Lesona 6

Ua Toefuataiina le Ekalesia a Iesu Keriso

Faamoemoega

Ina ia fesoasoani i tamaiti taitoatasi ia malamalama o le Ekalesia moni a Iesu Keriso ua toefuataiina.

Sauniuniga

1. Suesue le Amosa 3: 7.

2. Afai e maua i la outou eria, ia fuafua e faaali le ata o Joseph Smith: The Man (9 minute), o lo o i le kaseti vitio o le Moments from Church History (53145).

3. Ia saunia e usu pe faitau upu o le “Perisitua Ua Toefuatai” (Tusi Pese a Tamaiti, itulau 89); o lo o maua upu i tua o le tusi lesona lenei.

4. O Mea e Manaomia:

   1. O se Mataupu Faavae ma Feagaiga ma se Tusi Paia.

   2. O se ata po o se isi mea manaia lava, e pei o se fugalaau, atigi figota, po o se ata manaia lava mai le potu tusi o le falelotu.

   3. Ni pepa e taai e pei o ni pu.

   4. Ata 3-10, O le Uluai Faaaliga (62470; Taga Ata o le Talalelei 403); ata 3-11 Ioane le Papatiso o Lo o Tuuina Mai le Perisitua Arona (62013; Taga Ata o le Talalelei 407); ata 3-12, Toefuataiina o le Perisitua Mekisateko (62371; Taga Ata o le Talalelei 408); ata 3-13, Tamaititi o Lo o Papatisoina (62018); ma le ata 3-14, Teineititi o Lo o Faamauina (62020).

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Ua Toefuataiina Le Ekalesia Moni

Gaoioiga faatosina

Faitau atu i tamaiti le Faaaliga 14:6-7. Ia faamalamalama atu i tamaiti o le agelu o lo o taʻuina mai i lenei mau o le agelu lea o Moronae, o lē na faaali atu ia Iosefa Samita ma faailoa atu iai o le a toefuataiina mai le talalelei. Fai atu i tamaiti e taai a latou pepa ia foliga o ni “pu.” Ia tuu atu le avanoa i tamaiti uma e faafoliga ai o lo o faailoa atu e le agelu o le a toefuataiina le Ekalesia.

Ata ma le talanoaga

Faaali le ata 3-13, Tamaititi o Lo o Papatisoina.

Ata ma le talanoaga

• O le a se mea e tupu pe afai e leai se isi e mafai ona papatisoina? (E leai se tasi e mafai ona auai i le ekalesia a Iesu Keriso.)

Taʻu atu i tamaiti, aʻo soifua Iesu i lenei lalolagi, na ia finagalo ina ia aoao ma usiusitai tagata i ana aoaoga. O nei aoaoga o le a fesoasoani i tagata e aoao mea e tatau ona latou faia ina ia toe foi atu ai ma toe ola faatasi ma le Tama Faalelagi. Na faatulagaina e Iesu lana ekalesia ina ia fesoasoani i tagata e ola ai i ana aoaoga. Ina ua maliliu uma Iesu ma ana Aposetolo, sa leʻi ola tagata i mea na aoaoina atu iai e Iesu. Na suia e tagata ana aoaoga o lea na le toe iai le ekalesia moni. Na aveeseina e Iesu lana perisitua mai tagata o le lalolagi. O lona uiga ua le mafai ona toe papatisoina ni tagata i le pule saʻo. E le gata foi i lea, ae a leai lea pule a le perisitua, e le mafai foi ona mauaina e tagata le meaalofa a le Agaga Paia, faamauina i le malumalu o ni aiga, po o le iai o se perofeta e tautala mai e avea ma sui o le Tama Faalelagi ma Iesu Keriso i lenei lalolagi.

Ata ma le talanoaga

Faaali le ata 3-10, O le Uluai Faaaliga.

Ata ma le talanoaga

• O ai o lo o iai i lenei ata? (Tama Faalelagi, Iesu, ma Iosefa Samita.)

• O le a le mea na tupu ina ua tatalo atu Iosefa Samita e saili po o le fea le ekalesia e moni? (Na faaali atu le Tama Faalelagi ma Iesu ia te ia. Na fetalai atu Iesu ia aua neʻi auai i se tasi o na ekalesia aua e leai ma se tasi e moni.)

Ia faamalamalama atu i tamaiti e leʻi iai le ekalesia moni i le lalolagi i lena taimi. Na finagalo Iesu e toefuatai mai ana aoaoga ma lana ekalesia i le lalolagi.

