Lesona 18

E Fesoasoani le Tama Faalelagi Ia i Tatou Ia Tatou Usitai i Ana Poloaiga

Faamoemoega

Ina ia fesoasoani i tamaiti ia malamalama o le a fesoasoani mai le Tama Faalelagi ma Iesu ia i latou ia usitai i poloaiga.

Sauniuniga

1. Suesue ma le agaga tatalo le 1 Nifae 3:7; 1 Nifae 17; 1 Nifae 18:1-4. Ia saunia e faamatala atu le tala i le fauina e Nifae o se vaa.

2. Afai e mafai ona e faia, fai se kopi o le pepa e tufaina atu o le 1 Nifae 3:7 mo tamaiti taitoatasi. ‘Oti‘oti le pepa i luga o laina togitogi. Tuu fasi pepa i totonu o se teutusi mo tamaiti taitoatasi.

3. Ia saunia e usu pe faitau le fuaiupu muamua ma le lua o le “Lototele o Nifae” (Tusipese a Tamaiti, itulau 120); o lo o maua upu i le pito i tua o le tusi lesona lenei.

4. O Mea e Manaomia:

   1. Se Tusi a Mamona mo tamaiti uma.

   2. Se penitala ma se fasipepa po o se pepa malō mo tamaiti uma.

   3. Laupapa, penisina, ma se solo.

   4. Ata 3-37, Ua Faatoilalo e Nifae Ona Uso Fouvale (62044; Taga Ata o le Talalelei 303).

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Na Usitai Nifae i Poloaiga

Gaoioiga faatosina

Fai atu i tamaiti latou te faia le mea lea e te faia. Ona fai lea o ni au taga eseese, e pei o le tu i luga, tuu ou lima i ou suilapalapa, faataamilo, ma isi mau taga. Nofo i lalo. Faafetai atu i tamaiti mo lo latou usiusitai.

Gaoioiga faatosina

• O le a le uiga o le usitai?

Ia faamalamalama atu, afai tatou te faia se mea ua faatonuina ai i tatou, ua tatou usiusitai.

Iloiloga

Tau atu i tamaiti o lo o e mafaufau i se tagata o lē sa usiusitai. Sa naunau lava o ia e usitai i poloaiga a le Alii ina ia tuua Ierusalema ma lona tama.

Sa matuai naunau lava foi o ia i le poloaiga ina ia toe foi atu i Ierusalema e aumaia papatusi apamemea.

Iloiloga

• O ai lenei tagata? (O Nifae.)

Ia faamalamalama atu ina ua faatonuina Nifae e toe foi atu i Ierusalema ma aumaia ia papatusi, sa ia iloa lelei o se mea faigata tele ona faia, ae na ia fai atu i lona tama o le a ia usitai. Toe iloilo faapuupuu le tala mai le lesona 17.

Faaali atu i tamaiti se kopi o le Tusi a Mamona ma tau atu iai o upu na fai atu ai Nifae i lona tama o lo o tusia i totonu o lenei tusi. Vaai ia tofu tamaiti e mafai ona faitau ma se kopi o le Tusi a Mamona. Fesoasoani ia i latou e sue le 1 Nifae 3:7.

Pese

Usu pe faitau faatasi ma tamaiti upu o le fuaiupu muamua o le “Lototele o Nifae.”

Faitau atu i tamaiti le 1 Nifae 3:7. Ia faamalamalama atu o le mea lava e tasi o lo o tauina mai i laina mulimuli e tolu o le pese. Ia toe usuina pe faitauina e tamaiti laina na e tolu. Fesoasoani i tamaiti ina ia latou malamalama o le a fesoasoani le Alii ia i latou ina ia usitai i ana poloaiga.

Na Aoaoina e le Alii Nifae i le Ala e Fau ai se Vaa

Tala o tusitusiga paia

Tau atu i tamaiti o le Tusi a Mamona o lo o aofia ai le mau tala matagofie eseese e uiga ia Nifae. Ona faamatala atu lea o le tala lenei i ni au lava upu.

Sa faimalaga Liae ma lona aiga i le vao mo le valu tausaga. O le faimalaga ma ola ai i le vao e faigata tele. Sa latou nonofo i faleie ma saili ni a latou meaai. Mulimuli ane, na latou taunuu i se laueleele e latalata i le sami. Sa latou faaigoaina lea eleele o Nuumau. Sa latou fiafia ao latou iai iina aua sa tele fualaau aina ma le meli e aai ai. Sa latou faatutuina o latou faleie i le matafaga.

Ina ua mavae le tele o aso talu ona iai le aiga o Nifae i le eleele o Nuumau, ona faatonuina ai lea e le Alii ia Nifae ina ia fausiaina se vaa e mafai ai e lo latou aiga ona laasia le vasa tele e tau atu i le nuu folafolaina. Na talitonu Nifae o le a fesoasoani atu le Alii ia te ia. Sa fesili atu Nifae po o fea se mea e mafai ona ia maua mai ai ni uamea e fai ai meafaigaluega e manaomia mo le fausiaina o le vaa. Sa tauina atu ia Nifae le mea e maua ai le uamea ma sa mafai e ia ona faia meafaigaluega.

