Fesoasoaniga mo le Faiaoga

Tusi Lesona ma le Taimi o Fetufaaiga a le Peraimeri

Faamoemoega

Na tusia lenei tusi lesona ina ia fesoasoani ia te oe i le aoaoina o tamaiti e faapea o le mulimuli i faataitaiga a Iesu Keriso, e mafai ai ona latou filifili le mea tonu, papatisoina, ma avea ma tagata o le Ekalesia a Iesu Keriso o le Au Paia o Aso e Gata Ai.

Savali i Faiaoga o le Peraimeri

Ua tuuina atu e lo tatou Tama oi le Lagi se valaauga paia e aoao ai fanau i le talalelei a Iesu Keriso ma fesoasoani ia te i latou e aoao ina ia ola ai. Aʻo e auauna atu i tamaiti ma valaaulia i latou taitoatasi ina ia “o mai ia Keriso,” o le a e faamanuiaina o latou olaga. E mafai ona e fesoasoani ia te i latou e amata ona malamalama i faamanuiaga a le Tama Faalelagi ma maua ni molimau o lana talalelei. O le a e tuputupu aʻe foi oe lava ma aoao mai i tamaiti. O lau auaunaga i le Peraimeri e mafai ai ona aumaia le olioli tele ia te oe. O lau auauna atu i fanau o le Peraimeri, o lou auauna atu lava lea i le Tama Faalelagi (tagai i le Mosaea 2:17).

Aʻo e ola ai i mataupu faavae o le talalelei, ia suesue i tusitusiga paia, mulimuli i fautuaga a taitai o le perisitua, ma faalatalata atu i le Tama Faalelagi e ala i le tatalo, o le a e mauaina ai musumusuga mai le Agaga Paia e uiga i fanau o lo o e aoaoina. Ia tuuina atu soo lau molimau i tamaiti, ma ia tuu atu e galue le Agaga Paia i totonu ia te oe e ala i lenei valaauga taua. A faapea ona e faia, o le a taitaiina oe e le Agaga ina ia e faia mea uma o lo o faanaunau iai le Tama Faalelagi ina ia faia i lana fanau.

Faamatalaga mo Vasega

O le talita a le FMT, o lo o maua i luma o lenei tusi lesona, ma le mama a le FMT o lo o faaaogaina i le tele o lesona. O le FMT o lona uiga o le “Filifili Mea Tonu.” O le mama a le FMT o lo o taʻua i le tele o lesona ma gaoioiga e faamauoa mai ai ma ua avea o se faamanatu i le tagata e ona le mama ina ia filifili mea tonu. Afai e maua le mama a le FMT i lo outou eria, ia talosaga atu i le epikopo po o le peresitene o le paranesi mo se tupe e faatau mai ai ni mama mo tamaiti taitoatasi.

Taimi o le Vasega

Tatalo

Ia amataina ma faaiuina vasega taitasi i le tatalo. Ia tuuina atu pea i tamaiti taitoatasi avanoa faifai pea e faia ai se tatalo. Ia avea le tatalo ma se vaega taua o le vasega i le tuuina atu lea o faatonuga ma fautuaga mo tatalo ma le fesili atu i tamaiti mo nisi manatu ia aofia ai i le tatalo. Ia taulaʻi atu na fautuaga i mea o lo o moomia e le vasega ma le savali o le lesona.

Aoaoina atu o le lesona

Ia saunia ma le faaeteete ma le agaga tatalo ia lesona taitasi ina ia malamalama ai tamaiti ma fiafia iai ma ia maua ai foi e oe le taitaiga a le Agaga. Aua le faitauina atu le lesona i tamaiti. O le a sili atu lo latou tali mai pe a e tuuina atu i ni au lava upu.

