nakangiting dalaga sa simbahan

Lesson 11 Materyal sa Paghahanda para sa Klase

Pagtamasa sa mga Pagpapala ng Simbahan ng Panginoon

Sa panahong bumababa ang bilang ng nagsisimba sa iba’t ibang relihiyon sa maraming lugar sa buong mundo, maaaring lalong mahalagang pagsikapang unawain nang mas malalim kung bakit nagtatag si Jesucristo ng simbahan noong panahon ng Kanyang mortal na ministeryo at pagkatapos ay ipinanumbalik ito sa mga huling araw. Sa iyong pag-aaral, isipin kung paano naghatid o makapaghahatid ng dagdag na layunin, lakas, at kagalakan ang ipinanumbalik na Simbahan ng Panginoon.

Bahagi 1

Anong mga natatanging pagpapala ang matatamo lamang sa pamamagitan ng pagiging miyembro ng Simbahan ng Panginoon?

Isinulat ni Apostol Pablo na ang Simbahan ni Jesucristo ay “itinayo sa saligang inilagay ng mga apostol at ng mga propeta, na si Cristo Jesus ang batong panulok” (Efeso 2:20). Noong Kanyang mortal na ministeryo, pumili si Jesucristo ng labindalawang kalalakihan at inordenan sila na maging Kanyang mga Apostol. Ibinigay Niya sa kanila ang awtoridad at mga susi ng priesthood upang mapamunuan nila ang Kanyang Simbahan, maituro ang Kanyang ebanghelyo, patotohanan na buhay Siya, at kumilos sa Kanyang pangalan (tingnan sa Mateo 10:1, 7–8; 16:19; Mga Gawa 1:21–22; Doktrina at mga Tipan 107:23).

Matapos mabuhay na mag-uli si Jesucristo, patuloy Niyang pinamunuan ang Kanyang Simbahan sa pamamagitan ng Kanyang mga Apostol, na mayhawak ng mga susi ng priesthood upang pamahalaan ang gawain ng kaligtasan. Gayunman, marami ang sumalungat sa mga tagapaglingkod na Kanyang tinawag, at nagsimulang malihis ang mga miyembro ng Simbahan. Pagkatapos ng kamatayan ng mga Apostol, “binaluktot ng mga tao ang mga alituntunin ng ebanghelyo at gumawa ng mga di-awtorisadong pagbabago sa organisasyon ng Simbahan at sa mga ordenansa ng priesthood. Dahil sa laganap na apostasiyang ito, kinuha ng Panginoon ang awtoridad ng priesthood mula sa mundo” (Mga Paksa ng Ebanghelyo, “Apostasiya,” SimbahanniJesucristo.org). Ang panahong ito ay kilala bilang ang Malawakang Apostasiya.

Ang panahong ito ng apostasiya ay nagpatuloy hanggang sa magpakita ang Ama sa Langit at si Jesucristo kay Joseph Smith noong 1820 (tingnan sa Joseph Smith—Kasaysayan 1:16–20). Ilang taon matapos ang pagpapakitang ito, nagpadala si Jesucristo ng mga sugo mula sa langit kay Joseph Smith, na nagkaloob sa kanya ng awtoridad at mga susi ng priesthood (tingnan sa Joseph Smith—Kasaysayan 1:68–72; Doktrina at mga Tipan 110:11–16; 128:19–21). Sa pamamagitan ng banal na awtoridad na ito, tumawag si Jesucristo ng mga bagong Apostol at muling itinatag ang Kanyang Simbahan sa lupa (tingnan sa Doktrina at mga Tipan 1:30).

Restoration of the Melchizedek Priesthood [Pagpapanumbalik ng Melchizedek Priesthood], ni Walter Rane

Ngayon ang Unang Panguluhan at Korum ng Labindalawang Apostol ang may hawak ng lahat ng awtoridad at mga susi ng priesthood na kailangan upang pamahalaan ang Simbahan ng Panginoon. Napakahalaga nito lalo na sa bawat isa sa atin na gustong maging mas mabuti at mas mapalapit kay Cristo.

