E Mafai Ona Avea Au ma se Faifeautalai

Faamoemoega

Ina ia fesoasoani i tamaiti ia latou iloa e mafai ona latou faia galuega faafaifeautalai i le taimi nei.

Sauniuniga

Suesue ma le agaga tatalo le Mataupu Faavae ma Feagaiga 133:37.
Kopi se ata o se faifeautalai teine po o se tama mo tamaiti uma.
Ia saunia e usu pe faitau e le vasega upu o le “Faamoemoe Latou te Valaau Au i se Misiona” (Tusipese A Tamaiti, itulau 169); o lo o maua upu i le pito i tua o le tusi lesona lenei.
O Mea e Manaomia:
1. Se Mataupu Faavae ma Feagaiga.
2. Pepa, seleulu, ma penivali.
3. Ata 3-51, Lauga i le Mauga (62166; Taga Ata o le Talalelei 212).
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Mafai Ona Tatou Fesoasoani e Aoao Atu le Talalelei a Iesu Keriso

Gaoioiga faatosina

Fesili atu mo se tagata e ofo mai e fesoasoani ia te oe. Fai atu i le tagata ua ofo mai e tuu atu se fasipepa i tagata uma o lo o i le potu, e amata ona tufa pe a e fai atu “alu.” A maea ona maua e tamaiti uma se fasipepa, fai atu iai e toe ao mai uma. Fai atu i tamaiti pe mafai ona i ai se isi e fesoasoani. Fesili atu mo se isi tagata e ofo mai e fesoasoani i le tufaina atu o pepa. E tatau i tagata ua ofo mai ona tufa atu pepa ia vaelua lelei ai le vasega. Fai atu iai e toe foi atu i o laua nofoaga ao e toe aoina mai pepa. (Mo vasega toalaiti atonu e te manao e tufa atu e tagata ua ofo mai ia sili atu nai lo le tasi le fasipepa i tamaiti uma.)

Ata

Faaali atu le ata 3-51, Lauga i le Mauga.

Ia faamalamalama atu ua talosaga mai Iesu Keriso ia te i tatou ina ia tatou fesoasoani atu ia te ia i le aoaoina o le talalelei. Faatasi ai ma le toatele o e fesoasoani, o le a mafai ona oo atu ana aoaoga i tagata uma o le lalolagi. E finagalo Iesu Keriso ina ia aoao uma e tagata ana aoaoga.

Talanoaga o le mau

Faitau le Mataupu Faavae ma Feagaiga 133:37. Ia faamalamalama atu o le talalelei o le isi upu lena mo aoaoga a Iesu Keriso, ituaiga o se vaega o tagata o ē feaiāaʻi, gagana o le isi upu lea mo le tautala, nuu o lona uiga o tagata e nonofo i se atunuu, lanu, po o se nuu.

Talanoaga o le mau

O le a le mea o lo o tau mai i lenei mau o le a tupu? (O le a talaiina atu le talalelei i tagata uma.)
O le a le igoa e tau ai i latou ua valaauina e le Tama Faalelagi e fesoasoani e aoao atu lana talalelei? (Faifeautalai.)

Tau atu i tamaiti o tagata uma lava o le Ekalesia, e tusa pe matua pe laitiiti, e mafai ona avea ma se faifeautalai e ala lea i le tauina atu i isi e uiga i le talalelei.

Tala

Fai atu i tamaiti e faalogo lelei mai i le tala lenei e uiga i se tamaititi e igoa ia Ryan o lē na avea ma se faifeautalai:

E fiafia tele Ryan e alu i le aoga. E faapitoa lava lona fiafia i lana faiaoga o Miss Johnson.

I se tasi aso na faatonuina ai e Miss Johnson tamaiti latou te tusia se ata o se mea latou te mananao e fai pe a latou matutua. Sa leai se faafitauli ia Ryan i le ata o le a ia tusiaina. Na ia tusia se ata o se tagata o lo o fai sona peleue ma ana tusitusiga paia o lo o tauaveina ma savali atu i le aai. E leai se isi mea na sili ona manao iai Ryan nai lo le avea ma se faifeautalai pe a matua, e pei o lona uso matua.

Ina ua vaai le faiaoga a Ryan i le ata, sa le mafai ona malamalama o ia i lea ata na ia tusiaina. O Miss Johnson e le o se tagata e auai i le ekalesia, o lea na ia le iloaina ai po o le a le mea a le tagata o lo o i le ata a Ryan o lo o fai. Na ia fesili ia Ryan e faamatala atu lana ata ia te ia. Na tau atu e Ryan i lana faiaoga e manao e avea ma se faifeautalai mo le Ekalesia a Iesu Keriso o le Au Paia o Aso e Gata Ai pe a matua. Sa ofo ia Miss Johnson i le faanaunauga o lenei tamaititi, o le avea lea ma se faifeautalai, nai lo le avea ma se leoleo, se fomai, po o se isi lava galuega.

Ina ua tuua le aoga, sa fai atu Miss Johnson ia Ryan e faamatala mai nisi mafuaaga e mafua ai ona manao e avea ma se faifeautalai. Na tau atu iai e Ryan lona alofa tele i le Ekalesia ma le mafuaaga ua ala ai ona alu atu lona uso i se isi atunuu e aoao atu le Ekalesia i isi tagata. Na ia tau atu iai na te iloa e moni le Ekalesia aua o ana aoaoga o aoaoga a Iesu Keriso.