Filifili mai mea e faaaoga i le lesona ni mea e talafeagai lelei mo lau vasega. O gaoioiga e faamauoa mai ai o lo o lisiina atu i le faaiuga o lesona taitasi e faaaogaina i le taimi e tuuina atu ai le lesona pe a e vaai atu e fetaui. E le o mea uma e faaaoga i le lesona poo gaoioiga uma e faamauoa mai ai o le a talafeagai mo lau vasega. Filifili na o mea na o le a talia lelei e lau vasega. Afai e iai ni tamaiti laiti ifo i lau vasega, atonu e te manao e faaaoga pea e le aunoa ia pese ma gaoioiga e faia i lima e fesoasoani ai e faagauaʻi mai ai i latou. Atonu e te manao e usu so o se fuaiupu e fai ni taga pe afai o lo o fiafia iai tamaiti. A le faaaogaina ia lisi o upu mo tamaiti laiti, atonu e tatau ona e tusia ni ata po o le ʻotiʻoti mai foi o ni ata mai ni mekasini o lo o faaalia mai ai le aoaoga o lo o tuuina mai i lisi o upu.

O le tusi lesona o le Aoao Atu-E leai se Isi Valaauga E Sili Atu (33043 890) |e mafai ona fesoasoani atu ia te oe i le aoaoina atu o lesona.

Ia le aunoa ona tuuina atu sau molimau puupuu ina ia mananao ai tamaiti o le vasega e faalogologo ma tali atu ma le Agaga i le savali o le talalelei.

Musika i le Potuaoga

E mafai e musika ona aumaia le Agaga o le Alii i totonu o le potuaoga. O le usuina faatasi e le vasega o se pese e mafai ai ona fesoasoani i tamaiti ina ia latou manatua lelei vaega o le lesona ma avea ai lau lesona o se lesona sili ona manaia.

O upu o pese o lo o faaaogaina soo i lenei tusi lesona, o lo o lomia i le pito i tua o le tusi lesona. O upu o pese e na o le faatasi ona faaaogaina i le tusi lesona, o lo o aofia atu lava i totonu o le lesona. O fati o nei pese e mafai ona maua i le Tusipese a Tamaiti (35395). O fati ua uma ona puʻeina mai le Tusipese a Tamaiti o lo o maua i kaseti faalogologo (na o le fati, 52505; fati ma upu, 52428) ma le tisiketi (na o le fati, 50505; fati ma upu, 50428).

E le seiloga o oe o se tagata tomai i musika ona mafai lea ona avea le usuina o musika i le potuaoga ma mea faafiafia loto. Faataitai ma aoao ia pese i le fale e avea o se vaega o sauniuniga o le lesona. Afai e te manaomia se fesoasoani faapitoa, ia fesili atu i le taitai pese poo le ta piano mo se fesoasoani. (Mo se fesoasoani faaopoopo, tagai i “Musika i le Potuaoga,” O le Tusi o Auala e Aoao ai Fanau [31109], itulau 40-42.)

Atonu e te manao e faaaoga ni taga e talafeagai ai ma pese, aemaise lava pe afai e iai ni tamaiti laiti. Atonu e mafai foi ona e faitauina atu upu nai lo le usuina.

Mataupu Faavae o le Faatuatua

O Mataupu Faavae o le Faatuatua o se vaega taua lea o mataupu aoaoina a le Peraimeri. Ia uunaiina tamaiti taitoatasi o ē mafai ona taulotoina uma poo se vaega o se mataupu faavae o le faatuatua o lo o faaaogaina i le lesona.

Tusitusiga Paia

Aumai au tusitusiga paia i le vasega i vaiaso taitasi, ma ia vaai atu tamaiti o lo o e aoao ma faitau mai ai. Afai e iai ni tusitusiga paia a tamaiti lava latou, ia uunaiina i latou ina ia aumaia i le vasega i vaiaso taitasi. Fesoasoani i tamaiti matutua e suʻe ma faitau fuaiupu o lo o faaaogaina i le lesona. Ia tuuina atu lau molimau i nisi taimi i le taua o tusitusiga paia.

O mea e faaaoga mo le aoaoga

Ata. O le tele o ata e faaaogaina i lesona ua faanumeraina ma o lo o iai i se teutusi o lo o aveatu faatasi ma le tusi lesona. O nei ata e tatau ona teuina pea i totonu o le tusi lesona. O se numera a le potu tusi o lo o lisiina atu i lesona mo ata lapopoa atonu o lo o mafai ona maua i le potu tusi o la outou falelotu. O se numera o le Taga Ata o le Talalelei o lo o lisiina atu foi mo ata na o lo o aofia ai i totonu o le pusa lena.