Ina ua vaai uso o Nifae o Lamana ma Lemuelu o le a fausiaina e ia se vaa, sa amata ona la tomumumu. Sa le talitonu i laua e mafai e Nifae ona fau se vaa. Sa mumusu i laua e fesoasoani atu. Sa le talitonu i laua o le a tauina atu e le Alii ia Nifae pe faapefea ona fausia se vaa.

Ae na silafia lelei e Nifae o le a fesoasoani atu le Alii ia te ia. O le a ia fesoasoani mai pea ia i tatou ina ia tatou usitai i ana poloaiga. Sa usitai Nifae i ana faatonuga.

Sa fai atu Nifae ia Lamana ma Lemuelu, afai o le a la usiusitai i poloaiga ma faia mea na fetalai mai ai le Alii, o le a ia fesoasoani mai foi ia te i laua. Sa lei mananao Lamana ma Lemuelu e tau atu e Nifae ia i laua le mea e fai. Sa la mananao e togi o ia i le sami, ae sa faatumulia Nifae i le mana o le Atua. Sa ia fai atu i ona uso e aua nei pai atu ia te ia. Sa fefefe Lamana ma Lemuelu. Sa fai atu iai Nifae ia la salamo ma usitai i poloaiga ma o latou matua.

Ona pai atu lea o Nifae i ona uso ma ua luluina ai i laua ina ia la iloaina ai o lo o fesoasoani le Alii ia te ia.

Talanoaina o le ata

Faaali atu le ata 3-37, Ua Faatoilalo e Nifae Ona Uso Fouvale.

Talanoaina o le ata

• O le a so outou manatu o le a se lagona na oo ia Lamana ma Lemuelu?

Ia faamalamalama atu na salamo Lamana ma Lemuelu. Sa la fesoasoani ia Nifae i le fauina o le vaa.

Talanoaina o le ata

• Sa faapefea ona fesoasoani le Alii ia Nifae? (Na ia tauina atu ia te ia le mea e maua ai le uamea e gaosi ai meafaigaluega. Na ia aoaoina o ia i le ala e fausia ai le vaa. Na ia puipuia o ia mai ona uso.)

Ia faamalamalama atu e ui lava e le iloa e Nifae fau se vaa, ae sa ia talitonu o le a fesoasoani le Alii ia te ia pe afai e usitai i ana poloaiga.

Usu pe faitau faatasi ma tamaiti le fuaiupu lona lua o le “Lototele o Nifae.”

Talanoaga i le laupapa

Tusi se foliga ataata faigofie ma se foliga faaūū i luga o le laupapa. Talanoa ma tamaiti po o a mea e mafua ai ona latou fiafia. Fesoasoani i tamaiti ina ia malamalama e finagalo le Tama Faalelagi ma Iesu Keriso ina ia tatou fiafia, ma o le pogai lea o lo la tuuina mai o poloaiga ia tatou usitai iai. Fai atu fesili e pei o nei e faatatau i le mafuaaga e oo mai ai le fiafia ona o le usitai.

Talanoaga i le laupapa

• O fea o nei foliga e faaalia ai lagona o Nifae ina ua ia usitai i le poloaiga e fausia se vaa?

• E faapefea ona fesoasoani le sau i le lotu ia tatou maua ai le fiafia?

• E faapefea ona fesoasoani le alofa ma le auauna atu i tagata o o tatou aiga tatou te maua ai le fiafia?

O Le a Fesoasoani Le Alii Ia i Tatou Ia Usiusitai i Poloaiga

Tala

Ia faamalamalama atu e pei lava ona fesoasoani le Alii ia Nifae, o le a ia fesoasoani mai foi ia i tatou taitoatasi pe afai tatou te faatuatua ia te ia ma naunau e usitai i ana poloaiga. Fai atu i tamaiti e faalogo lelei ao e faamatalaina atu le tala lenei i se teineitiiti na fesoasoani iai le Tama Faalelagi ia usitai i le poloaiga ia tausia le Aso Sapati ia paia.

E iai si tamai faleaiga o Malini e tu i tafatafa ane o le auala e latalata i le vaitafe. O aso uma lava na te faatauina ai lana araisa ma i‘a i tagata e tutu atu i lona faleoloa. O po uma lava e foi atu ai o ia i lona aiga i luga o se vaa ma faitauina le tupe na ia mauaina, e mavava o ia ma lulu lona ulu, aua e tau le lava le tupe e faatau ai le araisa a lona aiga e faatauina i le aso e sosoo ai.

