१ साच्चैँ नै, परमप्रभु ती युद्धहरूका सम्बन्धमा यसो भन्नुहुन्छ जुन छिट्टै पूरा हुने छन्, साउथ केरोलाइनाको विद्रोहबाट सुरु भएर, धेरै आत्माहरूको मृत्यु र दुःखमा अन्तत: समाप्त हुने छ;

२ अनि समय आउने छ कि युद्ध सबै राष्ट्रहरूमा खन्याइने छ, यस स्थानबाट सुरू भएर ।

३ किनकि हेर, दक्षिणी राज्यहरू उत्तरी राज्यहरू विरुद्ध विभाजित हुने छन् र दक्षिणी राज्यहरूले अन्य राष्ट्रहरूलाई बोलाउने छन्, ग्रेट ब्रिटेनको राष्ट्रलाई समेत, जसरी यसलाई भनिन्छ र तिनीहरूले अन्य राष्ट्रहरूका विरुद्ध आफ्नो रक्षा गर्न अन्य राष्ट्रहरूलाई पनि बोलाउने छन्; अनि युद्ध सबै राष्ट्रहरूमा खन्याइने छ ।

४ अनि यस्तो हुन जाने छ, धेरै दिन पछि, दासहरू तिनीहरूका मालिकहरू विरुद्ध खडा हुने छन्, जसलाई युद्धका लागि सङ्गठित र अनुशासित गरिने छ ।

५ अनि यो पनि हुन जाने छ कि भूमिका बाँकी रहेका अवशेषहरूले आफैँलाई युद्धका लागि सङ्गठित गर्ने छन् र अत्यन्तै क्रोधित हुने छन् र गैर-यहूदीहरूलाई पीडादायी आक्रोशले सताइने छ ।

६ अनि यसरी, तरवार र रक्तपातले पृथ्वीका बासिन्दाहरूले शोक गर्ने छन्; अनि अनिकाल, महामारी, भूकम्प, आकाशको गर्जन र भयङ्कर र ज्वलन्त बिजुलीका साथ, पृथ्वीका बासिन्दाहरूलाई रीस, क्रोध र सर्वशक्तिमान परमेश्वरको हप्काइका हातको अनुभूति गराइने छ, सर्वनाशको उर्दीले सबै राष्ट्रहरूको पूर्ण अन्त्य नगरेसम्म;

७ ताकि सन्तहरूको क्रन्दन र सन्तहरूको रगतको, तिनीहरूका शत्रुहरूमाथि प्रतिशोध लिन जमिनबाट, सबाथका परमप्रभुको कानमा आउन बन्द हुने छ ।

८ यसकारण, पवित्र स्थानहरूमा खडा होओ र परमप्रभुको दिन नआउँदा सम्म विचलित नहोओ; किनकि हेर, यो छिट्टै आउँदै छ, परमप्रभु भन्नुहुन्छ । आमीन ।