Tusi Lesona ma le Taimi o Fetufaaiga a le Peraimeri
Lesona 13: O le Feagaiga o le Papatisoga

Lesona 13

O le Feagaiga o le Papatisoga

Faamoemoega

Ina ia fesoasoani i tamaiti ina ia latou malamalama, pe a papatisoina i latou ua latou osia se feagaiga ma le Tama Faalelagi.

Sauniuniga

Faaaliga: Talu ai ona o lenei lesona e manaomia tele ai le faafetauiina i tamaiti ua taifa, lima, ma le ono tausaga, o lea atonu e te manao ai e te faatali seia latalata atu i le taimi e papatisoina ai i latou ona aoaoina atu lea.

  1. Suesue ma le agaga tatalo le Mosaea 18:8-10 ma le Alema 7:15-16.

  2. Ia saunia upu nei e tusia i luga o ni fasipepa:

    Usiusitai i Poloaiga

    Faamagalo au

    Meaalofa a le Agaga Paia

    Mau faatasi ma ia e faavavau

  3. Ia faia ni pepa faailoga se lua e ala lea i le gagauina i le umi, ma tusia ai upu nei e pei ona faaalia atu:

    Ou te folafola atu

    Ua folafola mai e le Tama Faalelagi

  4. Ia saunia e te fesoasoani atu i tamaiti i le usuina po o le faitauina o upu o le “Papatisoga” (Tusipese a Tamaiti, itulau 100).

  5. O Mea e Manaomia:

    1. Se Tusi a Mamona

    2. Se pine e faia i pepa mo tamaiti uma e tusia ai upu “e mafai ona ou tausia au folafolaga.”

    3. Ni ata ʻoti o se tama ma se teine (ata ʻoti 3-1 ma le 3-2).

    4. Se taga pepa telē e ofi uma ai i totonu ia upu o lo o tusia i fasipepa.

    5. Penisina, laupapa, ma se solo.

    6. Talita ma mama a le FMT.

    7. Ata 3-13, Tamaititi o Lo o Papatisoina (62018); ata 3-10, O le Uluai Faaaliga (62470; Taga Ata o le Talalelei 403); ata 3-23, Tamaititi o Lo o Faitauina Tusitusiga Paia; ata 3-24, Tamaititi o Lo o Tatalo; ata 3-25, Alu i le Lotu; ata 3-26, Tamaititi o Lo o Totogi Lana Sefuluai; ata 3-27, Fetufaai le Uila Vilivae (62317); ata 3-28, Filifili le Sao.

  6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Folafolaga ma Feagaiga

Gaoioiga faatosina

Tofi se tamaititi e fesoasoani ia te oe. Fai atu iai afai na te faia mea o le a e tauina atu ia te ia, o le a na maua se mea faapitoa. Fai atu iai e fai se mea faigofie, e pei o le faataamilo faalua ma faatalofa ia te oe. Fai atu iai na te folafola mai o le a ia faia i le mea e gata mai ai lona lelei. Ona tuu atu loa lea iai na te faia. A maea ona ia faataunuuina, ona tau atu lea iai o le a e tausia foi lau vaega o le folafolaga. Faapine pe faapipii i lona ofutino le pine o lo o iai upu, “E mafai ona ou tausia au folafolaga.” Tau atu i tamaiti, na oulua tausia uma ma le tamaititi na fesoasoani ia te oe ia oulua folafolaga. Ona tuu atu lea o le avanoa i tamaiti uma latou te faia ai le mea lava lea e tasi ina ia maua ai ni a latou pine.

Gaoioiga faatosina

  • O le a le mea na folafola atu e i tatou taitoatasi e faia?

  • O le a se mea e tupu pe a e tausia lau folafolaga?

Tala

Faamatala atu le tala lenei i ni au lava upu:

Sa tau alu atu Setefano e taalo i fafo i se tasi taeao ae tuu atu loa iai e lona tina le tagapepa apu.

“O le tagapepa apu lenei e ave ma Sister Jones. E mafai ona e aveina atu mo au?” sa fesili atu ai lona tina.

“Ioe, e mafai,” sa tali atu ai Setefano ma tago atu i le aumai le tagapepa.

“Ia mautinoa ua e aveina atu muamua ia apu ae te lei alu e te taalo, ma e faaeteete ia aua nei toulu i lalo i le palapala,” sa lapatai mai ai lona tina. Ave sao lava ia Sister Jones.”

“Ou te folafola atu o le a ou faia!’ sa fai atu ai Setefano.

E savali mai i fafo Setefano mai lo latou fale, ae o lo o faatali atu ana uo e toalua i fafo. Ua la amataina se taaloga ma o lo o la mananao latou te taaalo faatasi.

“Ou te alu muamua lava e ave apu nei,” sa tali atu ai Setefano.

Sa fai atu le tasi o tama nei, “Oi, e mafai ona e faia i se isi taimi. E na o le tasi lava se itula tatou te taaalo ai, ma ua tatau ona tatou amata.”

