Tusi Lesona ma le Taimi o Fetufaaiga a le Peraimeri

Lesona 44: Ia Faia Atu Foi i Isi

Lesona 44

Ia Faia Atu Foi i Isi

Faamoemoega

Ina ia fesoasoani i tamaiti taitoatasi e faaaloalo i isi tagata ma a latou meatotino.

Sauniuniga

Suesue ma le agaga tatalo le 3 Nifae 14:12 ma le Esoto 20:15.
Ia saunia se paluga faamasima. Saeu faatasi le 2 iputi falaoamata, 1 le iputi masima, 1 sipuni gaʻo, ma le 3/4 ipu vai (faaopoopo iai ni mataua se fa o le fagu e faalanu ai meaai i le vai pe a manao iai). Palu le paluga ia pei o ni polo seia oo ina malū ma lamolemole. Faaopoopo iai le 1 sipuni vai po o le falaoamata pe a manomia.
Ia saunia e usu pe faitau upu o le “Filifili le Ala Sao” (Tusipese A Tamaiti, itulau 160); o lo o maua upu i le pito i tua o le tusi lesona lenei.
O Mea e Manaomia:
1. Se Tusi Paia ma se Tusi a Mamona.
2. Le talita po o le mama a le FMT.
3. Penisina, laupapa, ma se solo.
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Ia Faia Atu Foi i Isi

Gaoioiga faatosina

Ia faamalamalama atu i tamaiti o se meatotino o se mea lea e pule ai i latou e pei o se tusi, se meataalo, tupe, po o se isi mea po o se ofu. O se meatotino e taua tele o se mea lena e taua tele ia te i latou. O se meatotino taua e le faapea o se mea e taugata. Atonu e iai se tupe e alu ai ae e iai se uiga taua ona o le mea na aumai ai po o le tagata foi na tuuina atu.

Tuuina i tamaiti taitoatasi se paluga faamasima ma fai atu iai e faafoliga pei o se tasi o ana meatotino taua. Tuu atu ni nai minute mo tamaiti e faia ai a latou gaoioiga i paluga faamasima.

Fetufaaiga

Ia valaaulia tamaiti e faaali atu a latou gaoioiga na faia mai paluga faamasima ma tau atu le mafuaaga o le taua tele ia te i latou o a latou meatotino.

Fetufaaiga

O le a se lagona e oo ia te outou pe afai e nonoina e se tasi, ave, po o le faaleagaina foi o lenei meatotino e aunoa ma le fesili atu?

Faaali atu a latou gaoioiga na faia mai paluga faamasima i luga o se laulau po o se isi vaega faapitoa seia oo i se isi taimi o le lesona.

Talanoaga

Afai e sau se tasi e faanoi atu sau meatotino taua, o le a le ituaiga tausiga e te manao iai i lena tagata na te faia iai?
Afai e le iloa lau meatotino taua lena, o le a se mea e te manao e faia e le tagata na ia mauaina?

Ia faamalamalama atu tatou te mananao uma lava ina ia tausia faalelei e isi tagata a tatou meatotino. E iai foi meatotino a isi tagata e taua tele foi ia te i latou, ma e mananao foi ina ia tatou tausia faalelei a latou meatotino faapitoa.

Talita po o le mama FMT ma le talanoaina o le mau

Tau atu i tamaiti na aoaoina i tatou e Iesu Keriso pe faapefea ona tatou tausia isi tagata ma a latou meatotino. Faaali atu le talita po o le mama a le FMT, ma faamalamalama atu e mafai ona tatou mauaina lea aoaoga a Iesu Keriso i totonu o tusitusiga paia. Fai atu iai e faalogo lelei ao e faitauina le 3 Nifae 14:12, e faaumaina i le fasi fuaitau ia te i latou.

Ia talanoaina ma tamaiti lenei mau. Fesoasoani iai ina ia latou malamalama e tatau ona tatou faia isi tagata i le auala tatou te mananao latou te fai mai ia i tatou. Ia faamalamalama atu o nisi taimi e taua ai lenei vaega o le Tulafono FaaAuro ma e faaigoaina faigofie faapea, “Ia e faia atu i isi e pei ona e manao e faia mai foi ia te oe.”

Fai atu i tamaiti e toe fai ma saga fai leotele le Tulafono FaaAuro. Ia faamalamalama atu o le faia atu o mea i isi tagata tatou te mananao e faia mai ia te i tatou e aofia ai le faia faalelei o a latou meatotino i le auala tatou te mananao latou te faia foi ia tatou foi meatotino.

