Iango Ibukin te Bootaki n Utu n te Tairiki

Te bwai ae taekinaki aio kanoana bwaai ao mwakuri ake ana kona ni kamanenaaki ibukin te botaki ni utu n te tairiki. Aikai taiani kakairi aika oti imwina.

“N riki bwa te Aomata ae ko Nako Raoi Ngkai,” p. 45: Kaotii tabeua bwaai (n aron te katoto, te bentira, Ana Boki Moomon, te Riaona, te kauniwae), ao kaoia kain te utu man karinania man ae kakawaki nakon ae aki rang ni kakawaki. Maroroakinna bwa a kanga ni karaoia ni karinanna. Tera te anua ae karaoia te aomata bwa e na tamaroa? Kaunga temanna ma temanna bwa e na karaoa te bwai teuana n te wiiki ae na roko n te aro bwa e na riki bwa te aomata ae tamaroa.

“Ni moantaain moaningabongin te Tabati,” p. 56: Kaoia kain nako te utu bwa ana iangoa temanna kain rarikia are a kona ni kawaria ke ni kainanoa karaoan te mwakuri nakoina. Bairea te bwai ae ko na karaoia n te wiiki aei nakon te aomata anne. Wareka Motiaea 18:7–10, ao maroroakinna bwa e kanga buokakiia tabemwaang n riki bwa te kawai ni kawakina ara berita n te babetito.

“Ngkana aki Beibeti Taake,” p. 58: Korei tabeua tuan am utu, ao maroroakinna bwa ana kanga ni katana am utu. Korei naba tabeua ana tua Tamara are i Karawa, ao maroroakinna bwa e kanga ni kataniko n te maiu n rabwata ao n tamnei.

Te Bootaki n Utu ae Kakukurei

Tabeua te ririki n nako, kainabau e tuangiia ara utu bwa ana katauraoia nakon ara bootaki n utu ae e onoti. Natira te aine ae aua ana ririki e tuangaki bwa e na anenea “Ngai Natin te Atua”. Natira te mwaane ae 10 ana ririki bwa e na anga te tataro ni kaukuki. Ti namakina te korakora ao tamaroan kaotin te Tamnei.

Kainabau e tibwauai tabeua iango mairouia taan kairiiri n te Ekaretia ao ni kaungaira bwa ti na riai n teimatoa n reitaki n ana euangkerio Iesu Kristo. E a manga anga imwina ana kakabwaia te tama nakon natira te ataeinaine ae uarereke. Tinau ao ngai ti anganaki naba te kakabwaia, te kabanea bon natira te mwaane. Imwain katokaan baina iaon natira te mwaane, kainabau e taetae ni karabwarabwa ibukin te nakoanibonga ao e kaunga bwa e na kororaoi ni karekea te kariaiakaki aei.

E kaniia teuana ma te iterana te ririki imwiina, e taku natira te aine, “Ti a manga karaoa riki ara bootaki n utu teuana n aron are ti karaoia teuana te tai.” N ataakin are e nanonna, I waekoa n titirakinna bwa e ngaa ae nanonna. E kaeka, n aron teuana ngkana ti tang ao ti rangin kukurei iai.

Marlúcia Souza de Jesus Costa, Bahia, Brazil

Am Bootaki n Utu n te Tairiki ae Mamaten Nanom

Kanakoa kabwarabwaraan am bootaki n utu n te tairiki ae mamaten nanom nakon [e-mail].