Tungkol sa kahalagahan ng pagsisimba para sa lahat ng mga “relihiyosong tao,” sinabi ni Pangulong Dallin H. Oaks ng Unang Panguluhan, “Ang pagdalo at aktibidad sa simbahan ay tumutulong sa atin na maging mas mabubuting tao at mabubuting impluwensya sa buhay ng iba” (“Ang Pangangailangan para sa Isang Simbahan,” Liahona, Nob. 2021, 24). Pagkatapos ay sinabi niya:

Pangulong Dallin H. Oaks

Pinatototohanan natin na ang mga banal na kasulatan, noon at ngayon, ay malinaw na nagtuturo ng pinagmulan at pangangailangan para sa isang simbahan na pinamumunuan ng ating Panginoong Jesucristo at sa pamamagitan ng Kanyang awtoridad. Pinatototohanan din natin na ang ipinanumbalik na Simbahan ni Jesucristo ay itinatag upang ituro ang kabuuan ng Kanyang doktrina at gamitin ang Kanyang awtoridad ng priesthood upang maisagawa ang mga ordenansang kinakailangan para makapasok sa kaharian ng Diyos [tingnan sa Juan 3:5]. Ang mga miyembrong hindi dumadalo sa Simbahan at umaasa lamang sa sariling espirituwalidad ay inihihiwalay ang kanilang sarili sa mahahalagang bahaging ito ng ebanghelyo: ang kapangyarihan at mga pagpapala ng priesthood, ang kabuuan ng ipinanumbalik na doktrina, at ang mga motibasyon at oportunidad na ipamuhay ang doktrinang iyon. Nawala sa kanila ang pagkakataon na maging karapat-dapat sa walang hanggang pagsasama ng pamilya. (“Ang Pangangailangan para sa Isang Simbahan,” Liahona, Nov. 2021, 25)

ordinasyon sa priesthood

Itinuro ni Elder Robert D. Hales ng Korum ng Labindalawang Apostol:

Elder Robert D. Hales

Kung ang kapangyarihan ng priesthood ay wala sa mundo, ang kaaway ay magkakaroon ng kalayaang gumala at maghari nang walang pasubali. Walang kaloob ng Espiritu Santo na papatnubay at magbibigay-liwanag sa atin; walang mga propetang mangungusap sa ngalan ng Panginoon; walang mga templo kung saan natin magagawa ang mga sagrado at walang-hanggang tipan; walang awtoridad na magbabasbas o magbibinyag, magpapagaling o magpapanatag. (“Blessings of the Priesthood,” Ensign, Nob. 1995, 32)

icon, pagnilayan

Magnilay-nilay upang Makapaghanda para sa Klase

Paano mo ipaliliwanag sa isang taong hindi miyembro ng ating Simbahan ang mga natatanging pagpapala na matatamo ng mga miyembro ng Ang Simbahan ni Jesucristo ng mga Banal sa mga Huling Araw?

Bahagi 2

Paano ako mapagpapala at ang iba ng aktibong pagdalo at pakikibahagi sa Simbahan?

Ganito ang itinuro ni Elder D. Todd Christofferson ng Korum ng Labindalawang Apostol tungkol sa mga pagpapala ng pagdalo at pakikibahagi sa Simbahan:

Elder D. Todd Christofferson

Mahalagang malaman na ang pinakalayunin ng Diyos ay ang ating pag-unlad. … Hindi lamang kailangan niyan ang simpleng kabaitan o espirituwal na pakiramdam. Kailangan nito ang pananampalataya kay Jesucristo, pagsisisi, binyag sa tubig at ng Espiritu, at pagtitiis nang may pananampalataya hanggang wakas. Hindi ito lubos na makakamtan nang nag-iisa, kaya ang isang pangunahing dahilan kung bakit may simbahan ang Panginoon ay upang lumikha ng isang komunidad ng mga Banal na susuportahan ang isa’t isa sa “makipot at makitid na landas na patungo sa buhay na walang hanggan” [2 Nephi 31:18]. (“Bakit Kailangan ang Simbahan,” Liahona, Nob. 2015, 108)

