Lesona 42

Sefuluai

Faamoemoega

Ina ia faamalosia le naunau o tamaiti e totogi a latou sefuluai.

Sauniuniga

1. Suesue ma le agaga tatalo le Mataupu Faavae ma Feagaiga 119:3-4 ma le Malaki 3:10.

2. Ia saunia e fesoasoani i tamaiti e usu pe faitau upu o le “E Fia Foai i le Alii Lau Tasi Vaesefulu” (Tusipese a Tamaiti, itulau 150).

3. O Mea e Manaomia:

   1. Se Tusi Paia ma se Mataupu Faavae ma Feagaiga.

   2. Sue ane se ata o le malumalu o lo outou atunuu.

   3. Aveane ni pepa e totogi ai sefuluai mani teutusi ia tofu ai outou ma tamaiti.

   4. Ia tofu tamaiti ma penitala.

   5. Ni tupe siliva se sefulu o le ituaiga e tasi.

   6. Se fagu.

   7. Apu se sefulu (po o nisi fualaau aina) po o nisi mea.

   8. Ata 3-26, Tamaitiiti o loo Totogi Lana Sefuluai; ata 3-62, Malumalu o Portland Oregon (62617); ata 3-68, Tagata o lo o Faia Talafaasolopito o Aiga; ma le ata 3-69, O Faifeautalai (62611).

4. Ia faia ni sauniuniga e talafeagai ai mo soo se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaitiiti e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

O Le Tulafono o le Sefuluai

Gaoioiga faatosina

Faaali atu apu e sefulu (po o nisi mea) i se mea e mafai ona vaai uma i ai.

Gaoioiga faatosina

• Afai ou te avatu ia te outou nei apu e sefulu ona ou toe fai atu lea e toe aumai le apu e tasi, mata tou te naunau e aumai ia te au? Sii i luga le lima pe a e manatu e te faia.

• O ai na mafai ai ona ola le apu?

• O ai na faia le lalolagi?

Faamatalaga a le faiaoga

Ia faamamafa atu o lenei lalolagi ma mea lelei uma o i ai, na aumaia e le Tama Faalelagi ma Iesu Keriso ia te i tatou. E alolofa ma manatu mai ia i tatou uma taitoatasi. E mafai ona tatou faaali atu lo tatou agaga talisapaia mo lo laua alofa ma lo laua agalelei e ala i le usiusitai i a laua poloaiga ma le faia o mea e ao ona tatou faia e fesoasoani ai e faamalosia le Ekalesia.

Faamalamalama o lenei lesona e uiga i se poloaiga taua. A tatou usitai i lenei poloaiga, ua tatou fesoasoani ia ola le Ekalesia.

Fai i tamaiti e faalogo a o e faitauina le Mataupu Faavae ma Feagaiga 119:3-4.

Faamatalaga a le faiaoga

• O le a le poloaiga o le a tatou talanoaina nei? (Sefuluai.)

• O le a le uiga o le sefuluai?

Lesona faatino

Toe faamanatu o le sefuluai o lona uiga o le tasi vaesefulu. Faaali i tamaiti tupe siliva e sefulu.

Lesona faatino

• Afai o le tupe maua lenei a se tagata, e fia le sefuluai e tatau e lena tagata ona totogi?

Fai i se tamaitiiti e sau e tago i le tupe siliva e tasi mo le sefuluai.

Faamalamalama na poloaiina e le Tama Faalelagi ma Iesu Keriso tagata o le Ekalesia e aveatu le tasi vaesefulu o tupe latou te maua i le Ekalesia mo le sefuluai. Talu ai o mea uma lava e maua mai i le Tama Faalelagi, o le totogi o le sefuluai o le mea moni o le toe faafoiina atu lea o le tasi vaesefulu ia te ia. O le sefuluai e a le Tama Faalelagi ia, ma e le tatau ona tatou taofia mai ia te ia.

