Lesona 15

O Le Oo Mai o le Tusi a Mamona

Faamoemoega

Ina ia fesoasoani i tamaiti taitoatasi ia malamalama pe na faapefea ona tatou mauaina le Tusi a Mamona.

Sauniuniga

1. Suesue ma le agaga tatalo le Talaaga o Iosefa Samita 1:29-54, 59-60; Mamona 8:1-4.

2. Aoao ma saunia e usu pe faitau ia upu o le “O Papatusi Auro” (Tusipese a Tamaiti, itulau 86).

3. O Mea e Manaomia:

   1. Se Penina Tautele; afai foi e talafeagai, ia tofu tamaiti uma ma se Tusi a Mamona.

   2. Ata 3-32, Ua Faaali Atu Moronae ia Iosefa Samita i Lona Potu (62492; Taga Ata o le Talalelei 404); ata 3-33, Ua Mauaina e Iosefa Samita Papatusi Auro (62012; Taga Ata o le Talalelei 406); ata 3-34, Ua Faapuupuuina e Mamona Papatusi (62520; Taga Ata o le Talalelei 306); ma le ata 3-35, Ua Nanaina e Moronae Papatusi i le Mauga o Kumora (62462; Taga Ata o le Talalelei 320); ata 3-36, O Papatusi Auro.

4. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Sa Tusitusi Mamona i Luga o Papatusi Auro

Gaoioiga faatosina

Hamu le fuaiupu muamua o le “O Papatusi Auro.”

Gaoioiga faatosina

• Faaali atu le ata 3-36, O Papatusi auro. Fesili atu i so o se tasi pe mafai ona ia tauina maia po o le a le pese lea e te hamuina? (O papatusi Auro.)

Ia faamalamalama atu o le lesona e faatatau i papatusi auro.

Tau atu i le vasega, i le tele o tausaga ua mavae, sa tausia ai e tama talafaamaumau o o latou aiga. E masani lava, ao lei maliu se tama, na te tuuina atu le talafaamaumau o lona aiga i lona atalii, o ia lea o le a ia faaauauina le tusiaina o le talafaamaumau. E tausia e aiga o latou talafaamaumau faapenei mo le tele o tausaga. Na tusia foi e perofeta mea na tutupu i o latou aiga. Ae na latou tusia foi ala na fesoasoani atu ai le Tama Faalelagi ia i latou ma tagata na latou ola faatasi i lena taimi.

Talanoaina o le ata

Faaali atu le ata 3-34, Ua Faapuupuuina e Moronae ia Papatusi.

Ia faamalamalama atu na valaauina e le Tama Faalelagi se perofeta e igoa ia Mamona ina ia ona faamaopoopoina uma ia talafaamaumau o ona tagata, ia tusia i lalo vaega sili ona taua, ma tusia i luga o ni fasi auro manifinifi, e pei o ni itulau o se tusi. O nei mea ua taua o papatusi auro.

Talanoaina o le ata

• Aisea na tusia ai e Mamona ia talafaamaumau i luga o fasi auro ae le o ni pepa?

Tau atu i tamaiti o le auro o se uamea e umi ona aoga. E le masaesae le auro e pei o le pepa ma isi mea po o le elea foi e pei o isi uamea.

Ia faamalamalama atu na faaaogaina e Mamona ia papatusi auro aua e umi se taimi e aoga ai. E tele tausaga na faaaluina e Mamona e faauma ai le tusiaina o papatusi. Ao lei maliu Mamona, na ia tuuina atu papatusi i lona atalii o Moronae.

Ata

Faaali atu le ata 3-35, Ua Nanaina e Moronae Papatusi i Luga o le Mauga o Kumora.

Ia faamalamalama atu, ina ua uma ona tusitusi o Moronae i luga o papatusi auro, na faatonuina loa o ia e le Tama Faalelagi ina ia ona tanumiaina ia papatusi i luga o se mauga. Na silafia lelei e le Tama Faalelagi, o tusitusiga o lo o i luga o papatusi auro o le a taua tele i tagata e ola i le tele o tausaga i le lumanai. Sa faia e Moronae se pusa maa e tanumia ai papatusi ina ia mafai ai ona faasaoina seiloga e finagalo le Tama Faalelagi e faitauina e lana fanau.