Itinuro ni Apostol Pablo kung paano tayo pinalalakas at mas inilalapit kay Jesucristo ng pagiging bahagi natin sa komunidad ng mga Banal.

icon, pag-aralan

Mag-aral upang Makapaghanda para sa Klase

Basahin ang Efeso 4:11–14, at maaari mong markahan ang iba’t ibang paraan na mapagpapala ang iyong buhay ng pagdalo at pakikibahagi sa Simbahan ng Panginoon.

Ipinaliwanag din ni Elder Christofferson na ang mga karanasan kasama ang iba pang mga miyembro ng Simbahan ay nagbibigay sa atin ng mga kinakailangang pagkakataon na ipamuhay ang ebanghelyo ng Panginoon:

Elder D. Todd Christofferson

Bilang bahagi ng katawan ni Cristo, ang mga miyembro ng Simbahan ay naglilingkod sa isa’t isa sa totoong mga nagaganap sa buhay sa araw-araw. Lahat tayo ay hindi perpekto; maaari tayong makasakit o masaktan. Madalas na isang pagsubok sa atin ang pagkakaiba-iba ng ating ugali. Sa katawan ni Cristo, hindi sapat na pinag-aaralan lang natin ang mga konsepto at mga banal na salita kundi dapat nating “aktuwal” na ipamuhay ito habang tayo ay natututong “mamuhay nang magkakasama sa pag-ibig” [Doktrina at mga Tipan 42:45]. (“Bakit Kailangan ang Simbahan,” Liahona, Nob. 2015, 108)

icon, isulat

Isulat ang Iyong mga Naisip

Maaari tayong magkaroon ng “aktuwal” na karanasan sa pagtatayo ng kaharian ng Panginoon sa pamamagitan ng mga tungkulin sa Simbahan, mga ministering assignment, paglilingkod sa kapwa, o pagkatutong makihalubilo sa mga taong naiiba sa atin. Isipin ang “aktuwal” na mga naranasan o nararanasan mo sa iyong ward o branch. Pumili ng isang karanasan at isulat kung paano ito nakatulong sa iyo na ipamuhay ang mga turo ng ebanghelyo at maging higit na katulad ni Jesucristo. Kung hindi ka nagsisimba, isiping itala kung paano ka mapagpapala at ang mga miyembro sa inyong ward o branch kung magsisimula kang magsimba.

Bahagi 3

Ano ang maaari kong gawin para matulungan ang aming ward o branch na maging magiliw sa lahat ng tao?

Isipin kung ano ang pakiramdam na pakitunguhan ka nang magiliw at taos-puso kapag dumadalo ka sa simbahan. Kailan mo tinulungan ang isang tao sa inyong ward o branch na madama iyon?

dalawang taong nag-uusap sa simbahan

icon, pag-aralan

Mag-aral upang Makapaghanda para sa Klase

Itinuro ni Moroni ang kahalagahan ng pakikipagkaibigan sa Simbahan. Basahin ang Moroni 6:4–5, at isipin kung paano ka makatutulong para madama ang pagiging kabilang sa inyong ward o branch.

Isipin ang sumusunod na halimbawa ng pakikipagkaibigan na ibinahagi ni Sister Carole M. Stephens, dating tagapayo sa General Relief Society Presidency:

