१ परमप्रभु तिमीहरूका परमेश्वर, येशू ख्रीष्ट यसो भन्नुहुन्छ महान्‌ म हुँ, अल्फा र ओमेगा, सुरु र अन्त्य, उही जसले संसार निर्माण गरिनुपूर्व अनन्त कालको वृहत् विस्तार र स्वर्गका सबै सराफहरूका सेनाहरूलाई हेर्‍यो;

२ त्यही जसले सबै विषयहरू जान्दछ, किनकि सबै विषयहरू मेरा दृष्टिसामु उपस्थित छन्;

३ म उही हुँ जसले बोलेको थिएँ, र संसार बनाएको थिएँ र सबै विषयहरू मद्वारा आए ।

४ म त्यही हुँ जसले हनोकको सियोनलाई मेरो आफ्नो छातीमा लिएको छु; र साच्चैँ नै, म भन्छु, किनकि म ख्रीष्ट हुँ, जति धेरैले मेरो नाममा विश्वास गरेका छन् र मेरो आफ्नै नाममा, मैले बगाएको रगतको सद्गुणद्वारा, मैले तिनीहरूका लागि पितासामु बिन्ती गरेको छु ।

५ परन्तु हेर, पतीतहरूका अवशेषहरूलाई मैले पृथ्वीको अन्तमा आउने महान् दिनको फैसाला नहुँदासम्म अन्धकारको साङ्लोमा राखेको छु;

६ अनि त्यसरी नै म पतीतहरूलाई राख्ने छु, जसले मेरो वाणीलाई सुन्ने छैनन् तर तिनीहरूका हृदयहरू कठोर पार्ने छन्, अनि धिक्कार, धिक्कार, धिक्कार, तिनीहरूको विनाश भयानक हुने छ ।

७ परन्तु हेर, साच्चैँ नै, साच्चैँ नै, म तिमीहरूलाई भन्छु कि मेरो दृष्टि तिमीहरूमा छ । म तिमीहरूका बीचमा छु र तिमीहरूले मलाई देख्न सक्दैनौ;

८ परन्तु त्यो दिन छिट्टै आउँदै छ जब तिमीहरूले मलाई देख्ने छौ र म नै हुँ भनी जान्ने छौ; किनकि अन्धकारको पर्दा चाँडै च्यातिने छ, र जो विशुद्ध छैन उसले त्यस दिन रहन सक्दैन ।

९ यसकारण, आफ्नो कम्मर कस र तयार होऊ । हेर, यो अधिराज्य तिम्रो हो, र शत्रुले विजय प्राप्त गर्ने छैन ।

१० साच्चैँ नै, म तिमीहरूलाई भन्छु, तिमीहरू विशुद्ध छौ, तर सबै होइन; अनि त्यहाँ अरू कोही छैन जससँग म प्रसन्न छु;

११ किनकि मेरासामु सबै प्राणीहरू भ्रष्ट भएका छन्; र मानिसहरूका छोराछोरीहरूका माझमा, स्वर्गका सबै सेनाहरूको उपस्थितिमा अन्धकारका शक्तिहरूको पृथ्वीमा व्यापक प्रभाव हुन्छ—

१२ जसका कारण मौनताले शासन गर्छ र सबै अनन्त काललाई पीडा दिन्छ, र घाँसहरू बटुल्न स्वर्गदूतहरू पृथ्वीमा फसल काट्न महान् अगुवाइको प्रतीक्षा गरिरहेका छन्, ताकि तिनीहरूलाई जलाउन सकियोस्; अनि, हेर, दुस्मन सङ्गठित छ ।

१३ अनि अब म तिमीहरूलाई रहस्य देखाउँछु, एउटा कार्य जुन गोप्य कक्षहरूमा थियो, समयसँगै प्रक्रियामा तिमीहरूको विनाशलाई पनि पूरा गर्नका लागि अनि तिमीहरूलाई जानकारी थिएन;

१४ परन्तु अब म यो तिमीहरूलाई भन्छु र तिमीहरू आशीषित छौ, तिमीहरूका दुष्टताका कारणले होइन, न त तिमीहरूका हृदयको अविश्वासका कारणले; किनकि साच्चैँ नै तिमीहरूमध्ये केही मेरासामु दोषी छौ, तर म तिमीहरूका कमजोरीप्रति दयालु हुने छु ।

