Tera Ae Ti Kakoauaa

E A Tia N Uti

Iroun Beretitenti Thomas S. Monson

Ike I mwananga nako iai, I kataia ni karoko n ruanimaten te kaawa. Bon te tai n iango, ni karaua tirobaean nanon te maiu ao koauan te mate. N te ruanimate ae uarereke n te kaawa ae Santa Clara, Utah, I uring aara iai bwa angiia bon araia bakatibu n Switzerland ake a koreaki i aon atibun ruanimate ake a rotaki taraaraoiia n te karau ma te mwaitoro. A mwaiti mai irouia ake a kitani mwengaia ma aia utu n te aba ae mari ae Switzerland ao, ni kaekaan te wewete “Mai nakon Tion,” a maeka ma baronga n aomata ike a “motirawa i nanon te rau” i buakoia ngkai. A nanomwaaka ni kaaitarai ieka, taai n aki kakarau n tain te kabuebue, karakon uaan te tai, ao mwakuri aika matoakaei. A katuka katein te angakarea.

Te kabanea ni bubura n ruanimate, ao n taekaia aika bati ake a kauekei namakin aika a korakora, a karineaki bwa mwengaia n rau mwaane ake a bua maiuia n tain te buaka n te tai are a katokaa i aoia kunikain abaia. Temanna e iangoi taekan mi ake a aki koro nanoia, kaantaninga ake aki korobukiia, naano ake a onrake n te nanokawaki, ao aomata ake a mate n uarerekeia man te buaka.

A rang ni mwaiti kanikinaean ruanimate ni kaawan Buranti ao Belgium ake a katuruturua aron kakamakun korakoran mwaitin te mate n te Moani Buaka n te Aonaaba. Verdun, i Buranti, ni bon te koaua te ruanimate ae buburakaei. Ni katoaa tain te tiburing (spring) ngke taan ununiki a kamaraua te tano, a kunea teuana te bwara ni buaka ikai, uruban te katii ikekei—bwaai ni kauring aika aki kakukurei n taekaia mirion mwaane ake a kakoauaki raoi bwa a kamara te tano n raraan maiuia.

Te Mate, te Mwakoro ae Boou n te Maiu

N ririki aika bati aika bwakanako I tei irarikin ana kainiwene temanna te mwaane ae ataei, tamaia uoman ataei, n te tai are e a anaanaa iai ikena. E taua baiu ni baina, e tarai matau, ao e titiraki ma te kaoriori, “Bitiobi, I ataia bwa iaon kawaiu ni mate. ”

I tataro ibukin te kairiiri mai karawa. E kairaki au iango nakon Ana Boki Moomon are mena iaon te taibora i rarikin ana kainiwene. I moanna ni wareware ni kabaibati:

“Ngkai, n taekan aron te tamnei i marenan te mate ao te mangauti— … tamneiia mwaane ni kabane, ni bon te tai naba are a mwaawa man te rabwata ae mamate aei, … a uotaki nakon te mwenga nakon te Atua arei are E anganiia te maiu.

“… tamneia ake a raoiroi a na butimwaeaki nakon te aro ni kakukurei, are e bon aranaki bwa bwaretaiti, n te aro ni motirawa, te aro n rau, are a na motirawa iai man aia kaangaanga ni kabane ao man raraoma ni kabane ma” (Aramwa 40:11–12).

E kamakii matana raraou ae ataei aei, e taekina ko rabwa ma nanona ni koaua, ao e karaurau tamneina ni kitanna nakon te bwaretaiti are ti taekinna.

Te Tokanikai i aon te Ruanimate.

Kariaia Ruka, te taokita, ni kabwarabwarai aia waaki Maria are Maketarene ao Maria are tinan Iakobo ngke a nakon te ruanimate.

“Ao a nora te atibu ba e karabinoaki nako man te ne ni mate.

“…Ao a rin, ao aki kunea rabatan te Uear are Iesu.

“… Ao ngke a maninga iai, ao noria, a tei i rarikia uoman te aomata ma kunnikai aika raneanea:

“Ao … taku nako ia, Kam aera ngkai kam ukoukora Teuare maiu i buakoia mate?

“E aki mena ikai, ma E a uti” (Ruka 24:2–6).

Aei bon te wewete nakon karaoan te mwakuri irouia Kiritian. Koauan te Mangauti e karekea nakon temanna ao ni kabane te rau are e raka iaon te atatai. E karau nanoia naake a tangiriia a wenerua ni katawanangin Flanders ke te tabo i Europe maeao ike e korakora mwaitiia tautia ni mate iai ke ake a mate i kabin marawa ke ake a motirawa i Santa Clara te tabo ae karako. Bon te koaua ae tabangaki.

Ae te kabanea ni mangori irouia Ana reirei, I a kaota ae bon au kakoaua bwa te mate e a tia ni konaaki, bwa e moanna te tokanikai i aon te ruanimate. Ke a katabuakaki taeka Irouna are E kakoroi bukiia n riki bwa rabakau ni koaua nakoiia ni kabane. Uringiia. Kawakiniia. Karineiia. E a uti.

1. Ti a tia roko n te aonaaba bwa ti na reirei, ni maeka, n rikirake ni mwanangara ae akea tokina ni kaineta te kabanea ni kororaoi.

2. A tiku tabeman iaon te aonaaba n te tai ae aki maan, ao ake tabeman a bwaabwaki maiuia iaon te aba. Te baire tiaki bwa abwakira are ti maiu iai ma e kanga arona ni ti maiu iai.

3. Ngkanne e a roko te mate ao moanakin te mwakoro ae boou n te maiu.

4. Te mwakoro ae boou aei e waki nakon bongin te mangauti ae mimitong anne, n te tai are te tamnei ao te rabwata a nang ikotakaki, n aki manga karaureakinako.

Man “He Is Risen,” Riaona, Eberi 2003, 2–7.

E taku Kristo nakon Mareta are rang nanokawaki, “Boni Ngai te mangauti, ao te maiu: ane e onimakinai, ngkana tao e boni mate, ao e na boni manga maiu: ao ane e maiu ma n onimakinai ao e na bon aki mate” (Ioane 11:25–26).

Mangautin Kristo, bwa teuana mwakoron te Mwakuri ni Kamaiu, e kauka te kawai ibukira ni kabane bwa ti na manga kautaki.

Man te Maing: E Maiu te Tia Kabooi Maiura, iroun Roger Loveless, tao e na aki katootongaki; korotamnei ake a raweaki iroun Matthew Reier, Christina Smith, ao Welden C. Andersen; Tarai Baiu ao Waeu, iroun Harry Anderson; Lazarus, iroun Carl Heinrich Bloch