Գլուխ 5

Ճամփորդություն անապատով

Տերը ցանկանում էր, որ Լեքիի որդիներն ամուսնանային այնպիսի կանանց հետ, ովքեր իրենց զավակներին կուսուցանեին ավետարանը։ Նա պատվիրեց Լեքիին, որ իր որդիներին ուղարկեր հետ՝ Երուսաղեմ, Իսմայելի ընտանիքին իրենց հետ վերցնելու համար։

1 Նեփի 7․1-2

Նեփին և նրա եղբայրները վերադարձան Երուսաղեմ։ Նրանք ասացին Իսմայելին, թե ինչ էր Տերը ցանկացել, որ նա աներ։ Իսմայելը հավատաց նրանց և իր ընտանիքով գնաց Լեքիի որդիների հետ։

1 Նեփի 7․3-5

Անապատով ճամփորդելիս Լամանը, Լեմուելը և Իսմայելի ընտանիքից մի քանիսը վրդովվեցին։ Նրանք ուզում էին վերադառնալ Երուսաղեմ։

1 Նեփի 7․6-7

Նեփին հիշեցրեց Լամանին և Լեմուելին այն ամենը, ինչ Տերն արել էր իրենց համար։ Նա ասաց, որ պետք է ավելի մեծ հավատ ունենալ։ Նրանք բարկացան Նեփիի վրա, բայց չվերադարձան Երուսաղեմ։

1 Նեփի 7․8-13, 16, 21

Նեփին, նրա եղբայրները և Զորամը հետագայում ամուսնացան Իսմայելի դուստրերի հետ։

1 Նեփի 16․7

Տերը պատվիրեց Լեքիին շարունակել իր ճամփորդությունը։ Հաջորդ առավոտ Լեքին իր վրանի մոտ գտավ մի արույրե գունդ, որը կոչվում էր Լիահոնա։ Այն ցույց էր տալիս ճանապարհը անապատում:

1 Նեփի 16․9-10

Լեքիի ընտանիքը հավաքեց սննդի պաշար, սերմեր և իրենց վրանները։ Նրանք շատ օրեր ճամփորդեցին անապատով, հետևելով Լիահոնայի ցույց տված ուղուն։

1 Նեփի 16․11-16

Ճամփորդելիս Նեփին և նրա եղբայրները որսորդությամբ էին զբաղվում, օգտագործելով նետ ու աղեղ։

1 Նեփի 16․14-15

Նեփիի պողպատյա նետը կոտրվեց, իսկ եղբայրների նետերը կորցրեցին իրենց ուժը։ Եղբայրները չկարողացան սպանել անգամ մի կենդանի, և բոլորը քաղցած էին։ Լամանը և Լեմուելը զայրացած էին։

1 Նեփի 16.18-21

Նեփին պատրաստեց փայտյա նետ և հարցրեց իր հորը, թե ուր կարող էր գնալ որս անելու։ Լեքին ուղղություն ստացավ Լիահոնայից։ Նեփին հետևեց այդ ուղղությանը և մի քանի կենդանի գտավ։

1 Նեփի 16․23, 26, 30-31

Լիահոնան աշխատում էր միայն այն ժամանակ, երբ Լեքիի ընտանիքը հավատարիմ, ջանասեր և հնազանդ էր լինում։

1 Նեփի 16․28-29

Նեփին վերադարձավ՝ իր հետ բերելով որսած կենդանիները։ Բոլորն ուրախ էին, որ ուտելիք ունեին։ Նրանք զղջացին, որ զայրացել էին, և շնորհակալություն հայտնեցին Աստծուն իրենց օրհնելու համար։

1 Նեփի 16․32

Ճամփորդությունը հեշտ չէր: Լեքիի ընտանիքը հաճախ հոգնած էր, քաղցած ու ծարավ։ Իսմայելը մահացավ և նրա դուստրերը վշտացած էին։ Նրանք դժգոհեցին Լեքիից։

1 Նեփի 16․34-35

Լամանը և Լեմուելը նույնպես դժգոհեցին։ Նրանք չէին հավատում, որը Տերը խոսել էր Նեփիի հետ։ Նրանք ուզում էին սպանել Լեքիին ու Նեփիին և վերադառնալ Երուսաղեմ։

1 Նեփի 16․37-38

Տիրոջ ձայնը խոսեց Լամանի ու Լեմուելի հետ։ Այն նրանց ասաց, որ չզայրանան Լեքիի և Նեփիի վրա։ Լամանն ու Լեմուելը ապաշխարեցին:

1 Նեփի 16.39

Լեքիի ընտանիքը շարունակեց իր դժվար ճամփորդությունը։ Աստված օգնեց և զորացրեց նրանց։ Ծնվեցին երեխաներ։ Լեքին և Սարիան ևս երկու որդի ունեցան՝ Հակոբ և Հովսեփ անուններով։

1 Նեփի 17․1–3, 18․7

Անապատով ութ տարի ճամփորդելուց հետո Լեքիի ընտանիքը հասավ ծովափին։ Այնտեղ նրանք գտան միրգ ու մեղր։ Այդ տեղը նրանք կոչեցին Լիառատ:

1 Նեփի 17․4-6