Musika. Tagai i “Musika i le Potuaoga” o lo o i luga aʻe.

Ata Tipi o Fesoasoani Faitino. Ia faaaogaina lelei ata tipi i lesona e talafeagai ai. Ia teuina pea i totonu o le tusi lesona.

Meaai. Soo se taimi lava e taʻua ai meaai i se lesona, faamolemole ia siaki muamua i matua o tamaiti ina ia mautinoa e leai se tamaititi e afaina i meaai.

O isi fesoasoani mo le aoaoga. O le a manaomia oe ina ia e faia nisi mea faigofie e aoao atu ai o lo o fautuaina atu i le lesona, e pei o upu e tusia i fasi pepa, siata, ma pepa e tufaina atu. Ia teu lelei nei fesoasoani mo le toe faaaogaina i isi lesona o lo o i luma atu faapea ma tausaga o lo o lumanai ai.

Taimi o Fetufaaiga

O le a valaaulia mai lea taimi i lea taimi lau vasega e tuuina atu se mataupu faatalalelei faigofie i le taimi o fetufaaiga a le Peraimeri. O ia mataupu e tatau ona aumaia mai lesona. Vaavaai manatu talafeagai mo le taimi o fetufaaiga a o sauniuni ma tuuina atu au lesona. E mafai foi ona e filifili mai se mataupu faavae mai le polokalama o le sauniga faamanatuga o lo o iai nei a le Peraimeri.

O le aoaoina atu e tamaiti o se mataupu faavae i le taimi o fetufaaiga o se auala lelei lea e fesoasoani ai ia te i latou e aoaoina ma fetufaai lena mataupu faavae. E mafai ona e faaaogaina le taimi o le vasega e aoaoina ai lea sauniuniga.

Ia mautinoa o le a faigofie ma o le a lē tele se taimi e faataitai ai le sauniuniga o le a tuuina atu i le taimi o fetufaaiga. Atonu e fesoasoani fautuaga nei i lou tuuina atu o se sauniuniga faigofie ma le lelei:

Faatino se tala po o se tulaga mai le lesona.
Faaali atu ma faamatala le siata o le “Avea ma Tagata o le Ekalesia a Iesu Keriso” (tagai i le lesona 7).
Ia tuu atu i tamaiti e faaali mai o latou lagona e tusa ma o latou papatisoga o le a oo mai. Afai ua iai se tamaititi ua aulia le valu o ona tausaga ma ua papatisoina, fai atu ia te ia e fetufaai mai ona lagona e tusa ma lona papatisoga.
Faamatala se tala mai se lesona i le faaalia lea o ata, upu tusia i luga o pepa, poo ata tipi.
Toe fai ma faamatala atu se mataupu faavae o le faatuatua. Atonu e te manao foi e usu se pese o mataupu faavae o le faatuatua mai le Tusipese a Tamaiti, itulau 122-33.

Mo se isi fesoasoani faaopoopo, tagai i le Tusi Lesona a le Peraimeri mo Taimi o Fetufaaiga (33231 890).

Fetufaai ma Aiga o Tamaiti

Ia uunaiina tamaiti e fetufaai ma o latou aiga mea na latou aoaoina i le Peraimeri. Ia valaaulia matua e asiasi atu ma auai i lau vasega mai lea taimi i lea taimi ina ia faamauʻoaina ai ia lesona. Ia talia ni fautuaga mai matua e te manatu o le a fesoasoani i le faaleleia atili o le Peraimeri mo a latou fanau.

