Tusi Lesona ma le Taimi o Fetufaaiga a le Peraimeri

Lesona 35: O Malumalu ma Aiga e Faavavau

Lesona 35

O Malumalu ma Aiga e Faavavau

Faamoemoega

Ina ia fesoasoani i tamaiti ia latou malamalama e mafai ona faatasia aiga e faavavau.

Sauniuniga

Ia saunia e usu pe faitau upu o le “E Mafai Ona Faavavau Aiga” (Viiga, itulau 183) ma le “O se Aiga Fiafia” (Tusipese A Tamaiti, itulau 198); o lo o maua upu i le pito i tua o le tusi lesona lenei.
I lenei lesona atoa, ia nofouta mo tamaiti e leai ni o latou tama po o ni tina i o latou aiga. Ia nofouta foi mo tamaiti na e le auai o latou tei po o matua i le Ekalesia.
O Mea e Manaomia: ata 3-5, Atamu ma Eva o Lo o Aoaoina A Laua Fanau; ata o le tou malumalu ma isi malumalu pe afai e maua (po o le faaaoga o le ata 3-62, Malumalu o Portland Oregon [62617]).
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Iai So Tatou Aiga Faalelagi ma le Faalelalolagi

Gaoioiga faatosina

Usu pe faitau upu o le “O Se Aiga Fiafia.”

Talanoaina o le ata

Ia faamalamalama atu i tamaiti, ae tatou te lei fananau mai i lenei lalolagi, sa tatou nonofo faatasi uma lava o ni uso ma ni tuafafine i se lalolagi matagofie o agaga. Sa avea i tatou ma se vaega o se aiga faalelagi faatasi ai ma ni matua faalelagi alolofa.

Ia uu atu i luga le ata 3-5, Atamu ma Eva o Lo o Aoaoina A Laua Fanau. Fesili atu i tamaiti pe latou te iloaina o ai nei tagata. Tau atu i tamaiti o Atamu ma Eva o uluai matua ia i le lalolagi. Na tauina atu e le Tama Faalelagi ia Atamu ma Eva ina ia iai ni a la fanau. O i laua o le uluai aiga i le lalolagi.

Ia faamalamalama atu na alofa le Tama Faalelagi ia Atamu ma Eva ma a laua fanau. Na ia tauina atu ia Atamu ma Eva ina ia aoaoina atu le talalelei ia laua fanau. Tau atu i tamaiti, o o tatou aso, ua auina mai i latou e le Tama Faalelagi i ni aiga, e pei lava ona ia faia ia Atamu ma Eva ma a laua fanau. E alofa o ia i tamaiti uma lava ma ua ia tauina atu i matua e aoao atu i a latou fanau le talalelei.

Pe a tatou oti ma tuua lenei olaga, e finagalo le Tama Faalelagi ma Iesu Keriso ina ia tatou toe ola faatasi o ni aiga i le lagi. Ua laua faaali mai le auala e mafai ai ona tupu lenei mea.

E Mafai Ona Faamauina E Faavavau Aiga i Totonu o Malumalu

O le a le malumalu?

Fesoasoani i tamaiti ina ia latou malamalama i manatu nei e uiga i malumalu:

O ni maota e paia.
O malumalu uma lava e faaigoaina o le maota o le Alii.
Tatou te aoaoina i totonu o malumalu le tele o mea e uiga i le fuafuaga a le Tama Faalelagi mo i tatou.
Tatou te faia ni folafolaga po o ni feagaiga i le Tama Faalelagi, ma e tuuina mai foi e le Tama Faalelagi ni folafolaga ia te i tatou i totonu o malumalu.

Ia faamalamalama atu e tele mea paia ma taua e mafai ona faia na o totonu lava o le malumalu.

Ata

Faaali atu ata o malumalu.

Ata

E toafia nisi o outou ua mafai ona vaai i se malumalu a le Tama Faalelagi?
O a ni lagona na oo ia te oe ina ua e vaai i le malumalu?

Tuu atu i tamaiti latou te faamatala mai malumalu ua latou vaai iai. Ia faaali atu lou faamoemoega mo tamaiti na e lei mafai ona maua le avanoa e vaai ai i se malumalu o le a iai se aso latou te vaai foi iai. Ia uunaiina tamaiti uma ina ia iai se ata o se malumalu i o latou aiga, pe afai e maua.

