढी देखि अर्को पिँढीसम्म सम्झना गरिनु पर्छ ।

७९ मेरा सेवक आइजेक गल्याण्डलाई तिमीहरूका माझ नियुक्त गरिनु पर्छ र मेरा सेवक विलियम मार्क्सद्वारा नियुक्त गरिनु पर्छ र उनीबाट आशीर्वाद दिइनु पर्छ, मेरा सेवक जोसेफले उनीहरूलाई बताएका कार्य पूरा गर्न मेरा सेवक हाइरमसँग जानु पर्छ र तिनीहरू धेरै आशीषित हुने छन् ।

८० मेरा सेवक विलियम मार्क्सले त्यस गृहमा सम्पत्ति तिर्नु पर्छ, जसरी उनलाई उचित लाग्छ, आफ्नो र उनका पिँढीका लागि, एउटा पिँढी देखि अर्को पिँढीसम्म ।

८१ मेरा सेवक हेनरी जी. शेरवुडले त्यस गृहमा सम्पत्ति तिर्नु पर्छ, जसरी उनलाई उचित लाग्छ, आफ्नो र उनी पछिका सन्ततिका लागि, पिँढी देखि पिँढीसम्म ।

८२ मेरा सेवक विलियमले त्यस गृहमा सम्पत्ति तिर्नु पर्छ, आफ्नो र उनी पछिका सन्ततिका लागि, एउटा पिँढी देखि अर्को पिँढीसम्म ।

८३ यदि उनले मेरो चाहना पूरा गर्छन् भने उनले आफ्नो परिवारलाई पूर्वी भूमिहरूमा, कर्टल्याण्डसम्म समेत लैजानु हुँदैन; यद्यपि, म, परमप्रभुले, कर्टल्याण्ड निर्माण गर्ने छु, परन्तु म, परमप्रभुले, त्यहाँका बासिन्दाहरूका लागि एक कोर्रा तयार गरेको छु ।

८४ अनि मेरा सेवक अल्मोन बबिटका सम्बन्धमा, त्यहाँ धेरै विषयहरू छन् जुनदेखि म खुसी छैन; हेर, उनले मैले नियुक्त गरेको सल्लाहको सट्टा आफ्नो सल्लाह स्थापित गर्न चाहन्छ, मेरो चर्चको अध्यक्षताको समेत; अनि उनले आराधना गर्नका लागि मेरा जनहरूका लागि सुनको बाच्छो खडा गर्छ ।

८५ मेरा आज्ञाहरू पालना गर्नका लागि यहाँ आएका कोही पनि यस स्थानबाट जानु हुँदैन ।

८६ यदि तिनीहरू यहाँ बस्छन् भने तिनीहरू मेरा लागि बस्नु पर्छ; अनि यदि तिनीहरूले मृत्युवरण गरे भने तिनीहरूले मेरा लागि मृत्युवरण गर्नु पर्छ; किनकि तिनीहरूले यहाँ आफ्ना सबै परिश्रमहरूबाट विश्राम लिने छन् र तिनीहरूका कार्यहरूलाई निरन्तरता दिने छन् ।

८७ त्यसकारण, मेरा सेवक विलियमले ममाथि भरोसा राख्नु पर्छ र भूमिको रोगको कारण आफ्नो परिवारको सम्बन्धमा डराउन छोड्नु पर्छ । यदि तिमीहरू मलाई प्रेम गर्छौ भने, मेरा आज्ञाहरू पालना गर; अनि भूमिमा फैलिएको रोगले तिमीहरूको महिमा ल्याउने छ ।

८८ मेरा सेवक विलियम जानु पर्छ र मेरो आत्माले उत्प्रेरित गरेआनुसार मेरो अनन्त सुसमाचार चर्को आवाजमा र महान् प्रसन्नताका साथ, वार्सका बासिन्दाहरू र कार्थेजका बासिन्दाहरू, बर्लिङटनका बसिन्दाहरूलाई पनि र म्याडिसनका बासिन्दाहरूलाई पनि घोषणा गर्नु पर्छ र मेरो साधारण सम्मेलनमा थप निर्देशनहरूका लागि धैर्य र लगनशीलताका साथ पर्खनु पर्छ, परमप्रभु भन्नुहुन्छ ।

