Lesona 37

O Le A Ou Auauna Atu Ia Iesu Keriso E Ala I Lou Auauna Atu i Isi

Faamoemoega

Ina ia fesoasoani i tamaiti ia latou malamalama e mafai ona latou faaali atu lo latou alofa mo Iesu Keriso e ala lea i le auauna atu i isi.

Sauniuniga

1. Suesue ma le agaga tatalo le Mosaea 2;17 ma le Luka 10:30-37, ma ia saunia e faamalamalama atu nei mau i tamaiti.

2. Ia saunia e hamu le “Pe a Tatou Fesoasoani” (Tusipese A Tamaiti, itulau 198) ma le “‘Foai o a Si Auvai Lea” (Tusipese A Tamaiti, itulau 236).

3. Ia saunia e usu po o le faitau upu o le “Lo Matou Epikopo” (Tusipese A Tamaiti, itulau 135).

4. Talanoa atu i lou epikopo po o le peresitene o le paranesi e uiga i lona olaga ao laititi. Fesili atu iai e tau mai nisi o auala na ia auauna atu ai i nisi ao talavou o ia. Ia saunia se faamatalaga puupuu e uiga ia te ia ina ia mafai e tamaiti ona mate mai po o ai o lo o e faamatalaina. Afai e talafeagai, ia faanoi mai se ata o lou epikopo po o le peresitene o le paranesi ao laititi o ia. (E mafai foi ona e faia lenei lava faamatalaga e uiga i le peresitene o le Peraimeri po o se isi lava taitai.)

5. Ia faia ni fugalaau pepa mo tamaiti uma e pei o le faataitaiga lenei o lo o faaalia atu i lalo. Fai ia lava lona tele e tusia ai se savali i le pito i tua.

   

6. O Mea e Manaomia:

   1. Se Tusi a Mamona ma se Tusi Paia.

   2. Se mea e faaaoga e inu ai (straw) po o se laau mo tamaiti uma, pe afai e maua.

   3. Mea faapipii malamalama, pe afai e maua.

   4. Se penitala po o se penivali mo tamaiti uma.

   5. Se meatuuteu po o se fagu.

   6. Penisina, laupapa, ma se solo.

   7. Ata 3-63, O le Samaria Agalelei (62156; Taga Ata o le Talalelei 218.

7. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Tatou te Faaali atu Lo Tatou Alofa mo Iesu Keriso e Ala Lea i Lo Tatou Auauna Atu i Isi

Gaoioiga faatosina

Fai atu i tamaiti e lipoti mai se auala se tasi na latou faaali atu ai lo latou alofa mo Iesu Keriso i le gasologa o le vaiaso ua tea (tagai i le lesona 36). Ia faamalamalama atu e te manao ina ia latou tauina mai ni auala se tele na mafai ona latou faaali atu ai lo latou alofa mo Iesu Keriso.

Ia faamalamalama atu i tamaiti o le taaloga o le a outou taaalo ai nei o le a fesoasoani lea ia te i latou ia malamalama i se auala taua tele e faaali atu ai lo tatou alofa mo Iesu Keriso. Faamatala atu iai o le a e hamuina se pese. A latou iloa loa le pese ona sii mai lea o o latou lima. E mafai ona e taofia le hamuina o le pese ma fesili atu i se tamaititi po o le a lea pese po o lou faatali foi seia maea lelei ona hamuina uma le pese.

Hamu le “Pe a Tatou Fesoasoani.” A maea ona mateina e se tamaititi le igoa o le pese, ona fesili atu lea iai o le fesili lenei:

Gaoioiga faatosina

• O le a le mea o lo o faatatau iai lenei pese? (Fesoasoani.)

Tusi lolomi le upu Fesoasoani i luga o le laupapa.

Hamu le “ ‘Foai o a Si Auvai Lea.” A maea ona mateina mai e tamaiti le igoa o le pese, ona fesili atu lea o le fesili lenei:

Gaoioiga faatosina

• O le a le mea o lo o faatatau iai lenei pese? (Foai atu.)

Tusi lolomi le Fesoasoani ma le Foai.

Gaoioiga faatosina

• E mafai ona outou mafaufau i se isi upu o lona uiga o le fesoasoani ma le foai? (Auauna atu. Tuu atu ia te i latou nisi faamatalaga e manaomia seia mafai lava ona latou mateina mai.)

Ia faamalamalama atu o le auauna atu i isi e mafai ona aofia ai le fesoasoani ma le foai. E masani ona tatou auauna atu e ala i le fesoasoani ma le foai atu i isi.

Mataupu faavae o le faatuatua

Fesoasoani i tamaiti ia outou faia faatasi le vaega lenei o le mataupu faavae e sefulutolu o le faatuatua: “Matou te talitonu … i le faia o mea lelei i tagata uma.”

Mau

Faitau le Mosaea 2:17. Ia faamalamalama atu o le uiga o lenei mau, pe afai tatou te auauna atu ma le faanaunau mo isi, ua tatou auauna atu foi lava lena i le Tama Faalelagi ma Iesu Keriso. E mafai ona tatou faaali atu i le Tama Faalelagi ma Iesu Keriso tatou te alolofa ia te i laua e ala lea i le auauna atu i isi.

