Lesson 2 Materyal ng Titser

Pagpapalakas ng Ating Patotoo tungkol sa Buhay na Cristo

Noong Enero 1, 2000, inilathala ng Unang Panguluhan at ng Korum ng Labindalawang Apostol ang kanilang patotoo tungkol sa pagiging Diyos ni Jesucristo sa isang dokumentong tinatawag na “Ang Buhay na Cristo: Ang Patotoo ng mga Apostol” (makukuha sa SimbahanniJesucristo.org). Sa lesson na ito, magkakaroon ang mga estudyante ng pagkakataong ipaliwanag ang kahalagahan ng sagradong titulo na Cristo at ibahagi kung paano mapalalakas ang kanilang pananampalataya sa pamamagitan ng mapanalanging pag-aaral ng “Ang Buhay na Cristo.”

Mga Mungkahi sa Pagtuturo

Si Jesus ang Cristo.

Pagpapahusay ng Ating Pagtuturo at Pag-aaral

Magtuon sa pagbabalik-loob, hindi sa pagtalakay ng lahat ng materyal. Karaniwan ay gusto nating matalakay ang lahat ng materyal sa lesson. Kapag ganito ang nadarama mo, ituon ang iyong isipan sa nararanasan ng iyong mga estudyante sa kanilang isipan at puso. Nagkaroon ba ang mga estudyante ng oras na kinakailangan nila para mapag-isipan at madama ang kahalagahan ng mga katotohanang natututuhan nila? Isaisip ang matalinong payo ni Pangulong Dallin H. Oaks, “Hindi natin mapipilit ang mga espirituwal na bagay” (“Sa Kanyang Sariling Panahon, sa Kanyang Sariling Paraan,” Liahona, Ago. 2013, 24).

Sabihin sa mga estudyante na magbanggit ng ilang halimbawa ng mga dakilang espirituwal at matwid na lider sa buong kasaysayan. (O maaari kang mag-isip ng sarili mong mga halimbawa.) Maikling talakayin kung paano naimpluwensyahan ng mga taong ito ang mundo sa kabutihan. Pagkatapos ay maaari kang magdispley ng larawan ni Jesucristo at itanong:

• Paano naiiba si Jesucristo sa mga dakilang espirituwal at matwid na lider ng mundo?

Sabihin sa mga estudyante na rebyuhin ang Mateo 16:13–17 at hanapin ang mga pariralang ginamit ni Pedro na nagpaiba kay Jesus mula sa lahat ng taong nabuhay sa mundo.

• Ano ang walang hanggang kahalagahan ng sinabi ni Pedro kay Jesus, “Ikaw ang Cristo, ang Anak ng Diyos na buháy”? (Mateo 16:16). (Maaaring makatulong na iparebyu sa mga estudyante ang natutuhan nila sa bahagi 1 ng materyal sa paghahanda. Maaaring maipahayag ng mga estudyante ang mga katotohanang tulad ng sumusunod: Si Jesus ang Cristo, ang pinahiran ng langis o ang Mesiyas. Siya ang kumakatawan sa Ama at ang tanging daan na maliligtas tayo.)

• Ano ang naiisip ninyo tungkol sa kahalagahan ng pagkakaroon at pagpapalakas ng inyong personal na patotoo na si Jesus ang Cristo? (Maaari mong anyayahan ang ilang estudyante na ibahagi kung paano nila natamo ang kanilang patotoo na si Jesus ang Cristo.)

Pagpapahusay ng Ating Pagtuturo at Pag-aaral

Gamitin ang mga tulong sa pag-aaral. Ang Mga Tulong sa Pag-aaral, na matatagpuan sa bahaging Mga Banal na Kasulatan ng Gospel Library, ay kinabibilangan ng mga sanggunian tulad ng Gabay sa mga Banal na Kasulatan. Ang resource na ito ay mula sa mga pamantayang banal na kasulatan upang matulungan ang mga mambabasa na matutuhan ang tungkol sa isang partikular na paksa. Sa pag-aaral ng mga estudyante ayon sa paksa, tulungan silang makita ang kahalagahan ng pag-unawa sa konteksto at nilalaman ng mga scripture passage upang matulungan silang matuklasan ang layunin ng inspiradong may-akda.

Ipaalala sa mga estudyante na bilang paghahanda para sa klase, hiniling sa kanila na saliksikin ang “Jesucristo” sa Gabay sa mga Banal na Kasulatan at alamin ang mga sagradong pangalan, titulo, at tungkuling ginagampanan na ibinigay sa Panginoon. Bigyan ang mga estudyante ng ilang minuto na rebyuhin ang nalaman nila. Pagkatapos ay maaaring ibahagi ng mga estudyante ang nalaman nila sa klase o sa maliliit na grupo. Kung sa palagay mo ay lalo pang matututo ang iyong mga estudyante, maaari mong idispley at pasagutan sa kanila ang isa o lahat ng mga sumusunod na tanong:

• Ano ang nadarama ninyo kapag iniisip ninyo si Jesucristo bilang [isingit ang pangalan, titulo, o tungkuling ginagampanan]?

• Paano nakaiimpluwensya sa inyong pananampalataya kay Jesucristo ang nalaman ninyo na Siya ay [isingit ang pangalan, titulo, o tungkuling ginagampanan]?

Maaari mong hikayatin ang mga estudyante na pumili at pag-aralan ang isang pangalan, titulo, o tungkuling ginagampanan ni Jesucristo na gusto pa nilang matutuhan pa.

