Lesson 9 Materyal ng Titser

Nagagalak sa Banal na Pagsilang ni Jesucristo

Tulad ng ipinahayag ng isang anghel, ang pagsilang ni Jesucristo ang dahilan ng “malaking kagalakan” (Lucas 2:10). Sa lesson na ito, magkakaroon ang mga estudyante ng pagkakataong ipaliwanag kung bakit mahalaga ang mga natatanging magulang ni Jesucristo sa pagiging Tagapagligtas Niya. Aanyayahan din ang mga estudyante na ibahagi ang kanilang nadarama tungkol sa banal na pagmamahal na ipinakita ng pagpapakababa ng Diyos at kung paano makaiimpluwensya ang pagmamahal na iyan sa mga pagpiling ginagawa nila.

Mga Mungkahi sa Pagtuturo

Nalaman ni Maria na magiging ina siya ng Anak ng Diyos.

Idrowing sa pisara ang sumusunod na diagram, at anyayahan ang ilang estudyante na magbahagi ng mga katangiang namana nila sa kanilang mga magulang.

Sabihin sa mga estudyante na rebyuhin ang Lucas 1:30–35 at alamin kung paano inilarawan ng anghel na si Gabriel ang anak na isisilang ni Maria.

Pagpapahusay ng Ating Pagtuturo at Pag-aaral

Iwasang magbigay ng haka-haka. Huwag talakayin sa mga estudyante ang mga paksa ng doktrina na hindi pinili ng mga propeta at apostol na ituro o ang tungkol sa mga ito na wala silang ibinigay na opisyal na pahayag. Halimbawa, nagbabala ang mga lider ng Simbahan laban sa pagbibigay ng mga haka-haka tungkol sa kung paano ipinaglihi ang Tagapagligtas (tingnan sa The Teachings of Harold B. Lee, ed. Clyde J. Williams [1996], 14). Sa gayong mga sitwasyon, makabubuting sabihin na lang natin na hindi natin alam o hindi pa naihahayag ang impormasyong iyon. Magtuon sa nalalaman natin at kung ano ang mapagtitibay ng Espiritu Santo bilang katotohanan sa puso ng mga estudyante.

Idrowing ang kalakip na diagram sa pisara.

Upang matulungan ang mga estudyante na pag-isipan ang kahalagahan ng mga natatanging magulang ni Jesucristo, maaari mong itanong ang ilan sa mga sumusunod:

• Anong mga natatanging katangian ang namana ni Jesucristo kay Maria? sa Ama sa Langit?

• Paano nauugnay ang mga natatanging magulang ni Jesucristo sa Kanyang Pagbabayad-sala at Pagkabuhay na Mag-uli? (Bilang bahagi ng talakayan, maaari mong rebyuhin sa mga estudyante ang Juan 10:17–18 at ang pahayag ni Pangulong Russell M. Nelson sa bahagi 1 ng materyal sa paghahanda. Tulungan ang mga estudyante na matukoy ang katotohanang tulad ng sumusunod: Dahil sa Kanyang mga natatanging magulang, si Jesucristo ay may kapangyarihang magbayad-sala para sa ating mga kasalanan at ialay ang Kanyang buhay at kunin itong muli.)

Upang matulungan ang mga estudyante na pag-isipan nang mas malalim ang doktrinang ito, maaari mong sabihin sa kanila na isulat ang kanilang mga naisip at impresyon tungkol sa mga tanong na ito:

• Ano ang maituturo sa inyo ng dalawang katangiang ito ni Jesucristo tungkol sa Kanyang kakayahang makaugnay sa inyo sa mortalidad?

• Paano nauugnay sa isa’t isa at sa inyo ang mga parirala sa pangungusap na ito mula sa “Ang Buhay na Cristo: Ang Patotoo ng mga Apostol” (makukuha sa SimbahanniJesucristo.org): “[Si Jesucristo] ang Panganay ng Ama, ang Bugtong na Anak sa laman, ang Manunubos ng daigdig”?

Nakita ni Nephi sa pangitain ang pagpapakababa ng Diyos.

Maaari mong idispley ang mga sumusunod na larawan ni Jesus bilang Tagapaglikha ng daigdig, bilang isang walang-lakas na sanggol, at bilang nilalang na nakapako sa krus. Itanong sa mga estudyante kung ano ang itinuturo ng mga larawang ito tungkol sa pagpapakababa ni Jesucristo. Kung kinakailangan, basahin ang kahulugan ng pagpapakababa na matatagpuan sa bahagi 2 ng materyal sa paghahanda.