Na Faatonuina e Moronae ia Iosefa Samita e Uiga i Papatusi

Pese

Usu pe faitau faatasi ma le vasega upu o le fuaiupu muamua o le “O Papatusi Auro.”

O papatusi auro sa natia

I luga o le mauga

Seia maua e le Atua se tasi

Lē na te faaali iai.

O se tusi a Nifae,

Na tusia i aso anamua;

Ua toe tauina mai nei,

I le Tusi a Mamona.

Pese

• O le a le ituaiga tagata o lo o taua mai i le pese e manaomia e le Tama Faalelagi na te aumaia ia papatusi auro? (O se tagata faatuatua tele.)

Ia faamalamalama atu o se tagata faatuatua tele o se tagata lea e faamaoni ma usiusitai. O le tagata faatuatua tele na filifilia e le Tama Faalelagi e fesoasoani ia te ia o Iosefa Samita.

Ata ma le tala

Tau atu i tamaiti le asiasiga a Moronae ia Iosefa Samita (tagai i le Talafaasolopito o Iosefa Samita 1:29-54, 59-60).

I se tasi afiafi ao tatalo Iosefa Samita. Na oo atu ai se malamalama uiga ese i lona potu. Sa matuai pupula le potu e sili atu nai lo le la susulu, ae o lo o po. E lei pine lava, ae faaali atu loa se agelu ia Iosefa i tafatafa o lona moega, o lo o tu i luga laititi ae lava o le fola.

Faaali atu le ata 3-32, Ua Faaali Atu Moronae ia Iosefa Samita i Lona Potu.

Na tauina atu e le agelu ia Iosefa o lona igoa o Moronae ma faamatala atu iai ua auina mai o ia e tau atu ia Iosefa o lo o iai se galuega faapitoa a le Tama Faalelagi mo ia e faia.

Na tau e Moronae ia Iosefa se tusi matagofie, o se talafaasolopito, na tanumiaina mo le fia selau o tausaga. O le tusi o lo o tusiaina i luga o ni fasi auro manifinifi. O lenei agelu o Moronae lava lea na ia tanumiaina ia papatusi ao soifua o ia i lenei lalolagi.

Na tauina atu e Moronae ia Iosefa a oo mai loa le taimi sao, o le a faatagaina loa Iosefa na te aveina ia papatusi auro mai le nofoaga sa nanaina ai i luga o le Mauga o Kumora. Na tauina atu foi e Moronae ia Iosefa le tele o isi mea taua e uiga i papatusi auro ma le taua o le galuega a Iosefa o le a valaauina ai o ia e faia. Ina ua maea ona tautala atu ia Moronae, ona faataaliolio ai lea o le malamalama ia te ia ma toe foi atu i le lagi.

Ao mafaufau Iosefa i lenei mea na tupu, na toe oo mai foi le malamalama i totonu o le potu. Na toe faaali atu Moronae faalua ma toe tuuina atu foi ia Iosefa le savali lava e tasi na ia tuuina atu muamua i lana uluai asiasiga. Ona toe alu ese foi lea o Moronae e pei lava o le taimi muamua.

Na toe taoto Iosefa i lona moega ma taumafai e fia malamalama i nei mea uma na tutupu. O se mea na matuai ofo tele ai ia Iosefa, ona na toe faaali atu foi Moronae ia te ia mo le lona tolu o taimi ma toe fai atu foi le tala lava lea e tasi e uiga i papatusi auro ma le galuega faapitoa a Iosefa. Na faaopoopo atu iai e Moronae e faapea, o le a taumafai Satani e faaosooso ia te ia ina ia ona faatauina atu ia papatusi ia maua mai ai ni tupe, ae na o le pau le mea e mafai ai e Iosefa ona maua mai papatusi, o le faia ai lea o galuega a le Tama Faalelagi.

Ata ma le tala

• O le a so outou manatu aisea na faaali faatolu atu ai Moronae ia Iosefa i lena po?

Ia faamalamalama atu o le tele o mea na tauina atu e Moronae ia Iosefa i lena po o ni mea sili ona taua. Na ia tauina atu faatolu ia Iosefa lana savali ina ia ona iloa lelei le savali.