Ang mga Apostol ng Panginoon ay mga natatanging saksi na Siya ang Cristo.

Maaari mong anyayahan ang mga estudyante na ibahagi kung gaano karami sa kanilang mga kaedad ang naniniwala kay Jesucristo. Maaari mo ring sabihin sa kanila na ibahagi ang narinig nila kamakailan tungkol sa Tagapagligtas sa social media o sa popular na libangan.

Magkakasamang basahin ang Doktrina at mga Tipan 107:23, at maaari mong isulat sa pisara ang sumusunod na pahayag: Si Jesucristo ay tumawag ng mga Apostol upang maging mga natatanging saksi Niya sa buong mundo. Pagkatapos ay itanong:

• Sa inyong pananaw, bakit napakahalaga sa ating panahon ang mga patotoo ng mga Apostol na tinawag ng Panginoon?

• Paano napalakas ng mga natatanging saksing ito ang inyong patotoo tungkol kay Jesucristo? (Maaaring makatulong na anyayahan ang ilang estudyante na ibahagi ang natutuhan o nadama nila habang pinanonood nila ang isa o mahigit pa sa mga video na “Mga Natatanging Saksi ni Cristo” mula sa bahagi 2 ng materyal sa paghahanda. Maaaring panoorin ng buong klase ang isa sa kanilang mga paborito.)

Ipaalala sa mga estudyante na noong ika-1 ng Enero, 2000, ibinahagi ng Unang Panguluhan at ng Korum ng Labindalawang Apostol ang kanilang patotoo tungkol sa Tagapagligtas sa “Ang Buhay na Cristo.” Bigyan ang mga estudyante ng kopya ng dokumento, o sabihin sa kanila na buksan ito sa kanilang mga electronic device.

Upang matulungan ang mga estudyante na mapalalim ang kanilang pagpapahalaga sa dokumentong “Ang Buhay na Cristo,” sabihin sa kanila na makibahagi sa sumusunod na aktibidad. Sabihin sa kanila na makipagtulungan sa kapartner, at bigyan ang bawat estudyante ng isa sa mga handout sa ibaba. Siguraduhing maraming oras ang mga estudyante para marebyu at maibahagi sa isa’t isa ang nalaman nila sa “Ang Buhay na Cristo.”

Mga Mensahe para sa Ating Panahon sa “Ang Buhay na Cristo”

Materyal ng Titser para sa Kursong Si Jesucristo at ang Kanyang Walang Hanggang Ebanghelyo—Lesson 2

Itinuro ni Elder Robert D. Hales ng Korum ng Labindalawang Apostol:

“Ang Buhay na Cristo: Ang Patotoo ng mga Apostol” ay inihanda noon pa bago pa natin ito kinailangang mabuti. (“Pangkalahatang Kumperensya: Nagpapalakas ng Pananampalataya at Patotoo,” Liahona, Nob. 2013, 7)

Rebyuhin ang “Ang Buhay na Cristo” para sa mga mensaheng sa palagay mo ay kailangang-kailangan sa ating panahon. Maging handang ibahagi ang nalaman mo sa iyong kapartner sa pag-aaral.

© 2023 ng Intellectual Reserve, Inc. All rights reserved.

Mga Mensahe para sa Ating Panahon sa “Ang Buhay na Cristo”

Materyal ng Titser para sa Kursong Si Jesucristo at ang Kanyang Walang Hanggang Ebanghelyo—Lesson 2

Banggitin Pa si Jesucristo

Materyal ng Titser para sa Kursong Si Jesucristo at ang Kanyang Walang Hanggang Ebanghelyo—Lesson 2

Sinabi ni Elder Neil L. Andersen ng Korum ng Labindalawang Apostol:

Habang nababawasan ang pagbanggit ng mundo kay Jesucristo, lalo pa natin Siyang banggitin. Kapag nalantad ang ating mga tunay na katangian bilang Kanyang mga disipulo, marami sa ating paligid ang magiging handang makinig. (“Nangungusap Tayo tungkol kay Cristo,” Liahona, Nob. 2020, 90)

Rebyuhin ang “Ang Buhay na Cristo” para sa mga mensaheng sa palagay mo ay magiging lalong mahalagang ibahagi sa mundong hindi gaanong binabanggit si Jesucristo. Maging handang ibahagi ang nalaman mo sa iyong kapartner sa pag-aaral.

© 2023 ng Intellectual Reserve, Inc. All rights reserved.

Banggitin Pa si Jesucristo

Materyal ng Titser para sa Kursong Si Jesucristo at ang Kanyang Walang Hanggang Ebanghelyo—Lesson 2

Para tapusin ang klase, sabihin sa mga estudyante na ibahagi kung paano napalakas o mapapalakas ang kanilang pananampalataya kay Jesucristo sa pamamagitan ng pag-aaral ng “Ang Buhay na Cristo.” Bigyan sila ng oras na magtakda ng mithiin kung ano ang gagawin nila upang mapalakas ang kanilang patotoo tungkol kay Jesucristo sa pamamagitan ng pag-aaral pa o pagsasaulo ng inspiradong dokumentong ito.

Para sa Susunod

Maaari mong ipadala sa iyong mga estudyante bago ang susunod na klase ang sumusunod na ideya o iba pa na sa palagay mo ay pupukaw sa kanilang interes: Habang pinag-aaralan mo ang materyal sa paghahanda para sa lesson 3, isipin kung bakit pinili mong sundin si Jesucristo sa premortal na buhay.