Tatou te Faaaloalo I Meatotino a Isi Tagata e Ala Lea i lo Tatou Le Gaoiina

Talanoaina o le mau

Ia faamalamalama atu ua poloaiina i tatou e le Tama Faalelagi ina ia tatou faaaloalo i isi tagata ma a latou meatotino.

Faitau le Esoto e 20:15. Fai atu i tamaiti e faamalamalama mai lenei mau.

Ia faamamafa atu ua poloaiina i tatou e le Tama Faalelagi ma Iesu Keriso ia aua le gaoi. O le tulafono foi a lo tatou atunuu o lo o tau mai ai e sese le gaoi mai isi. I le avea ai ma tagata o le ekalesia a Iesu Keriso, tatou te talitonu i le usiusitai i nei tulafono e faapena foi i poloaiga a le Tama Faalelagi ma Iesu Keriso.

Mataupu faavae o le faatuatua

Faamalamalama atu o le mataupu faavae e sefululua o le faatuatua o lo o faamatalaina mai ai lo tatou talitonuga e uiga i tulafono. Fai atu i tamaiti e toe fai mai le faamatalaga lenei “Matou te talitonu i le … usiusitai … i tulafono.”

Tala ma le talanoaga

Faamatala atu i tamaiti le tala lenei e uiga i teineiti talavou se toalua o e na feagai ma se faaiuga faigata:

Na mananao Iana ma Susana e faatau ni a la pulukamu mai se masini pulukamu. Na la tuuina se tupe i totonu o le masini ma oomi le ki e maua mai ai ni pulukamu, ae o le mea na ofo tele ai i laua, ua le tasi se pulukamu ua sau ae ua tele pulukamu ua toulu ifo nei. Ae le gata foi i lena, ua toe sau foi i fafo ma le la tupe.

Tala ma le talanoaga

O le a se mea tou te faia pe ana faapea o outou lea e tupu ai lea mea?

Tau atu i tamaiti, na faapena foi se mea na tupu i tausaga ua leva ia Elder Sterling W. Sill, o se tasi sa avea ma Pulega Aoao, atonu e fesoasoani ia te i latou i le taliina o lena fesili. Ona faamatala atu lea o le tala lenei i ni au lava upu:

“Sa alu atu le taavale a Elder Sill i le auala ma ua lagona e ia lona fiainu, o lea na taofi ai lana taavale ma faatau sana vaiinu. Na ia tuuina se tupe i totonu o le masini i le pamu kesi ma maua mai ai sana apa inu, ae na toe foi mai lana tupe. Na ia aveeseina mai le tupe, ma vaai iai, ona tuu lea i lana taga, ma toe foi atu i lana taavale, ma faapea ane, ‘Ua taugata tele nei apa inu.’ Ae lei oo lelei o ia i le taavale, aua o lo o iai lava se leo itiiti o lo o tauvalaau atu i lona taliga ma fesili atu ia te ia se fesili matagofie. O le fesili e faapenei ‘Sill, pe o le a avea moni ea oe ma tagata gaoi mo na o le sefulusene?’ “ (Hartman Rector, Jr., “get Up and Glow,” Brigham Young University Speeches of the Year [Provo, 5 Jan. 1971], p. 6).

Tala ma le talanoaga

O le a so outou manatu o le a le mea na faia e Elder Sill?

A maea ona tali mai tamaiti, ia tau atu iai na toe foi atu o ia i le masini ma amata ona toe tuu i totonu le tupe. Ae o lea ua toe iai nei se isi faafitauli ia Elder Sill.

Tala ma le talanoaga

Afai na te toe tuuina le tupe i totonu o le masini, o le a se mea o le a tupu? (O le a toe maua e iai se isi apa inu, ma atonu foi o le a toe maua e ia lana tupe.)

Ia faamanino atu o le a avea lea tulaga ma mea e faateteleina ai le faafitauli.

Tala ma le talanoaga

O le a se mea e te faia?

Ia faamalamalama atu na iloa e Elder Sill o le tupe e le o sana tupe. Na ia faafesuiaiina ma se apa inu. O lea na ia sueina ai le faatauoloa ma tuu iai le tupe.

Tala ma le talanoaga

O le a la se tou manatu o le a le mea na faia e Iana ma Susana i a la pulukamu ma le tupe? (Ia faamalamalama atu na mauaina e teineiti le pule o le faleoloa ma faamatala atu ia te ia le mea na tupu nai lo e na o le ave o le pulukamu ma le tupe.)