Lesona faatino

Lesona faatino

• O le a le uiga o le upu toefuatai? (O le toe auamaia lea o se mea i lona tulaga e pei ona sa iai muamua.)

A maea ona tuuina mai tali a tamaiti, ona tuu atu lea o le faataitaiga lenei:

Faaali atu le ata po o le mea na e aumaia. Ia talanoaina pe aisea ua e lagona ai e manaia tele lenei mea ma e taua tele pe a e mauaina, ma fai atu i tamaiti e tuuina mai ni o latou lagona. Ona valaaulia lea o se tamaititi e ave le mea lea ma tuu i se mea e le mafai ai e isi tamaiti ona latou iloa.

Lesona faatino

• Pe tou te mananao ea ina ia mafai ona tatou mauaina lenei ata po o lenei mea matagofie ina ia mafai ona tatou toe vaai iai?

Fai i le tamaititi e toe aumai le mea lea na ia uuina ma toe faaali tasi atu i le vasega. Ia faamalamalama atu o lea ua toefuatai le mea lea i lona tulaga e pei ona sa iai muamua. Ia faamanino atu o le toefuatai o lona uiga o le toe faia lea o se mea ia pei o le mea sa iai muamua. Ia faamanatu atu i tamaiti e ui lava sa faatulagaina e Iesu lana ekalesia i le auala na ia finagalo iai, ae na aveesea lava e tagata mea moni ina ua maliliu Iesu ma lana au Aposetolo. Na finagalo Iesu ina ia toefuatai mai ana aoaoga, o lana ekalesia, ma lana pule e papatisoina ai tagata ia pei lava ona iai aʻo iai o ia i le lalolagi.

Talanoaga

Taʻu atu i tamaiti na filifilia e le Tama Faalelagi ma Iesu Keriso se alii talavou o lē sa sili lona usiusitai ma e mafai ona talitonuina o ia ina ia fesoasoani ia i laua e toefuatai mai le Ekalesia moni.

Talanoaga

• O ai lenei alii talavou? (O Iosefa Samita.)

Toe tagai i le ata o le Uluai Faaaliga, ma faamalamalama atu so o se taimi lava e iai se Ekalesia moni i le lalolagi, e filifilia e le Alii se perofeta na te taitaia. Na filifilia e Iesu ia Iosefa Samita e avea ma uluai perofeta o aso nei.

Kaseti vitio ma le talanoaga

Afai e maua, ia faaali le ata Joseph Smith: The Man.

Kaseti vitio ma le talanoaga

• O le a le perofeta?

Ia faamalamalama atu o le perofeta o se tagata lea e tuuina atu iai e Iesu faatonuga mo lana ekalesia.

Talanoaina o le mau

Fesoasoani i tamaiti matutua e faitau leotetele le Amosa 3:7 po o lou faitauina atu foi. Ia faamalamalama atu o le “faaalia o lona finagalo” o lona uiga o le tuuina atu lea i lana perofeta o faatonuga e ala lea i le tofamamao, miti, po o isi faaaliga.

Talanoaina o le mau

• O ai e tuuina atu iai e Iesu Keriso ana faatonuga? (I le perofeta soifua.)

Ia faamalamalama atu e taʻuina atu e le perofeta i tagata mea o lo o finagalo ai Iesu latou te faia. E fesoasoani mai le perofeta ia i tatou ina ia tatou filifilia le saʻo ina ia mafai ai ona tatou toe foi atu e ola faatasi ma le Tama Faalelagi ma Iesu.

Faaali atu i tamaiti se kopi o le Mataupu Faavae ma Feagaiga.

Ia faamalamalama atu na tuuina atu e Iesu ia Iosefa Samita le tele o nei upu o lo o tusiaina i totonu o lenei tusi. O nisi o nei upu na taʻuina atu ia Iosefa e faatatau lea i le ekalesia moni a Iesu. Mai nei tusitusiga paia, e mafai ai ona tatou aoao i le toefuataiina mai e Iesu o lana ekalesia moni e ala mai lea ia Iosefa Samita.

Sa Mauaina e Iosefa Samita le Perisitua

Talanoaga

Ia faamalamalama atu i tamaiti e faapea, aʻo leʻi mafai ona fesoasoani atu Iosefa i le toefuataiina o le Ekalesia, sa tuuina atu ia te ia se mana faapitoa - o le aiā tatau lea e galue ai mo Iesu.