E lei leva talu ona alu ese atu Moronae mo le taimi lona tolu, ae vivini loa se moa, o lea na iloa ai e Iosefa ua lata ona ao. O asiasiga e tolu a Moronae na alu ai le po atoa. Na alu ese Iosefa mai lona moega ae na te lei tauina atu lava i se tasi le mea na tupu. Ina ua uma le ti i le taeao, na o atu loa o ia ma lona tama e galulue i le faatoaga. Sa matuai vaivai lava Iosefa mai le mea na ia iloaina i le po ua mavae atoa ai ma le lē lava o lana moe ua le mafai ai e ia ona galue. Sa manatu lona tama ua mai o ia, o lea na ia auina atu ai o ia i le fale.

Na amata ona tautevateva atu Iosefa i le fale, ao a‘e atu o ia i luga o le pa, sa pau o ia i lalo i le eleele aua ua le lava lona malosi. Ina ua mavae se taimi ao taoto ai o ia i lalo, na ia faalogoina ai se leo o lo o valaau i lona igoa. O le agelu o Moronae.

Ona toe tauina atu lea e le agelu o Moronae ia mea uma na ia tauina atu ia te ia i le po ua mavae. Ona fai atu lea o le agelu ia te ia e toe foi i lona tama ma tau atu iai mea uma na ia vaaia ma faalogo iai.

Sa faalogo lelei le tama o Iosefa i upu uma ma na ia iloa e moni mea o lo o tauina atu e lona atalii. Na ia fai atu ia Iosefa e faia e pei ona fai mai ai le agelu aua o le savali na aumai mai le Tama Faalelagi. I se taimi lava o lena aso, na alu atu ai Iosefa i luga o le mauga o Kumora e saili ia papatusi auro o lo o tanumia ai. Ina ua taunuu atu o ia i le mauga, na ia alu atu sao lava i le nofoaga o lo o tanumia ai papatusi.

Mau

Faitau atu po o le faamatalaina i ni au lava upu le tala a Iosefa i mea na ia mauaina ai iina (tagai i le Talafaasolopito o Iosefa Samita 1:52).

Ia faamalamalama atu na faaali atu le agelu o Moronae ao tilotilo atu Iosefa i totonu o le pusa maa. Na ia fai atu ia Iosefa e aua nei ona aveeseina ia papatusi, aua e lei oo mai le taimi na te aveeseina ai.

Na fai atu Moronae ia Iosefa Samita ia foi atu i le mauga o Kumora i tausaga taitasi mo le fa tausaga. Sa faapea lava ona faia e Iosefa, ma o taimi uma lava e asiasi atu ai iina, na te iloaina ai Moronae o lo o faatali mai iina e aoaoina o ia i mea o lo o finagalo le Tama Faalelagi ma Iesu Keriso na te iloaina.

Ata

Faaali atu le ata 3-33, Ua Mauaina e Iosefa Samita Papatusi Auro.

Mulimuli ane, ina ua mavae le fa tausaga, ua oo mai le taimi e aveeseina ai papatusi mai le pusa. Na aveeseina le tapuni mai le pusa maa, ma ua tuuina atu papatusi auro i lima o Iosefa. Na tauina atu e Moronae ia Iosefa ina ia matuai faaeteete lava iai ma ia puipuia i lona ola.

Ata

• Aisea na taua ai tele ia Iosefa lona puipuia o papatusi? (Aua o le a taumafai tagata leaga e aveesea mai ia te ia ma o le a le faataunuuina ai le mea o lo o finagalo le Tama Faalelagi e faia i papatusi.)

Ua Faaliliuina e Iosefa Papatusi

Ia faamalamalama o tusitusiga sa i luga o papatusi sa tusia lea i se gagana e lei mafai ona faitauina e Iosefa. Na mauaina e Iosefa se meafaigaluega faapitoa e fesoasoani ia te ia i le faaliliuina o tusitusiga o lo o i luga o papatusi.

• Pe iai se tasi o outou na te iloa le mea e tau o le Urima ma le Tumema?

Ia faamalamalama atu o le Urima ma le Tumema e pei o ni tioata faapitoa ia e mafai ona vaai atu iai Iosefa mo se fesoasoani i le faaliliuina o tusitusiga anamua o lo o i luga o papatusi. Faatasi ai ma le fesoasoani a le Tama Faalelagi ma le faaaogaina o le Urima ma le Tumema na mafai ai e Iosefa ona faaliliuina upu o lo o i luga o papatusi i ni upu e mafai ona malamalama ai. Ina ua maea le faaliliuga i le gagana Peretania, ona lomia loa lea o le tusi. Ua taua o le Tusi a Mamona.

