Lesona 34

E Mafai Ona Tatou Tatalo Atu i le Tama Faalelagi

Faamoemoega

Ina ia faamalosia le faanaunauga o tamaiti taitoatasi e tatalo atu i le Tama Faalelagi e pei ona faia e Iesu Keriso.

Sauniuniga

1. Suesue ma le agaga tatalo le 3 Nifae 17 e oo i le 19.

2. Ia saunia e usu pe faitau upu o le “Ou Te Faafetai Ia Te Oe Le Tama e” (Tusipese A Tamaiti, itulau 7).

3. Ia saunia se pepa mo tamaiti uma e pei o lenei:

   Ou te Faafetai Atu i Lau Afio

   Ou Te Ole Atu I Lau Afio

4. O Mea e Manaomia:

   1. Se Tusi Mamona.

   2. Se penitala po o se penivali mo tamaiti uma.

   3. Ata 3-60. Teineititi o Lo o Tatalo (62310); ma le ata 3-61, Iesu o Lo o Tatalo ma Sa Nifaē (62542).

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Mafai Ona Tatou Talanoa ma lo Tatou Tama Faalelagi

Gaoioiga faatosina

Faaali atu le ata 3-60, Teneititi o Lo o Tatalo.

Gaoioiga faatosina

• E mafai faapefea ona tatou talanoa ma lo tatou Tama Faalelagi?

• Aisea tatou te tatalo atu ai i lo tatou Tama Faalelagi?

• O le a le taimi e mafai ai ona tatou tatalo atu i lo tatou Tama Faalelagi?

Talu ai ona e alofa tele lo tatou Tama Faalelagi ia te i tatou, o lea ua faia ai e ia se auala ina ia mafai ai ona tatou talanoa ma ia. E finagalo o ia ina ia tatou faafetai atu ia te ia mo o tatou faamanuiaga. E finagalo foi o ia ina ia tatou ole atu mo lana fesoasoani i so o se taimi tatou te manaomia ai.

E Mafai Ona Tatou Faafetai Atu i lo Tatou Tama Faalelagi

Talanoaga

Ia faamalamalama atu, afai tatou te tatalo, e tatau ona tatou faafetai atu i lo tatou Tama Faalelagi mo o tatou faamanuiaga.

Talanoaga

• O a nisi o faamanuiaga ua tuuina mai e lo tatou Tama Faalelagi e mafai ona tatou faafetai atu ai ia te ia? (O tali e mafai ona aofia ai o tatou aiga, fale, o le lalolagi matagofie, meaai, ma lavalava.)

Pe a tatou talanoa atu i le Tama Faalelagi, tatou te faaaogaina ni upu faapitoa. A tatou faafetai atu ia te ia, tatou te faapea atu, “Matou te faafetai atu i lau afio.”

Tuu atu le avanoa i tamaiti latou te faamatala mai ai i le vasega pe faapefea ona latou faafetai atu i le Tama Faalelagi mo se faamanuiaga faapitoa. Fai atu i tamaiti e mafaufau i se mea e faafetai atu ai i le Tama Faalelagi, e faaaoga ai upu Ou te faafetai atu i lau afio.

Tala

Fai atu i tamaiti e faalogo lelei mai ao e faamatalaina atu le tala lenei i ni au lava upu e uiga ia Sina ma pe na faapefea ona ia manatu e faafetai atu i le Tama Faalelagi.

O se taimi o le taua i Egelani. Na pogisa ma sa fefe ia Sina. O lona tina matua sa nofo i se tamai nuu e latalata ane i Lonetona, ma o lo o alu atu Sina e asiasi atu ia te ia. Na te viliiina lana uila mo le lua maila ina ia taunuu atu ai i le auala tele. Na tatalo Sina ma lona loto atoa ina ia puipuia o ia.

Ao vili atu lana uila ma tatalo, sa agi mai se matagi malosi ma toetoe lava a lelea ese ai. Sa toe tatalo foi Sina mo lona saogalemu ma ia mafai ona ia iloa atu le auala.

E lei pine ae ona vaaia loa se moli i luga o le aega. Na vili atu le uila a Sina agai i le malamalama. Na tu pea i ona luma le malamalama mo le vaega atoa o le auala.

Sa matuai faafetai Sina. Na ia iloa na tali mai le Tama Faalelagi i lana tatalo. So o se taimi lava e faamanatu atu ai ia te ia, e na te toe faafetai atu ai foi i leTama Faalelagi. (Tagai i le Lucile C. Reading, “The Light,” Childrenʻs Friend, Aug. 1965, p. 45.)

Ia faamamafa atu e pei lava ona manatua e Sina le faafetai atu i le Tama Faalelagi, e tatau foi ia te i tatou taitoatasi ona faafetai atu ia te ia mo mea uma ua ia tuuina mai ma le fesoasoani ua tatou maua.

Pese ma le talanoaga

Usu pe faitau faatasi ma tamaiti upu o le fuaiupu muamua o le “Ou Te Faafetai Ia Te Oe Le Tama e.”