१५ त्यसकारण, अबदेखि मजबुत होऊ; नडराऊ, किनकि अधिराज्य तिमीहरूकै हो ।

१६ अनि तिमीहरूका मुक्तिका लागि म तिमीहरूलाई आज्ञा दिन्छु, किनकि मैले तिमीहरूका प्रार्थना सुनेको छु र गरिबहरूले मेरा अगाडि गुनासो गरेका छन् र धनीहरूलाई मैले बनाएको छु, र सबै प्राणीहरू मेरा हुन् र म मानिसहरूलाई पक्षपात गर्दिन ।

१७ अनि मैले पृथ्वीलाई धनी बनाएको छु अनि हेर यो मेरो पाउदान हो, यसकारण, म पुनः यसमा उभिने छु ।

१८ अनि म अगाडि तिमीहरूलाई धेरै धन-सम्पत्ति, प्रतिज्ञा गरिएको भूमि समेत, दूध र मह बग्ने भूमि समेत राख्छु, जहाँ परमप्रभु आउनु हुँदा कुनै श्राप हुने छैन;

१९ अनि यदि तिमीहरूले आफ्नो सम्पूर्ण हृदयले खोज्यौ भने म तिमीहरूको उत्तराधिकारको भूमि तिमीहरूलाई दिने छु ।

२० अनि तिमीहरूसँग यो मेरो करार हुने छ, यो तिमीहरूको उत्तराधिकारको भूमिका रूपमा तिमीहरूले प्राप्त गर्ने छौ र जबसम्म पृथ्वी खडा रहने छ, यो सदाका लागि तिमीहरूका सन्ततिहरूको उत्तराधिकार हुने छ र तिमीहरूले यसलाई अनन्तकालमा पुनः प्राप्त गर्ने छौ, पुनः कहिल्यै अस्तित्वबाट हराउने छैनौ ।

२१ परन्तु, म तिमीहरूलाई साच्चैँ नै भन्छु कि कुनै समयमा तिमीहरूका कुनै पनि राजा वा शासक हुने छैन, किनकि म तिमीहरूको राजा हुने छु र तिमीहरूको हेरचाह गर्ने छु ।

२२ यसकारण, मेरो वाणी सुन र मलाई अनुशरण गर र तिमीहरू एक स्वतन्त्र जन हुने छौ र म आउँदा तिमीहरूसँग मेरो नियमबाहेक अरू कुनै नियम हुने छैन, किनकि म तिम्रो नियमदाता हुँ र मेरा बाहुलाई कसले रोक्न सक्छ?

२३ परन्तु, म तिमीहरूलाई साच्चैँ नै भन्छु, मैले तिमीहरूलाई नियुक्त गरेको विभागअनुसार एक-अर्कालाई सिकाऊ;

२४ अनि हरेक मानिसले आफ्ना बन्धुहरूलाई आफूस्वयम् लाई जस्तै आदरसम्मान गरोस् र मेरासामु सद्गुण र पवित्रताको अभ्यास गरोस् ।

२५ अनि पुनः म तिमीहरूलाई भन्छु, हरेक मानिसले आफ्ना बन्धुहरूलाई आफूलाई जस्तै आदरसम्मान गरोस् ।

२६ किनकि तिमीहरूमध्ये कुन मानिसका बाह्र छोराहरू छन् र तिनीहरूको पक्षपात गर्दैनन् र तिनीहरूले आज्ञाकारी भई उनको सेवा गर्छन् र उनले एकलाई भन्छन्: तिमी उत्कृष्ट लुगा लगाएर यहाँ बस; र अर्कालाई भन्छन्: तिमी लबेदा लगाएर त्यहीँ बस—अनि आफ्ना छोराहरूलाई हेर्छन् र भन्छन् म न्यायी छु?

२७ हेर, यो मैले तिमीहरूलाई दृष्टान्तका रूपमा दिएको छु, र यहाँसम्म कि यो मजस्तै छ । म तिमीहरूलाई भन्छु, एक होऊ; र यदि तिमीहरू एक भएनौ भने तिमीहरू मेरा होइनौ ।

२८ अनि पुनः, म तिमीहरूलाई भन्छु कि गोप्य कक्षहरूका शत्रुले तिम्रो ज्यान लिन खोज्छ ।

२९ तिमीले टाढाका देशहरूमा युद्धहरूका सम्बन्धमा सुन्छौ र तिमीहरूले भन्छौ कि टाढाका देशहरूमा छिट्टै महान् युद्धहरू हुने छन्, तर तिमीहरू आफ्नै भूमिका मानिसहरूको हृदयलाई चिन्दैनौ ।