Ia faamamafa atu na filifilia e Iana, Susana, ma Elder Sill le sao. Na latou filifili e usitai i le poloaiga a le Tama Faalelagi ma Iesu Keriso ma le tulafono a le laueleele - o le aua le gaoi.

Ia faamanino atu e le tatau ona tatou aveina se mea e le o sa tatou meatotino.

E Mafai Ona Tatou Faaaloalo i Meatotino a Isi e Ala Lea i le Toe Faafoiina Atu Iai

Talanoaga

Afai e le iloa sau meatotino, o le a se mea e te manao e faia e le tagata na ia mauaina (Toe faafoi atu.)

Tala

Faamatala atu i tamaiti le tala lenei i ni au lava upu:

Na vaaia e Keiti se mea o iila mai luga o le mutia i tafatafa o le auala ao alu atu o ia i le aoga. Na punou o ia i lalo, ma ia vaaia ai se asoa auro o taatia mai. E ese le matagofie. Ao ia tago atu ma avae i luga sa faapea ona manatu, “O le asoa lenei e pei lava o le asoa na maua e Maria mo lona aso fanau.” Na tuu e Keiti le asoa i totonu o lana taga ma faavave atu loa i le aoga.

Ina ua amata le vasega, sa lei auai atu iai Maria. E lei leva ae sau o ia i totonu. O lo o mumu ma fulafula ona mata. Sa tagi o ia.

I le taimi o le malologa, sa tau atu ai e Maria ia Keiti le mafuaaga na tuai atu ai i le aoga. Ua le iloa lana asoa, i le mea tonu lava na maua ai e Keiti, ma sa ia sueina. E leai se upu na faia e Keiti. Na manatu o ia, “O le a ou le tauina atu iai o lea e ia te au. Na ou mauaina, o lona uiga o lau asoa.”

O lena aoauli na faamatala atu ai e le faiaoga i le vasega le mea ua tupu i le asoa a Maria. Na ia fai atu i le vasega e fesoasoani i le sueina o le asoa a Maria pe a tuua le aoga.

O Keiti le tagata mulimuli lava na tuua le aoga i le aoauli lena. Na ese lana faalogona i totonu. Na ia iloaina le faanoanoa o lo o iai Maria. Na ia iloaina o Maria e onaina le asoa e ui lava sa ia mauaina. Na ia manatu pe faapefea pe ana o Maria lea na ia mauaina lana asoa ma ua manao e toe faafoi mai. O lea na ia faavave atu ai loa ma tamoe atu e sue ia Maria ma faafoi atu iai lana asoa.

Talanoaga

O le a le mea na mafaufau Keiti e fai?
O le a so outou manatu o le a se lagona na oo ia Maria ina ua toe faafoi atu iai e Keiti le asoa?
O le a se mea tou te faia pe a outou mauaina se mea e le o sau meatotino?

E Tatau Ona Tatou Faia Faalelei Meatotino a Isi Tagata ma le Faaaloalo

Talanoaga

O le a se lagona e oo ia te outou pe afai e faatamaia pe faaleagaina e se isi se tasi o au meatotino ma le faamoemoe iai?

Ia faamalamalama atu e tatau lava ona tatou taumafai pea e faafoi atu i le tagata e ona soo se mea ua le iloa po o se mea tatou te mauaina. E le tatau ona tatou faaleagaina po o le faaaoga seseina ia meatotino a isi tagata ma le faamoemoe iai. Sii i luga se paluga faamasima ma faaali atu i tamaiti pe faapefea ona taulimaina ma le faaeteete. Faataamilo atu i le vasega ina ia mafai e tamaiti ona faataitai le uuina ma le faaeteete.

Tala ma le talanoaga

Faamatala atu le tala lenei i ni au lava upu:

Sa taaalo Toloi ma Aleni i se malae avanoa e sosoo ma le fale e teu ai fua o faatoaga o Kulini. Sa amata ona tauai e Toloi ia maa ma ia luiina ia Aleni e fai se la tauvaga ma vaai po o ai e mamao lana togi. Ina ua maea ona tauai ni nai a laua maa, ona togi ai lea e Toloi o le isi maa ma tau i le pito o le fale o Kulini. Na ula o ia ia Aleni ma faapea atu ai, “Ou te fai atu ia te oe ailoga e au lau togi i le pito o le fale.” Na tago atu Aleni i le maa o le a togi.

