Ngkana Aki Beibeti Taake
Ti kantaningai ara buntake bwa ana maiu inanon te ran. Ti rang ni mimi.
E riki aei man ana bwaintangira ni kakuba nako tamara are e uotia n oki nakon te mweenga nakoia natina aine aika teniman. Inanon kaninganingara n te katibooti ae kamwakaikai, ngaira aine ti tang n takarua ma te kukurei. Taian Buntake! Tiaki kona n tataninga n roko inanona ao n taua temanna. Ti kebutua nako Tamara, ao e a kuri ni bwaka te baoki irouna.
“Karaurau, aine!” e ngare ma te karaurau. “Iai tibwami ni kabane!”
I rang ni mimi ni bingingiin te buntake anne n namakinana inanon baiu. N tauana irou, rabwatana ae e abuue kanga ai aron katun te kamwakoro, ao iai rakan tinebuna.
“O, e bon rangin bebete” I a taetae n takarua. “E maroaka ae a bon kona ni beibeiti taian buntake!”
E manga ngare Tamara ngke e nako ni kawara Tinara n te uma ni kuuka. Tamara e korakora ana kakubanako, ai moararariki ni bwaai ake a momoangare iai ana utu. Ao anne ngkana I uringa te tabo n tebotebo ae kuri kanganga te nakonako iai. Bon te tabo ae e na rang tamaroa ibukin n neia ara take aika a boou.
“Nora, kanakoa te buratitiki ni bwai n tebotebo ane e a mane man te karaati,” I kanakoa au ota nakon tariu.
Ni nnen ara bwai ibukin ara auti ma ara bam te ooti, e katiiaki te ran ae maitoro nako nanon te tabo n tebotebo, ao tia moanna n tuoi ara take ni ikoti bwa tina arania. Au man e kuri n taraa n tantan buraaun ni katobibia atuuna ma waena aika a totoa mani ikotaki.
Ngkanne I a uringiia raraou. Ana boni ngareakinai n aron mamaten nanou ni maan aika a boou aikai. Ngkanne I ataia bwa raraou ana bon aki kaoti inanon tabeua te bong. A tia n anganaki te kariaiakaki irouia aia karo bwa ana nako ni kaembwa n te maunga ae e uakaan. Ni bwatika nako iaon te kawai ae e mangaingai mani barekareka, rineakin are tabo ni kaembwa, ao ni kateakin umwaranrianna. E rang korakora kukureia ao ni kantaningaa te oki nakon te mweenga te bong are imwina, ni ngarengare ao ni karakina taekan nakoia ni kaembwa. E aki anganai te kariaiakaki tinau. E taku bwa I bon rang n ataei.
Ngke e a iabubuti te tabo n tebotebo, ti ikotaki ni katobibi ngaira aine, ni ka korakoraira ni kantaningaa te tai anne. Ti katekatekai ara man aika atiotio, iaon te ran ao ni Kamwaingiia, nako naano.
A bane n iinako ni kateniman! Ti kateboi baira nako nanon te tabo n tebotebo ao ni kamaiuia maan aika a kaawa bwa a bwabwa. Tera te bwai ae e a riki? Tiaki tuangiia bwa ana karaoa te bwai ae e kanganga, n aron te uaua. Te bwai ae ana riai ni karaoia ana bon ti beibeiti. E aki bebete anne ibukin te take?
“Terana ae e riki?” e mimi tariu.
“Tao ti kakubanakoia!”
Ti bane ni kariaia bwa kanga ai aroia ataei ngke a tabe n reireiniia aron te nakonako. A boni kona ni bwaka n tabetai. Ti kariaia bwa ana kataia riki .
“Teuana, uoua,tenua, e nako!”
Plunk! Plunk! Plunk! ni kaineti nako naano n ai aroia booro aika a karaoaki man te bwai ae tinebu.
A tekeraoi taian buntake, bwa akea mai iroura ae iai nanona ni ira nanon ara iango are a kainnanoa te kataneiai. Ngke e iangoia Nora bwa tina kabongana te bwai ni kamwau iaon kuniia; ti bane ni kawaekoaira n rinnako inanon te auti. Ni karaurau, tariu aika uoman a ukiia maan aika a kaawa aikai n au bwai ni kamwauu ngke I tabe n taraa nambwan te tareboon man te ara are iaon te katiboti.
“Mauri, naewa? Boni ngaira ae tia tibwa kabooi— ao, tamara e a tibwa kabooi —teniman taian buntake. Eng, naewa, Nooria, iai te kanganga ae e riki nakoia ara take. Ko nooria, ti tangiriia ara take bwa ana beibeti.”
Te bwai are e taekinna teuaei bon te bwai ae e kamimi nakoiu. I aki ataia ae e rawata te bwai ae I reiaki raoi ni karokoa are I kabwarabwara nakoia Nora ao Suzy: “Ko nooria, taian buraee ni man aika a maraurau aki kona n totokoa te ran. A mara raoi iai. Tina riai n tataninga teuana te wiiki ke uoua ibukin karekean kabiran rabwataia ae manennaaka bwa eaonga n aki kai roko te ran ni buraen kuniia.
“Ma e aki koaua anne, e ngurengure Nora. “I a tia n nooria buntake n rimwia tinaia iaon te karaanga. Ai bon tibwa tabebong aia bong ni maiu.”
“E kabwarabwara te mwaane arei nakoiu. Ngkana a bungiaki taian take, te tina e rabuniia natina ni kabueeia ian baina. Te bwaa are man bain tinaia ni kiba e bubuia nako aoia natina. N raonaki iroun tinaia, a kona n tiku ni beibeiti. N tiku i bon irouia, ana riai ni kaikawaiia riki imwain ae ana kona ni mano inanon te ran.”
Anne ngke e nako au iango nakon te mwaunga n taabo tabeua, ibukin iangoakia raoraou inanon umwaianrianna. Tao Tinau e tangiria ni kawakinai iaan baina n te tai ae aki rang ni maan. I orea nukan au buntake ae e bingingi ni baiu teuana.
“Tina kaerakeko man te ran n te tai moa aei, ngkoe ae ko uarereke,” I berita nakoina. Ngkanne, imwin te iango, I a reitia, Ko uringa tinam?”
Kamatataaki n te Korotamnei Iroun Jim Madsen