“Leai, o le a ou faia muamua le mea lenei na ou folafola atu i lou tina.

Ao savali atu o ia, na amata ona ia liaiina le tagapepa i luga i le ea. Ona ia manatua lea o lana folafolaga. Afai na te liaiina le tagapepa i luga i le ea, atonu o le a paʻu ese mai i fafo se apu ma faamanuaina. Na ia uumauina ma le faaeteete le tagapepa ao ia savali atu agai i le fale o Sister Jones.

Sa ataata ia Setefano ao ia tuuina atu le tagapepa ia Sister Jones.

Talanoaina o le tala

Talanoaina o le tala

  • O le a le mea na folafola atu e Setefano i lona tina?

  • O le a sou manatu o le a se lagona na oo ia Setefano ina ua ia tausia lana folafolaga?

Talanoaga i le laupapa

Tusi lolomi le upu folafolaga i luga o le laupapa, ma fesili atu i tamaiti po o le a so latou manatu o le a le uiga. Ia faamanino atu afai ua e malie e te faia se mea po o lou fai atu o le a e faia, ua e faia se folafolaga.

Tulaga e talanoaina

Tau atu i tamaiti e iai le isi ituaiga folafolaga, e lua ona itu. Fai atu iai e faalogo lelei i le tulaga lenei ina ia mafai ai ona latou tauina mai po o a mea na folafola e le tasi o Sini ma lona tama i le isi:

Na tau e Sini ma lona fiafia tele i lona tama le faaaliga o lo o faia i le taulaga ma fesili atu loa iai pe mafai ona la o. Sa toe faamanatu atu iai e tama ia Sini le tele o le otaota e i lo latou fanua e tatau ona faamamaina. Sa faaʻūʻū ia Sini. Sa fai atu iai tama, afai na te faamamaina le fanua i le taeao, o le a na ia aveina atu o ia i le faaaliga i le aoauli lena. Na faia e Sini ma lona tama ni folafolaga i lo la va.

Tulaga e talanoaina

  • O le a le vaega a Sini i le folafolaga?

  • O le a le vaega a lona tama?

  • Ana faapea e solia e Sini lana vaega o le folafolaga, faamata o le a tausia pea e lona tama lana vaega o le folafolaga? (Leai.)

Talanoaga i le laupapa

Tusi lolomi le upu feagaiga i luga o le laupapa. Ia fai faatasi e outou ma tamaiti.

Talanoaga i le laupapa

  • O le a le feagaiga?

Ia faamalamalama atu o le feagaiga o se folafolaga lea e lua ni ona itu. Pe a e faia se feagaiga ma se tasi, ua e lotomalie e te faia se mea ma ua lotomalie foi lena tagata na te faia nisi mea.

Tatou te Faia se Feagaiga i le Papatisoga

Talanoaina o le mau

Tau atu i tamaiti e mafai ona latou faia se feagaiga taua lava pe a valu o latou tausaga. Fai atu iai e faalogo lelei i le mau lenei ina ia mafai ai ona latou iloaina pe o ai lea e faia iai le feagaiga ae pe faapefea foi ona faia. Faitau ma faamalamalama atu le Alema 7:15, e amata i le “o mai ia ma ia outou o atu.”

Talanoaina o le mau

  • E tusa ai ma lenei mau, o ai lea tatou te faia iai le feagaiga? (Tama Faalelagi.)

  • O le a se mea e tatau ona e faia ina ia faaalia atu ai lou faia o le feagaiga ma le Tama Faalelagi? (Ia papatisoina.)

Ata ma le talanoaga

Faaali atu le ata 3-13, Tamaititi o Lo o Papatisoina. Ia faamatala atu o le feagaiga o lo o tatou talanoa iai o le feagaiga o le papatisoga. Pe a papatisoina i tatou, ua tatou faaali atu i le Tama Faalelagi ua tatou osia se feagaiga ma ia. Ua tatou folafola atu se mea tatou te faia, ma ua folafola mai foi e le Tama Faalelagi se mea na te faia.

Pese

Usu pe faitau faatasi ma tamaiti upu o le “Papatisoga”:

Na alu Iesu ia Ioane le Papatiso,

I Iutaia anamua,

Sa papatisoina i le faatofuina

I le vai o Ioritana.

Upu tusi ma le talanoaga

Faamalamalama atu faamatalaga nei ma fesili atu ia fesili. Ia faatagaina tamaiti e faamatala mai i le mea e gata mai ai lo latou mafai. Fesoasoani atu iai pe a moomia. Ia faaali atu upu tusi e talafegai ai i le taimi o le talanoaga. Ona gaugau lea ma tuu i totonu o le tagapepa.

Pe a papatisoina i tatou, ua tatou folafola atu i le Tama Faalelagi o le a tatou usiusitai i ana poloaiga. (Faaali atu le upu tusi.)