८९ यदि उनले मेरा चाहना पूरा गर्ने छन् भने उनले अबदेखि मेरा सेवक जोसेफको सल्लाह सुन्नु पर्छ र उनको क्रियाकलापद्वारा गरिबहरूको कल्याणमा सहायता गर्नु पर्छ र पृथ्वीका बासिन्दाहरूका लागि मेरो पवित्र वचनको नयाँ अनुवाद प्रकाशित गर्नु पर्छ ।

९० अनि यदि उनले यसो गरेमा म उनलाई धेरै आशीर्वादहरूले आशीष दिने छु, कि उनलाई त्यागिने छैन, न त उनका सन्तानले रोटी माग्दै गरेको भेटिने छ ।

९१ अनि पुनः, साच्चैँ नै म तिमीहरूलाई भन्छु, मेरा सेवक विलियमलाई मेरा सेवक हाइरमको स्थानमा, मेरा सेवक जोसेफको सल्लाहकारका रूपमा नियुक्त, प्रदान र अभिषिक्त गरिनु पर्छ, ताकि मेरा सेवक हाइरमले पादरित्व र कूलपिताको विभाग लिन सकून्, जुन उनलाई उनका पिताले आशीर्वाद र अधिकारद्वारा नियुक्त गर्नुभएको थियो;

९२ ताकि अबदेखि उनले कूलपिताको आशीषका साँचाहरू मेरा सबै जनहरूले शिरहरूमा धारण गर्ने छन्,

९३ ताकि जसलाई उनले आशीर्वाद दिन्छन् तिनले आशीर्वाद प्राप्त गर्ने छन् र जसलाई उनले श्राप दिन्छन् तिनी श्रापित हुने छन्; ताकि उनले पृथ्वीमा जे-जति बाँध्ने छन्, त्यो स्वर्गमा बाँधिने छ; र उनले पृथ्वीमा जे-जति फुकाउने छ त्यो स्वर्गमा फुकाइने छ ।

९४ अनि यस समय देखि म उनलाई नियुक्त गर्छु ताकि उनी साथै मेरा सेवक जोसेफ पनि मेरा चर्चका लागि एक अगमवक्ता र एक द्रष्टा र एक प्रकाशकर्ता बन्न सक्ने छन्;

९५ ताकि उनले मेरा सेवक जोसेफसँग पनि मेलमिलापमा कार्य गर्न सक्ने छन्; र उनले मेरा सेवक जोसेफबाट सल्लाह प्राप्त गर्ने छन्, जसले उनलाई साँचाहरू देखाउने छन् जसद्वारा उनले माग्न र प्राप्त गर्न सक्छन् र सोही आशीर्वाद, अनि महिमा, अनि सम्मान, अनि पादरित्व र पदारित्वका उपहारहरूको मुकुट लगाइने छ जुन एकपटक उनलाई दिइएको थियो जुन मेरा सेवक ओलिभर काउड्री थिए;

९६ ताकि मेरा सेवक हाइरमले ती सन्दर्भहरूका अभिलेख राख्न सक्ने छन् जुन म उनलाई देखाउने छु, कि उनको नाम एउटा पिंढी देखि अर्को पिंढीसम्म, सदा र सदासर्वदा सम्मानजनक सम्झनामा रहिररहन सक्छ ।

९७ मेरा सेवक विलियमले पनि साँचाहरू प्राप्त गर्नु पर्छ जसद्वारा उनले आग्रह गर्न र आशीर्वाद प्राप्त गर्न सक्छन्; उनी मेरासामु विनम्र हुनु पर्छ र कुनै छलकपटरहित हुनु पर्छ र उनले मेरो आत्मा, आश्वासी समेत प्राप्त गर्ने छ, जसले उनलाई सबै विषयहरूको सत्यता प्रकट गर्ने छ र उनलाई त्यो घडीमा, उनले के भन्नु पर्ने छ भनेर दिने छ ।

९८ अनि यी सङ्केतहरूले उनलाई पछ्याउने छन्—उनले बिरामीहरूलाई चङ्गाइ दिने छन्, उनले दानवहरूलाई निकाला गर्ने छन् र उनलाई घातक विष दिनेहरूबाट उद्धार गरिने छ;

