Te Kunnikai ni Mare ao te Baaire

Iroun Jane McBride Choate

Te mare e katabuaki iroun te Atua (D &C 49:15).

E tekateka Lori iaon ana kainiwene tarina are te ikawai ngke e a tia Karyn ni kabaei kanoan ana baeki nakon te tembora. E nang mare Karyn n te bong aei.

E nang kukurei ni kaea te baka n amwarake n te mare n te tairiki anne, ma e bon namakina te nanokawaki. Mwanena are te ikawai, are e nako ni karaoa te mwakuri ni mitinare, e kona n rin n te tembora ma Karyn. A kona naba ni mwananga ana karo. Ma Lori ao mwaanena aika uoman aika a uarereke aki kona n nako.

“I iangoia bwa tera ngke I mena n te tembora ma ngkoe,” e taku Lori.

E tararake Karyn man ninnen ana bwai ake e karinii. “Ao ngai naba, ma kamna bae ni mena itinaniku. Ao n te taina ao Nna bon nako n te tembora ma ngkoe ngkana ko nang mare.”

E aki manga nanokawaki imwiina Lori, ma e tabe ni miiakina taekan te bwai teuana. “Ko kangaa n ataia ae ko tangiria ni kani mare ma Matt?” e titiraki.

E tekateka Karyn irarikin Lori. “N taai aika a bwaka nako I reiakinaki bwa Tamara are i Karawa iai ana babaire ibukiu. Ngke I a kaitibo ma Matt, I matata raoi bwa ti kona ni kakoroa bukin te babaire anne ni kabane.”

“Koa tia ni katiaa te babaire anne?” E titiraki Lori.

E ioioa atuuna Karyn iaki. “Ngai ao Matt ti tangiria ni karekeia natira, ti na kabanea ara reirei, ao a maiti riki.”

Lori e taraa te kunnukai ni mare ae rang tamaroa ae e tine iaon mataroan nnen ana bwai Karyn. “E rang tikiraoi kunikaim,” e taku

E moangare Karyn. “Anne te baire naba teuana.,” e taku. “I tangiria n taai nako ni kan mare n te temobora, bwa e aonga n tamaroa kunikaiu.”

Tabeua te aoa imwina ao Lori e tabe ni matakuakiniia Karyn ao Matt ngke a otinako man te tembora. A takiakia ubuia.

E biri Lori nakon Karyn ao e rabwatia ni baina.

Tabeua te wiiki imwiina ao e a roko ana tamnei Lori n te meeri. Bon tamnein Karyn ao Matt n tei imoan te tembora. E koroboki Karyn mai ieta, “Tamara are i Karawa iai ana babaire ibukim.”

E katikui tamnei Lori iaon nnen ana kunikai. E berita i bon irouna bwa n te bongina ao e na nako n te tembora ao ni kona ni karekea naba te takiakia are e oti n ubun tarina.