Lesona 21
Tatou te Mauaina Faamanuiaga Silisili i le Avea ai ma Tagata o le Ekalesia a Iesu Keriso
Faamoemoega
Ina ia fesoasoani i tamaiti ia malamalama e mafai ona oo mai faamanuiaga silisili i le avea ma tagata o le Ekalesia.
Sauniuniga
-
Suesue ma le agaga tatalo le Mosaea e 18 ma le Enosa 1, ma ia saunia e faamatala atu tala o lo o iai i nei mataupu e lua.
-
Ia saunia e fesoasoani i tamaiti e usu pe faitau upu “O le Agaga Paia” (Tusipese a Tamaiti, itulau 105) ma le “Fesoasoani Mai Tama Pele” (Tusi Pese A Tamaiti, itulau 99); o upu o nei pese o lo o maua i le pito i tua o le tusi lesona lenei.
-
Ao lei amataina le vasega, ia faasalalau solo ia mea na aoina mai-e aofia ai le ata 3-13, 3-14, 3-48, ma le 3-49 (tagai i le 4o i lalo)-i luga o se laulau po o luga o le fola ma ufiufi i se ie.
-
O Mea e Manaomia:
-
O upu nei e tusia i fasipepa:
O Faamanuiaga o le Papatisoga
Ua Avea i Tatou ma Tagata o le Ekalesia a Iesu Keriso
Meaalofa o le Agaga Paia
E Faamagaloina i Tatou e le Tama Faalelagi
-
Ao mai mea nei pe afai e talafeagai: se Tusi a Mamona, se Tusi Paia, se tamai ata o Iesu Keriso, ma se mama a le FMT.
-
Se ie lautele e ufiufi uma ai mea na e aoina mai.
-
Ata 3-48, Alema o Lo o Papatiso Atu i le Vai o Mamona (62332; Taga Ata o le Talalelei 309); ata 3-13, Tamaititi o Lo o Papatisoina (62018); ata 3-14, Teineititi o Lo o Faamauina (62020); ma le ata 3-49, O Enosa o Lo o Tatalo (62604; Taga Ata o le Talalelei 305).
-
-
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.
Faalautelega Fautuaina o le Lesona
Tofi se tamaititi e faia le tatalo amata.
Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.
E Mafai Ona Avea i Tatou ma Tagata o le Ekalesia a Iesu Keriso
Gaoioiga faatosina
Tau atu i tamaiti o lo o iai ni mea i lalo o le ie. Ia faamatala atu o le a e aveeseina le ie mo sekone e sefulu. Ia uai atu mafaufau o tamaiti ma taumafai e manatua ni mea se tele latou te mafai ona manatua.
Ia faapotopoto uma atu tamaiti i autafa o le laulau. Aveese le ie o lo o ufiufi ai mea o lo o i luga o le laulau mo le sefulu sekone. Ona toe ufiufi lea. Fai atu i tamaiti e toe foi atu i o latou nofoa.
Tuu atu i tamaiti e auauai e tau mai mea o lo o i luga o le laulau. A maea ona maua uma e i latou le avanoa e tali mai ai, ona aveese lea o le ie ona vaai lea pe a lo latou taumafai. Ia faamalamalama atu, o nei mea taitasi uma e mafai ona faamanatu mai ai ia i tatou ia faamanuiaga ua tatou maua mai le Tama Faalelagi pe a papatisoina i tatou.
Upu tusi
Tuu atu i se tamaititi na te faapipiiina le upu tusi “O Faamanuiaga o le Papatisoga” i luga o le laupapa.
Ata ma le tala o tusitusiga paia
Faaali atu le ata 3-48, Alema o Lo o Papatiso Atu i le Vai o Mamona.
Toe iloiloina faapuupuu le tala ia Alema mai le lesona 20. Faamanatu atu i tamaiti, ina ua sola ese Alema mai auauna a le Tupu amioleaga o Noa, sa lafi o ia i le vao. O iina na ia tusitusia ai aoaoga na tautala iai le perofeta o Apinati.
Ina ua mavae le tele o aso, ona alu atu ai lea o Alema ma aoao faalilolilo atu i tagata e uiga ia Iesu Keriso. E toatele i latou na faalogo ia Alema ma talitonu ia te ia. O i latou o ē na talitonu na o atu i se nofoaga e taua o Mamona. O iina o lo o iai se vaipuna manino ma se ulu vao o laau laiti lea na lafi ai Alema pe a oo i le ao mai sailiga a le tupu.
E toatele tagata na faapotopoto e faalogologo ia Alema. Na ia aoaoina i latou e uiga i le faatuatua ma le salamo. Na papatisoina e Alema i latou uma o ē na mananao e papatisoina, ma avea i latou ma tagata o le ekalesia moni a Iesu Keriso.
