Te Buoka Ibukin Te Reirei ae Teimatoa Inanon Ruaiwa Te Ririki Imwiin Waakinana
E taonaki Tyson Kemege n te aoraki ae te polio ao bon te te teei ngaia ae akea ana karo n uarerekena, man aki kona ni matu iaon te matureti ao ni kuri ni karako reken amwarakena. E kona n nakonako ti man ana ibuobuoki kabonganaan kaai aika uaai are a boutokaa aron nakonakona.
E a katiaa ana iango bwa E nang nakon te Kenya’s Augustana College mani kamatebwai iaon te information technology, ma ibukin akean ana utu ao ana mwane, ana iango ibukin taai aika ana roko a nang aki koro bukiia.
Te Tari Kemege, are e a tia ni kaaina te Ekaretia tabeua te ririki imwiin banen ana reirei ae rietata, e maroro ma mitinare aika taanga ao n tuangiia aron ana iango. Mitinare aikai a buoka aron reitakina ma te komete ibukin Te Buoka Ibukin Te Reirei. Te katangomwane ibukin te buoka aei e a bon buoka butimwaeana nakon te reirei.
“Bon te tekeraoi ni mwaane ngai iaon te aba,” E tataekina aioTe Tari Kemege nakoia mitinare.
E a tia n riki Brother Kemege bwa te beretitenti irouia ataein te reirei n te Augustana University ao n tauii mwiiokoana aika uoua inanon ana uoote.
Ruaiwa te ririki imwiina Beretitenti Gordon B. Hinckley (1910–2008) ngke e moan katanoataa te Buoka Ibukin te Reirei, te burokuraem ae karekea ae raka iaon 38,000 aomata ake a buokaki man abaa aika 42 maitiia. N aki ongei taian kanganga aika a riki ibukin taian karikirake, te Buoka Ibukin Te Reirei e bon teimatoa ao ni buokiia aomata n aron Tyson Kemege ni karekean te reirei, ni kamwaawa te maiu ni kainnano, ao n anga aia ibuobuoki nakon aia kaawa.
E raka iaon 87 te katebubua ake a buokaki man te PEF are a tia ni kabanea aia reirei ao n reke aia mwakuri.
Te Tokanikai iaon Taian Kakaewenako
E ngae ngke akea rootakin te burokuraem aei ni bwakan mwanen taian karikirake, te koraki ake a tararuaa te burokuraem aei a taekinna bwa iai riaina n totokoa aron taian kakaewenako.Teuana mai ibuakon taian kakaewenako aika a korakora ae e kaitara te burokuraem aei mangaia bon korakoran mwaitiia te koraki ake a buokaki.
“Bwaai aika a tukira are ti riai ni kaitarai ao n totokoi bon taian bwai n tutuki ake a irekreke ma te rikirake ae waekoa ao te konabwai,” e taku Elder John K. Carmack, te membwa ae karineaki man te Kaitingaun ao te tarekita man te mwane ni buoka. “Tabeua bwaain tutuki ake a karinaki bon kaotakina nakoia aomata, karaoakin baika a kainnanoaki ma tatauraoina ae e na ataaki, ao boutokakiia aike a na buokaki.”
Te burokuraem aei e kairaki man ana etekuata te Ekaretia man taian bootaki n tararua ni kurubu aika a uarereke, ni ikotaki ma taan mwakuri tabeman , mitinare aika taanga, ao taan anganano man te aba. E bon tararuaaki irouia uoman Mataniwii ni Kabuta aika a karineaki, aika Unimwaane Carmack ao Unimwaane Richard E. Cook.
Ibukin kairakin te burokuraem ae e tabangaki, te tia tararua n te buoka ibukin reirei ao mitinare a mwakuri ma Beretitenti n te Aono ni kataneiaia taan kairiri n te aono, ni karaoi oin tabeia ni mwakuri ma taan kairiri n te aba ni kataneiaia taan reirei n te aba, taani mwakuri ni kabane, taan anganano, ao naake a buokaki.
“Bon te karikirake ae e a kaman waakinaki ao e teimatoa naba ngkai,” e taku Rex Allen, te tarekita ibukin kataneiai ao itoman ibukin te burokuraem. “E boni boou aron waakinana, ngaiare te aro ni itoman ao ni kataneiai a bon rangin kakawaaki.”
