Euangkerio ni Maiu
Ana Karaki Nibwaai, E Riki Bwa Au Karaki
Ana tareboon Jake e katukai ma te uruaki n nano, ma I kunea te kantaninga n ana katooto te burabeti ni kawai.
Tabeua te ririki imwiina imwiin banen au reirei ae rietaata, I tekateka n te bootaki n utu ma kairake n ataeinimwaane aika tuai n iein n au uoote. Ti a tia ni kaoaki nakon mweengan te kauntira n ara beretitentii n te titeiki, ao e anga te reirei kaain abana.
Ti wareka rongorongon Nibwaai ma tarina ngke a nako n anai bwaatua buraati mai iroun Rabwan (tara 1 Nibwaai 3–5). Ara tia rerei a taekina rongorongon te ninikoria ao te waaki n aki tatanrikaaki n aron are e kaotia Nibwaai. Imwiina e tararake n tara ara kurubu ae uarereke. Iai nanon ana taratara.
“A tia n anganaki te mwakuri ae kangaanga Nibwaai ma tarina,” e taekinna. “E kataia tabeua te tai, akea mai ibuakoia ae bebete. Ma e materaoi te mwakuri ae karaoaki. Ao miin karekean booki aika tabu, ao e kamanoia ana utu Nibwaai man te ‘kerikaa[ki] ao ma[te] man aia aki onimaki te botanaomata’ (1 Nephi 4:13).
“E na iai ‘bwaatua’ inanon maium,” e reitianako. “Tao ko na kaota aron te nanomatoa ibukin karekean am reirei. Tao ko na kaota te ninikoria ngkana ko marooro ma raom. Tera te anganano, te bwai n tuutuuki, te kerikaaki, te uruaki n nano—tera are e na reke ibukin kamanoaia am utu man te kerikaaki n aia onimaki—okirikaaki ao anai bwaatua.”
Bon te kabotau ae tamaroa, I iango. I kawakinna n au iango ibukin uringakina nakon taai aika ana roko. N te tai anne ao i aki namakinna ae e rangin n rawata te bwai n tutuki inanon maiu. Ea bane au reirei, I rangin ni kukurei n au mwakuri, ao I a tia ni marooro ma te mwaane ae tamaroa—te rao ae a rangin ni maan are e a moanna ni kangaanga iai bwaai—inanon te maan ae aua namwakaina. I aki kona ni kukurei riki n aron bwaai aika a riki.
Tabeua te namwakaina imwiina ao au reitaki ma Jake (e a tia ni bitaki te ara) e a tia n rangin n nakoraoi. Ma a tia n raure ana karo Jake n ririki imwaina, ao raureia e teimatoa n riki bwa ana kangaanga. E maaku bwa ngkana ti mare, ao ana bon raure naba n aroia naba ana karo.
I tuangnga bwa I tauraoi n anganna riki ana tai—ae abwabwaki ngkana e tangiria—ni katiai bwaai n ana iango ao n nanona. Ti marooroakina aron karaoan ara iango ae boboto iaon te onimaki irarikin te maaku. Ti marooroakina taben te rinerine ao te koaua are e aki riai ni kabotaua kawaia ana karo bwa te bwai ae nang riki naba nakoina. Ao ti taekina naba Ana Mwakuri ni Kamaiu Iesu Kristo ao ana konabwai te Tia Kamaiu ni karau nanora.
E tara n ibuobuoki aron ara marooro nakon ana kangaanga teutana, ao ara reitaki e a waaki n arona. Ngaia are ngke e tareboniai n tawanoun te Tabati teuana bwa e nang katoka ara iraorao, I rangin ni mimi iai. E tuangai bwa e aki kona n taraia bwa e na mare ma ngai—ke temanna riki. E a bon aki kakoaua te mare riki.
Inanon tabeua te aua imwiina ao ti a manga rinanoi bwaai ake ti a tia ni marooroakin, ma I bon aki kona ni bita nanona. E wirikiriki, “I bon rangin ni kabwara bure,” ao e katuka ana tareboon. I tekateka n aki kakarongoa iaon au kainiwene, a bwaka ranin matau, man aki ataia bwa tera ae n na karaoia.
Tabeua te tai imwiina raou n au ru e karebwerebwe ni mataroan au ru. “Ko na nakon te maungatabu n te titeiki?” e titiraki. I aki tangiria n nakon te tabo teuana ke ni karaoa te bwai teuana, ma I karina au kunikai ao n nakon ana ka.