O Le Ala E Totogiina Ai le Sefuluai

Gaoioiga

Faaali atu teutusi o sefuluai ma isi foai. Faamalamalama le mea o lo outou falelotu e maua mai ai teutusi o sefuluai ma isi foai ma pepa e totogi ai. O nei teutusi e masani ona maua i tafatafa o le ofisa o le epikopo. E faaaogaina mo le totogiina o sefuluai.

Tufatufa i tamaiti teutusi ma pepa e totogi ai sefuluai ma ni penitala. Faasino i tamaiti le mea e tusi ai o latou igoa ma tusi le aofai o le sefuluai e totogi.

Faamalamalama a totogi a latou sefuluai, e tatau ona latou faatumuina le pepa, tuu le tupe i totonu o le teutusi, faapipii, tusi o latou igoa i luma, ona ave ai lea i le epikopo po o se tasi o ona fesoasoani.

Fai i tamaiti e tusi o latou igoa i luma o le teutusi.

Ia faamamafa atu le taua o le totogi o le tasi vaesefulu o soo se tupe tatou te maua i le epikopo mo le sefuluai.

Gaoioiga

• E toatele outou ua totogiina sefuluai. E mafai ona e faamatalaina ou lagona?

E Faaaogaina Sefuluai e Fesoasoani Ai Ina Ia Ola le Ekalesia a Iesu Keriso

Ata ma talanoaga

Faaali le ata 3-26, Tamaitiiti o lo o Totogi Lana Sefuluai. Faamalamalama le mea e tupu i le sefuluai pe a oo atu i le epikopo. E faitau, ona auina atu lea o le sefuluai i le laumua o le Ekalesia. Ona faaaogaina ai lea e taitai o le Ekalesia i auala eseese e fesoasoani ai ina ia ola le Ekalesia, e pei o le fausia o malumalu ma falelotu, aumaia o mea tatou te faaaogaina e aoao ai, ma mo seminare e fesoasoani ai tatou te aoaoina le talalelei.

Fai i tamaiti o le a e faaaliina atu ia i latou mea e fai e taitai o le Ekalesia i tupe o le sefuluai, le tasi vaesefulu a le Alii. Vaevae se apu se tasi ia tofu uma ai le vasega ma se fasi apu, ona fai lea i ai e ʻai. Faamatala, e foliga faapena le sefuluai o lo o tatou totogiina ina ia mafai ai ona fesoasoani i tagata e toatele.

E tuufaatasi a tatou sefuluai ma sefuluai a isi tagata o le Ekalesia i le lalolagi atoa. E toe foi mai lava ia i tatou i auala eseese.

Taʻu atu mea nei, ma faaali ata e fetaui i ai:

Ata ma talanoaga

1. O tupe o sefuluai e totogi ai mea e faaalu i le fauina ma le tausiaina o falelotu, malumalu, ma isi fale o le Ekalesia.

2. O nisi tupe o sefuluai e totogi ai galuega faalemalumalu ma talafaasolopito o aiga.

3. O nisi tupe o sefuluai e lagolago ai galuega faafaifeautalai.

Faamalamalama e fesoasoani foi tupe o sefuluai i isi mau mea, e pei o polokalama faaseminare ma mataupu faalelotu. O se matafaioi ma se faamanuiaga le totogi o sefuluai. E ao ona tatou maua lagona lelei ona o tupe o lo o tatou tuuina atu mo sefuluai, o lo o fesoasoani i le Ekalesia.

Tala

Fai i tamaiti e faalogo i le tala lenei ina ia latou iloa ai le ala na faaaogaina ai se sefuluai a se tagata e fesoasoani ai i le Ekalesia:

O Uso Uilisone o se paionia. Sa ia te ia ni povi poʻa lelei se lua. O nei manu sa fesoasoani tele ia Uilisone mo le suaina o lana faatoaga.

Ina ua oo mai le taimi e totogi ai lana sefuluai, sa iloa e Uso Uilisone e le lava lana tupe. Sa le manao o ia e totogi na o sina vaega. Sa ia manao e totogi uma.

O lea na tonu ai ia te ia o le a na foaiina atu le isi ana povi poʻa e fiafia lava i ai e fai ai lana sefuluai, e ui lava o le a totoe ai na o le povi e tasi.

