Ti Taekina Kristo
E na Uota iaona te mate
Tabeua te ririki imwiin kainnabau, Gisèle, ao ngai,ti karairaki man tararuaan te Fiji Suva Mission, Gisèle e kuneaki irouna te kaentia ni birotona. Te kakamaku ae ena riki bwa ena raonaki n teniua te korokoro ao kanganga ake ana kona n riki imwiina bon kanakoan ni kabane biroton neiei. E bon roko n rietan taraan rawawatan kaainnabau ike I a oota raoi iai n ana Mwakuri ni Kamaiu Iesu Kristo.
I uringa namakinan raoi are e taonaki iai Gisele n te bwai are e rinanona. Ai bon tera ae ea tia ni karaoia ngkai e karekea te korakai ae aekan aio? E tuai ni beku ibukin te Uea ma te kakaonimaki? E aki maiuakina Tuan te Itiaki? E aera E aki kaman totokoa te aoraki aei? Bukin tera?
Te tairiki teuana I karaua nanou ma au namakin n tataro ngke I anga nakon te Uea aki raun nanou. “I a bon aki kona n tara kainnabau ae tangiraki ni ngiraa te maraki ae ai aron aei!” I tuangnga. Imwiina ao I a iangoia bwa nna rairaki nakon te boki ae tabu. I kunea te kiibu ni karaurano aikai n taken Iesu Kristo n Aramwa Aramwa 7:11–12:
“Ao e na waaki, n rinanon te maraki ma te karawawataaki ao te kaririaki n aekaia nako; ao aio bwa e na kakoroaki bukin te taeka are e taku bwa e na uota iaona marakiia ao aorakiia ana aomata.
“Ao e na uota iaona te mate, bwa e aonga ni kabwara ana kabaebae te mate are kabaeiia ana aomata; ao e na uota iaona mamaaraia, bwa e na on nanona n te nanoanga, ni kaineti ma te maiu ni iriko,bwa e na ataia ni kaineti ma te maiu ni iriko bwa e na kanga ni buokiia ana aomata ni kaineti ma mamaaraia.
Ni karokoa te tai anne I bon tuai n iangoia ni kabane kamimiin te bwai are e rinanona te Tia Kamaiu ni kabwarabwaraan te mwakuri ni kamaiu. I aki rang ataia raoi bwa Iesu Kristo e na kona ni katokaa iaona marakin Gisèle—ke marakiu. I bita marakiu ao ni maeka Teuare e uota “te maraki ao aorakiia ana aomata.” Ma te atatai ae e boou aei, I namakina rawawatan te uota ae e tabekaki!
N te bong aei, Gisèle e a marurung, n aron are bon akea te kantia irouna. N ana tutuo ae tane iai te aba, ana taokita e tuangnga bwa bon te “kamiimi.” I bon rangi ni kakaitau ibukin marurungin rabwatana, ma I kakaitau naba ibukin katokan te aoraki are E rinanona, ni katokan aorakin te nano. Te karaunano are e tauraoi tii rinanon te Tia Kamaiu e anganai te kakoaua ae rau bwa a nakoraoi bwaai ni kabane.
Ngkai n te tai are I kaitara ma te kataaki, au iango e rairaki n tainako nakon te reirei are e korakora arei ao nakon te bwai are te Uea e tuanga te Burabeti Iotebwa Timiti: “Natin te Aomata e atia n ruo rikaaki nakoia ni kabane. Ko rietata riki nakoina?” (D&C 122:8). Uringan ana angakarea Iesu Kristo e karaua nanou n taainako.
Bon akea tokin au kakaitau ibukin au Tia Kamaiu n anga nanona ni kan rinanon te kammarakaki are E a tia ni karawawataaki iai.I kakoaua ana Tangira, Ana nanoanga, ao Ana tararua ibukiia Natina. Bon ngaia ara Tia Kamaiu, ao I tangiria.
O Tamau, iroun Simon Dewey, e tabuaki kaeweana