I se tasi aso na feiloai ai Malini ma faifeautalai, ma sa la aoaoina atu ia te ia le talalelei. Sa la aoao atu ia te ia e uiga i poloaiga a le Tama Faalelagi ma le tausiaina o le Aso Sapati ia faapaiaina. Sa talanoa atu Malini i le Tama Faalelagi i le tatalo ma folafola atu ia te ia o le a le toe tatalaina lona faleaiga i le Aso Sa. Sa manao o ia e tausia le Aso Sapati ia faapaiaina ma e le toe galue i le Aso Sa.

Mai lena taimi e oo mai i aso nei, o po uma lava e faitauina ai e Malini ana tupe, ua ia iloaina ai ua tele atu ana tupe nai lo le taimi muamua. Ua sili atu meaai ua mafai ona ia faatauina mo lona aiga, ma ua tele foi ni ia ua mafai ona ia faatauina mai e faatau atu. Na faamanuiaina Malini e le Tama Faalelagi aua sa ia tausia le faapaiaina o le Aso Sapati. Sa fiafia Malini aua sa usitai o ia i poloaiga.

Talanoaga

Talanoaga

• O le a le poloaiga na usitai iai Malini?

• Na faapefea ona fesoasoani le Tama Faalelagi ia te ia?

Tau atu i tamaiti, e pei lava ona fesoasoani le Tama Faalelagi ia Nifae ma Malini, o le a faapena foi ona ia fesoasoani ia i latou taitoatasi ia usitai i ana poloaiga.

Aotelega

Molimau a le faiaoga

Afai e talafeagai, ia e tau atu i tamaiti se taimi na fesoasoani ai le Tama Faalelagi ia te oe ia e usitai i se poloaiga. Ia tuuina atu lau molimau e alolofa le Tama Faalelagi ma Iesu Keriso ia i tatou ma o le a la fesoasoani ia i tatou ia tatou usiusitai i poloaiga.

Ia tuuina atu i tamaiti uma se fasipepa po o se pepa malō ma se penitala. Tuu atu i tamaiti latou te tusia se ata o se foliga ataata. Ona fai atu lea i tamaiti e filifili se poloaiga latou te usitai iai i le faagasologa o le vaiaso, e pei o le faatupu filemu, fesoasoani ia Tina ma Tama, alofa i le uso po o le tuafafine, po o le fetufaai ma uo. Tuu atu i tamaiti taitoatasi po o lou fesoasoani atu foi iai e tusia le poloaiga ua ia filifilia i luga o lana pepa. Tau atu i tamaiti ina ia saunia e lipoti mai i le vaiaso lea pe o le a ni o latou lagona ina ua latou usiusitai.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Talanoa ma tamaiti e uiga i nisi poloaiga, e pei o le faaaloalo, tatalo, agalelei, faamaoni, Upu o le Poto, ma isi. Ia faamatala atu iai o nisi tagata e faigofie ona latou usitaia nisi o poloaiga nai lo isi tagata. Ia faamamafa atu o le a fesoasoani le Tama Faalelagi ia i tatou taitoatasi e usitai i poloaiga pe afai tatou te matuai taumafai ma pe afai tatou te ole atu mo lana fesoasoani.

2. Usu pe faitau faatasi ma tamaiti upu o le “Filifili le Ala Sao” (Liahona, Iuni 1995) ma isi pese e faatatau i poloaiga e pei o le “Alofa Atu i le Isi” (Tusipese a Tamaiti, itulau 136) po o le “Pe a tatou Fesoasoani” (Tusipese a Tamaiti, itulau 198) o upu mo nei pese e tolu o lo o maua i le pito i tua o lenei tusi lesona.

3. Togi atu se taga fatupi po o se manu meataalo i se tamaititi; ona fesili atu lea o se fesili mai le lesona, e pei o:

   • O le a le mea na fai atu le Alii ia Nifae e fausia?

   • O a ni uiga o Lamana ma Lemuelu ina ua fai atu iai Nifae e uiga i le fausiaina o le vaa?

   • E mafai ona e tauina mai se poloaiga e mafai ona e usitai nei iai?

   • O le a se mea e mafai ona tatou faia pe a tatou manaomia le fesoasoani a le Tama Faalelagi? (Tatalo.)

   • O le a le mea faigata lea na fai atu le Alii ia Nifae e faia?

   • Na faapefea ona maua e Nifae meafaigaluega?

4. Fai atu i tamaiti ia latou faafoliga o lo o latou eliina ni uamea, gaosi meafaigaluega, ma fauina le vaa e pei ona faia e Nifae.

5. Mo tamaiti matutua: Fai se kopi tusitusia o le 1 Nifae 3:7 mo tamaiti uma. ‘Oti‘oti i luga o laina ma faapipii lelei e tamaiti i le faasologa sao i luga o se pepa. Ia uunaiina latou e taulotoina uma le mau.

Lord commands

1 Nifae 3:7

Ou te alu atu ma faia mea

ua poloaiina e le Atua,

aua ua ou iloa e le

aumaia e le Atua ni poloaiga

i le fanauga a tagata,

seiloga na te saunia le ala mo i latou

ina ia mafai ai e i latou ona faia

mea ua ia poloaiina ai i latou.