९९ अनि उनलाई मार्गहरूमा डोर्‍याइने छ जहाँ विषालु सर्पले उनको कुर्कुच्चोमा टोक्न सक्दैन र उनी चीलका पखेटाहरूमा जस्तै आफ्ना विचारहरूको कल्पनामा माथि उठ्ने छन् ।

१०० अनि यदि म चाहन्छु कि उनले मृतकहरूलाई उठाउनु पर्छ, उनले आफ्नो आवाजलाई रोक्नु हुँदैन ।

१०१ त्यसकारण, मेरा सेवक विलियमले ठूलो आवाजमा कराउन पर्छ र रोकिनु हुँदैन, प्रसन्नता र हर्सोल्लासका साथ र सिंहासनमा सदा र सदासर्वदा विराजमान हुनुहुनेलाई होसन्नाका साथ, परमप्रभु तिमीहरूका परमेश्वर भन्नुहुन्छ ।

१०२ हेर, म तिमीहरूलाई भन्छु, मसँग मेरा सेवक विलियम र मेरा सेवक हाइरम र तिनीहरूका लागि मात्र एउटा कार्यभार छ; र मेरा सेवक जोसेफ घरमा बस्नु पर्छ, किनकि उनको आवश्यकता छ । बाँकी म तिमीहरूलाई यसपछि देखाउने छु । तसर्थ यस्तै हुने छ । आमीन ।

१०३ अनि पुनः, साच्चैँ नै म तिमीहरूलाई भन्छु, यदि मेरा सेवक सिड्नीले मेरो सेवा गर्छन् र मेरा सेवक जोसेफको सल्लाहकार बन्छन् भने, उनी उठ्नु पर्छ र उनको बोलावटको विभागमा खडा हुनु पर्छ र आफूलाई मेरा अगाडि विनम्र तुल्याउनु पर्छ ।

१०४ अनि यदि उनले मलाई स्वीकार योग्य र स्वीकृति अर्पण गरेमा र मेरा जनहरूसँग रहेमा, हेर, म परमप्रभु तिमीहरूका परमेश्वरले उनलाई चङ्गाइ दिने छु ताकि उनले चङ्गाइ प्राप्त गर्ने छन्; उनले पुनः पर्वतहरूमा आफ्नो आवाज उठाउने छन् र मेरा अगाडि एक प्रवक्ता बन्ने छन् ।

१०५ उनी आउनु पर्छ र मेरा सेवक जोसेफ बसेको छिमेकमा उनको परिवारलाई सार्नु पर्छ ।

१०६ अनि उनको सबै यात्राहरूमा उनले आफ्नो आवाज तुरहीको आवाज जस्तै उठाउनु पर्छ र पृथ्वीका बासिन्दाहरूलाई आउने क्रोधबाट भाग्न चेतावनी दिनु पर्छ ।

१०७ मैले पहिले नै तिमीहरूलाई भनेजस्तै पृथ्वीका राजाहरूलाई एक गम्भीर घोषणा गर्नमा, उनले मेरा सेवक जोसेफलाई सहयोग गर्नु पर्छ र मेरा सेवक विलियमले पनि मेरा सेवक जोसेफलाई सहयोग गर्नु पर्छ ।

१०८ यदि मेरा सेवक सिड्नीले मेरो चाहना पूरा गरेमा, उनले आफ्नो परिवारलाई पूर्वी भूमिहरूमा लैजानु हुँदैन तर उनले मैले भनेजस्तै समेत उनीहरूको बासस्थान परिवर्तन गर्नु पर्छ ।

१०९ हेर, मैले तिमीहरूलाई नियुक्त गरेको सहर, नाभू सहर बाहिर समेत उनले सुरक्षा र आश्रय खोज्नु पर्छ भन्ने यो मेरो चाहना होइन ।

११० साच्चैँ नै म तिमीहरूलाई भन्छु, अहिले पनि, यदि उनले मेरो वाणी सुनेमा, यो उनका लागि फलदायी हुने छ । तसर्थ यस्तै हुने छ । आमीन ।

१११ अनि पुनः, साच्चैँ नै म तिमीहरूलाई भन्छु, मेरा सेवक अमोस डेविसले तिनीहरूका सम्पत्ति फिर्ता गर्नु पर्छ जसलाई मैले आवासका लागि गृह, नाभू गृह समेत निर्माण गर्न नियुक्त गरेको छु ।