Ngke ti roko ao te moan aomata are I nooria bon te aine are e a tia n anganiia te reirei n bootakin te utu n te tairiki tabeua te namwakaina n nako. Akea mai ibuakora ae taetae, ma ti uaia n itara mata, ao I ongo te bwanaa ae maraara n au iango ae wetea arau ao e taku, “Oki naako anaa te bwaatua.”
I aki ataia bwa e kanga n riki ae I ata naba nanon te wirikiriki anne. Tiaki ti taekan te burabeti are e oki n anai rekooti aika tabu. Bon taekau naba. E nanonaki n ae e ngae ngke Jake e aki kakoaua te mare, ao ngai I kakoaua. I kona ni kakoroa bukina ao n tataro ibukina ao n mwakuri ibukina—tiaki n te bubuti, n te anga n anainano ma man te onimaki, te mwakuri korakora are e irekereke ma katauraoakiu ni katoabong, bukina bwa aio ana baire te Atua ibukiia Natina. Tiaki nanona bwa n na oki rikaaki nakon Jake ao ni mena irarikina ni karokoa e “bitaki nanona” iaon te iango ni kan mare, ao tiaki naba nanona bwa n nang manga moana au marooro ma temanna n te tai ae waekoa. E raoiroi irou bwa e na reke au tai n nanokawaki ao ni karauaki nanou.
Ma n te tai anne I a kona n taotaona nanou. I kona n totokoa te kataaki ake aki eti ibukin Jake—ke mwaane ni kabane. I kona n ukoukoriia raoraou aika a kakoaua te mare man ingainga nanoia nako iai. Ao I konaa, n ai aron Nibwaai, ae e onimakina Tamana are i Karawa ae tatangira are e aki kona n anga te tua — tao anaakin booki aika rongorongoia ara bakatibu ngke tao te mare ao te karikaia ara utu — n akea te kawai ae katauraoia ibukira.
I bon tei naba iaon “kakoroi bukiia”—ma tiaki ae a “koro bukiia”—n aroia. I tuai ni mare n te tai aei, ma I namakina te kukurei n au marooro ma raou aika tamaroa ake I a tia n rinanona—a rikirake atatai man ataakin totoko ni kouru aika kororaoi.
I namakinna naba te mweeraoi ao te koaua n ata ana reirei Unimwaane Richard – G. Scott kaain te Kooram n Abotoro n te Tengaun ma Uoman n ana katooto Nibwaai n nano matoa. E taku:
“Imwiin uoua te tai ae aki reke iai, e teimatoa Nibwaai ni kakoauaa bwa a na bon reke. E karaurau ni mwananga nakon te kaawa are e mena iai ana auti Rabwan n akea te kaeka. E mataku ma ni karekeiango, ‘Ao I kairaki iroun te Tamnei, n aki atai moa bwaika I riai ni karao’ ‘E ngae n anne ao I waaki nako,’ (1–Nibwaai 4:6–7; kairara e kairaki.)
“E tangiria ni kataia Nibwaai ni karaoia n tainako, nakon ana kabanea ni kona. E taekina te onimaki bwa e na kona n ibuobuoki. E rawa ni bwarannano. Ma bukina bwa e mwakuri, man ana onimaki iroun te Uea, e ongotaeka, ao e kabongana raoi ana rinerine, e karekei kairiiri. E reireinaki kawaina teuana imwin teuana nakon te tokanikai, ao n ana taeka tinana‘e taekinaki … mwaaka[ni] kakoroi nanon bwaai ake e tua te Uea.’ (1 Nibwaai. 5:8; ;kairara e kairaki.)”1
Te moan tua iaon te nanomatoa bon akea tiana ngkana iai nanom nako iai. Aio e bon kaineti naba nakoia naake a rangi n aoraki ao a bon aki koaua bwa ana konaa n tokanikai ngkana a manga kaitaraaki ma te maraki n te tai teuana, nakoia naba taanga ake a rangi n keiaki mwaaka ni kaitarai kanganga n aia mare, nakoia kaaro ake a tataro inanon ririki ibukin kaokan natiia ae ea tia ni mwaninga nako, nakon te kairake are e katinanikuaki n ana reirei ibukin ana koaua, nakoia mitinare ake a bane aia bong ni mwakuri ao aki anga reirei. N itera tabeua ao ngaira ni kabane ti a tia n tuangaki bwa tina manga oki rikaaki ao n anai bwaatua.
Ao n aia aron Nibwaai, ti bon konaa. Ma botumwaaka, keiaki inanon kanganga, ao te onimaki, ti konaa n kakoroi bukin bwaai ni kabane ake e tua te Uea bwa ti na karaoi.
Kamataata n te Korotamnei iroun Michael Parker