Ou te faafetai i le Tama oi luga,

Mo lou agalelei faapea lou alofa.

Mo aiga ma uo faapea ma matua,

Ma manuia uma ma le fiafia.

Fai atu i tamaiti e faamatala mai ni faamanuiaga ua latou faafetai atu ai i le Tama Faalelagi.

E Mafai Ona Tatou Ole Atu i le Tama Faalelagi mo se Fesoasoani

Ata ma le molimau

Faasino atu i le ata 3-60, Teineititi o Lo o Tatalo.

Ia tuuina atu lau molimau e leai se afaina po o a ituaiga faafitauli tatou te maua, e mafai lava ona tatou ole atu i le Tama Faalelagi mo se fesoasoani i so o se taimi tatou te manaomia ai.

Ata ma le molimau

• O a nisi o mea e mafai ona tatou ole atu ai i le Tama Falelagi e fesoasoani mai ai ia te i tatou?

(Tuu atu se taimi i tamaiti e tali mai ai. O tali e mafai ona aofia ai le fesoasoani mai i le tuuina atu o se lauga po o le faia o se galuega i le aoga, fesoasoani ia malamalama ma le aoaoina ia usitai i poloaiga, puipuiga faapitoa, ma fesoasoani ia toe malosi.)

Fai atu i tamaiti e faamatala mai ni taimi na latou tatalo atu ai mo se isi tagata, e pei o tagata o aiga, uo, po o tuaoi.

O upu faapitoa e faaaoga pe a tatou ole atu i le Tama Faalelagi mo se fesoasoani e pei o le Ou te ole atu i lau afio. Fai atu i tamaiti e faataitai mai upu nei.

Pese

Usu pe faitau upu o le fuaiupu lona lua o le “Ou Te Faafetai Ia Te Oe Le Tama e.” Fai atu i tamaiti e faalogo lelei i upu ma faamatala mai po o a ni mea atonu latou te ole atu ai i le Tama Faalelagi.

Ia ou filemu ma ia ou alofa,

Ma usiusitai i ou matua.

I le suafa o Iesu Keriso Le agalelei,

Faamanuia mai ma puipui au nei.

E Tatau Ona Tatou Tatalo Pea E Le Aunoa, E Pei Ona Faia E Iesu Keriso

Faamatalaga a le faiaoga

Ia faamanino atu na tatalo Iesu Keriso i le Tama Faalelagi i le tele o taimi ao soifua o ia i lenei lalolagi. Ina ua mavae lona toetu, na ia tatalo atu foi i le Tama Faalelagi. Ina ua asiasi atu Iesu i tagata Sa Nifaē, na ia aoao ia te i latou ma faamanuia i latou. Na ia tatalo foi mo tagata ma aoaoina i latou e tatau ona latou tatalo foi.

Ata

Faaali atu le ata 3-61, Iesu o Lo o Tatalo ma Sa Nifaē.

Ia faamalamalama atu o le Tusi a Mamona o lo o faamatalaina mai ai le faapotopotoina e Iesu Keriso o tagata i ona tafatafa ma fai atu iai e tootutuli. Ina ua latou tootutuli i lalo i le eleele, na ia tootuli foi i lalo ma tatalo atu i le Tama Faalelagi. Na ia tuuina atu se tatalo matagofie lava na faatumulia ai tagata i le olioli pe a latou faalogo i ana upu.

Ina ua maea ona aoaoina i latou e Iesu i le tele o mea matagofie, ona ia aoaoina lea o i latou e tatau foi ona latou tatalo e pei ona ia faia.

Talanoaina o le mau

Faitau le 3 Nifae 18:16.

Talanoaina o le mau

• O le a le mea o lo o tauina mai e lenei fuaiupu i le mea na aoaoina e Iesu Keriso i tagata Sa Nifaē? (Na ia aoaoina i latou ina ia tatalo.)

Ia faamalamalama atu na tuua e Iesu Keriso tagata Sa Nifaē, ae na ia toe foi ane iai faalua. Ina ua ia toe foi ane, na ia toe tatalo atu foi i le Tama Faalelagi e faafetai atu ia te ia mo le fesoasoani i ona soo Sa Nifaē. Na ia ole atu foi iai i le Tama Faalelagi e faamanuia tagata. Na tatalo Iesu Keriso i le tele o taimi ao iai o ia faatasi ma Sa Nifaē. O nisi o ana tatalo o lo o faamaumauina i le Tusi a Mamona. O lo o faamatalaina mai e le Tusi a Mamona ia te i tatou nisi o tatalo na ia tuuina atu e ese ma le matagofie na lei mafai ona tusiaina i lalo.

Ia faamalamalama atu o i tatou uma lava taitoatasi e tatau ona tatou faia e pei ona aoaoina atu e Iesu Keriso i Sa Nifaē ma tatalo atu e le aunoa i le Tama Faalelagi.

