E Fesoasoani o Tatou Matua Ina ia Tatou Aoao

Faamoemoega

Ina ia fesoasoani i tamaiti ia malamalama pe faapefea ona mafai ona fesoasoani o latou matua po o ē vaaia i latou ina ia latou aoao e usitai i poloaiga.

Sauniuniga

Suesue ma le agaga tatalo le Alema 53:10–22; 56:3–10, 46–48, 55–56; 57:24–25; Mataupu Faavae ma Feagaiga 93:40; ma le Mose 6:58.
Ia saunia e usu pe faitau upu o le “Aoao Mai Ina Ia Ou Savali I Le Malamalama” (Tusipese A Tamaiti, itulau 77). Atonu e te manao i se tamaititi na te usuina le fuaiupu muamua mo le vasega.
Ia valaaulia se tina e aumai sana pepe i le vaega muamua o le vasega. (Afai e le talafeagai lea tulaga, atonu e te manao e faaaoga se ata o se tina ma le pepe.)
I lenei lesona atoa, ia e nofouta mo tamaiti e le o nonofo faatasi ma matua po o o latou matua e le aoaoina i latou e usitai i poloaiga.
O Mea e Manaomia:
1. O Tusi Faavae e Fa.
2. Se taga fatupi, tamai polo, po o se isi mea vaivai.
3. Ata 3-38, O Toa Talavou e Lua Afe (62050; Taga Ata o le Talalelei 313); ata 3-5, Atamu ma Eva o Lo o Aoaoina A Laua Fanau.
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Iai o Tatou Matua e Fesoasoani Ina ia Tatou Aoao

Gaoioiga faatosina

Faailoa atu le tina ma le pepe i tamaiti. Fai atu i tamaiti e vaavaai i le pepe mo sina taimi ona e fesili atu lea:

Gaoioiga faatosina

O le a se mea e mafaia e le pepe ona faia mo ia lava?
O le a le mea e faia e le tina mo le pepe?
E faapefea ona aoao le pepe e tautala?
E faapefea ona aoao le pepe e savali?

Ia faamalamalama atu e iai se tasi na te tausiaina le pepe. E faalagolago o ia i ona matua mo mea uma lava. E alolofa i laua i le pepe, ma la te faaaluina o la aso, o nisi taimi o po i le vaaiga o ia.

Gaoioiga faatosina

O a nisi o mea na e aoaoina ao e pepe?
O ai na aoaoina ma tausiaina oe?

Faafetai atu i le tina mo le maliu mai i le vasega ma lana pepe, ona faataga atu lea o i laua e malaga ese atu i le taimi lea.

E Fesoasoani o Tatou Matua Ia Tatou Aoao e Usiusitai i Poloaiga

Ata ma le tala

Faaali atu le ata 3-5, O Atamu ma Eva o Lo o Aoaoina a Laua Fanau.

O Atamu ma Eva, le uluai tane ma le fafine i le lalolagi, na la aoaoina le talalelei a Iesu Keriso ma na la tauina atu ia laua fanau. Faitau leotele le Mose 6:58, aveese le upu mulimuli.

Ata ma le tala

O le a le poloaiga na tuuina atu e Iesu Keriso i matua? (Ia aoaoina a latou fanau. O mea e tatau ona aoaoina o upu moni o le talalelei; tagai i le MFF 93:40.)

Pese

Usu pe faitau upu o le “Aoao Ina Ia Ou Savali I Le Malamalama.” Fai atu i tamaiti e faalogo lelei pe mafai ona latou maitauina o le a le uiga o le “savali i le malamalama.”

Aoao mai ia ou iloa lona alofa;
Aoao au ia tatalo i lou Tama;
Aoao ia ou iloa mea sao e fai;
Aoao au ia ou savali ai.

Si au tama ia ta faatasi nei
Ana poloaiga ia tausi lelei
I ona luma ia ta faatasi nei
Tumau tumau ia ou savali ai.

Tama e oi le lagi ma te faafetai nei
Mo lou alofa ia i maua nei.
Faafetai matou te vivii ai!
Fiafia, fiafia, ia ma savali ai.

Pese

O le a le uiga o le “savali i le malamalama”? (Ia usitai i lo tatou Tama Faalelagi.)