Upu tusi
Tuu atu i se tamaititi na te faapipiiina le upu tusi “Ua Avea i Tatou ma Tagata o le Ekalesia a Iesu Keriso.”
E Mafai Ona Tatou Maua le Meaalofa o le Agaga Paia
Upu tusi ma le talanoaga
Upu tusi ma le talanoaga
-
O le a se meaalofa e mafai ona tatou maua pe a maea ona papatisoina i tatou? (O le meaalofa o le Agaga Paia.)
Ia faapipiiina e se tamaititi le upu tusi “Meaalofa o le Agaga Paia” i lalo ifo o isi upu tusi.
Ia faamalamalama atu, a maea ona papatisoina i tatou, e mafai ona tatou mauaina le meaalofa o le Agaga Paia e ala lea i le faaee o lima. O se meaalofa matagofie foi mai lo tatou Tama Faalelagi. Afai tatou te faia le sao, o le a tumau le Agaga Paia ma i tatou e le aunoa ma tau mai ia te i tatou le mea sao e faia.
Pese
Usu pe faitau faatasi ma tamaiti upu o le “Agaga Paia.”
Mataupu faavae o le faatuatua
Iloilo faatasi ma tamaiti le mataupu faavae e fa o le faatuatua. Ia faamatala atu o le meaalofa o le Agaga Paia o le a avea o se faamanuiaga i o tatou olaga atoa-pe afai tatou te ola agavaa.
Tala
Faamatala atu i ni au lava upu pe na faapefea ona fesoasoani le Agaga Paia ia Timo:
Na mafai ona iloa e Timo o lo o popole lona tina. Sa foliga faanoanoa ma vaivai lona tama. Ua fai si umi e le o toe maua mai se tusi mai lona uso o Uale, o lo o i le misiona.
Sa nofo i lalo ia Timo i luga o le nofoa o lo o i le potu malolo. Na mafai ona ia lagonaina talanoaga a lona tama ma lona tina o lo o fai i le umukuka
“O se mea matuai matautia tele le iai o se mafuie,” sa faapea atu ai lona tama, “ma e latalata atu lava i le eria o lo o talai ai Uale. Talosia ia vave ona tatou faalogo atu i se tala po o faapefea mai o ia.”
Sa matua faalologo Timo. “Mafuie …. Uale?” sa ia mafaufau ia te ia lava. Sa ia faalogoina se mea i lona faaī. Sa mafai ona ia vaai faalemafaufau atu i lona uso o manua po o tanumia i lalo o ni maa se tele. Na ia faataupupla atu i le ata o Uale o lo o i luga o le kesi, ma sa faatumuina ai ona mata i loimata. Na ia faavave atu i lona potu ma tapuni mai le faitotoa. Sa mafaufau solo Timo i le mau mea matautia ma popole ai lava i lena po atoa ma le aso atoa na sosoo ai. O taimi uma lava e taumafai ai e tautala atu i ona matua e uiga ia Uale, na te faalogoina ai lava se mea i lona faaī ma le mafai ai ona fai atu se upu.
Sa faatupulaia le fefe o Timo. Na ia lagona e ao ona ia talanoa i se tasi e uiga i nei mea. Na ia iloa o lo o galue lona tama i le vaega pito i lalo o le fale, o lea na alu atu ai Timo i lalo.
Sa amata ona tautala atu Timo i le mea ua ia fuafuaina e fai atu. Ae sa faigata tele ona talanoa e uiga ia Uale. Sa punou ifo lona ulu ma ona mata ua faatumulia i loimata.
“O lo o e manatu popole ia Uale, a ea Timo?” sa fesili atu ai lona tama. “Ina ua ma faalogo i le mafuie, sa ma popole foi. Sa ma tatalo ma lou tina mo le saogalemu o Uale. Na mauaina le faamafanafanaga mai le Agaga Paia o lo o lelei mea uma ma e le tatau ona tatou popole ia Uale. E mafai foi ona e maua lena lava faamafanafanaga e tasi Timo.”
“E faapefea?” sa fesili atu ai Timo.
“Tatalo i le Tama Faalelagi. Tau atu ia te ia ou popolega. Fesili atu ia te ia ina ia fesoasoani mai ia te oe e te fia iloa po o saogalemu ia Uale. Ou te iloa o le a e maua le faamafanafanaga.”