Talanoaga

• Tou te iloa o le a le igoa o lea mana? (O le perisitua.)

Ata ma le tala

Faamatala atu le tala lenei pe na faapefea ona mauaina e Iosefa Samita le perisitua:

Na aoao Iosefa Samita ma Oliva Kaotui e uiga i le papatisoga aʻo la faaliliuina le Tusi a Mamona. Na la mananao ina ia papatisoina i laua i le ekalesia moni. Na la tootutuli i lalo ma tatalo atu i le Tama Faalelagi. E leʻi umi ae o la vaaia loa se avefeau mai le lagi ua faaali atu ia i laua.

Faaali atu le ata 3-11, Ioane le Papatiso o Lo o Tuuina Mai le Perisitua Arona.

Ia faamatala atu o le avefeau o Ioane le Papatiso, o ia lava lea na papatisoina ia Iesu. Ina ua ia faaali atu ia Iosefa ma Oliva, na ia aoaoina i laua e uiga i le papatisoga. Na ia tuuina atu ia i laua le mana e papatiso ai. O lea mana e taua o le Perisitua Arona. Ona sosoo ai lea ma le faapea atu o Ioane le Papatiso ina ia papatisoina e le tasi le isi i le auala lava e tasi na ia papatisoina ai Iesu. Na muamua ona papatiso e Iosefa ia Oliva i se vai e latalata ane, ona papatiso ai lea e Oliva ia Iosefa.

O le auala moni lava o le papatisoga ua toefuataiina mai i le lalolagi, e pei lava ona sa aoaoina e Iesu.

Ata ma le talanoaga

Faaali le ata 3-12, Toefuataiina o le Perisitua Mekisateko.

Ia faamalamalama atu, i ni nai vaiaso mulimuli ane, na oo mai ai nisi avefeau se toatolu mai le lagi ia Iosefa ma Oliva. O nei alii e toatolu o ni Aposetolo a Iesu aʻo iai o ia i le lalolagi, o o latou igoa o Peteru, Iakopo, ma Ioane. Na latou faaee atu o latou lima i luga o le ulu o Iosefa ma luga o le ulu o Oliva ma tuuina atu ia i laua le Perisitua Mekisateko. O lea perisitua e maualuga atu nai lo le Perisitua Arona ma e tuuina atu ai i alii uma le mana e faataunuuina ai mea ofoofogia i le suafa o Iesu Keriso, e pei o le faamanuiaina o ē mamai, faamanuiaga a se tama i fanau, ma le faia o sauniga i le malumalu.

O le mana o le perisitua e faatagaina ai i tatou ina ia papatisoina ma faamauina o ni tagata o le Ekalesia ma tuuina atu iai le meaalofa a le Agaga Paia. Toe faaali atu le ata 3-13, Tamaititi o Lo o Papatisoina, ma le ata 3-14, Teineititi o Lo o Faamauina. O lenei mana e mafai foi ona faamaloloina ai i latou o lo o mamai ma faamauina ai aiga i totonu o le malumalu ina ia mafai ona tumau o ni aiga e faavavau pe afai latou te ola amiotonu.

Pese

Usu pe faitau upu o le pese, “Perisitua ua Toefuatai.”

Ia tuuina atu lau molimau i tamaiti ua toe iai i le lalolagi le perisitua. O le mana e galue ai mo Iesu ua toefuataiina mai e ala lea ia Iosefa Samita. Na faaaogaina e Iosefa lenei mana e faatulaga ai le ekalesia moni a Iesu. Na tumau pea ona iai lea perisitua i le ekalesia moni talu mai lena taimi.

Pese

• O le a le igoa o le ekalesia moni a Iesu Keriso? (O le Ekalesia a Iesu Keriso o le Au Paia o Aso e Gata Ai.)

Ia toe fai faatele e tamaiti le igoa o le Ekalesia. Ia faamalamalama atu, ua mafua ona faaigoa o le Ekalesia a Iesu Keriso o le Au Paia o Aso e Gata Ai aua o le ekalesia moni a Iesu ua ia toefuatai mai i aso nei e gata ai. Aso e Gata ai, o lona uiga o le taimi nei, po o taimi o lo o tatou ola ai.

Aotelega

Mataupu faavae o le faatuatua

Ia faamalamalama atu ua iai ia te i tatou le avanoa tatou te auai i le ekalesia lava e tasi lea na faatulagaina e Iesu aʻo iai o ia i le lalolagi. O nisi taimi tatou te faaigoaina le Ekalesia na faatulagaina e Iesu o le “Ekalesia Anamua” (tagai i le Mataupu Faavae o le Faatuatua 1:6).