३० तिमीहरूका प्रार्थनाका कारण म तिमीहरूलाई यी विषयहरू भन्छु; यसकारण, आफ्नो हृदयमा ज्ञानको भण्डार गर, अन्यथा मानिसहरूका दुष्टताले यी विषयहरू तिनीहरूका दुष्टताद्वारा तिमीहरूसामु प्रकट गर्ने छन्, त्यस तरिकाले जसले पृथ्वीलाई हल्लाउने भन्दा पनि उच्च स्वरमा तिमीहरूका कानमा चिच्याउने छ; तर यदि तिमीहरू तयार छौ भने तिमीहरूले डराउनु पर्ने छैन ।

३१ अनि कि तिमीहरू शत्रुको शक्तिबाट उम्कन सक्षम होऊ र मसामु धर्मी मानिस, दाग रहित र निष्कलङ्क मानिसहरूका रूपमा एकत्रित होओ —

३२ यसकारणले यही उद्देश्यले गर्दा मैले तिमीहरूलाई आज्ञा दिएँ कि तिमीहरू त्यो ओहायो जानु पर्छ; र त्यहाँ म तिमीहरूलाई मेरो नियम दिने छु; अनि त्यहाँ तिमीलाई उच्चबाट शक्ति प्रदान गरिने छ;

३३ अनि त्यहाँबाट, मैले चाहेको जो कोही सबै राष्ट्रहरू माँझ जानु पर्छ, अनि उनीहरूले के गर्ने भनेर उनीहरूलाई भनिनेछ; किनकि मसँग महान् कार्य भण्डार गरिएको छ, किनकि इस्राएलको उद्धार हुने छ, अनि म तिनीहरूलाई जहाँ म चाहन्छु त्यहीँ लैजाने छु र कुनै पनि शक्तिले मेरा बाहुलाई रोक लगाउन सक्दैन ।

३४ अनि अब, म यी भू-भागहरूमा रहेका चर्चलाई एउटा आज्ञा दिन्छु, ताकि तिनीहरूका माझमा विशेष मानिसहरूलाई नियुक्त गर्नु पर्छ र तिनीहरूलाई चर्चको आवाजद्वारा नियुक्त गर्नु पर्छ;

३५ अनि तिनीहरूले गरिब र आवश्यकतामा परेकाहरूलाई हेरचाह गर्ने छन् र तिनीहरूले दुःख नपाऊन् भनेर उनीहरूलाई राहत दिने छन्; र तिनीहरूलाई मैले आज्ञा गरेको स्थानमा पठाइदेऊ;

३६ अनि यस चर्चको धनसम्पत्तिको कारोबारको व्यवस्थापन गर्ने, यो तिनीहरूको कार्य हुने छ ।

३७ अनि जससँग बेच्न नसकिने खेतहरू छन्, तिनीहरूलाई छोडिदेऊ वा तिनीहरूलाई राम्रो लागे भाडामा देऊ ।

३८ सुनिश्चित गर कि सबै विषयहरू सुरक्षित छन्; र जब मानिसहरूलाई माथिबाट शक्ति सँगै अभिदान प्रदान गरिन्छ र पठाइन्छ, यी सबै विषयहरू चर्चको केन्द्रमा जम्मा हुने छन् ।

३९ अनि यदि तिमीहरूले त्यो धन खोज्छौ जुन तिमीहरूलाई दिने पिताको अभिलाशा हो भने, तिमीहरू सबै जनमध्ये सबैभन्दा धनी हुने छौ, किनकि तिमीहरूसँग अनन्तकालको समृद्धि हुने छ; र यो हुनु पर्छ कि पृथ्वीका मेरा धन दिनका लागि हुन्; तर घमण्डदेखि सचेत होऊ, अन्यथा तिमीहरू प्राचीन नफीहरूजस्तै हुने छौ ।

४० अनि पुनः, म तिमीहरूलाई भन्छु, म तिमीहरूलाई एउटा आज्ञा दिन्छु, कि हरेक मानिस, दुबै एल्डर, पादरी, शिक्षक र सदस्यले पनि, मैले आज्ञा दिएका कार्यहरू तयार गर्न र पूरा गर्नका लागि आफ्नो क्षमताले, आफ्नो हातको श्रमसँगै जानू ।

४१ अनि तिम्रो प्रवचनको कोमलता र विनम्रतामा हरेक मानिसले उसको छिमेकीलाई दिने चेतावनीको आवाज बनोस् ।

४२ अनि दुष्टहरूका माझबाट तिमीहरू बाहिर जाओ । आफूस्वयम् लाई बचाओ । तिमीहरू विशुद्ध होओ जसले परमप्रभुका पात्रहरू बोक्छौ । तसर्थ यस्तै हुने छ । आमीन ।