Lesona 41

O Le Anapogi Tatou te Latalata Atu ai i le Tama Faalelagi ma Iesu Keriso

Faamoemoega

Ina ia fesoasoani i tamaiti ia latou malamalama o le anapogi e mafai ai ona latou latalata atu i le Tama Faalelagi ma Iesu Keriso ma e mafai ona latou anapopogi ma tatalo mo faamanuiaga faapitoa.

Sauniuniga

1. Suesue ma le agaga tatalo le Mareko 9:17-29 ma le Mataupu Faavae ma Feagaiga 88:76.

2. O le a sili atu pe afai e aoaoina atu lenei lesona i se Aso Sa ao lumanai le Aso Sa anapogi.

3. Afai e maua i la outou eria, ia saunia e faaali atu le ata vitio “O Le tulafono o le Anapogi (4 minute 10 sekone) o lo o i le Family Home Evening Video Supplement (53276).

4. O Mea e Manaomia: ia saunia fesili nei i luga o ni fasi pepa ma tuu i totonu o se fagu:

   • O le a le uiga o le anapogi?

   • O ai e tatau ona anapogi?

   • A tatou anapopogi ma tuuina atu a tatou tupe i le epikopo po o le peresitene o le paranesi, o le a le tau o lea tupe?

   • O le a le mea e faia e le epikopo ia tatou taulaga anapogi?

   • O a nisi mafuaaga o le anapogi?

   • E faapefea ona fesoasoani le anapogi ia te i tatou?

   • O afea le Aso Sa anapogi?

   • O le a le mea e faaalia e le anapogi i le Tama Faalelagi ma Iesu Keriso?

   • Pe e te naunau ea e te anapogi pe afai o lo o manaomia e oe po o se tasi e te alofa iai se fesoasoani?

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

O le Anapogi o Lona Uiga o le Tuueseina Lea o Meaai ma Vaiinu mo se Faamoemoega Amiotonu

Gaoioiga faatosina

Faaali atu i tamaiti le “O Le Tulafono o le Anapogi.”

Faamatala atu le vaega lenei i ni au lava upu:

I le taeao o se tasi Aso Sa na faavave atu ai Filipo i le umukuka i le mea o lo o pisi ai lona tina i le suesueina o tusitusiga paia.

“O le a le tatou meaai mo le taeao?” na ia fesili atu ai. “Ua ou fiaai.”

Na vaai atu le tina o Filipo ma le faanoanoa tele i lana tama ma faapea atu, “O lo o mai lou tama.”

Na manua le tama o Filipo i se faalavelave tau taavale, ma sa taoto ai o ia i le falemai, ua le mafai ona gaoioi.

“Na ou faapea lava au ia ua malosi,” sa tali mai ai Filipo ma ona mata ua faatumulia i loimata.

“O lo o manaomia e lou tama lo tatou faatuatua ma talosaga i le asō Filipo,” sa tautala lemu atu ai lona tina ia te ia. “E manaomia lo tatou faalatalata atu i le Tama Faalelagi ma Iesu Keriso i le taimi nei ao tatou tatalo atu ina ia toe malosi lou tama.”

“O le faia o lea tulaga,” sa toe faaauau atu ai le talanoa a le tina o Filipo, “o le a tatou le aai ai i nisi o a tatouʻaiga i le asō. O le a tatou le fetagofi atu i meaai ma vaiinu. Pe e te naunau ea e faia lena mea mo lou tama?”

“Ioe, o le a ou faia,” sa tali atu ai Filipo.

Gaoioiga faatosina

• A tatou le faaaogaina ia meaai ma vaiinu ona o se faamoemoega amiotonu, o le a le taʻu o lena mea? (Anapogi.)

Ia faamalamalama atu a tatou anapopogi, ua tatou faaali atu i le Tama Faalelagi ma Iesu Keriso tatou te alolofa ma faatuatuaina i laua ina ia fesoasoani mai ia te i tatou ma tali mai a tatou tatalo.

E silafia lelei e le Tama Faalelagi ma Iesu Keriso e faigata tele ia te i tatou ona anapogi. Na la silafia lelei afai tatou te anapopogi, o a tatou tatalo e faamaoni ma o lo o tatou manaomia moni lava se fesoasoani.

Talanoaga

Ia faamalamalama atu o tamaiti laiti ma tagata mamai e le faamoemoeina i latou ina ia anapopogi. E amata ona tatou anapopogi pe a uma ona papatisoina i tatou. Ia faamatala atu talu ai ona o lenei mea e moomia mo i latou ua uma ona papatisoina, o lea e tatau ai ona amata ona mafaufau i le anapogi i le taimi ua lava ai lo latou matutua e papatisoina.

