Գլուխ 14
Աբինադին և Նոյ թագավորը
Զենիֆը մի խումբ Նեփիացիների արդար թագավոր էր։ Երբ նա ծերացավ, թագավոր դարձավ նրա որդի Նոյը։
Նոյը՝ ի տարբերություն իր հորը, լավ թագավոր չէր։ Նա չար էր և չէր հնազանդվում Աստծո պատվիրաններին:
Նա ստիպում էր իր ժողովրդին իրեն տալ իրենց ցորենի, կենդանիների և արծաթի մի մասը։
Նոյ թագավորը դա անում էր իր ծուլության պատճառով։ Նա ստիպում էր Նեփիացիներին իրեն ապահովել այն ամենով, ինչ անհրաժեշտ էր ապրելու համար։
Լավ քահանաներին, որոնց նշանակել էր իր հայրը, նա փոխարինեց չար քահանաներով։ Այդ չար քահանաները մարդկանց սովորեցնում էին մեղքեր գործել:
Նոյ թագավորը կառուցել տվեց բազմաթիվ գեղեցիկ շենքեր, այդ թվում ՝ գահով մի մեծ պալատ։ Շենքերը զարդարված էին ոսկով, արծաթով և թանկարժեք փայտով։
Նոյ թագավորը սիրում էր հարստությունը, որը վերցնում էր իր ժողովրդից։ Նա և իր քահանաները ամբողջ ժամանակ գինի էին խմում և մեղքեր գործում։
Աստված Աբինադի անունով մի մարգարե ուղարկեց Նոյի ժողովրդի մոտ։ Աբինադին զգուշացրեց նրանց, որ եթե չապաշխարեն, կդառնան Լամանացիների ստրուկները։
Երբ Նոյ թագավորը լսեց Աբինադիի խոսքերը, նա զայրացավ։ Նա մարդիկ ուղարկեց, որպեսզի Աբինադիին պալատ բերեն, որտեղ կարողանար սպանել նրան:
Աբինադիին բերեցին թագավորի մոտ: Նոյ թագավորը և նրա քահանաները բազմաթիվ հարցեր տվեցին նրան: Նրանք փորձում էին ծուղակը գցել նրան՝ դրդելով սխալ բան ասել։
Աբինադին չէր վախենում պատասխանել նրանց հարցերին: Նա գիտեր, որ Աստված կօգնի իրեն։ Աբինադիի պատասխանները զարմացրել էին քահանաներին:
Նոյ թագավորը զայրացած էր և հրամայեց իր քահանաներին սպանել Աբինադիին։ Աբինադին ասաց՝ եթե դիպչեն իրեն, Աստված կսպանի նրանց։
Սուրբ Հոգին պաշտպանեց Աբինադիին, որպեսզի նա կարողանար ավարտել այն, ինչ Տերն ուզում էր, որ նա ասեր։ Աբինադիի դեմքը փայլում էր։ Քահանաները վախեցան դիպչել նրան։
Խոսելով Աստծո զորությամբ, Աբինադին հայտնեց մարդկանց նրանց անարդարությունների մասին։ Նա ընթերցեց նրանց Աստծո պատվիրանները։
Նա ասաց, որ Երկրի վրա կծնվի Հիսուս Քրիստոսը։ Հիսուսը հնարավոր կդարձնի, որ մարդիկ ապաշխարեն, հարություն առնեն և ապրեն Երկնային Հոր հետ։
Աբինադին մարդկանց ասաց, որ ապաշխարեն և հավատ ունենան առ Հիսուս Քրիստոսը, այլապես չեն փրկվի։
Նոյ թագավորի բոլոր քահանաները, բացի մեկից, չհավատացին Աբինադիին։ Նոյը հրամայեց իր քահանաներին սպանել Աբինադիին։ Նրանք կապեցին Աբինադիին և բանտ նետեցին։
Քահանայի անունը, ով հավատաց Աբինադիին, Ալմա էր։ Նա խնդրեց Նոյ թագավորին բաց թողնել Աբինադիին։
Թագավորը բարկացավ Ալմայի վրա և հրամայեց դուրս հանել նրան։ Այնուհետև նա ուղարկեց իր ծառաներին, որ սպանեն նրան: Ալման փախուստի դիմեց և թաքնվեց, իսկ թագավորի ծառաները նրան այդպես էլ չգտան։
Երեք օր բանտում անցկացնելուց հետո Աբինադիին կրկին բերեցին Նոյ թագավորի մոտ։ Թագավորն ասաց, որ Աբինադին հրաժարվեր թագավորի ու իր մարդկանց դեմ իր ասածներից։
Նոյ թագավորն ասաց Աբինադիին, որ եթե նա չհրաժարվեր իր ասածներից, կսպանվեր։
Աբինադին գիտեր, որ ճշմարտությունն էր ասել։ Նա գերադասում էր մահանալ, քան հրաժարվել խոսքերից, որոնց համար նրան Աստված ուղարկել էր։
Նոյ թագավորը հրամայեց իր քահանաներին սպանել Աբինադիին։ Նրանք կապեցին նրան, մտրակեցին ու այրեցին։ Մահանալուց առաջ Աբինադին ասաց, որ Նոյ թագավորը նույնպես կմահանա կրակից։
Որոշ Նեփիացիներ ընդդիմացան Նոյ թագավորին և փորձեցին սպանել նրան։ Լամանացիների բանակը նույնպես եկավ կռվելու թագավորի ու նրա հետևորդների դեմ։
Թագավորն ու նրա հետևորդները փախուստի դիմեցին, բայց Լամանացիները բռնեցին ու սկսեցին կոտորել նրանց։ Թագավորը հրամայեց իր մարդկանց թողնել ընտանիքներն ու փախչել։
Տղամարդկանցից շատերը ոչ մի տեղ չփախան։ Նրանք գերի ընկան Լամանացիներին։
Նոյ թագավորի հետ փախուստի դիմած տղամարդկանցից շատերը զղջացին։ Նրանք ուզում էին հետ գնալ և օգնել իրենց կանանց, երեխաներին ու ժողովրդին։
Նոյ թագավորը չէր ուզում, որ տղամարդիկ վերադառնային իրենց ընտանիքների մոտ։ Նա հրամայեց նրանց մնալ իր հետ:
Տղամարդիկ զայրացած էին Նոյ թագավորի վրա։ Նրանք այրեցին նրան կրակի վրա, ինչպես մարգարեացել էր Աբինադին։ Հետո նրանք վերադարձան իրենց ընտանիքների մոտ։