११२ यदि उनमा चाहना छ भने उनले यसो गर्नु पर्छ; र उनले मेरा सेवक जोसेफको सल्लाह सुन्नु पर्छ र मानिसहरूको विश्वास प्राप्त गर्न आफ्नै हातले परिश्रम गर्नु पर्छ ।

११३ अनि जब उनले आफ्नो हेरचाहमा सुम्पिइने सबै विषयहरूमा आफूलाई विश्वासयोग्य प्रमाणित गर्ने छन्, हो, केही विषयहरूमा समेत, उनलाई धेरैजनामाथि शासक बनाइने छ;

११४ त्यसकारण उनले आफूलाई विनम्र तुल्याउनु पर्छ ताकि उनी उच्च बन्न सकून् । तसर्थ यस्तै हुने छ । आमीन ।

११५ अनि पुनः, साच्चैँ नै म तिमीहरूलाई भन्छु, यदि मेरा सेवक रोबर्ट डी. फस्टरले मेरो वाणीको पालना गर्न चाहेमा, उनले मेरा सेवक जोसेफका लागि एउटा आवास निर्माण गर्नु पर्छ, उनले तिनीसँग गरेका सम्झौताअनुसार, जसरी समय-समयमा उनका लागि ढोका खुला रहने छ ।

११६ अनि उनले आफ्नो सबै मूर्ख कार्यहरूको पश्चात्ताप गर्नु पर्छ र आफूलाई करुणाको वस्त्र पहिराउनु पर्छ; र दुष्टता छोड्नु पर्छ र आफ्ना सबै कठोर वचनहरू बन्द गर्नु पर्छ;

११७ अनि नाभू गृहको गणको हातमा सम्पत्ति पनि तिर्नु पर्छ, आफ्ना लागि र उनी पछिका सन्ततिका लागि, एउटा पिँढी देखि अर्को पिँढीसम्म;

११८ अनि मेरा सेवकहरू जोसेफ र हाइरम र विलियम ल र मैले सियोनको आधार बसाल्न बोलाएका अधिकारीहरूका सल्लाहहरू सुन्नु पर्छ; अनि यो उनका लागि सदासर्वदा र सदाका लागि राम्रो हुने छ । तसर्थ यस्तै हुने छ । आमीन ।

११९ अनि पुनः, साच्चैँ नै म तिमीहरूलाई भन्छु, जबसम्म उनले मोर्मोनको पुस्तक र मैले तिमीहरूलाई दिइएका प्रकाशहरूमा विश्वास गर्दैन कुनै पनि मानिसले नाभू गृहको गणमा स्टक तिर्नु हुँदैन, परमप्रभु तिमीहरूका परमेश्वर भन्नुहुन्छ;

१२० किनकि त्यो जुन यो भन्दा धेरै वा कम हुन्छ दुष्टबाट आउँछ र आशीर्वाद होइन श्रापकासाथ आउने छ, परमप्रभु तिमीहरूका परमेश्वर भन्नुहुन्छ । तसर्थ यस्तै हुने छ । आमीन ।

१२१ अनि पुनः, साच्चैँ नै म तिमीहरूलाई भन्छु, नाभू गृहको गणलाई त्यस गृहको निर्माणमा तिनीहरू सबैको श्रमकालागि पारिश्रमिकको उचित प्रतिफल दिनु पर्छ; र तिनीहरूको पारिश्रमिक त्यस कार्यको मूल्यअनुसार तिनीहरूतिनीहरू आपसमा सहमत भएअनुसार हुनु पर्छ ।

१२२ अनि स्टक तिर्ने हरेक व्यक्तिले तिनीहरूका पारिश्रमिकको अनुपात वहन गर्नु पर्छ, यदि यो तिनीहरूको सहयोगका लागि आवश्यक छ भने, परमप्रभु भन्नुहुन्छ; अन्यथा, तिनीहरूको श्रमलाई त्यो गृहमा सम्पत्तिका रूपमा गणना गरिने छ । तसर्थ यस्तै हुने छ । आमीन ।

१२३ साच्चैँ नै म तिमीहरूलाई भन्छु, अब म तिमीहरूलाई मेरो पादरित्वका विभागहरूको जानकारी दिन्छु, ताकि तिमीहरूले त्यसका साँचाहरू धारण गर्न सक्ने छौ, पादरित्व समेत जुन मल्कीसेदेकको रीतमा छ, जुन जन्माइएका मेरा एकमात्र पुत्रको रीतमा छ ।