O le afiafi lena na faamatala atu ai e Ryan i ona matua e uiga ia Miss Johnson ma le ata na ia tusia. Na ia fesili atu i ona matua pe mafai ona ia valaauliaina ia Miss Johnson e alu atu latou te fai’aiga i le afiafi ina ia mafai ona feiloai lo latou aiga ia te ia ma talanoa iai e uiga i le talalelei.

O le aso na sosoo ai na avatu ai e Ryan se tusi ia Miss Johnson e valaaulia ai o ia i lona fale mo le taumafataga i le afiafi. Na ia taliaina le valaaulia ma alu atu i le fale o Ryan i nai aso na sosoo ai. Na matuai fiafia lava Miss Johnson i le aiga o Ryan o lea na ia asiasi ane pea iai e le aunoa. E tele ni a latou talatalanoaga e uiga i le Ekalesia, ma i le ono masina mulimuli ane na papatisoina ai Miss Johnson. E faafetai pea o ia ia Ryan mo le fetufaai atu ia te ia o lona alofa mo le Ekalesia.

E Tele Auala e Avea ai ma Faifeautalai

Iloiloga

Tau atu i tamaiti e tele auala e avea ai ma ni faifeautalai lelei. O le a e vaai pe latou te iloaina nisi o nei auala. Fai atu iai e faalogo lelei i nisi o faamatalaga. Afai o se faamatalaga o se auala lelei e avea ai ma faifeautalai, e tatau ona latou tutu i luga. Afai e le o se auala lelei e avea ai ma faifeautalai, e tatau ona latou nonofo i lalo.

Iloiloga

E te le faatagaina sau uo i le vasega e te lua taaalo i le aoga.
Ua e valaaulia sau uo i le Peraimeri.
Ua e tau atu i sau uo e le auai i le Ekalesia e uiga i le ekalesia a Iesu Keriso.
Ua e amio le pulea i lou tuaoi.
Ua e teuina se tupe mo lau faaputugatupe mo le misiona.
E te faaaloalo i le taimi o le sauniga faamanatuga.
Ua e kopi i se suega a le aoga.
Ua e aveina se mea e le o sau meatotino.
E te le usitai i ou matua ma ua e faamamafaina atu i au uo.
Ua e valaaulia sau uo e alu atu i lo outou fale mo se afiafi faaleaiga.
Ua e valaaulia se tagata fou atu i le tou vai aai e te lua taaalo.
Ua e taufaalili i se tasi o le vasega seia oo lava ina tagi.
Ua e tatalo mo faifeautalai.

Atonu e te manao e tau atu i le vasega atoa se auala na mafai ai ona e avea ma se faifeautalai. Ia valaaulia se tamaititi e fetufaai mai ni mea na tutupu na fetufaai atu ai e i latou po o latou aiga le talalelei.

Aotelega

Gaoioiga o pepa e tufaina atu

Tufa atu i tamaiti uma se kopi o le pepa e tufaina atu o le faifeautalai tama ma le faifeautalai teine. Fesoasoani e tuu o latou igoa i luga o pine ma tusi ai “O le Tusi a Mamona “ i luga o le tusi. A maea ona latou valivaliina ia ata, ona tuu atu lea latou te ʻotiʻotiina.

Pese

Usu pe faitau upu o le “Faamoemoe Latou te Valaau Au i se Misiona.”

Fai atu i le tamaititi ua tofia e faia le tatalo faaiu e faafetai atu i le Tama Faalelagi mo avanoa ua avea ai i latou ma faifeautalai.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Ia valaaulia se tagata na liliu mai i le Ekalesia e sau i le vasega ma faamatala atu tagata na fesoasoani ia te ia e aoao e uiga i le Ekalesia. (Ia mautinoa ia maua mai se faatagaga mai le epikopo pe afai o le tagata e le auai i le uarota po o le paranesi. Ia logo le peresitene o le Peraimeri pe afai o se tagata o le uarota po o le paranesi.)
Tuu atu i tamaiti latou te talanoaina, ona faatino lea o vaega nei:
1. Na faalogo au uo e le auai i le Ekalesia o e usuina le pese “O Au O se Atalii o le Atua” ma fesili atu ia te oe po o le a lena pese e te usuina. E faapefea ona e faaaogaina lenei avanoa e te faamatala atu ai e uiga i le Ekalesia ma valaaulia i latou i le Peraimeri?
2. Ua maitauina e iai se tamaititi fou i lo outou vaiaai. E matamuli o ia ma e le o iai ni ana uo fou. E faapefea ona avea oe ma se faifeautalai lelei?
3. Na ala i luga lou uso i le taeao o le Aso Sa ma ua le manao e alu i le lotu. O le a se mea e mafai ona e faia e avea ai oe ma se faifeautalai?
Toe faamatala atu le tala ia Amona mai le lesona 24, e faaaoga ai le ata 3-50. Togi atu se polo po o se isi mea vaivai i se tamaititi ma fesili atu iai se fesili e uiga i le tala. Afai e sao lna tali, ona fai atu lea iai e tu i luga ma toe togi atu ia te oe le polo. Ia faaauau pea le togiina o le polo ma fesili atu ni fesili seia uma lelei ona tutu i luga le vasega.