Upang maipagpatuloy ang talakayang ito, maaari mong ayusin ang mga estudyante sa maliliit na grupo at bigyan ang bawat grupo ng kopya ng sumusunod na handout.

Ang Pagpapakababa ng Diyos

Manwal ng Titser para sa Kursong Si Jesucristo at ang Walang Hanggang Ebanghelyo—lesson 9

Hatiin sa inyong grupo ang mga sumusunod na assignment na babasahin. Habang nagbabasa kayo, alamin kung paano kusang bumaba ang Panginoon sa mas mababang katayuan mula sa mas mataas na kalagayan.

1. Abraham 3:24–25, 27; Filipos 2:7–8

2. 1 Nephi 11:14–22

3. 1 Nephi 11: 26–27, 31–33

4. Ang mga pahayag nina Pangulong Tad R. Callister at Elder D. Todd Christofferson sa bahagi 2 ng materyal sa paghahanda at ang sumusunod na pahayag ni Sister Wendy Ulrich, dating miyembro ng Relief Society general advisory council:

[Ang Tagapagligtas] ay isinilang bilang isang walang-lakas na sanggol na may katawang mortal at pinalaki ng di-perpektong mga [magulang]. Kinailangan niyang matutong lumakad, magsalita, magtrabaho, at makisama sa iba. Siya ay nagutom at napagod, nadama ang nadarama ng tao, at maaaring magkasakit, magdusa, labasan ng dugo, at mamatay. (“Hindi Kasalanan ang Maging Mahina,” Liahona, Abr. 2015, 33)

Pagkatapos ay talakayin nang magkakasama ang mga sumusunod na tanong:

• Ano ang itinuturo sa atin ng mga nabasa natin tungkol sa pagpapakababa ni Jesucristo?

• Ano ang itinuturo sa atin ng pagpapakababa ni Jesucristo tungkol sa pagmamahal ng ating Tagapagligtas at ng ating Ama sa Langit para sa atin? Paano nakaiimpluwensya ang pagmamahal Nila sa inyo sa pagmamahal ninyo sa Kanila?

© 2023 ng Intellectual Reserve, Inc. All rights reserved.

Ang Pagpapakababa ng Diyos

Manwal ng Titser para sa Kursong Si Jesucristo at ang Walang Hanggang Ebanghelyo—lesson 9

Matapos ang sapat na oras para sa talakayan, maaari ninyong ipahayag at ibahagi ang inyong nadarama tungkol sa sumusunod na pahayag: Ang pagpapakababa ni Jesucristo ay nagpapakita ng pagmamahal ng Ama sa Langit at ni Jesucristo para sa bawat isa sa atin.

• Ano ang matututuhan natin mula sa Tagapagligtas sa Kanyang halimbawa ng pagpapakababa upang tulungan ang pinakamaliit sa atin? (Kung kinakailangan, maaaring rebyuhin ng mga estudyante ang pahayag ni Bishop Richard C. Edgley sa bahagi 2 ng materyal sa paghahanda. Maaari ding pag-isipan sandali ng mga estudyante kung paano nila matutularan ang halimbawa ng Tagapagligtas kapag hinangad nilang magministeryo at maglingkod sa lahat ng anak ng Ama sa Langit.)

Ipaalala sa mga estudyante na sa bahagi 2 ng materyal sa paghahanda, inanyayahan silang magbasa o makinig sa mga titik ng mga himno na naglalahad ng tungkol sa pagpapakababa ng Tagapagligtas. Maaaring rebyuhin ng mga estudyante ang isa sa mga himno at pagkatapos ay ibahagi sa klase ang mga salita at parirala mula sa himno na lubos na nakaantig sa kanila. Kung may oras pa, maaari din ninyong kantahin nang magkakasama ang isa o dalawang talata mula sa mga himnong ito.

Upang matulungan ang mga estudyante na maipamuhay ang natutuhan at nadama nila sa klase, sabihin sa kanila na pagnilayan at isulat ang kanilang mga sagot sa sumusunod na tanong o sa tanong na pinili mo:

• Ano ang maaari mong gawin upang maipakita sa Tagapagligtas ang iyong pasasalamat para sa Kanyang kahandaang magpakababa upang matubos at maligtas ka Niya?

Para sa Susunod

Upang maipaalala sa mga estudyante na pag-aralan ang materyal sa paghahanda para sa susunod na klase, maaari mong ipadala ang sumusunod na mensahe o ang isa sa ginawa mong mensahe: Ano ang prayoridad ng Tagapagligtas sa iyong buhay sa linggong ito? Isipin kung paano makatutulong sa iyo ang materyal sa paghahanda para sa lesson 10 upang masagot ang tanong na ito.