Na faia e Timo le mea na tauina atu e lona tama e faia. Na ia tatalo mo le saogalemu o Uale. Na ia ole atu i le Tama Faalelagi ina ia fesoasoani atu ia te ia i lona fia iloa po o ola ma manuia ia Uale. Ina ua uma le tatalo a Timo, na oo mai se lagona maoae o le filemu ma le mafanafana ia te ia. Sa le toe popole o ia ia Uale. Na ia iloaina o lo o lelei mea uma.
E lei leva ae taunuu se tusi e faamautinoa ai i le aiga o lo o saogalemu ia Uale. Sa lei ofo ia Timo. Ua leva ona ia iloaina o lo o saogalemu ia Uale. Na faamafanafanaina Timo e le Agaga Paia.
Tala
-
Na faapefea ona fesoasoani le Agaga Paia ia Timo? (Na ia tuuina atu ia te ia se lagona filemu-se lagona o lo o saogalemu ia Uale.)
Tau atu i tamaiti o le meaalofa o le Agaga Paia o se faamanuiaga sili lea ia Timo ma lona aiga. E mafai foi ona avea ma se faamanuiaga sili ia te i tatou.
O le a Faamagaloina i Tatou e le Tama Faalelagi Pe a Uma Ona Papatisoina i Tatou
Upu tusi
Tuu atu i se tamaititi na te faapipiiina le upu tusi “E Faamagaloina i Tatou e le Tama Faalelagi” i luga o le laupapa.
Faamalamalama atu o se tasi faamanuiaga sili o le papatisoina o le mafai lea ona faamagaloina i tatou pe a tatou faia ni mea sese. Na silafia lelei e le Tama Faalelagi o le a faia e lana fanau ni mea sese. Na ia poloaiina tagata uma ina ia salamo mai a latou mea sese. Afai tatou te salamo, ua ia folafola mai o le a ia faamagaloina i tatou ma tuuina mai isi faamanuiaga. Faamanatu atu i tamaiti o le isi vaega o le salamo o le faatuatua lea ia Iesu Keriso. O le isi vaega o le ola lea faapei ona finagalo ai Iesu ia tatou ola ai, o le usiusitai lelei lea i poloaiga. E mafai ona tatou aoao atili e uiga ia Iesu ma ana poloaiga e ala lea i le suesue i tusitusiga paia.
Ata ma le tala o tusitusiga paia
Faaali atu le ata 3-49, O Enosa o Lo o Tatalo.
Ia faamatala atu o Enosa o se perofeta o lē e mafai ona tatou faitau iai i le Tusi a Mamona. Na faatonuina Enosa e lona tama na te tausia lelei talafaamaumau lea e aofia ai tusitusiga paia ma talafaasolopito o ona tagata. O talafaasolopito sa tusia i luga o papatusi uamea. Na aoaoina Enosa e lona tama i le talalelei e pei ona aofia ai i nei faamaumauga, o lea na iloa lelei ai e Enosa le ola e ola ai. I se tasi aso na alu atu ai Enosa i le vao ma tatalo atu i le Tama Faalelagi i le ao atoa ma le po. Na ia ole atu ina ia faamagaloina ona sese na ia faia. Ona tupu ai lea o se mea matagofie lava.
Ia faamatala atu na faamagaloina e le Tama Faalelagi ia Enosa ma folafola atu o le a ia faamanuia ia te ia. Na oo mai se siufofoga ia te ia ma faapea mai, “Enosa e, ua faamagaloina au agasala, e faamanuiaina foi oe” (Enosa 1:5). Na faamagaloina Enosa aua sa ia faatuatua ia Iesu Keriso, lē na ia faitau iai i talafaamaumau. Na faamagaloina o ia aua na ia talitonu i le taulaga togiola a Iesu Keriso. Na folafola atu foi e le Tama Faalelagi ia Enosa o le a tausia ma le saogalemu nei talafaamaumau seia oo mai le aso e mafai ai e Sa Lamana ona faitau iai i nei upu. O le a fesoasoani talafaamaumau ia i latou e aoao e uiga ia Iesu, tausia poloaiga, ma mauaina le faamagaloga pe a latou sese.
Ia faamalamalama atu ua tatou iloa na tausia e le Tama Faalelagi lana folafolaga ia Enosa aua ua mafai ona tatou faitau i le Tusi a Mamona i mea na tusia ai i luga o papatusi.
Ata ma le tala o tusitusiga paia
-
O le a le faamanuiaga na mauaina e Enosa ina ua ia salamo? (Ia talia so o se tali sao lava, ae ia faamamafa atu na faamagaloina o ia e le Tama Faalelagi.)