E kanga aron Mwakurina
Te burokuraem aei e karaoaki irouia te bubua tengaa aomata ake anga mwane nakon te buoka . Mwaane ni kabane ake a karikorikoaki a kanakoaki ibukin boutokakiia taan buokaki.
Ibukiia ake ana buokaki, te waaki ni buoka aei e moanaki man te katauraoi ake a karaoaki rinanon te intitute n ana burokuraem te aro are a reiakinaki inanona membwa. Man ana ibuobuoki te tienta ni kamwakuri ibukiia aika Itiaki Ni Boong Aika Kaitira, naake a buokaki anai “Planning for Success” (Babaire ibukin te Kabwaia) taian kooti ao reirei ni kataneiai ibukin te kareke mwakuri imwain katiaan te online loan application.
Te tai are e rinanoaki iai te tangomwane, naake a buokaki ana riai ni karekea aia reirei ma ootaia ni kabwaraa aia taarau bwa aonga ni manga reke kabwaiaia ake te korakina man te buoka aei. Naake a buokaki ana kabwakaa ae e raka iaon te US $2.5 million nakon aia taarau ni katoa ririki.
E taku Unimwaane Carmack bwa te burokuraem aei e rangin nakoraoi tiaki ibukina ngkai e korakora aia mwane ni ibuobuoki taian membwa ma ibukin naba te kairiri ae e tamaroa. “Te karo n te Mwane ni Buoka ibukin te Reirei ae Teimatoa bon Gordon B. Hinckley,” e taku, “bwa a na ibuobuoki ao nanon Beretitenti [Thomas S.] Monson e rangi ni korakora n aiaron Beretitenti Hinckley. [Beretitenti Monson] e a kaman rinanon te waaki aei mai imoana ao ni kairiri ni boong aikai n ana atatai n ana mwakuri ni burabeti.”
Bwaai aika Riki
Ni katanoataakin te burokuraem aei n te maungatabu ni kabuta n Eberi 2001, e taku Beretitenti Hinckley: “Bwa te konabwai ae tamaroa n te mwakuri,ni kairake n ataeinimwaane ao n ataeinnaine a kona ni mwaawa man te kainnano ngaiia ma te roro ae na roko imwaain ataakina. Ana riai ni katauraoi ibukiia aia utu. Ana kona ni beku ibukin te Ekaretia ao n rikirake inanon te kairiri ao te katabeaki. Ana kabwarai aia taarau bwa aonga ni kona ni kakabwaiaaki tabeman ngkai a tia naba ni kakabwaiaaki” (“Te Mwane Ni Buoka Ibukin te Reirei Ae Teimatoa,” Riaona, Tuurai 2001, 60; Ensign, Meei 2001, 51).
Taan kairiiri n te burokuraem a teimatoa n taraa kakoroan nanon ana taeka Beretitenti Hinckley. E nakon te mwaiti ae te10 nakon 15 te katebubua taan kairiri n te Ekaretia aika butimwaeaki man aaba tabeua mai imwaaina are a reke aroia man te buoka aei.
“Bon tiaki te iango ae e raoiroi,” E kaeka Beretitentit Hinckley. “E reke buokara man raoiroia ao n aia akoi raoraora aika a kakateke ao n tituaraoi. Iai ara bootaki. Iai korakorara n aomata ao ana toro te Uea aika a mwakuri korakora ni kakoroa bukin te waaki. Bon te ibuobuoki n anganano are ana akea iai ana kabane mwane te Ekaretia. Ti tataro ma te nanorinanao ao ni kakaitau ngkai te Atua e kona ni karikirakea te waaki aei ao ni kona ni uoti taian kakabwaia, aika a uaana ao ni kakateke, iaon atuia ngaa n aomata n aron bootaki ni mwakuri, te Perpetual Emigration Fund, kakabwaiai aikai a reke nakoia te koraki ake a karekea te kabwaia aei.”
Ruaiwa te ririki imwiina, e teimatoa n rikirake te burokuraem, ni kona ni kakoroaki nanona, “rinanon te reitaki ni iraorao ao n te onimaki ae e korakora.” aei are e a kaineti nakon te Tari Allen.
Taian membwa ake a tauraoi n anaaki a kona ni kakabwaiaki …
man katongakin uaan te Buoka Ibukin Te Reirei ae Teimatoa …
ao ni kaoka boon mwiina bwa aonga ni kabwaia iai ake temwaangina.
Korobanna iroun Brad Teare