Ana Tarena Taylor

Heather Hall, Utah, USA

Ko kona n tuangai bwa tera ana tarena Taylor ae i kona n tibwauaia ma te kiraati?” au tia reirei n te Moanrinan ae waniua ana ririki e titirakinai. E a tia n tareboon bukina bwa ana taekina taekan te taarena kaain ana kiraati Taylor ae a tia ni karekea mai iroun Tamara are i Karawa.

E bua au iango. I iangoi kanoan waniua te ririki n nako, ni kataia ni karekea te reke. Ngke aua ana bong ao e taonaki Taylor n te boo are e roota kaburorona ao rabwatana naba. E aki noraaba, n taetae, ke n reitaki. E aki kona ni waaki nako imwiin onoua namwakaina n aron rikin te ataei ae iai irouna te kangaanga ni kaburorona. E kabanea angiin ana tai iaon te kaintekateka te wiira n ara tai n tararuaia man kataia ni kamwengaraoia.

Ti kaunga ngkana e kataia n takakaro ke ni mooi n te mwangko ae onoti, ao ti kukurei ma ngaia ngkana e kataia n teirake man kataia n nakonako. Ma ngkana ti kaunga man kakukureia itinanikuna, ma inanora ti korakai n tang ma atakina bwa nakoraoin bwaai aika uarereke a bon kakawaki nakon are e na karekea Taylor. Ma iaki kakoaua bwa aio ae tangiria ni kan ongo ana tia reirei n te Moanrinan.

I kaitiaka buau man kaekaa n aki koaua raoi, “akea ana tarena Taylor ae I kona n iangoia.”

Te titita ae akoi aei e bita aron au reitaki ma natiu te mwaane man ana kaeka.

“Ngke iangoa te reirei aei, I a tibwa ataia bwa ngaira natin te Atua ni kabane iai aia tarena,” e taku. “N au katautau bwa ana tarena Taylor e reireiniia tabeman bwa ana ibuobuoki. Ngkana e raoiroi iroum, I tangiria n taetae nakoia kaain au kiraati bwa i kanga ni kina ana tarena Taylor ikai n te taromauri. I a tia n nooria ataein te Moanrinan ake tabeman ni kokooka ana kaintekateka te biti, kauki mataroa ibukina, ao n tokanikai ni makuia ngkana a kaoa bwangena n te kawere ngkana e kainnanoaki. N au iango ao anne te kabanea ni korakora n tarena are e kakabwaiai maiura.”

I taetae ni karaurau ni kakoaua, ao ti karaurau n taekina tiabo. I aki ataia ngkana e ataia te tia reirei n te Moanrinan aron mwiin te marooro arei nakon maiu. Taylor e teimatoa n arona. E teimatoa n tangira te tararua ae bati. Onaoraki, taokita, ao taan buokiia mwauku a teimatoa n ana angiin tabeu ni maiu. Ma e bitaki au taratara, ao I moanna ni kina ana tarena.

I noria irouia aomata irarikira ni kona ni bita kateia ngke a kataia ni kaotia ae a tabe ibukina. I kona naba n noria bwa e kanga ni kauringiira bwa ti na karaurau, n ata kainnanona, ao n rangin n tangira, ni mwamwannano, ao n tataonannano.

I aki ata ana kantaninga te Atua ibukin Taylor ni karekei kakaewenako aika a rangin ni kabwaranano aikai, ma I kakoaua bwa ea tia ni kaota teutana ana tia reirei n te Moanrinan. E mena ikai bwa e na tibwaua ana tarena ma ngaira. E mena ikai bwa e na reireiniira aron te ibuobuoki.

“I a tia n nooria ataei ake tabeman n reireiniia ni kabuta ana kaintekateka te wiira Taylor, kauki mataroa ibukina, ao n tokanikai man makuia,” e taekinna nakoiu ana tia reirei natiu te mwaane n te Moanrinan.