Upu tusi ma le talanoaga

  • O a nisi o poloaiga a le Tama Faalelagi?

  • O le a le mea ua tatou folafola atu i le Tama Faalelagi pe a papatisoina i tatou? (Ia usitai i poloaiga.)

O la tatou vaega lenei o le folafolaga. Afai tatou te tausia la tatou folafolaga, ua folafola mai e le Tama Faalelagi o le a faamagaloina i tatou pe a tatou salamō (faaali atu le upu tusi) ma tuuina mai ia i tatou le meaalofa a le Agaga Paia (faaali atu le upu tusi). Na ia folafola mai o le a tatou mau faatasi ma ia e faavavau (faaali atu le upu tusi).

Upu tusi ma le talanoaga

  • O le a le vaega a le Tama Faalelagi i le feagaiga? (O le a ia faamagaloina i tatou pe a tatou salamo. O le a ia tuuina mai ia i tatou le meaalofa a le Agaga Paia. O le a ia faatagaina i tatou ina ia tatou mau faatasi ma ia e faavavau.)

Gaoioiga

Faaali atu le ata 3-10, O le Uluai Faaaliga, ma ata tipi e lua. Tuu atu i se tamaititi na te faasinoina mai le Tama Faalelagi i le ata. Faitau faailoga e lua ma fai i se tamaititi na te tuuina le upu “Ou te folafola atu” i tafatafa o ata tipi; ona fai lea i le tamaititi e tuu le upu “Ua Folafola mai e le Tama Faalelagi” i tafatafa o le ata O le Uluai Faaaliga. Ia auauai uma tamaiti e aveeseina mai se upu tusi mai totonu o le tagapepa, faitau (po o lou faitauina e oe), ma tuu i luma tonu o le faailoga sao. Toe fai le gaoioiga seia soo uma tamaiti. Toe iloilo ia lisi e lua. Ia faamalamalama atu o poloaiga ua tatou folafola atu tatou te usitaia e aofia ai aoaoga a Iesu Keriso ua tatou aoaoina i le Peraimeri ma o tatou aiga.

Aotelega

Ata

Faaali atu ata e ono o lo o faamatalaina mai ai poloaiga (ata 3-23 e oo i le 3-28), le talita a le FMT, ma se mama a le FMT. Ia tauina mai e tamaiti taitoatasi se poloaiga o lo o faamatalaina mai i ata ma le talita. (O ata o lo o faamatalaina mai ai le faitauina o tusitusiga paia, tatalo, alu i le lotu, totogi sefuluai, alofa i isi, ma le filifili o le sao. Fesoasoani i tamaiti ina ia latou malamalama e le na o le pau lenei o poloaiga ua tatou folafola atu tatou te usitaia. Atonu e te manao e ta’u mai e i latou nisi poloaiga.)

Ia uunaia tamaiti e tilotilo i a latou mama a le FMT ma mafaufau e uiga i lo latou tausia o a latou folafolaga ma le Tama Faalelagi pe a latou vaai ia latou mama. E tatau ona latou manatuaina o le papatisoina e aofia ai le folafola atu e tausia ana poloaiga.

Molimau a le faiaoga

Ia faamamafa atu le taua o le tausia o folafolaga, aemaise lava i folafolaga tatou te faia ma le Tama Faalelagi. Ia tuuina atu lau molimau e alofa le Tama Faalelagi i tamaiti uma lava ma e finagalo o ia e tausia lana vaega o le feagaiga o le papatisoga. Ia uunaia tamaiti ina ia saunia e faia ma tausia feagaiga o le papatisoga e ala lea i lo latou tausia o folafolaga latou te faia.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

  1. Faaali atu i tamaiti le ata vitio “Baptism-A Promise to Follow” (9minute) o lo o i le Primary Video Collection (53179), ma talanoaina fesili nei:

    • O le a le mea na folafola atu e Lui i ona matua?

    • O le a le mea na folafola atu e Lui i le Tama Faalelagi ina ua papatisoina o ia?

  2. Ia saunia se kopi “O Lau Feagaiga o le Papatisoga,” o lo o i le faaiuga o lenei lesona mo tamaiti taitoatasi. Faitau faatasi ma tamaiti. Fesoasoani atu po o le tuu atu i le tamaititi na te tusiaina lona igoa i luga o le laina ua saunia atu. Ia uunaia i latou e tausia a latou pepa i se nofoaga e mafai ona vaai ma mafaufau pea iai.

Ata
baptismal covenant
Ata
baptismal covenant

O au o, ou te folafola atu o le a ou usitai i poloaiga a le Tama Faalelagi. Afai ou te tausia lau vaega o le feagaiga, ua folafola mai e le Tama Faalelagi

1. O le a faamagaloina au pe a ou salamo.

2. Tuuina mai ia te au le meaaalofa a le Agaga Paia.

3. Ou te maua le avanoa e mau faatasi ai ma ia e faavavau.

Lolomi