१२४ पहिले, म तिमीहरूलाई मेरो चर्चको बाँध्ने आशीर्वादहरू, अनि प्रतिज्ञा गरिएको पवित्र आत्मालाई धारण गर्नका लागि एक कूलपिता हुन हाइरम स्मिथ दिन्छु, जसद्वारा तिमीहरूलाई उद्धारको दिनसम्म बाँधिने छ, ताकि तिमीहरूमा आउन सक्ने प्रलोभनका समयका बावजुद तिमीहरूको पतन हुने छैन ।

१२५ म तिमीहरूलाई मेरा सबै चर्चमा अध्यक्षता गर्न एक एल्डर, एक अनुवादक हुन, एक प्रकाशकर्ता, एक द्रष्टा र अगमवक्ता हुन मेरा सेवक जोसेफ दिन्छु ।

१२६ म उनलाई मेरा सेवक सिड्नी रिग्डन र मेरा सेवक विलियम ल सल्लाहकारहरूका रूपमा दिन्छु, ताकि यिनीहरूले सम्पूर्ण चर्चका लागि प्रकाशहरू प्राप्त गर्न एक गण र प्रथम अध्यक्षता गठन गर्न सक्छन् ।

१२७ म तिमीहरूलाई यात्रा गर्ने बाह्रको परिषद्को अध्यक्ष हुन मेरा सेवक ब्रिघम यङ्ग दिन्छु;

१२८ जुन बाह्रले पृथ्वीका सबै भागहरूमा मेरो अधिराज्यको अधिकार खोल्न र त्यसपछि प्रत्येक व्यक्तिलाई मेरो वचन पठाउनका लागि साँचाहरू धारण गर्छन् ।

१२९ तिनीहरू हिबर सी. किम्बल, पार्ली पी. प्राट, ओर्सन प्राट, ओर्सन हाइड, विलियम स्मिथ, जोन टेलर, जोन ई. पेज, विल्फोर्ड उड्रफ, विलार्ड रिचर्ड्स, जर्ज ए. स्मिथ हुन्;

१३० डेभिड प्याटनलाई मैले आफूमा लिएको छु; हेर, उनको पादरित्व कसैले पनि उनीबाट लिने छैन; परन्तु, साच्चैँ नै म तिमीहरूलाई भन्छु, त्यही बोलावटका लागि अर्कोलाई नियुक्त गरिन सक्छ ।

१३१ अनि पुनः, साच्चैँ नै म तिमीहरूलाई भन्छु, सियोनको कुने ढुङ्गाका लागि म तिमीहरूलाई एउटा उच्च परिषद् दिन्छु—

१३२ ती हुन्, स्यामूएल बेन्ट, हेनरी जी शेरवुड, जर्ज डबल्यू ह्यारिस, चार्ल्स सी. रिच, थोमस ग्रोवर, नुवल नाइट, डेभिड डर्ट, डनबर विल्सन—सेमोर ब्रन्सनलाई मैले आफैँमा लिएको छु; कसैले पनि उनको पादरित्व लिने छैन, परन्तु उनको स्थानमा अर्कोलाई समान पादरित्वमा नियुक्त गरिन सक्छ; र साच्चैँ नै म तिमीहरूलाई भन्छु, मेरा सेवक एरोन जन्सनलाई उनको स्थानमा यो बोलावटमा नियुक्त गरिनु पर्छ—डेभिड फुलमर, अल्फियस कट्लर, विलियम हन्टिङ्टन ।

१३३ अनि पुनः, म तिमीहरूलाई उच्च पादरीहरूको गणको अध्यक्ष हुन डन सी. स्मिथ दिन्छु;

१३४ जुन विधि विदेशमा छरिएका विभिन्न किलाका स्थानीय अध्यक्ष वा सेवकहरूमा नियुक्त हुनेहरूलाई योग्य बनाउने उद्देश्यले स्थापना गरिएको हो;

१३५ अनि यदि तिनीहरूले छनोट गरेमा तिनीहरू यात्रा पनि गर्न सक्छन्, परन्तु बरु स्थानीय अध्यक्षहरू हुनका लागि नियुक्त गरिन्छन्; यो उनीहरूका बोलावटका विभाग हुन्, परमप्रभु तिमीहरूका परमेश्वर भन्नुहुन्छ ।

