Roronrikirake
Kataakin Au Onimaki
Ngke 13 au ririki, I a waaki ni wareka Ana Boki Moomon ni katoa bong, ao I a tia ni kakabwaiaaki ni katoabong man te tai anne.
N ara Reirei n Tabati irouia kain 13 te ririki ti aki rangi ni kinaaki ibukin ara karinerine. E ngae n anne, iai ara tia reirei ae tikiraoi are e kabanea korakorana n reirei iaon tatabeua reirei man te Tamnei. Teuana te reirei bon taekan warekan koroboki aika a tabu.
Ni banen te reirei e anganiia te kakaewenako. E kananonaaki ibukira ni kabane, ma bukina aika bati e kainetai n taraai ao n taetae, “I kaewenakoko bwa ko na wareware man ana Boki Moomon ni katoa teuana te bong!” I iango inanou, “N na kaotia nakoim. N na karaoia!”
I waaki 1 Nibwaai mwakoro 1 n te tairiki anne ao ni waaki nako ni katoa bong. E aki reke irou te anua ae tamaroa ngke I waaki, ma imwiin te tai ao I a tabe n tangira te namakin are I karekea man warekan ana Boki Moomon. Te wareware ni katoa tairiki e riki bwa te anua ae kakukurei.
Namwakaina ake imwina I roko n Arama 32 ao e a teke nanou n te iango are kataakin te onimaki. N te reirei ao tia tibwa reiakinaki karaoan te kakatai n te tiaienti, ngaia are I a katorobubua ao n tuanga Tamau are i Karawa bwa I a waakina te kakatai. I bubuti bwa n na anganaki te atatai ngkana e koaua ana Boki Moomon.
N au atatai, I ataia bwa Tamau are i Karawa e kaekai au tataro n tainako. Warekan ana Boki Moomon ni katoabong e karikirakea arou n tokanikai iaon te buakaka. I namakinna bwa I a kaan riki nakon Tamau are i Karawa. I namakina kakorakoraau man mwaakan te Tamnei ae Raoiroi n tokanikai iaon taian kanganga. Tera are e taekinna Aramwa n taekan te kakatai ma ana taeka te Atua e bon koaua: “E moanna ni kabubura tamneiu; eng, e moanna ni kaota au atatai, eng, e moanna ni kangkang irou” (Arama 32:28).