E Karinea Au Bubuti

Juan Carlos Fallas Agüero, San José, Costa Rica

Ngke I bwabetitoaki ngke te 18 au ririki, I ataia ae maiuakinakin ana euangkerio Iesu Kristo e na riki bwa katein maiu. I namakina kakawakin ao kakannaton maiuakinan katein te euangkerio, ao karaoakiia e a tia ni kakabwaia maiu n itera aika kakaokoro.

Teuana ana moan tua te euangkerio ae rangi ni kakawaki nakoiu bon karineakin te bong ae te Tabati. E boutokaai bwa nna katoki tabeu ake i kakaraoi n te bong teuana koraki ao ni kaatuua au iango iroun Tamau are I Karawa.

I mwakuri n te kambwana ni kaneweaba i Costa Rica. N au mwakuri aei, ao a mwakuri naba aomata n te Tabati. Ngke I moana au mwakuri, I kaotai ae bon ngai kaain te Aro. I bubuti—ao e kariaiakaki—motirawau n te Tabati.

Ibukin au bubuti ae aki tataneiai iai, ao raou ni mwakuri ma au bwaoti a bon rangi ni kan ataa bukina. A titirakinai titiraki aika mwaiti ibukin au koaua. Inanon te tai ao e reke au tai ni kamataata nakoia iaoni bwaai tabeua ake ti kakoauai ngaira aika a Itiaki ni boong aikai. N taai aika mwaiti au kabwarabwara iaon tuan te euangkerio e anai nanoia.

N te bong teuana ao au bwaoti e bootia taan mwakuri ibukin te katanoata. “I tangirii ngkami bwa kam n na mwakuri n uoua wiikente aika imwaira,” e taku. E bua nanou. I ataa nanon te bwai aei bwa nna riai ni mwakuri n te Tabati.

Ma e reitinako au bwaoti man taku: “Aio bon ibukiia ni kabane, tii Juan Carlos ae e na aki. Ti ataia ae bon ake te bwai ae konaa ni kamwakuria n te Tabati.”

E oki nanou. Au bwaoti ea tia ni karinea au bubuti! Ibukin aroarou ao kateiu ake I kakaotii n au mwakuri, ao I karekea karineakiu mai irouna. Ao n tokina e kukurei nanona ni karinei au koaua.

I ataia bwa ngkana ti karimoai katein te euangkerio inanon maiura, ao te Uea e na bon kakabwaiaira.

“I tangirii ngkami bwa kam nna mwakuri n uoua wiikente aika imwaira,” e taku au bwaoti. E bua nanou. I ataa nanon te bwai aei bwa nna riai ni mwakuri n te Tabati.