Ia faamalamalama atu na tatou fananau mai ia tatou aoao, ma ua tuuina i tatou e le Tama Faalelagi i ni aiga ina ia mafai ai ona tatou aoao mai o tatou matua. Ua poloaiina matua e fesoasoani e saunia i tatou ina ia iai se aso e mafai ai ona tatou toe foi atu ma mau faatasi ma lo tatou Tama Faalelagi.

Tala o tusitusiga paia ma le ata

Ia faamalamalama atu o lo o faamatalaina mai i le Tusi a Mamona se tala e uiga i nisi o alii talavou o ē na aoaoina e o latou matua ina ia usiusitai i poloaiga. Faamatala atu le tala lenei i ni au lava upu:

Faamanatu atu i tamaiti o tagata Sa Lamanā o e na liliu mai i le Ekalesia na taua i latou o Aneti-Nifae-Liae ina ia aua ai nei fenumiai i latou ma le toatele o Sa Lamanā. Ina ia faaliliuina mai ia Aneti-Nifae-Liae, sa latou faia se folafolaga po o se feagaiga ma le Tama Faalelagi o le a latou le toe faaaogaina a latou auupega e tau ai. Na latou tanuina a latou auupega e faaali ai lo latou tausia o le latou feagaiga.

Na saunia e Sa Nifaē se laueleele mo tagata Aneti-Nifae-Liae e nonofo ai ma puipuia ai i latou mai tagata Sa Lamanā. Na lauiloa tagata Aneti-Nifae-Liae i lo latou amiotonu ma le faamaoni. Na latou aveina atu meaai ma lavalava mo autau a Sa Nifaē.

Ua tele tausaga ua alu. Ua amata ona toe osofaia e Sa Lamanā ia eleele o Sa Nifaē ma aveesea ai nisi o aai o Sa Nifaē. Na iai se faafitauli ia Sa Nifaē i lo latou puipuiga o nisi o o latou aai. Ina ua vaaia e tagata Aneti-Nifae-Liae le faigata ona taumafai o Sa Nifaē e puipuia o latou aai faapea Aneti-Nifae-Liae, sa matuai popole lava i latou. Na mafaufau Aneti-Nifae-Liae pe o le a tatau ona latou solia la latou feagaiga ma fesoasoani ia Sa Nifaē e tau.

O se taitai toa o Sa Nifaē, o Helamana lona igoa na tauina atu ia te i latou e aua nei o latou solia le latou feagaiga. Na ia iloa lelei le taua tele o le tausiaina o feagaiga. Na ia iloa foi o nei tagata amiotonu o lo o iai ni o latou atalii e toatele o ē na laiti i le taimi na osia ai le feagaiga. O nei tama e lei osi feagaiga i latou ma le Tama Faalelagi, o lea e mafai ai ona fesoasoani ia Sa Nifaē e tau ina ia puipuia o latou aai ma o latou matua. O le lua afe o nei alii talavou na latou ofo atu latou te tau ma Helamana.

Faaali atu le ata 3-39, O Toa Talavou e Lua Afe. Ona faaauau lea o le faamatalaina o le tala.

Ia faamalamalama atu o nei alii talavou sa matuai faamaoni lava ma na mafai ona faatuatuaina. Na aoaoina i latou e o latou tina ina ia faamoemoe i le Tama Faalelagi ma usiusitai i ana poloaiga. Na iloa lelei e nei toa talavou afai latou te faia faapea, o le a puipuia i latou e le Tama Faalelagi. Aua na latou talitonu ma mulimuli i aoaoga a o latou tina, ma sa lei fefefe i latou e mulimuli atu ia Helamana. Sa latou tau i ni taua se tele mo Sa Nifaē. Sa latou tau ma le lototoa ma sa avea ma se fesoasoani tele i autau a Sa Nifaē.

Faitau leotele mo tamaiti le Alema 56:47, amata mai le “ua aoaoina i latou e o latou tina” ma faaauau atu ai pea seia oo i le fuaiupu e 48.

Ia faamalamalama atu, na matuai alofa lava Helamana i nei alii talavou e pei lava ona alolofa iai o o latou matua. Ina ua mavae se tasi taua tele lava, e toatele tagata na fasiotia ai. Na popole Helamana ina nei fasiotia ai nisi o nei alii talavou. Ina ua faitauina i latou, sa matuai fiafia o ia ina ua ia ona iloaina e leai ma se tasi o i latou ua fasiotia. Aua sa talitonu nei alii talavou i le Tama Faalelagi ma mulimuli i aoaoga a o latou tina, o lea na puipuia ai i latou mai tagata Sa Lamanā.