Faamatalaga a le faiaoga

Ia faamalamalama atu, i totonu o se malumalu, e mafai ai e se tane ma se ava ona faataunuuina se sauniga e fesoasoani ai ina ia faatasia e faavavau. E taua lea vaega o le faamauga po o le faaipoipoga faalemalumalu. Afai e faaipoipoina se ulugalii i fafo atu o le malumalu mo na o le taimi nei, e mafai ona la o atu i le malumalu ma faamauina ina ia mafai ona faatumauina pea le faaipoipoina o i laua mo le faavavau. E mafai ona faamauina a laua fanau ia te i laua ma avea ai ma se vaega o le la aiga e faavavau. O lenei faamanuiaga e tuuina atu na o i latou ua faamauina i le malumalu ma tausia folafolaga na latou faia iina. Ia faamanatu atu i tamaiti lo latou alolofa tele i o latou aiga ma le matagofie o le faatasia e faavavau.

Ia faamalamalama atu e alofa le Tama Faalelagi i tagata uma lava. E alofa ia i latou e lei o atu i le malumalu e pei lava ona ia alofa ia i latou ua o atu i le malumalu. E naunau o ia ina ia faamauina aiga uma i le malumalu. Ia faamalamalama atu e toatele aiga e lei faamauina i le malumalu. Ae peitai, e mafai e nei aiga ona o atu i le malumalu pe afai ua saunia lelei i latou. Tau atu i tamaiti e mafai ona latou ola agavaa ina ia oo i le taimi e faaipoipoina ai i latou ae o lo o mafai ona o atu i le malumalu ma faamauina ai ma amataina ai ni o latou lava aiga e faavavau.

Pese

Aoao atu i tamaiti le fuaiupu muamua ma le tali o le pese “E Mafai Ona Faavavau Aiga.” Talanoaina upu o le pese. Fai atu i tamaiti e tutū i luga ma usu pe faitau le pese.

E Tatau Ona Tatou Agavaa e o atu i le Malumalu

Faamatalaga a le faiaoga

Ia faamalamalama atu e so o se tagata lava o le Ekalesia e ola i se olaga amiotonu ma maua le faatagaga (o se pepa faataga o le malumalu) mai le epikopo po o le peresitene o le paranesi e mafai ona alu atu i le malumalu. O i latou e o atu i le malumalu e tatau ona agavaa e ulu atu i le maota o le Alii.

Pese

Talanoaina upu o le fuaiupu lona lua o le pese “E Mafai Ona Faavavau Aiga.” Ona fesoasoani lea i tamaiti e usu pe faitau faatasi ia upu.

Talanoaga

E mafai faapefea ona e saunia e te alu atu i le malumalu?
Afai e nonofo latalata lo outou aiga i le malumalu ma e mafai ona o atu pea ou matua i le malumalu e le aunoa, e mafai faapefea ona e fesoasoani ia te i laua ia faia pea lena mea?

Tuu atu i tamaiti latou te talanoaina auala e mafai ai ona saunia i latou e o atu i le malumalu. Fesoasoani atu iai ina ia latou iloa mea e tatau ona latou saunia iai mo le alu atu i le malumalu e ala lea i lou fesili atu iai o ni fesili faapenei:

Talanoaga

O le a le mea e tatau ona e faia pe a maua sau tupe? (Totogi sefuluai.)
O le a le mea e tatau ona e faia i le Aso Sa? (Alu i le lotu ma tapuai i le Tama Faalelagi.)
O a ni ou uiga e faaalia i ou matua, o ou uso ma tuafafine? (Agalelei ma alofa.)
O le a le uiga o le faamaoni? (Tau atu le mea moni ma aua le gaoi.)
E faapefea ona e tausia lou tino? (Ai meaai lelei. Usitai i le Upu o le Poto.)
O a ni ou lagona e tatau ona iai i le Tama Faalelagi ma Iesu Keriso? (Alofa ia i laua, usitai i a laua poloaiga, ma mulimuli i aoaoga a perofeta soifua.)
E faapefea ona tatou tausi i isi? (Alofa atu i le isi.)

Ia faamalamalama atu e finagalo le Tama Faalelagi ina ia ola lana fanau i ni olaga lelei ma agavaa e o atu i le malumalu. Afai latou te usiusitai i poloaiga a le Tama Faalelagi ma taumafai e fai le mea sao, o le a agavaa i latou e o atu i le malumalu ma maua faamanuiaga faapitoa mai le Tama Faalelagi.

Mataupu faavae o le faatuatua

Iloilo faatasi ma tamaiti le mea o lo o faamoemoe le Tama Faalelagi ia i tatou e faia e tusa ai ma le mataupu faavae e sefulutolu o le faatuatua. Ia faamalamalama atu o le faia o nei mea o le a fesoasoani lea e saunia ai i latou e o atu i le malumalu.