Sauniuniga mo Papatisoga

Afai e iai ni tamaiti ua taʻifitu tausaga i lau vasega, o nisi o i latou o le a papatisoina i se taimi o le tausaga. I le avea ai o oe ma so latou faiaoga o le Peraimeri, e mafai ona e lagolagoina aiga o tamaiti ma fesoasoani i tamaiti ina ia saunia i latou mo o latou papatisoga. Mafaufau i nisi nei o fautuaga ina ia fesoasoani ai ia te oe i le faataunuuina o lea vaega:

Afai e talafeagai ai, ia aoao atu nisi o lesona e faatatau i le papatisoga (lesona 11, 13, 21, 32, ma le 33) aʻo leʻi papatisoina le tamaititi muamua o lau vasega.
Faaalu ni nai minute o le taimi o le vasega i le Aso Sa aʻo lumanai papatisoga o tamaiti taitoatasi ina ia talanoaina ai le taua o lenei sauniga.
Afai e talafeagai ai, ia outou auai atu ma se tasi o le au peresitene o le Peraimeri ma soo se tasi lava o le vasega i papatisoga o tamaiti uma taitoatasi.
Fesoasoani i tamaiti e faia a latou sauniuniga e uiga i papatisoga mo taimi o fetufaaiga.

Malamalama i Tamaiti

O lou valaauga e aoao atu le talalelei a Iesu Keriso o se faatuatuaga paia ua tuuina atu ia te oe e auala atu i le au epikopo poo le au peresitene o le paranesi. E mafai ona e matuai uunaia lava tamaiti ina ia mulimuli atu i le Faaola i o latou olaga atoa. Ia manatua, ua valaauina oe e taitai o le perisitua e ala i musumusuga mai le Tama Faalelagi.

Ia faaalia pea ou uiga tausaafia ma le alofa mo tamaiti i taimi uma. Ia e faamasani i taleni a tamaiti taitoatasi, o mea e fiafia iai, ma mea latou te mafaia. Ia faafetaui gaoioiga o lesona e manaomia ai le faitau ma le tusitusi i mea e mafaia e tamaiti.

Fesoasoani i tamaiti uma ina ia faatupuina se lagona o le tauaogaina e ala lea i lou faalogo atu ia i latou ma lou gauai atu iai ma le atoatoa uma pe a talafeagai ai.

O nei lesona ua tusiaina mo vasega e tutusa tausaga pe faafefiloi foi tausaga o tamaiti mai le fa e oo atu i le fitu tausaga le matutua. Ae peitai, e mafai ona e faafetauiina lesona e fuafua i tausaga o tamaiti o lau vasega. E tusa lava poo le a le faatulagaina o lau vasega, ae o le malamalama lelei i uiga o le matutua o tamaiti o le a fesoasoani tele lea ia te oe ina ia lelei lau aoao atu. E mafai ona fesoasoani lenei vaega ia te oe ina ia e iloa ai mafuaaga o amioga a tamaiti ma pe faapefea foi ona aoao atu i latou i se auala sili o le a latou aoao mai ai. O le malamalama lelei i tamaiti o le a fesoasoani foi lea ia te oe ina ia faatumauina ai se lagona lelei i totonu o le potuaoga. Iloilo mea nei a o saunia au lesona. Ae peitai, ia manatua, e matua lava ma tuputupu aʻe le tamaititi ia i lona lava taimi. O nei vaega ua na o ni taiala lautele.

Taʻifa tausaga le matutua

O le fa o tausaga o le taimi lea o le sailiili. O le aisea ma le faapefea o upu nei e lua e masani lava ona faaaogaina e le taʻifa tausaga. O le taʻifa tausaga o le vaega lea e faatinoina se mea ma e ese le tiotio. O lo o faaalia atu i lalo ni uiga lautele o le taʻifa tausaga:

E mafai ona latou tamomoe, tulioso, ma faigofie ona feaei ma le mautinoa nai lo le taʻitolu tausaga.
E mafai ona togi pe kiki se polo ma fausia se fale i poloka.
E fiafia tele i le faia o tala e pei o le “Sa ou faia muamua foi lena mea; E mafai ona faia se isi mea e ese mai ai i le taimi nei.”
E mananao latou te taaalo ma isi tamaiti ae latou te leʻi saunia e fegalegaleai ma se vaega toatele.
E ui lava ina mananao ma moomoo e taaalo ma isi tamaiti, ae mafuli lava i le taalo o le tagata lava ia na o ia. Atonu latou te taufetuli pe sisiva i se musika ma se vaega, ae le tele so latou naunau pe faapefea ona taaalo isi tamaiti.
I le faaopoopo atu iai i le tele o fesili e fai atu, e mafai ona latou faaauauina se talanoaga ma se tagata matua poo se isi foi tamaititi.
Talu ai o le tele o lo latou malamalama ma le iloa o le aiga, e tele lava ina latou talanoa e uiga i le fale ma le aiga. O tamaiti i le matutua lea e fiafia tele e faamatala atu i le faiaoga e uiga i o latou aiga. E masani lava ona sili atu ia i latou le faamatalaina atu o a latou lava tala nai lo le faalogo atu i tala a isi tamaiti. E fiafia tele i latou i lesona ma gaoioiga e faaautu i le aiga.
E matuai ola lava iinei i le taimi nei. O ananafi ma le asō e leai se taua tele ia i latou. Peitai, latou te faaalia lo latou fiafia i mea o le a tutupu, ma talu ai e le mafai ona latou malamalama i le uiga o le taimi, o lea o le a latou fesilisili ai mo mea o le a tutupu i le lumanai, “O taeao?”
Latou te fiafia e faalogologo i tala ma pese a tamati laiti. E fia faalogologo pea lava pea i tala latou te fiafia iai e aunoa ma sina suiga laitiiti. A maea ona faalogologo i le tala, ona latou mananao lea e faatino i taga tagata o lo o iai i le tala.
E mafai ona latou aoao e tatalo faatasi ai ma sina fesoaosani laitiiti.

Taʻilima Tausaga le Matutua

O tamaiti ua taʻilima tausaga ua agai atu ina latou mautinoa i latou lava ma ua mafai ona le faalagolago i nisi. Ua latou aoaoina e faia mea ua faamoemoeina latou te faia i le fale. Latou te taaalo lelei foi ma isi tamaiti, ae e mafai foi ona latou faafiafiaina i latou lava i le tele o auala, e pei o le tafue solo poo le tusitusi o ata. O vaega nei o lo o taʻua i lalo o uiga masani ia mo le vaega ua taʻilima tausaga le matutua:

O le uaua tele o lo o fesootai ai ua faasolosolo ina faaleleia. Ua mafai nei ona latou tafue, tatafiti, ma osooso tusa foi pe tasi le vae. Ua faigofie ma ua mafai ona latou tosoina se taavale toso.
O uaua laiti o lo o fesootai ai ua mafai ai ona latou faapipii, ʻotiʻoti ni ata, ma valivali ni ata ua uma ona tusia, e ui lava ina faigata ia te i latou ona alu tonu i luga o le laina. O le toatele ua mafai foi ona latou nonoaina o latou lava seevae.
E sili atu ona le faalagolago i nisi ma tutoatasi i latou nai lo le taʻifa tausaga. E masani ona fiafia i feau i le fale ma e fiafia tele pe a latou galulue faatasi ma o latou matua.
E faamaoni pe a latou fesili mai, “O le a le mea e faaaoga iai lena mea?” poo le “E faapefea ona faaaoga lea mea?” Latou te mananao ma e tatau ona latou mauaina ni tali faamaoni ma saʻo, ae le o se gagana auiliili latou te le malamalama ai.
E alolofa i o latou faiaoga, ma latou te manatu o se matuai faamanuiaga lava pe a latou nonofo i o latou tafatafa. E fiafia lava pe a fesili atu faiaoga ia i latou e fesoasoani atu i le faiga o le lesona e ala lea i le uuina i luga o se ata poo le faia o se isi mea e fesoasoani ai.
Latou te fiafia i galuega faivaega ma faatinoga e uiga i fale ma aiga.
Latou te fiafia e faalogologo ma faamatala tala, ma latou te fesili mai pea lava pea i le tala lava lea e tasi. O le faifai soo o le ala pito sili lea ona aoaoina ai i latou. E masani ona mafai ona latou faamatalaina se tala e toetoe lava o le upu i le upu aʻo latou susueina itulau o se tusi.
E masani ona latou fefaauoai, lagona mo isi, loto alolofa ma fesoasoani, ae a le faia le mea latou te mananao ai, e mafai foi ona avea i latou ma tagata tauaimisa.
Latou te mananao e maua ni avanoa fou e faaali atu ai ua latou matutua ma malolosi.
E i le va o le sefulu i le sefululua minute le umi o se taimi e gauai atu ai i se gaoioiga, ona latou suia vave lava lea mai lea gaoioiga i le isi. Ua amata ona latou mafaufau, o gaoioiga e faaaoga ai tamatamailima e mo tamaiti laiti ma ua mananao i ni gaoioiga mo tamaiti ua matutua poo gaoioiga e malolo ai.
E manao lava e aumai le mea la e taalo ai le isi tamaititi seʻi taalo ai foi o ia. Taumafai e taulimaina ma le faaeteete tulaga faapenei; aoao tamaiti e feauauaʻi.
E sili atu lo latou mananao i ni vaega toalaiti nai lo le toatele. E sili atu ia i latou le iai o se uo sili se toatasi nai lo se vaega e toasefulu.
Latou te leʻi iloa lelei le eseesega o ni mafaufauga ma ni mea moni. O le mea lea e mafai ai ona fai mai se tamaititi o lana uati e gaosia mai le auro, o lona tama e sili atu ona lapoa nai lo se isi lava tama, ma o lana iʻa na ia mauaina e umī i lo se isi lava. E tatau i tagata matutua ona latou iloaina o le natura lava lea o le gasologa o le olaga o se tamaititi ma e tele se taimi e aoao ai le eseesega o le mea moni ma le mea e le moni. E teʻa ese lenei vaega aʻo tuputupu aʻe pea le tamaititi.
E naunau tele e aoao. Talu ai e moni tele le Tama Faalelagi ia te i latou, o le mea lea e matuai fiafia ai lava i latou ia te ia ma latou te fesili foi ni fesili se tele e uiga ia te ia. E fiafia tele i latou e tatalo ma e mafai ona tatalo e aunoa ma se fesoasoani.