Sister Carole M. Stephens

[Si Maria ay] maraming kaibigan na di-gaanong aktibo o kaya’y hindi pa naririnig ang mensahe ng ipinanumbalik na ebanghelyo ni Jesucristo. Bawat araw ay nananampalataya siya at ipinagdarasal na malaman kung sino ang nangangailangan ng tulong niya, at saka siya kumikilos ayon sa pahiwatig na natatanggap niya. Tumatawag siya sa telepono, nagpapahayag ng pagmamahal, at sinasabi niya sa kanyang mga kaibigan, “Kailangan ka namin.” May family home evening siya sa apartment niya linggu-linggo at inaanyayahan ang mga kapitbahay, miyembro, at missionary—at pinakakain sila. Inaanyayahan niya silang magsimba, inaabangan sila, at tinatabihan sila kapag dumarating sila. (“May Malaking Dahilan Tayo para Magalak,” Liahona, Nob. 2013, 116)

icon, kumilos

Magnilay-nilay upang Makapaghanda para sa Klase

Sino sa inyong ward o branch ang mapagpapala ng pakikipagkaibigan mo? Ano ang gagawin mo para matulungan silang madama ang pagmamahal ng Tagapagligtas kapag dumadalo sila sa simbahan? Panoorin ang “Inviting Others to ‘Come and Stay’ [Anyayahan ang Iba na ‘Lumapit at Manatili’]” (1:39) para sa mga halimbawa kung paano makipagkaibigan o mag-fellowship. (Paunawa: Bagama’t wala nito sa inyong wika, ang video na ito ay mapapanood mo sa wikang Ingles para magamit mo kung makatutulong.)

Gusto Mo Bang May Matutuhan Pa? (Opsiyonal)

Ano ang ilan pang mga dahilan kung bakit kailangan natin ang ipinanumbalik na Simbahan ni Jesucristo?

Ang mga sumusunod na mensahe sa kumperensya, na binanggit sa lesson na ito, ay nagbibigay ng ilang karagdagang dahilan kung bakit mahalaga ang Simbahan ng Panginoon sa ating pag-unlad at kakayahang ilapit ang ating sarili at ang iba sa Tagapagligtas:

• Pangulong Dallin H. Oaks

  Mensahe ni Pangulong Oaks: “Ang Pangangailangan para sa Isang Simbahan” (Liahona, Nob. 2021, 24–26)

• Elder D. Todd Christofferson

  Mensahe ni Elder Christofferson: “Bakit Kailangan ang Simbahan,” (Liahona, Nob. 2015, 108–11)

Saan ko malalaman pa kung paano pinagpapala ng awtoridad at mga susi ng priesthood ang ating buhay?

Pangulong Julie B. Beck

Sa mensaheng “Pagbuhos ng mga Pagpapala” (Liahona, Mayo 2006, 11–13), ibinahagi ni Pangulong Julie B. Beck, dating Relief Society General President, ang mga pagpapalang matatanggap natin sa pamamagitan ng priesthood.

Pangulong Russell M. Nelson

Tinukoy ni Pangulong Russell M. Nelson ang pagkakaiba ng awtoridad ng priesthood at ng mga susi ng priesthood sa kanyang mensaheng “Mga Susi ng Priesthood” (Liahona, Okt. 2005, 26–30). Ang natatanging pag-iral ng awtoridad at mga susing ito sa Simbahan ni Cristo ay nagtutulot sa Panginoon na patuloy na pagpalain at dalhin ang bawat isa sa atin sa Kanya.

Saan ko malalaman pa ang tungkol sa naitutulong ng kababaihan sa Simbahan?

Pangulong Russell M. Nelson

Sa mensaheng “Isang Pakiusap sa Aking mga Kapatid na Babae” (Liahona, Nob. 2015, 95–98), tinalakay ni Pangulong Nelson ang kapangyarihan ng mga tinig, lakas, karunungan, at pananalig ng kababaihan.

Ano ang maaari kong gawin para maging mas magiliw ako sa pagtanggap sa iba sa aming branch o ward?

Sa 1 Corinto 12:12–25, itinuro ni Apostol Pablo kung paano tayong lahat ay kinakailangan sa Simbahan ng Panginoon.

Para malaman pa kung paano maging mas magiliw sa mga tao sa inyong ward o branch, basahin ang artikulong “Paano Tayo Makalilikha ng Isang Kultura na Kabilang ang Lahat sa Simbahan?” (Liahona, Hulyo 2019, 8–11).