Aotelega

Fesoasoani i tamaiti ina ia latou malamalama ua tuuina mai e le Tama Faalelagi se fuafuaga e faatagaina ai aiga ona faatasia e faavavau. Talu ai ona e alofa le Tama Faalelagi ia i tatou, ua ia finagalo ai ina ia maua uma e lana fanau faamanuiaga o lo o tuuina atu i malumalu. E tele malumalu i le lalolagi atoa, e toatele tamaiti i le lalolagi e mafai ona latou mauaina faamanuiaga o le faamauina po o le tuufaatasia e faavavau ma o latou aiga. Toe tagai i ata o malumalu eseese. Ia faamalamalama atu, ona o le faatupulaia o le faitau aofai o tagata o le Ekalesia, o lea o le a fausia ai e le Ekalesia nisi malumalu i le lalolagi.

O le a se mea e te mafai ona tau atu i lou aiga e uiga i malumalu?

Ia uunaiina tamaiti e fetufaai ma o latou aiga mea na latou aoaoina. (Ia nofouta mo le vaega lenei pe afai e te talitonu o le a lē fiafia ia aiga i lea tulaga.)

Molimau

Ia tuuina atu lau molimau e uiga i malumalu. Ia faamalamalama atu e na o le pau le auala e mafai ai e aiga ona maua le faamanuiaga o le faatasia e faavavau o le faamauina lea i le malumalu. Ia tuuina atu lau molimau e uiga i faamanuiaga o le faaipoipoga faalemalumalu ma le fiafia e mafai ona maua mai i fanau pe afai e saunia i latou e o atu i le malumalu. (Afai e te lei ulu i le malumalu, e mafai ona e fesili atu i le epikopo po o le peresitene o le paranesi, po o se tasi na te fautuaina mai ua uma ona ulu i le malumalu a alu atu i lau vasega i le faaiuga o le lesona e tuuina atu lana molimau i faamanuiaga o le malumalu.)

Ia uunaiina tamaiti e taumafai e faafiafia o latou aiga i lenei vaiaso e ala lea i lo latou fai atu iai o upu agalelei ma le faia o mea e fai atu ai o latou matua ia te i latou.

Tofi se tamaititi e faia le tatalo faaiu. Ia fautua atu iai e faafetai atu i le Tama Falelagi mo aiga ma faamanuiaga o le malumalu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Ia saunia ia lava ni fasi pepa ina ia tofu le tamaititi ma fasi pepa mo tagata uma o lona aiga. Aumai se kulū po o se mea faapipii.

Amata i fasi pepa e lua mo tamaiti uma, ma tusia ai le upu Tina i le isi ae o le Tama le isi. Faapipii faatasi le lua e pei o se filifili.

Tau atu i tamaiti, ina ua faaipoipoina o latou matua, e pei o se filifili le soofaatasia o i laua. Ona fesoasoani lea i tamaiti e faaopoopo se sootaga mo tamaiti uma lava o lo latou aiga i le filifili. A faaopoopo se sootaga mo tagata taitoatasi uma lava o le aiga, ia faia se lio o le filifili. Tau atu i tamaiti, a faamauina uma faatasi tagata o lo latou aiga i le malumalu, ua sosoo faatasi i latou e faavavau. E mafai ona avea i latou ma se aiga e faavavau, e pei lava o se lio e alu pea e faavavau.
Fai le tala faatino lenei ma tamaiti e faaaoga ai tamatamailima.

(Amata i le uu o le moto)

O tina lenei, (sii le lima matua)

O tama lenei, (sii le limatusi)

O uso matua lenei, (sii le tamailima ogatotonu)

O tuafafine lenei, (sii le lima tuumama)

O le matou pepe lenei, (sii le tamailima)

Oi, e ese lo matou alolofa ia te i latou uma. (sii uma i luga tamatamailima ma faafelefele solo)
Aoao atu i tamaiti le fuaiupu faaopoopo o le “O se Aiga Fiafia.”

Ou te alofa ia Iesu.

E alofa foi ia te au.

Ua ia aumai malumalu,

Ia faavavaau ai aiga.
Afai e iai se tamaititi o lau vasega na maua le avanoa e alu atu ai i le malumalu faatasi ma lona aiga ina ia faamauina, atonu e te manao e tuu atu i lena tamaititi po o ona matua e faamatala mai e uiga i lo latou o atu i le malumalu.