Taʻiono tausaga le matutua

O le taʻiono tausaga le matutua ua latou maua le pulea lelei o o latou tino ma ua tele naua le malosi ua faaalu i le aoaoina o tomai fou ma le faaleleia atili o ni tomai ua iai. Mo se faataitaiga, e mafai ona latou aoao e tafue, popo se polo, mapumapu, tafiti ae tu i lima, ma tietie uila. O le taʻiono tausaga atonu o lo o iai lava sina faafaigata i uaua laiti, ae e mafai ona latou aoao e lolomiina mataitusi o le alafapeta, o o latou lava igoa, ma nisi upu. O lo o taʻua atu i lalo uiga lautele o le taʻiono tausaga le matutua:

Ua faateleina lo latou gauaʻi mai. E ui lava e le mafai ona latou nonofo filemu, e mafai foi ona latou uaʻi atu i se gaoioiga mo le sefululima po o le luasefulu minute, e fuafua lava i lo latou fiafia iai.
Latou te fiafia i gaoioiga e faagaoioi ai le tino atoa, e pei o le feaei i laau, taaalo i fafo i le malae, poo tuuga tamoe.
E fiafia i taaloga ma tauvaga faasamasamanoa.
O manatu o le faiaoga e taua tele ia i latou. E mananao e nonofo i tafatafa o le faiaoga ma fesoasoani i le lesona e ala lea i le uuina i luga o ata poo le toe aveina atu o mea na faaaoga i le lesona i le potutusi.
Latou te mananao pea e faalogologo i tala, faatinoina, ma faafoliga iai. O le toatele lava e mananao e oofu i ofu o tagata matutua.
E agalelei, lagona alofa mo isi, ma augofie seia oo lava ina le mafai ona toe pule i latou, ma e mafai foi ona avea i latou ma ni tagata faamimisa.
E fiafia i latou i faafiafiaga.
Atonu ua atoatoa i latou i le tafue, osooso, ma le musa ma e mananao e faaaoga nei tomai i taaloga.
E popole tele i latou poo le fea amio e lelei ae poo le fea foi e leaga.
O lo latou faatuatua i le Tama Faalelagi ma Iesu Keriso ua faateleina. O le toatele lava o tamaiti taʻiono tausaga e mafai ona tatalo na o i latou pe afai na latou faia muamua i o latou aiga poo isi vasega.

