Tenne ni Mate ae Kabaeaki

iroun David L. Frischknecht

Mwaangan te Aobiti ibukin Karikirum

Te bubuti ni bwaai ni bobwai aika a tauaki mwiia n te boki a taraa n aki— kuri ni kangare— ma a kauringai taekan te berita ae akea tokina aika aki kabooaki uruakiia.

Te bong are e mate iai Tamau, tinau , mwaaneu tariu ao ngai ti karaoa mwanangara ae e kainnanoaki nakon te auti ni mate ibukin ara katauraoi bukin te taunimate. Tabera ni ikotaki ma rineakin te baoki ni mate ao te tabo ike e na katukaki iai te bwaoki ni mate.

Ngke ti tabe ni iangoa ara rinerine, I a noora te boki ni boobwai are e a katanoataa te ruu ae e karaoaki i aantano bwa te rua ni mate. E a kaman kaotaki ibuakon bwaai tabeua, bwa te ruu are e karaoaki i aantano ibukin te mate e boni kabaeaki, ao e matoa te berita iaon kabaeakina ibukin 75 te ririki. E ngae ngke e rangin kakawaki te bwai ae e karaoaki aei, te berita ae matoa aei e kakukureiai.

“Antai aena tuoa te bwai ane e kabaeaki anne inanon 75 te ririki?” I mimi. “Ao ngkana iai temanna ae e karaoia ao e aki nako raoi, antai ae e na butimwaea te berita ane e matoa anne? Tera angana raoi, ni koaua,” I mimi, “n te ruu ni mate annne are e teimatoa ni kabaeaki?”

N te tai n iango anne, au iango e a nakon teuana te ruu ni mate iaantano, are e kabwarabwaraaki ni Mataio 27. Te ruu iaantano ibukin te mate, bon tenne ni mate n te tai ao te tabo ae e raroa, iai ukina teutana n rabunaki n te atiibu ae e bubura.

“Ao ngke e a ingabong, n te bong are i mwin te bongi ni katauraoi, ao a botaki nakoni Birato ibonga ake a kakanato ma Baritaio,

“Ao a taku, te Uea, ti uringa te tia bureburea te aba arei ngke E kangai ngke E maiu, I mwin teni bong ao I a manga uti.

“Ma ngaia ae ko na tua ba e na kamatoaki te ne ni mate ni karokoa te kateni bong, bwa a kawa n roko ana reirei n iraea ma n taku nakoia aomata, E a manga uti mai buakoia mate: ao ane e na buakaka riki te bureburea te aba are e rimwi nakon are rimoa.

“E taku Birato nakoia, Boni iai taan tantani i roumi: naako, kamatoaa te ne ni mate n ai aron ae kam kona.

“Ao a nako, ao a kamatoa te ne ni mate arei ni kanikinaea te atibu, ao bon raoia tan tantani.” (Mataio 27:62–66).

Man taian taeka n tuuea ake a tia n taekinaki n rongorongoia ueea, ao taan kairiri ni kabuta, e tua Birato bwa e na kawakinaki raoi tenne ni mate ngkai e kanganga aron taekana.

N ningai taina ae na tiku ni kabaeaki iai te nne ni mate? Ni koauana, bon akea te anga ibukiia tautia ni karaoa tuangakiia anne ngkai bon akea naba te anga ae e kona ni kaukaki iai te tenne ni mate: “Ao nooria, e a kaman roko mwaeieien te aba ae e korakora: bwa e ruo mai karawa ana anera te Atua, ao e roko ni karabinoa nako te atibu arei” (Mataio 28:2).

Ibukin tenne ni mate teuana are e aki kabaeaki, taian ruu aika a karaoaki i aantano bwa te rua ni mate ao bwanganimatang ao taian nne ni mate ake a kaman kabaeaki ana bon uki. Te berita ae e matoa

Te Bwaa ibukin Kamaeuakira boni ngaia kainaomatakira man te mate ao mai moone. “Boni ngai te mangauti, ao te maiu” (Ioane 11:25). Ibukin ae mai Irouna, “mone e na kainaomataia tamneia ake e tautoronia, ao te rua ni mate e na kainaomataia rabwata ake e tautoronia, ao a na manga ikotaki rabwataia ma tamneia aomata n riki bwa ti teuana; ao e na riki aio rinanon mwaakan te mangauti are mwaakan Atuan Iteraera ae Tabu” (2 Nibwaai 9:12).