Sa avein e Uso Uilisone le povi i le epikopo. Na tuuina atu e le epikopo ia Uso Uilisone lana lisiti mo lana sefuluai. Sa lagona e Uilisone le faanoanoa. Ae talu ai e alofa o ia i le Tama Faalelagi ma Iesu Keriso, sa fiafia o ia ina ua ia aveina atu lana povi i le Ekalesia mo lana sefuluai.

E masani ona mafaufau Uso Uilisone e uiga i le povi na ia tuuina atu mo le sefuluai. E mafaufau lava pe faapefea e lana povi ona fesoasoani i le Ekalesia. Ona oo lea i se tasi aso, sa i ai o ia i Sate Leki i le mea sa fausia ai le malumalu. Na ia vaaia ni povi poʻa mananaia se lua o tosoina ʻala tetele. Sa fiafia lava o ia e maitauina le galuega a nei povi ma oo ina ia faalatalata atu i ai ina ia lelei lana matamata. Sa matua teʻi o ia ma mimita ina ua ia iloa atu o le tasi o ia povi, o lana povi toeaina e fiafia lava i ai. Oka se fiafia o Uso Uilisone ina ua ia iloaina o le povi na ia tuuina atu mo le sefuluai o lo o fesoasoani i le fausiaina o le malumalu!

Mai lava i lena taimi, o le totogiina o sefuluai o se mea sa atili ai ona fiafia Uso Uilisone. E mafaufau lava o ia i ala eseese e tele o lo o faaaogaina ai lana sefuluai e fesoasoani ai i le Ekalesia.

Faamalamalama, e ui lava ina tatou te le o vaai pea i le ala o lo o faaaogaina ai a tatou sefuluai, e pei o Uso Uilisone, ae ua tatou iloa lava o lo o fesoasoani a tatou sefuluai i le Ekalesia.

E Tatau Ona Totogi ma le Naunautai a Tatou Sefuluai

Pese

Aoao i tamaiti upu o le “E Fia Foai I Le Alii Lau Tasi Vaesefulu.”

E foai lau tasi

vaesefulu mo le Alii

E faaali atu ai

Ia Ia lou alofa

O laʻu sefuluai

E fai ma au faafetai

Mo manuia ua Ia

Tuuina mai ia te aʻu.

Pese

• O ai e fiafia pe a tatou totogi a tatou sefuluai? (Tama Faalelagi ma Iesu Keriso.)

• O le a se mea ua tatou faaali atu i le Tama Faalelagi pe a totogi a tatou sefuluai? (Tatou te alolofa ia te ia, ma tatou faafetai mo mea ua ia foai mai.)

Ia toe fai e tamaiti le fuaiupu muamua o le pese. Faamanino atu a tatou totogiina a tatou sefuluai, ua tatou faaali atu i le Tama Faalelagi tatou te alolofa ia te ia. Ia faamamafa atu le matua fiafia o le Tama Faalelagi ma Iesu Keriso pe a tatou totogiina a tatou sefuluai, aemaise lava pe a tatou totogiina ma le naunautai.

E Faamanuiaina i Tatou Pe A Totogi a Tatou Sefuluai

Faitauga Mau

Taʻu atu i tamaiti na folafola mai e le Tama Faalelagi ma Iesu Keriso o le a faamanuiaina i tatou pe a tatou totogiina a tatou sefuluai.

Faitau le Malaki 3:10.

Faitauga Mau

• Tou te manatu o le a le uiga o le folafolaga a le Tama Faalelagi na te tatala pupuni o le lagi ma faamanuia mai i tatou?

Faamatala o faamanuiaga e oo mai ia i latou e totogi a latou sefuluai. Sa saunoa mai Peresitene Heber J. Grant, o se tasi o perofeta o aso e gata ai, o le a faamanuiaina i tatou i se malamalama sili atu i le Tama Faalelagi ma Iesu Keriso, i se molimau e malosi atu, ma se agavaa faateleina e usitaia poloaiga (tagai Lipoti Konafesi, Aperila, 1925, itulau 10). Ua taʻu mai foi e isi perofeta o aso e gata ai, a totogi a tatou sefuluai, o le a tatou tagolima. Tagolima o lona uiga o le faamanuiaina i tatou i mea tatou te manaomia e pei o meaai ma me ae nonofo ai.