Taʻifitu tausaga le matutua

I le fitu o tausaga, o la e lava e latalata lava tamaiti i o latou matua ma o lo o talisapaia pea lo latou alofa, tausiga, ma lagona ootia, ae ua amata foi ona tele fegalegaleaiga ma tagata ma isi tulaga i fafo atu o le aiga. Ua tofu lava i latou ma manaoga ma ua mananao ina ia faatagaina i latou e faia lava a latou faaiuga. E tiotio, naunau, ma matuai fiafia tele i le olaga o lo o siomia ai i latou. Ua latou suesue i gaoioiga e tele ma e mananao e toe faia gaoioiga na e faamalieina ai i latou. O lo o taʻua atu i lalo nisi o uiga lautele o i latou ua taʻifitu tausaga le matutua:

Ua pulea lelei o latou musele tetele, ma ua oo ina alofagia, saosaoa, ma tiotio.
Ua faatupuina le puleaina lelei o o latou musele laiti. Ua mafai ona latou tusi lolomi lelei ma saʻo.
E toatele e fiafia i taaloga e tuʻi ai le tino, ma faia pea lava pea le taaloga e tasi.
E malolosi tele ae vaivai gofie. E taua tele taimi e malolo ai.
E masani lava ona tatemeteme solo.
E fiafia e faaputuputu mai mea ma talanoaina. E fiafia foi e talanoa i mea sa faia e i latou lava poo vaega.
O le taimi e gauaʻi atu ai ua faatupuina mo le taʻifitu tausaga; o tamaiti i le tausaga lea e mafai ona faamaeaina se galuega pe afai e fiafia iai, e tusa lava pe luasefulu i le luasefululima minute e alu ai. E manaomia lava le fesuisuiai o gaoioiga i le tele o lesona.
Ua amata ona le toe faifai mea faatasi ma tagata o le isi itupa.
Ua amata ona le toe fiapule ma toe mananao e faia lava mea e mananao iai.
Ua amata ona tutoatasi ma ua faatulaga lelei o latou mafaufau.
Ua latou iloa le saʻo mai le sese ma e faitio tele i tagata latou te le faia le mea sao.
Latou te tulimatai atu i o latou papatisoga.
E mafai ona tatalo na o i latou ma e masani lava ona latou faamoemoe e talia vave mai a latou tatalo i le taimi lava lena.
Latou te mitamita i le mea moni o lo latou mafaia lea ona anapopogi a laititi ifo o le tasi le ʻaiga i aso anapogi ma ua totogi a latou sefuluai.

Taiala Faapitoa mo le Faaaofiaina ai o Tamaiti e Faaletonu Tino po o Mafaufau

Na faatuina e le Faaola le faataitaiga mo i tatou ia lagona ma faaali atu le alofa mo i latou e faaletonu tino po o mafaufau. Ina ua ia asiasi atu ia Sa Nifaē ina ua mavae lona toetu, sa ia fetalai atu faapea:

“Po ua ia te outou nisi ua mamaʻi? Aumaia ia te i latou iinei. Po ua ia te outou ea nisi ua pipili, pe tauaso, pe setu, pe manuʻa, pe lepela, pe mamae, pe tutuli, pe puapuagatia i se tasi mea? Ina aumaia ia i latou iinei, ou te faamaloloina i latou, aua ua mutimutivale loʻu alofa ia te outou; ua tumu loʻu loto i le alofa” (3 Nifae 17:7).

I le avea ai ma se faiaoga o le Peraimeri, ua e iai i se tulaga sili ona lelei e faaali atu ai lou alofa mutimutivale. E ui ina faapea e le i aoaoina oe e tuuina atu se fesoasoani faapitoa, ae e mafai lava ona e malamalama ma tausia tamaiti e faaletonu tino poo mafaufau. E manaomia le manatu popole, malamalama, ma se agaga naunautai ina ia faaaofia ai tamaiti uma o le vasega i gaoioiga e aoao ai.