Faamatala atu le mataupu faavae o le faatuatua lona ono, ma fai atu i tamaiti e fai faatasi ma oe. Ia uunaiina i latou na e mafai ona taulotoina ina ia tauloto uma le vaega atoa.

Talanoaga i le laupapa

Fai atu i tamaiti e mafaufau i ni mafuaaga faapitoa na latou mananao ai ina ia avea ma ni tagata o le ekalesia moni i lenei lalolagi. Lisi a latou tali, ia pei o tali nei i luga o le laupapa:

Talanoaga i le laupapa

1. Ina ia usiusitai i le Tama Faalelagi.

2. Ina ia taitaiina e aoaoga a Iesu.

3. Ina ia faamagaloina a tatou agasala.

4. Ina ia maua le meaalofa a le Agaga Paia.

5. Ina ia toe foi atu e mau faatasi ma le Tama Faalelagi ma Iesu.

6. Ina ia avea ma se tagata o le malo o le Atua i le lalolagi.

Molimau

Ia tuuina atu lau molimau i tamaiti pe aisea ua e lagona ai o se faamanuiaga le avea ma tagata o le ekalesia moni a Iesu. Faamatala atu i tamaiti le fiafia ua aumaia e le Ekalesia i lou olaga ma lou agaga faafetai ona ua e auai i le Ekalesia.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Taʻu atu i tamaiti, talu ai ona ua toefuataiina le ekalesia moni a Iesu i le lalolagi, ua mafai ona tatou aoaoina mea lava e tasi na aoaoina e Iesu aʻo iai o ia i le lalolagi. Ua tatou maua uma le avanoa o le avea ma se tasi o lana ekalesia.

   Ia faamatala atu le tala lenei i ni au lava upu, po o le faatinoina e tamaiti:

   “O loʻu igoa o Ila Maria Kuti. E sefulufa oʻu tausaga ma sa maua aʻu i le maʻi pipili mo le sefulutasi tausaga. …. O lea ou te nofo nei i le Falemai a Tamaiti o le Peraimeri i Sate Leki….

   “Talu mai lena taimi ou te manatuaina lelei le tuuina mai e oʻu matua o se manatu faapea o le mea sili ona taua i loʻu olaga o laʻu Ekalesia ma loʻu Tama Faalelagi…. Na ou aoao ou te alofa [i le] Ekalesia ma loʻu loto atoa….

   “Na aoao mai e oʻu matua ia te au le taua o le papatisoga, o lea na ou tulimatai atu iai ma loʻu naunau i loʻu lava papatisoga. Ina ua valu oʻu tausaga, sa ou iai i le falemai ma o le manatu o le fomai e le mafai ona ou tuua le falemai e tusa lava pe na ona ou alu ou te papatiso. Na ou lagona le faanoanoa ma ou talosaga atu i lou tama ina ia papatisoina aʻu aʻo valu pea oʻu tausaga. Ae foliga mai ou te faatali pea seia ou manuia ma ou teʻa i tua, ma e leai ma se tasi na te iloa po o afea ou te teʻa ai i tua.

   “Ona [aʻo lumanai le iva o oʻu tausaga], o mai ai lea o oʻu matua…. o isi tagata o loʻu aiga ma uo i le falemai, ma sa ou papatiso ai … i le faatanoa [vai] o le potu e fai ai faamalositino. Sa faamauina au o se tagata o le Ekalesia ou te alofa tele iai…

   “O lenei, ua ono tausaga mulimuli ane, na fesiligia ai aʻu ina ia ou tusia lenei tala e faaali atu ai i isi le taua tele o le papatisoga ia te au.

   “…. Ou te manao…. e taʻu atu ia te outou uma loʻu agaga faafetai i le avea o au ma se tagata o le Ekalesia a Iesu Keriso o le Au Paia o Aso e Gata Ai” (Ila Marie Goodley, I Was Baptized in a Hubbard Tank,” 1963, p. 30).

2. Tuu atu i tamaiti e faamatala mai ni papatisoga na latou vaai iai, e pei o se uso po o se tuafafine matua.

3. Ia faatagaina tamaiti e tusi po o le valivali se mea o le a faamanatu ai ia te i latou le toefuataiina o le Ekalesia, e pei o se pu e faailoa atu ai le Toefuataiina po o Iosefa Samita o lo o tatalo i le togalaau.