Faitauga Mau

• Mata tou te mananao i nei faamanuiaga?

Faamanino atu e faamanuiaina uma lava tagata e totogi a latou sefuluai e le Tama Faalelagi. Fai atu i tamaiti e alofa le Tama Faalelagi ia te i latou, ma e ui ina o le a na ia le faamanuiaina i latou uma i le ala e tasi, a latou totogiina a latou sefuluai, o le a ia faamanuiaina i latou i le ala sili latou te manaomia.

Ia faamamafa atu e tatau ona tatou faatuatua, totogi atoa ma le faamaoni le sefuluai, ma faalagolago i le Tama Faalelagi.

Aotelega

Taaloga

Fesoasoani i tamaiti e faatulaga o latou nofoa i se liʻo, pe faanonofo foi i latou i se liʻo i luga o le fola. Faataavili le fagu. Tuu se fagu i le ogatotonu o le liʻo o nofoa. Taavili le fagu. O le tamaitiiti e u i ai le gutu o le fagu, o ia lena ua maua le avanoa e ioe ai pe leai foi. Ona vili ai lea e le tamaitiiti lena le fagu.

A lava le taimi, atonu o le a e manao e toe fai le taaloga.

Faitau faamatalaga nei. Afai e le ioe i ai le tamaitiiti, ona taʻu atu lea i ai e tamaiti o le faamatalaga saʻo.

Taaloga

1. O se poloaiga le totogi o le sefuluai. (Ioe).

2. Sefuluai o lona uiga o le tasi vaelima. (Leai. Sefuluai o lona uiga o le tasi vaesefulu.)

3. E totogi a tatou sefuluai i le Ekalesia. (Ioe).

4. E faaaoga sefuluai e fesoasoani ai i le fausia o fale o le Ekalesia. (Ioe).

5. E faaaoga sefuluai e lagolagoina ai galuega faafaifeautalai, lolomi ai tusi, ma fesoasoani ai i galuega faalemalumalu ma talafaasolopito o aiga. (Ioe.)

6. E le afaina pe totogi a tatou sefuluai pe leai. (Leai.)

7. E faamanuiaina i tatou e le Tama Faalelagi ma Iesu pe a totogi a tatou sefuluai. (Ioe.)

Molmau a le Faiaoga

Faauma le lesona i le tuuina atu o lau molimau e uiga i faamanuiaga o le totogiina o sefuluai. Uunai tamaiti ina ia filifili pea le mea tonu ma totogi a latou sefuluai ma le fiafia.

Pepa e Tufatufaina Atu

Toe faafoi pepa e totogi ai sefuluai ma teutusi i tamaiti pe a uma le Peraimeri.

Tofi se tamaitiiti e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Fesoasoani i tamaiti e sauni se nofoaga lelei e mafai ai ona teu ese a latou tupe o sefuluai mai isi o a latou tupe. E mafai ona faaaoga se atigipusa, se tamai atigi fagu po o se apa, po o se teutusi foi. Fai i ai o taimi uma lava e maua ai a latou tupe, e tatau ona aveese muamua le tupe mo le sefuluai ona tuu lea i totonu o a latou mea teutupe faapitoa.

2. Valaaulia se failautusi o le uarota po o le paranesi e faamalamalama pe o le a le mea e tupu pe a oo atu sefuluai i le epikopo po o le peresitene o le paranesi.

3. Faaali le kaseti vitio o le “Pupuni o le Lagi,” o lo o maua i le Kaseti Vitio o Kosi Amata 2 (53178).

4. Sauni se pepa mo tamaiti taitoatasi. Tusi i le isi itu o le pepa upu “O Le Tama Faalelagi” ae o le isi itu ia tusi ai “O Au.” Ia tusia e tamaiti ni mea se iva (tupe, apu, po o nisi mea) i le itu a latou, ae tasi se mea i le itu a le Tama Faalelagi.