O tamaiti e faaletonu tino ma mafaufau e mafai ona ootia i le Agaga e tusa lava po o le a le maualuga o le malamalama o lo o iai. E ui lava o nisi tamaiti e le mafai ona auai i le taimi atoa o le Peraimeri, e manaomia ina ia latou maua le avanoa e auai atu ai mo sina taimi puupuu ina ia lagonaina ai le Agaga. Atonu e talafeagai le iai o se uo e malamalama lelei i manaoga o se tamaititi e la te nonofo faatasi i le taimi o le Peraimeri, neʻi manaomia e le tamaititi se taimi e alu ese ai mai le vasega.

O tagata o le vasega e iai ni faaletonu i le tino po o le mafaufau atonu o le a feagai i latou ma faigata o tulaga tau le aoaoina, faaletonu tau le mafaufau, tautala poo faafitauli tau le gagana, tauaso pe tutuli, amioga po o faafitauli tau le vafealoai, maʻi o le mafaufau, faafitauli tau le gaoioi, po o faafitauli tuga tau le soifua maloloina. O nisi e faigata ma e le masani ma tu ma aganuu o lo o ola ai. E tusa lava po o a tulaga o tagata taitoatasi, e tutusa uma lava manaoga o le alofagia ma le taliaina e iai i tamaiti uma, o le aoaoina o le talalelei, o le lagonaina o le Agaga, o le auai ma le atoatoa, ma auauna atu i isi. O taʻiala nei o lo o taʻua atu i lalo e mafai ona fesoasoani ia te oe i le aoaoina o se tamaititi e iai ni faaletonu i le tino po o le mafaufau.

Vaai i tua atu o le faaletonu o le tino po o le mafaufau ma ia e iloa lelei le tamaititi. Ia faaalia ou uiga masani, faauo, ma ia agaalofa.
Aoao e uiga i mea faapitoa e malosi ai le tamaititi po o mea e faafaigata ia te ia.
Ia faia taumafaiga uma lava e aoao ma faamanatu ai i tamaiti o le vasega lo latou tiutetauave o le faaaloalo lea i tagata uma o le vasega. O le fesoasoani i se tamaititi o le vasega e iai se faaletonu i le tino po o le mafaufau, e mafai ona avea ma se tulaga faaKeriso e aoao mai ai le vasega.
Saili ni metotia aupito sili mo le aoaoina o le tamaititi e ala lea i le talanoa atu i ona matua, o isi tagata o le aiga, ma le tamaititi lava ia pe afai e talafeagai ai.
Aʻo leʻi tofiaina se tamaititi e faaletonu le tino poo le mafaufau e faitau, tatalo, pe auai i se faatinoga, ia fesili muamua atu iai poo a ni ona lagona e uiga i le auai ai i le vasega. Ia faamamafa atu mea e mafaia ma taleni a tamaiti taitoatasi ma vaai i ni auala e mafai ai e i latou taitoatasi ona auai ma le atoatoa.
Ia faafetaui mea e faaaoga i le lesona ma mea o lo o siomia ai tamaiti ina ia faafetaiaia manaoga o tamaiti taitoatasi e iai mea e faaletonu i o latou tino po o mafaufau.

O mea faaopoopo e faaaogaina mo le aoaoina o tamaiti e faaletonu tino ma mafaufau e mafai ona maua mai faletusi tutotonu a le Ekalesia (tagai i “Mea e Faaaogaina mo i Latou e Faaletonu Tino ma Mafaufau” i le tusi oka a le faletusi i la outou eria).

Taulimaina o Faafitauli o le Faasaunoa

I le avea ai ma se faiaoga o le Peraimeri, ua mafai ona e iloaina tamaiti o lau vasega e pologa i lagona po o le sasaina foi o le tino. Afai ua e manatu popole i se tamaititi faapea o lau vasega, faamolemole ia feutagai ma lau epikopo. Aʻo e sauniaina ma tuuina atu au lesona, ia tatalo mo le taitaiga ma le faasinomaga a le Alii. Fesoasoani i tamaiti taitoatasi o lau vasega ina ia latou lagonaina o ia o se atalii/afafine faapelepele o le Tama Faalelagi ma e alolofa le Tama Faalelagi ma Iesu Keriso ia i tatou uma taitoatasi ma e finagalo ina ia tatou fiafia ma saogalemu.