Ia faamalamalama atu e tasi le Aso Sa i masina taitasi ua faatonuina ai tagata o le Ekalesia ina ia anapopogi moʻaiga e lua. O le taimi lea tatou te le aai ai ma feinu. Tatou te taua lea aso faapitoa o le masina o le Aso Sa anapogi.

Ia faamalamalama atu o perofeta o aso e gata ai ua latou faatonuina i tatou e tuuina atu meaai mo e matitiva. Ua latou faatonuina i tatou ina ia tuuina atu i le ekalesia le aofaiga o le tupe tatou te faasaoina mai lo tatou le aai ma le feinu ao tatou anapopogi. O le tupe tatou te tuuina atu e taua o le taulaga anapogi, ma e faaaogaina ina ia fesoasoani e faatau ai meaai ma lavalava mo e matitiva.

Talanoaga

• O a taulaga anapogi? (O tupe e ofoina atu i le Ekalesia e fesoasoani ai i e matitiva.)

• O le a le mea e faaaogaina iai lenei tupe? (E faatau ai meaai, lavalava, ma isi mea e manaomia mo e matitiva ma le tagolima.)

Ia faamalamalama atu e mafai ona tatou anapopogi ma tatalo i so o se taimi, e pei lava ona faia e Filipo ma lona aiga mo le tama o Filipo. O i tatou ma i latou tatou te alolofa iai tatou te moomia le fesoasoani a le Tama Faalelagi i taimi uma, ae iai lava taimi e oo mai ai ni o tatou faafitauli patino e faigata ona foia po o se tasi o lo tatou aiga o lo o mai tigaina. O le taimi lena tatou te anapopogi ai e ese mai le Aso Sa anapogi.

Tala o tusitusiga paia

Ia faamanino atu na silafia lelei lava e Iesu Keriso le aoga tele o le tatalo ma le anapogi. Faamatala atu le tala lenei mai le Mareko 9:17-29 i ni au lava upu. A maea ona faamatala atu, atonu e te manao i tamaiti latou te faatinoina.

I se tasi aso ao faatasi Iesu Keriso ma ona soo, sa faapotopoto ane ai le motu o tagata e toatele i o latou tafatafa. O se tasi alii na sau mai le faapotopotoga ia Iesu. Na faamatala atu e lenei Alii ia Iesu se tala faanoanoa i lona atalii ua leva ona mai i le tele o tausaga. Na fai atu lenei alii i soo o Keriso ina ia faamalolo lona atalii, ae lei manuia ai o ia i a latou faamanuiaga. Na talosaga atu lenei alii ia Iesu ina ia faamalolo i lona atalii. Na ia iloa e mafai ona faamaloloina lona atalii. Na faamanuia e Iesu le tamaititi mai, ma uu mai lona lima, ma faatu i ona vae. Na faamaloloina le tamaititi.

Na matuai ofo le au soo. Ina ua o ese atu le tamaloa ma lona atalii, na fesili atu lea o le au soo ia Iesu pe aisea na le malolo ai le tamaititi i le latou faamanuiaga. Na ia tali atu ia te i latou, ina ia faamaloloina le tamaititi lenei, e manaomia ona latou faia nisi mea e sili atu nai lo o le na o le tatalo. E manaomia foi ona latou anapopogi.

Tau atu i tamaiti e faafofoga mai pea le Tama Faalelagi i a tatou tatalo, ae a tatou naunau e anapopogi, ua tatou faaali atu i le Tama Faalelagi ma Iesu Keriso e moni lava e iai lo tatou faatuatua ia te i laua.

O Le Anapogi e Mafai Ona Fesoasoani Ina Ia Tatou Lagona Ai Le Latalata Atu I Le Tama Faalelagi ma Iesu Keriso

Faamatalaga a le faiaoga

Ia faamanino atu a tatou naunau tatou te tatalo ma anapopogi, ua tatou faaali atu i le Tama Faalelagi ma Iesu Keriso tatou te alolofa ia te i laua ma o lo o tatou taumafai ina ia latalata atu ia te i laua ma mafai ona tatou maua la laua fesoasoani.

Tala ma le talanoaga

Ina ia fesoasoani i tamaiti ia iloaina pe mafai faapefea e le tatalo ma le anapogi ona latou latalata atu ai i le Tama Faalelagi ma Iesu Keriso, fai atu iai e faalogo lelei i tala nei.

Faamatala atu le tala lenei i ni au lava upu:

O le taimi o le tautotogo ma ua popole uma faifaatoaga i le aai. O le taumalulu ua tuanai sa matuai matūtū ai lava le eleele, ma o lo o latou moomia se timu ina ia mafai ai ona latou totoina a latou faatoaga.