Uu i luga se kopi o le Tusi a Mamona. Ia faamanino atu o le tusi lenei na faaliliuina e Iosefa mai papatusi auro.

Ina ua uma ona ia faaliliuina le Tusi a Mamona, ona toe faafoi atu lea e Iosefa o papatusi ia Moronae.

Gaoioiga i tusitusiga paia

Tufatufa atu kopi o le Tusi a Mamona i tamaiti na e leai ni a latou tusi.

Ia faamanino atu o le Tusi a Mamona o lo o aofia ai le tele o tusi eseese. O tusi o lo o i totonu o le Tusi a Mamona o lo o faaigoaina i igoa o perofeta na latou tusia i luga o papatusi. Faaali atu i tamaiti le tusi a Moronae o lo o vaevaeina i mataupu ma fuaiupu.

Fesoasoani i tamaiti matutua e sue le Mamona e 8. Faitau faatasi ma le vasega le Mamona e 8, fuaiupu 1 ma le 4, e oo i le upu lalolagi.

Ia faamalamalama atu ua tatou taua lenei tusi o le Tusi a Mamona aua o Mamona na ia tusia le tele o upu o lo o i luga o papatusi auro. O Moronae, o le atalii lea o Mamona, na ia faaumaina ia faamaumauga.

Aotelega

Talanoaga e iloilo ai

Faaali uma atu ata mai le lesona pe faataatitia i luga o le fola. Tuu atu i tamaiti uma e faasino i le ata sao ao e fai atua fesili nei:

Talanoaga e iloilo ai

• O le fea ata o lo o faaalia mai ai papatusi auro?

• O le fea ata o lo o faaalia mai ai Moronae o lo o tusitusi i luga o papatusi auro?

• O fea le ata o lo o faaalia mai ai Moronae o lo o tanumiaina ia papatusi auro?

• O fea le ata o lo o faaalia mai ai le perofeta o Moronae o lo o talanoa atu ia Iosefa Samita?

• O le fea ata o lo o faaalia mai ai le tuuina atu e le perofeta o Moronae o papatusi auro ia Iosefa Samita?

Pese

Usu pe faitau faatasi ma le vasega fuaiupu uma o le “O Papatusi Auro.”

Fai atu i le tamaititi o le a na faia le tatalo faaiu e faafetai atu i le Tama Faalelagi mo le Tusi a Mamona.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. I le faaaogaina o ata e talafeagai ai, ia toe iloilo ni nai tala o le Tusi a Mamona o le a aoao iai tamaiti i lenei tausaga. Mo se faataitaiga:

   1. Faaali atu le ata 3-37, Ua Faatoilalo e Nifae Ona Uso Fouvale (62044; Taga Ata o le Talalelei 303). Tau atu i tamaiti o le a latou aoao pe na faapefea ona fesoasoani le Tama Faalelagi ia Nifae i le fauina o se vaa e ui lava sa feitai ona uso matutua ia te ia.

   2. Faaali atu le ata 3-38, O Toa Talavou e Lua Afe (62050; Taga Ata o le Talalelei 313). Tau atu i tamaiti o le a latou aoao pe na faapefea ona tau nei alii talavou e lua afe ina ia tausia le saolotoga o o latou aiga.

   3. Faaali atu le ata 3-17, Ua Aoao Atu Iesu i le Itu Lalolagi i Sisifo (62380; Taga Ata o le Talalelei 316). Tau atu i tamaiti o le a latou aoao e uiga i le asiasi atu o Iesu Keriso i tagata Sa Nifaē .

2. Tuu atu i tamaiti latou te tusiaina se ata o papatusi auro ma le Tusi a Mamona. Tusi upu Papatusi Auro ma le Tusi a Mamona i luga o a latou ata.

3. Ina ia fesoasoani i tamaiti ia malamalama pe na faapefea e perofeta anamua ona tusitusi i luga o uamea, ia valaaulia se tamaititi e taumafai e tusi le mataitusi muamua o lona igoa i le pito i lalo o se atigi apa i se fao. E tatau i le faiaoga ona ia faataitaiina muamua le vaega lenei.

4. Toe iloilo faatasi ma tamaiti le mataupu e valu o le faatuatua. Fesoasoani ia i latou o ē mafai ona taulotoina ina ia tauloto uma.