Ia faaali atu lou agaga faafetai mo le malamalama o tagata uma lava e salamo faamaoni o le a faamagaloina. Ia faamamafa atu o tusitusiga paia e mafai ona avea ma se faamanuiaga sili i le fesoasoani lea i le atinaeina o le faatuatua ia Iesu Keriso ma aoao i ana aoaoga.
Pese
Fesoasoani i tamaiti e usu pe faitau upu o le “Fesoasoani Mai Tama Pele.”
Aotelega
Toe iloilo faamanuiaga i le avea ai ma tagata o le Ekalesia e pei ona lisiina atu i upu tusi. Faamanatu atu i tamaiti na folafola mai e le Tama Faalelagi o le a ia tuuina mai faamanuiaga silisili pe afai tatou te papatiso ma tausia poloaiga.
Fai atu i tamaiti e mafaufau i faamanuiaga ua tuuina atu e le Tama Faalelagi ia te i latou i le isi taimi latou te fetagofi atu ai i le faamanatuga. Faamalosia i latou e uai atu i tatalo o le faamanatuga ma mafaufau i folafolaga o le a latou faia pe a papatisoina i latou. O i latou ua uma ona papatisoina e mafai ona toe mafaufau atu i o latou papatisoga.
Molimau
Tuuina atu lau molimau e tausia pea e le Tama Faalelagi ana folafolaga ia i tatou pe afai tatou te usiusitai ia te ia. Atonu e te manao e fetufaai atu se mea na oo ia te oe na e lagonaina ai lou faamanuiaina ona o lou auai i le ekalesia.
Tofi se tamaititi e faia le tatalo faaiu.
Gaoioiga e Faamauoa Mai Ai
Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”
-
Ia saunia se siata o lo o iai upu mai le 3 Nifae 11:33 i luga. ‘Oti se isi pepa e pei lava o le tele o le siata ma tusi lolomi ai luga ia le “O Faamanuiaga o le Papatisoga.” ‘Oti‘oti le pepa lenei i ni fasipepa se tele e pei o se paso. Faapipii vaega taitasi i luga o le siata ina ia ufiufi uma e fasipepa le mau. Ia faaeteete ina ia faigofie ona aveese e aunoa ma le faaleagaina o le mau ua uma ona tusia.
Faaali atu i tamaiti le paso “O Faamanuiaga o le Papatisoga,” ma tuu atu latou te faitauina mai le ulutala. Faamatala atu o le a e faitauina atu ni fesili e uiga i le lesona. O ai lava e sao lana tali i le fesili e mafai ona aveseeina mai se fasipepa o le paso. Mulimuli ane, o le a mafai e tamaiti ona latou iloa le mau o lo o ufiufi ai i lalo. O nisi nei o fesili e fautuaina atu:
-
O a feagaiga tatou te faia i le papatisoga? (Ia manatua pea Iesu Keriso, tauave i o tatou luga lona suafa, ma tausia ana poloaiga.)
-
O le a le mea a Alema na fai i le Vai o Mamona? (Na ia papatisoina ai tagata na mananao e papatiso.)
-
O le a le lotu e auai Alema ma i latou na mulimuli ia te ia? (O le Ekalesia a Iesu Keriso.)
-
Na faapefea ona taliina mai le tatalo a Timo? (Na fesoasoani le Agaga Paia ia ona iloaina o lo o saogalemu ia Uale.)
-
Aisea na tatalo ai Enosa? (Na manao e faamagaloina ana agasala.)
-
O le a le tusi na faaliliuina mai papatusi auro? (O le Tusi a Mamona.)
-
O le a le matua e tatau ona papatisoina ai oe? (Pe a valu ou tausaga.)
A maea ona aveeseina uma vaega o le paso, ia outou faitauina faatasi ma le vasega le mau. Ia faamalamalama atu o le “fai mo latou tofi le malo o le Atua” o lona uiga o le ola faatasi ma le Tama Faalelagi e faavavau.
-
-
Usu pe faitau upu o le viiga “Faitau Ou Manuia” (Viiga, nu. 151).
Pe a mafatia oe i mea tiga
Pe a e manatu ua le toe aoga
Faitau ou manuia ua maua mai
E te ofo tele i mea ua Ia fai
Faitau ia o ou manuia,
Faitau manuia mai luga
Faitau ia o ou manuuia
Faitau ou manuia tele mai luga.
-
Ia iai ni penivali ma se fasipepa e tusia ai le “Faamanuiaga o le Auai” mo tamaiti taitoatasi. Tuu atu i tamaiti uma latou te tusia ma valivaliina se ata o se faamanuiaga atonu latou te mauaina pe a uma ona papatisoina ma faamauina i latou e avea o ni tagata o le Ekalesia a Iesu Keriso o le Au Paia o Aso e Gata Ai.