Na mafaufau le peresitene o le siteki ina ia faia se anapogi faapitoa, ma o lea na ia talosaga atu ai i epikopo taitasi ina ia faasilasila atu i tagata uma o a latou uarota. Na ia iloa o lo o manaomia e tagata lo latou faalatalata atu i le Tama Faalelagi ma Iesu Keriso ao lei mafai ona latou mauaina le fesoasoani faapitoa o lo o latou moomia. O tagata uma mai so o se mea o le siteki na latou faapotopoto uma mai ma auai i tatalo ma anapogi. Na latou tatalo mo le timu po o le aisa ina ia mafai ai ona latou totoina a latou faatoaga ma ia ola ai. Sa latou faatali, ae o le susū sa latou moomia e lei oo mai lava.

Ua alu atu masina. Sa faaauau pea ona tatalo ma anapopogi tagata. Mulimuli ane, ona taloina ai lea e le persitene o le siteki se isi fonotaga. “Tōtō a outou faatoaga,” na ia tau atu ai i tagata. “Ua faafofogaina e le Tama Faalelagi a outou talosaga.”

E ui lava e lei vaaia e le au faifaatoaga ni faailoga o le a timu, ae sa latou faia lava e pei ona faatonuina ai i latou. I ni nai vaiaso na lumanai ai, na oo mai ai le tali a le Tama Faalelagi. Ua uma lea aso ma lea aso o lo o timu pea, ma tuuina atu i meatotō le faasūsūina e pei ona latou manaomia ina ia ola ai. O le tausaga lena na faatoa vaaia ai lava e le aufaifaatoaga ni fua sili ona lelei o a latou faatoaga. (Tagai ia David Carl Danielson, “Rain in Due Season,” Ensign, July 1978, pp. 68-69.)

Tala ma le talanoaga

• Aisea na talosaga atu ai taitai o le Ekalesia i le alalafaga i tagata ina ia tatalo ma anapopogi?

• Na faapefea ona fesoasoani le tatalo ma le anapogi ia te i latou? (Na latou latalata atu ai i le Tama Faalelagi ma Iesu Keriso. Na latou mauaina le timu e pei ona latou moomia mo a latou faatoaga ina ia ola.)

Faamatala atu nei loa le tala lona lua lenei:

O Rona o se teineititi laititi na manua i se faalavelave tautaavale. Ina ua faalogo lona aiga i le tala faanoanoa, sa latou faanatinati atu loa i le falemai. Sa koma o ia, o lona uiga ua le mafai ona toe tautala pe gaoioi.

Ua alu aso ma sau aso ae o lo o faatalitali pea lona aiga i le falemai, ma faamoemoe ma tatalo ina ia toe malosi o ia. Ae foliga mai e le lava a latou tatalo. Sa latou mananao ina ia latou latalata atu i le Tama Faalelagi ma Iesu Keriso, ia faaali atu ia te i laua lo latou alolofa ma ole atu ia te i laua ina ia faamalolo ia te ia.

Na fuafua le aiga e anapopogi. O o latou aiga uma, o tuaoi, ma uo na mananao e auai faatasi mai latou i le anapogi. Na faasilasila e le epikopo le anapogi i le lotu, ma e toatele foi nisi o le uarota na anapopogi faatasi ma i latou. Na latou lagona lo latou latalata atu i le Tama Faalelagi ma Iesu Keriso ma na latou iloa o le a fesoasoani le Tama Faalelagi ia te i latou pe afai o se mea sili lea mo Rona.

I se taimi ao latou tootutuli ma tatalo atu, na maua ai e matua o Rona se lagona o le a toe manuia la laua tama. Ao la ulu atu i lona potu i le falemai i lena taeao, sa tilotilo ae o ia i luga ma tautala atu ia te i laua. Mulimuli ane, sa mafai ona ia nofo ane i luga maʻai. E toe malosi lava Rona. Sa taʻuina atu foi e le epikopo i le aiga, ona o le anapogi sa faia, ua vavalalata tagata o le uarota ma faaalia le alofa e sili atu nai lo se isi lava taimi muamua.

Tala ma le talanoaga

• O le a se mea na tupu ona o lenei anapogi faapitoa? (Sa faamanuiaina le teine maua malosi. Ua vavalalata tagata o le uarota ma faaalia le alofa o le tasi i le isi.)

Faamanatu i tamaiti o nisi taimi e i ai isi fuafuaga a le Tama Faalelagi mo i latou e mamai pe manunua. Afai e le malolosi pe a maeʻa se anapogi ma tatalo, e tatau ona tatou taliaina le finagalo o le Tama Faalelagi, ma malamalama e sili atu lona silafia nai lo tatou.