Talanoaina o le mau

• O le a le taimi e mafai ai ona tatou tatalo atu i le Tama Faalelagi? (Tuu atu le avanoa mo ni tali, ma talanoaina ia taimi eseese e mafai ai e tamaiti ona tatalo, e aofia ai le taeao ma le po, i taimi o meaai, ma o latou aiga, po o so o se taimi lava e iai ni o latou faafitauli pe manaomia ai se fesoasoani faapitoa.)

• O a upu faapitoa tatou te faaaogaina pe a tatou talanoa atu i le Tama Faalelagi?

Fai atu i tamaiti e faataitai mai le “Ou te faafetai atu i lau afio” ma le “Ou te ole atu i lau afio.” Ia uunaiina tamaiti e faaaoga le gagana sao mo le tatalo. Atonu e mafai ona latou faataitaiina le faaaogaina o le “afio.”

Aotelega

Gaoioiga

Tuu atu i tamaiti pepa na e saunia ma se penitala po o se penivali. Fai atu i tamaiti uma e tusi se ata i le isi afa o le pepa o se mea o le a ia faafetai atu ai ma se mea o le a ia ole atu ai.

Molimau a le faiaoga

Fetufaai ma tamaiti lau molimau i le tatalo. Ia faamamafa atu o se faamanuiaga sili le mafai ona tatalo atu i le Tama Faalelagi ma faafetai atu ia te ia ma ole atu ia te ia mo se fesoasoani. Ia valaaulia tamaiti e fai ni a latou tatalo i aso uma, ma faamanatu atu ia i latou e mafai ona latou tatalo i so o se taimi ma so o se nofoaga latou te mananao iai.

I le sauniuni atu mo le tatalo faaiu, fai atu i tamaiti e fautua mai ni mea e mafai ona taua e le tagata o le a faia le tatalo e faafetai atu ai i le Tama Faalelagi. Ia fai atu foi iai e fautua mai ni mea atonu e mafai ona ole atu ai.

Ia fai e oe le tatalo faaiu, ma ia manatua e faaaoga manatu na sa fautuaina mai e le vasega.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Toe fai atu le solo lenei, ma fai taga. Ona fai faatasi ai lea ma tamaiti, ma fai taga.

   Matou te faafetai i le Atua, mo le malamalama, (sii i luga lima, fepaiai tamailima e fai ai le la)

   Mo manufelelei e pepese i le taeao, (faaloloa lima i autafa e pei o ni manufelelei)

   Mo tamaiti fiafia i soo se mea, (ataata)

   Mo le alofa o le Tama Faalelagi. (punou le ulu, piilima lima, e pei o lo o tatalo.)

2. Faamatala i ni au lava upu le tala lenei pe na faapefea ona talia mai le tatalo a se tamaititi laititi.

   O se tamaititi e valu tausaga le matua sa taoto i luga o le laulau e fai ai taotoga i le falemai. Ua maliliu ona matua, ae ua ia iloa tatalo. Na ia iloa e matuai faigata lava le taotoga. Na ia fesili atu i le fomai o lē o le a na ia faia lona taotoga, “Fomai, a o le i amataina le taotoga, e mafai ona e tatalo mo au?” Na tilotilo atu le fomai i le tamaititi ma lona ofo tele ma faapea atu, “Aisea, e le mafai ona ou tatalo mo oe.”

   Ona fai atu lea o lenei tamaititi i isi fomai o lo o fesoasoani iai, ae sa latou tali mai i le tali lava e tasi. Ona faapea atu lea o le tamaititi lenei, “Afai tou te le tatalo mo au, faamolemole pe mafai ona outou faatali ae sei ou tatalo mo au lava?” Na ia tootuli i luga o le laulau o taotoga, piilima ona lima, ma faapea atu, “Le Tama Faalelagi e, o au ua na o se tamaititi matuaoti, ae ua ou matuai mai tigaina lava ma o le a faia e nei fomai lou taotoga. Faamolemole fesoasoani atu ia te i latou ina ia latou faia ia sao. Ma o lenei, le Tama Faalelagi e, afai o lou finagalo ia ou toe malosi, o le a ou tama lelei. Faafetai mo lou faamalosiina o au.

   Ina ua uma lana tatalo, na matuai faatumulia mata o alii ma tamaitai fomai i loimata. Na taoto le tamaititi i luga o le laulau ma faapea atu, “Ua ou sauni.” (Siitia mai ia George Albert Smith, Sharing the Gospel with Others, sel. Preston Nibley [Salt Lake City: Deseret Book Co., 1948], pp. 144-45.)

3. Fai se siata o tatalo mo le vaiaso mo tamaiti uma i le isi afa o le pepa ina ia mafai ona latou makaina i le taeao ma le afiafi pe a faia a latou tatalo. I le isi afa o le pepa ia tusiaina ai e le tamaititi lona ata o lo o tatalo. Fai atu i tamaiti e tuu a latou siata o tatalo i se mea e mafai ona ia vaai atu iai ma manatua e maka i le taeao ma le po.

4. Toe iloilo ma tamaiti le mataupu faavae muamua o le faatuatua.