Ang Bahaging Para sa Atin

Sa Web: Tumulong sa pagpili ng pinakamainam na mga poster na gagamitin sa mga susunod na buwan. Magpunta sa liahona.lds.org para bumoto. At habang naroon, maaari din kayong magmungkahi ng mga caption o ideya para sa susunod pang mga poster.

Ang Paborito Kong Banal na Kasulatan

“Kung lalapit kayo sa akin ay magkakaroon kayo ng buhay na walang hanggan. Masdan, ang aking bisig ng awa ay nakaunat sa inyo, at kung sinuman ang lalapit, siya ay tatanggapin ko; at pinagpala ang mga yaong lumalapit sa akin” (3 Nephi 9:14).

Isa ito sa mga paborito ko dahil ito ang banal na kasulatan na nagbigay sa akin ng patotoo na buhay si Cristo at nais na sumunod tayo sa Kanya.

Olivia K., 15, Heves, Hungary

Mga Misyonero Tayo Ngayon

Ang artikulo sa Marso 2007 Liahona na “Paano Maghahanda Upang Maging Isang Mabuting Misyonero” ay nagbigay sa amin ng mahalagang mensahe. Hindi natin kailangang maghintay na maging 19 anyos upang maging mga misyonero. Hindi! Mga misyonero na tayo ngayon.

Sinabi nito sa atin na dapat nating saliksikin at pagnilayin ang mga banal na kasulatan at palaging manalangin upang madaig natin si Satanas. Dapat palagi tayong manampalataya sa Tagapagligtas na si Jesucristo.

Melissa N., 18, Samoa

Kay Inam ng Buhay

Malinaw pa sa aking alaala ang gabing nasa matinding pakikibaka ang aking espiritu. Papunta na ako sa institute nang madama kong nababalisa ako. Nalilito ang isip ko. Hindi ko masabi na alam ko ang katotohanan ng aking pananampalataya. Wala na akong madamang katiyakan sa anumang bagay. Dama ko ang kawalan ng pag-asa at nahiya ako sa aking sarili at nanalangin na palakasin ako.

Nang dumating ako sa meetinghouse, napuspos ako ng kalungkutan. Huminga ako nang malalim at pumasok sa gusali. Sa pagpasok ko sa kapilya, narinig ko ang himnong “Mga Banal, Halina” (Mga Himno, blg. 23) na kinakanta ng kapwa ko mga miyembro. Kaagad kong nadama ang kaginhawahang mula sa Diyos sa pamamagitan ng Espiritu Santo.

Napakatindi ng kapayapaang nadama ko kung kaya hindi ko mapigilan ang lumuha. Ipinaalam sa akin ng Panginoon na ang buhay ay magiging mainam at ligtas ako. Naunawaan ko na tinangka ng kapangyarihan ng kadiliman na wasakin ang lahat ng mabuting natutuhan ko gayunpaman ang pagmamahal ng Diyos ay ligtas at mapagmalasakit. Naunawaan ko na totoo ang Diyos at Siya ang ating kanlungan at lakas. Nalaman ko rin na madadaig natin ang mga pagsubok at tukso kung mananampalataya tayo sa Diyos at hahangarin sa tuwina ang Kanyang patnubay sa pamamagitan ng panalangin.

Ang mundong ito ay puno ng mga pagsubok, at hindi natin kailanman malalaman kung ano ang mangyayari. Kailangan nating lubos na magtiwala sa Diyos, palakasin ang ating pananampalataya sa pamamagitan ng pag-aaral ng mga banal na kasulatan, at mamuhay ayon sa Kanyang kagustuhan.

Ivonete S., 19, Bahia, Brazil

“Sapagka’t iyong papagniningasin ang aking ilawan: liliwanagan ng Panginoon kong Dios ang aking kadiliman” (Mga Awit 18:28).

Ito ang Bahaging Para sa Inyo

Ito ang mga pahinang para sa inyo—ang inyong pahina para maibahagi sa iba pang mga kabataan ang kahulugan sa inyo ng ebanghelyo. Narito ang maaasahan ninyong mabasa sa mga pahinang ito at kung ano ang inyongmaiaambag:

• Ang mga karanasan o ideya na nakatulong sa inyo na maunawaan at ipamuhay nang mas maigi ang ebanghelyo.

• Isang high-resolution na retrato na kuha ninyo at banal na kasulatan bilang caption.

• Isang magandang karanasan ninyo habang ginagawa ang Tungkulin sa Diyos o Pansariling Pag-unlad.

• Mga komentaryo ninyo tungkol sa isang talata ng banal na kasulatan na nagbigay-inspirasyon sa inyo. Lakipan ng inyong retrato kung gusto ninyo.

• Feedback tungkol sa Liahona: anong mga artikulo ang nagustuhan ninyong basahin?

Ipadala sa e-mail ang inyong kuwento, retrato, o mga komentayo sa [e-mail]. Mangyaring isulat ang “Our Space” sa subject line, at lakipan ng pahintulot ng inyong magulang (ipahayag sa e-mail) upang maibahagi ang ipadadala ninyo sa amin. Ang mga artikulo ay maaaring i-edit para iakma ang haba o palinawin.

Kanan: Paglalarawan ni Craig Dimond