Molimau a le faiaoga

Tuuina atu lau molimau i le taua o le anapogi e ala i lou faamatalaina atu o se mea na e oo i ai e mafai ai ona uunaia tamaiti ina ia mananao e anapogi. E mafai ona fai atu se mea na e oo lava oe ia iai, po o se mea foi e te iloa na tupu i se isi tagata e te iloa. Faamatala atu o le anapogi ma le tatalo ma le naunautai o se tasi lea o auala aupito taua e faaali atu ai i le Tama Faalelagi ma Iesu Keriso tatou te mananao e latalata atu ia te i laua ma maua mai ai la laua fesoasoani.

Tuu atu i tamaiti e faamatala mai ni mea latou te iloa e uiga i le anapogi.

Aotelega

Talanoaga

Fesoasoani i tamaiti e toe faamanatu mea na latou aoaoina e uiga i le anapogi ma le tatalo. Tago le tamaitiiti e ave se fesili mai le mea na e saunia ma tuu ai fesili ma taumfai e tali.

Talanoaga

• O le a le uiga o le anapogi? (Aua leʻai pe inu mo se faamoemoega amiotonu.)

• O ai e tatau ona anapogi? (O tagata uma lava e mafai.)

• A tatou anapogi ma ave a tatou tupe i le epikopo po o le peresitene o le paranesi, o le a le igoa o lena tupe? (Taulaga Anapogi.)

• O le a le mea a le epikopo e fai i a tatou taulaga anapogi? (Na te faaaogaina e fesoasoani ai i e matitiva ma e le tagolima.)

• O ni mafuaaga e anapogi ai? (Ina faalatalata atu ai i le Tama Faalelagi. Ina ia maua mai ai le fesoasoani mai le Tama Faalelagi. Ina ia fesoasoani ai i isi. O se poloaiga.)

• E fesoasoani faapefea le anapogi ia te i tatou? (E fesoasoani tatou te latalata atu ai i le Tama Faalelagi ma Iesu Kerisi.)

• O afea le Aso Sa anapogi? (E masani o le Aso Sa muamua o le masina.)

• O le a se mea e faaali atu e le anapogi i le Tama Faalelagi ma Iesu Keriso? (O a tatou tatalo e faamaoni ma e tatou te faatuatua ia te i laua.)

• Mata e te naunau e anapogi pe afai e te manaomia pe manaomia foi e se tasi se fesoasoani?

Valaaulia tamaiti e talanoa i o latou matua e uiga i le anapogi ma fuafua po o afea ae po o le a foi le umi e tatau ai ona anapogi?

Tofi se tamaitiiti e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoiiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Mo tamaiti laiti, atonu e fesoasoani ma aoga le tala lenei:

   Sa umi ona alu malaga le tama o Ioana. Ina ua foi mai, sa fiafia lava Ioana ina ua toe vaai ia te ia. Sa ia avatu se fusi lapoʻa ia te ia ma kisi atu i ai, ma sa tuuina atu e lona tama ia te ia se tagapepa lole faapitoa na aumai i le taulaga sa i ai.

   Sa tago Ioana i le tagapepa ma tamoe loa i tua o le fale i le mea sa taalo ai le tamaititi e igoa ia Teni o lo latou tuaoi. Sa vaaia e le tina o Ioana Teni ina ua maʻi lona tina.

   “Vaai!” sa leotele atu ai Ioana. “Vaai i mea na aumai e loʻu tama!”

   Sa autilo Teni i totonu o le tagapepa.

   • Mata o le a le mea na fai e Ioana?

   E te manatu na ia faapea atu, “E le mafai ona eʻai ai,” pe e te manatu na ia faapea atu, “Ou te manao e aveatu ni au mea”?

   Mata o le a se lagona o Teni pe ana fai atu Ioana “E le mafai ona eʻai ai”? Mata o le a se lagona o le tama o Ioana pe a na fai e Ioana lena tala? Mata e fiafia pe faanoanoa?

   Afai e fai atu, “Ou te manao e aveatu ni au mea,” mata e fiafia Teni? Mata e fiafia lona tama? Mata e fiafia lo tatou Tama Faalelagi? Mata e fiafia Ioana?

   Na fai atu Ioana, “Ou te manao e aveatu ni au mea,” ma sa fiafia tagata uma.

   E mafai ona outou fetufaai i Aso Sa anapogi, e pei lava ona faia e Ioana. E mafai ona e leʻai i le taeao, ma aua le aai i (taʻu meaai e masani ona aai ai tamaiti), e mafai ona outou faasaoina tupe mo matua. Ona mafai ai lea ona latou tuuina atu lea aofaiga i le epikopo, ona ia tuuina atu ai lea i se tasi o fiaai.

   • Mata o le a fiafia tagata o lo o manaomia ni meaai?

   • Mata o le a e fiafia ai?

2. Ia tusia e tamaiti se ata o se tagata atonu latou te mananao e anapogi ai.