Tala ma le talanoaga

O le a le faaiuga tou te manatu e tatau ona faia e Aleni?
O le a se mea e mafai ona fai atu ai Aleni ia Toloi? (Toe sue se isi mea ta te tauva iai.)

Fai atu i tamaiti e mafaufau i se faaiuga lelei e tatau ona iai le tala e faaalia mai ai le mea e tatau ona faia e Aleni. Tuu atu i se tamaititi po o nisi e faamatala le faaiuga o le tala.

Pese

Ia faamalamalama atu na filifilia e le Uso o Sill, Keiti, ma Aleni le ala sao.

Fai atu i tamaiti e tutu i luga ma usu pe faitau upu o le “Filifili le Ala Sao.”

Talanoaga

Fai atu i tamaiti e faamatala mai nisi auala e mafai ona latou faaali atu ai lo latou faaaloalo i isi tagata ma a latou meatotino. O a latou fautuaga atonu e mafai ona aofia ai vaega nei:

Talanoaga

Aua le savavali i luga o mutia a isi tagata po o le taaalo i fanua o isi aiga e aunoa ma le faatagaga.
Aua le faia ni mea e faaleagaina ai pe faatamaia ai meatotino, e pei o le tusitusi i puipui po o pa.
Taaalo faaeteete i taaloga ma meataalo.
Aua le faaaogaina se mea e le o se tatou mea e aunoa ma le faanoi.
Aua le tataʻeina pe faaleagaina se meatotino ma le faamoemoe iai.

Aotelega

Ia faamamafa atu na aoao mai Iesu Keriso e tatau ona tatou tausi atu i isi i le auala tatou te mananao e tausia mai ai i tatou. Afai tatou te mulimuli i aoaoga a Iesu Keriso, o le a tatou le aveina ni mea e le o ni a tatou mea. O le a tatou faafoiina atu mea na tatou mauaina ia i latou e onaina. O le a tatou tausia ma le faaeteete ma le faaaloalo ni mea na tatou faanoi maia e ala lea i lo tatou le faaleagaina po o le lē faatamaiaina. Faamanatu atu i tamaiti le poloaiga na tuuina mai e Iesu Keriso lea e taua o le Tulafono FaaAuro.

Pepa e tufaina atu ma le laupapa

Fai atu i tamaiti pe mafai ona latou manatuaina ia upu o le Tulafono FaaAuro. Tusi lolomi upu i luga o le laupapa pe afai e mafai e tamaiti ona faitau, po o le faitau lemu atu foi o upu. Ona latou fai faatasi lea. Toe faafoi atu gaoioiga a tamaiti na faia i paluga faamasima.

Molimau a le faiaoga

Molimau atu i tamaiti e taua tele lo tatou tausia faalelei o isi e pei ona finagalo ai Iesu Keriso ia i tatou. Atonu e te manao e fetufaai atu se mea na oo ia te oe i se taimi na faia atu ai e se isi se mea lelei mo oe ma faamatala atu i tamaiti ou lagona na iai. Ia uunaiina tamaiti ia latou faia ni mea lelei i o latou aiga ma uo e mananao foi e faia mai ia i latou.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

Fai atu i tamaiti e faatino tulaga e pei o nei:
- Na e mauaina se ato tupe o lo o iai se tinoitupe tele i le auala i luma o lo outou fale. O le a se mea e tatau ona e faia iai? (Fai atu i tamaiti e faatino mea e mafai ona latou faia e sue ai le tagata e onaina le ato tupe.)
- Ina ua e foi mai le fale o lau uo, na e iloaina ai o lo o iai i lau taga se tasi o ana meataalo. O le a se mea e tatau ona e faia iai?
- Na lua taaalo ma lau uo ae faafuasei lava ona taʻe ai le faamalama a lo outou tuaoi. O le a le mea e tatau ona e faia?
- Na lua o ma lou tina e te lua faatau ae faafuasei lava ona e lavea i se faaputuga apa. O le a le mea e tatau ona e faia?
- Na outou taaalo i fafo ma au uo ma ua palapala uma ou seeve. Ina ua e alu atu i totonu o le latou fale, na palapala uma ai lava le fola. O le a le mea e tatau ona e faia?
Tuu atu i tamaiti latou te faia ni asoa a le FMT (tagai i le faataitaiga) i se vulu ma pepa lanu. Fai atu iai o asoa o le a faamanatu atu ai ia te i latou e faia pea mea lelei i isi e pei ona latou mananao e faia mai ia te i latou.

Ata

CTR necklace