Talanoaga

Ia faamanino atu e mafai ona tatou aoaoina poloaiga mai o tatou matua e pei lava ona faia e nei alii talavou. O lea e tatau ai ona tatou usiusitai i mea ua aoaoina ai i tatou. E ala lea i le aoaoina o i tatou e uiga i poloaiga a le Tama Faalelagi, e fesoasoani o tatou matua ia tatou iloa po o a mea e tatau ona tatou faia ina ia tausia ai feagaiga tatou te faia pe a papatisoina i tatou.

Talanoaga

O a nisi o poloaiga ua aoaoina ai i tatou e o tatou matua ma isi? (Tuu atu i tamaiti e tali mai. Ia faamamafa atu i la outou talanoaga le poloaiga ia alofa atu i le Tama faalelagi ma Iesu Keriso, alofa le tasi i le isi, ava i matua, faamagalo atu i isi, ia papatisoina, to togi sefuluai, anapogi, usitai i le Upu o le Poto, ia faamaoni, tausia le Sapati ia faapaiaina, auai i sauniga lotu, ma suesue i tusitusiga paia.)

Aotelega

Ia valaaulia tamaiti e faalogo lelei i o latou matua pe a aoaoina i latou ma usiusitai i poloaiga. Ia faamalosia tamaiti e faafetai atu i o latou matua pe a aoaoina i latou e uiga i poloaiga.

Molimau a le faiaoga

Ia tuuina atu lau molimau e alofa le Tama Faalelagi ia i tatou uma taitoatasi. Talu ai lenei alofa, ua ia poloaiina ai o tatou matua faalelalolagi ina ia latou vaavaaia i tatou, tausi i tatou, ma aoao i tatou i le ala sao e ola ai. Ao taumafai o tatou matua e ola i le auala o lo o finagalo le Tama Faalelagi e ola ai, e mafai ona tatou aoao mai ai pea ia te i latou ina ia filifili le ala sao.

Tofi se tamaititi e faia le tatalo faaiu.

Gaoioiga e Faatosina Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Tuu atu i tamaiti e mafaufau i nisi o mea na aoaoina ai i latou e o latou matua e fai. Ona fai faatasi lea ma tamaiti le taaloga lenei:

Ia e faapea atu, “O lou (tina, tama, po o matua) na aoaoina au ina ia e (faataitaiga: fai se keke).” Ona valaau atu lea o se igoa o se tamaititi, pe togi atu iai se taga fatu pi, ma fesili atu, “O le a se mea na aoaoina e ou matua ia te oe e fai?”

E tali mai le tamaititi i lona faapea mai, “O lou (tina, tama, po o matua) na aoao ina au e (faataitaiga: tusi lou igoa).” Ona toe togi atu lea e le tamaititi le taga ia te oe.

Toe fai le taaloga seia alu le faalua a tamaiti uma.
Faitau atu le solo lenei i tamaiti. Fai atu i tamaiti e tutu i luga ae toe faitau atu iai le solo,ma fai atu iai e tuu o latou lima i luga o o latou ulu i soo se taimi lava latou te faalogoina ai le upu aiga po o le fale.

E Iai Sou Fale i le Lagi

E iai sou fale i le lagi;

Na tau mai e lou tina;

Na ou nofo ai ma Tama Falelagi

I se taimi e lei mamao atu.

Sa masani ona ou nofo i le lagi;

Na fai mai lou tama e moni;

Ae na auina mai au e le Tama Faalelagi iinei

Ia ou ola, ma aoao, faataunuu.

Ou te fiafia i lou fale i le lagi;

Ae ua ou fiafia nei ona ua ou iinei;

Matou te ola faatasi ma lou aiga,

O uo ma e peleina.
Usu pe faitau faatasi ma tamaiti ia upu o le “O se Aiga Fiafia” (Tusipese A Tamaiti, itulau 198); o lo o maua upu i le pito i tua o le tusi lesona lenei.

Filifili se tamaititi e avea ma tina ma se tasi e avea ma tama. A outou usuina le upu “tina,” ona tu lea i luga o le tamaititi o lo o fai ma tina. A outou usuina ia “au,” ona tusi lea o lima o tamaiti uma i le tagata lava ia. A outou usuina le upu “tama,” ona tu lea i luga o le tamaititi o lo o avea ma tama.