१३६ म उनलाई सल्लाहकारहरूका रूपमा अमासा लाइमन र नोवा प्याकर्ड दिन्छु, ताकि उनीहरूले मेरा चर्चका उच्च पादरित्वहरूको गणमा अध्यक्षता गर्न सक्ने छन्, परमप्रभु भन्नुहुन्छ ।

१३७ अनि पुनः, म तिमीहरूलाई भन्छु, म तिमीहरूलाई जोन ए. हिक्स, स्यामूयल विलियम्स् र जेसी बेकर दिन्छु, जुन पादरित्वले एल्डरहरूको गणको अध्यक्षता गर्छ, जुन गण स्थानीय सेवकहरूका लागि स्थापना गरिएको हो; यद्यपि तिनीहरू यात्रा गर्न सक्छन्, तापनि तिनीहरू मेरा चर्चका स्थानीय सेवकहरू बन्न नियुक्त गरिएका छन्, परमप्रभु भन्नुहुन्छ ।

१३८ अनि पुनः, म तिमीलाई जोसेफ यङ्ग, जोसाया बटरफिल्ड, ड्यानियल माइल्स, हेनरी हेरिमन, जेरा पल्सिफर, लिभाइ ह्यान्कक, जेम्स फस्टर, सत्तरीको गणको अध्यक्षता गर्नका लागि दिन्छु;

१३९ सारा संसारमा मेरो नामको गवाही दिन यात्रा गर्ने एल्डरहरूका लागि यो गण स्थापना गरिएको छ, जहाँ जहाँ यात्रा गर्ने उच्च परिषद्, मेरा प्रेरितहरूले मेरा अगाडि मार्ग तयार गर्न तिनीहरूलाई पठाउने छन् ।

१४० यो गण र एल्डरहरूको गण बीचको भिन्नता यो हो कि एउटाले निरन्तर यात्रा गर्नु पर्छ र अर्कोले समय-समयमा चर्चहरूको अध्यक्षता गर्नु पर्छ; एउटाको समय-समयमा अध्यक्षता गर्ने जिम्मेवारी छ र अर्कोको अध्यक्षता गर्ने जिम्मेवारी छैन, परमप्रभु तिमीहरूका परमेश्वर भन्नुहुन्छ ।

१४१ अनि पुनः, म तिमीहरूलाई भन्छु, म तिमीहरूलाई विन्सन नाइट, स्यामूयल एच. स्मिथ र स्याड्राक राउन्डी दिन्छु, यदि उनले यो प्राप्त गरे भने, बिशपरिकको अध्यक्षता गर्न; उक्त बिशपरिकको ज्ञान तिमीहरूलाई सिद्धान्त र करारको पुस्तकमा दिइएको छ ।

१४२ अनि पुनः, म तिमीहरूलाई भन्छु, स्यामूएल रोल्फ र उनका सल्लाहकारहरू पादरीहरूका लागि र शिक्षकहरूका अध्यक्ष र उनका सल्लाहकारहरू र डिकनहरूका अध्यक्ष र उनका सल्लाहकारहरू र किलाका अध्यक्ष र उनका सल्लाहकारहरू पनि ।

१४३ माथिका विभागहरू र त्यसका साँचाहरू सहयोगहरू र प्रशासनहरूका लागि, परोपकारको काम र मेरा सन्तहरूको पूर्णताका लागि मैले तिमीहरूलाई दिएको छु ।

१४४ अनि म तिमीहरूलाई एक आज्ञा दिन्छु कि तिमीहरूले यी सबै विभागहरूमा बोलवट गर्नु पर्छ र मैले उल्लेख गरेका ती नामहरूलाई अनुमोदन गर्नु पर्छ, अन्यथा मेरो साधारण सम्मेलनमा तिनीहरूलाई अस्वीकार गर्नु पर्छ;

१४५ अनि जब तिमीहरूले मेरो नाममा यो गृह निर्माण गर्छौ, तिमीहरूले यहाँ यी सबै विभागहरूका लागि कोठाहरू तयार गर्नु पर्छ, परमप्रभु तिमीहरूका परमेश्वर भन्नुहुन्छ । तसर्थ यस्तै हुने छ । आमीन ।