Tala ma le ata

Faaali atu le ata 3-63, O le Samaria Agalelei, a talafeagai ia faamatala atu le tala lenei i ni au lava upu:

Na aoao mai Iesu Keriso e uiga i le auauna atu i le isi i se tala i le Samaria agalelei. Na ia faamatala i se tagata na alu malaga mai Ierusalema e agai atu i Ieriko. Na osofaia o ia e tagata faomea i le ala ma ave ona lavalava, ua fasi ia te ia, ma tuu ai o ia ua toe lava ina oti. Na ui ane se ositaulaga ma ia vaaia lenei tagata manua, ae sa faatafatafa ese o ia i le isi itu o le auala. Ona sau ai lea o le Sa Levī, o se tagata e fesoasoani i ositaulaga i o latou tiute, ae na ui ane foi o ia i le isi itu o le ala e ʻalo mai le tagata manua.

Mulimuli ane, ona sau ai lea o le tagata Samaria, o se vaega o tagata e inosia e tagata Iutaia, ma ua afe ane o ia i le mea o lo o iai le tagata manua, ua fufulu ma fusifusi i ona manua. Ona faatietie ai lea e le Samaria i le tagata manua i luga o lana manu, ma avatu o ia i le fale e tali ai malo, ma nonofo ma ia i le po atoa. O le aso na sosoo ai, na totogi atu ai e le Samaria i lē ana le faletalimalo ma faapea atu iai afai e iai se isi tupe e toe totogi mo le tagata manua, o le a ia toe foi mai ma totogi atu ai.

Tala ma le ata

• Aisea tou te manatu ai na ui ese le ositaulaga ma le Sa Levī mai le tagata manua e aunoa ma le fesoasoani iai? (O tali e talafeagai e aofia ai le vaega lenei: Atonu o lo o faanatinati atu i laua i se feau. Atonu sa fefefe i laua i le tagata manua. Atonu sa le mananao i laua e faalavelave fua i se faafitauli o se tasi.)

• Aisea tatou te laasia ai i nisi taimi ia tagata o lo o moomia la tatou fesoasoani?

Ia faamalamalama atu e mafai ona avea tamaiti ma Samaria agalelei e ala lea i lo latou fesoasoani i tagata o lo o moomia le fesoasoani. Faamatala atu iai nisi o tulaga na manaomia ai e se tasi se fesoasoani, ma tuu atu i tamaiti latou te faatinoina pe na faapefea ona latou fesoasoani. Atonu e te manao e faaaoga tulaga e pei o nei:

Tala ma le ata

• O lo o paepae solo meataalo i luga o le fola, o lo o tagi le pepe, ae o lo o taumafai lou tina e sauni le meaai.

• Faatoa siitia atu lava se teineititi fou i lo outou tuaoi. E malaga mai se atunuu ese ma e le mafai ona tautala lelei i la outou gagana. A alu i fafo e taalo, e foliga mai e le fiafia.

• E sau lava Sister Castro i le lotu i Aso Sa uma, ae foliga mai e leai lava se tasi na te iloaina o ia. Ua matua o ia, e masani lava ona nofo na o ia, ma foliga faanoanoa.

• Ua faanoanoa lou tuafafine laititi ona ua taʻe lana meataalo.

Ia faamalamalama atu e fiafia Iesu pe a tatou auauna atu i isi ma le faanaunau. Fautua atu i tamaiti e mafai ona latou tuuina atu le auaunaga i isi tagata.

E Mafai Ona Tatou Faaali Atu Lo Tatou Alofa mo Iesu Keriso e Ala Lea i le Auauna Atu i Lana Ekalesia

Faamatalaga o le ata

Ia faamalamalama atu e toatele tagata i le Ekalesia o lo o auauna atu ia Iesu Keriso e ala lea i le fesoasoani atu i isi i vaiaso taitasi, e pei o faiaoga o le Peraimeri, taitai pese, ta laau pese, ositaulaga ma tiakono o lo o faamanuiaina ma tufaina le faamanatuga, ma le tele o isi.

Afai e talafeagai, ia faaali atu le ata o le epikopo po o le peresitene o le paranesi i le taimi ao laititi, ae aua le tauina atu i tamaiti po o ai ia.

Ia faamalamalama atu o le ata lenei o se tamaititi na avea o se tagata sili ona taua i totonu o lo outou uarota po o le paranesi. Faamatala atu o le tagata lenei e fiafia tele e auauna atu i isi tagata i totonu o le uarota po o le paranesi i vaiaso taitasi.

Faamatalaga a le faiaoga

Tau atu i tamaiti o le faamatalaga na e faapotopotoina maia e faatatau lea i se tagata latou te iloaina lelei. Ia faamalamalama atu na ia auauna i isi ao laititi o ia. Tuu atu i tamaiti latou te mateina maia poo ai. Afai e talafeagai, ia tuu atu nisi faamatalaga taufaaataata seia sao lelei le latou mate. (Mo se faataitaiga: e fesoasoani o ia ina ia tatou filifili le sao; e fesoasoani o ia pe a iai ni o tatou faafitauli: e avatu ia te ia a tatou sefuluai.)

Ia faamalamalama atu e tuuina atu e le epikopo le tele o itula e auauna atu ai i tagata o le uarota i vaiaso taitasi. E le gata ina fesoasoani atu o ia i le Aso Sa ae o isi foi aso o le vaiaso.

Faamatalaga a le faiaoga

• E le gata i lona auauna atu i tagata o lo o i lana uarota, ae o ai le isi tagata o lo o auauna atu iai le epikopo? (Atua.)

• O ai e faaali atu iai e le epikopo lona alofa ao ia auauna atu? (Iesu Keriso ma tagata o lana uarota.)

Pese

Tuu atu i tamaiti latou te usuina po o le faitauina upu o le “O La Matou Epikopo.”

Pisi tele lo matou epikopo

Ae talanoa mai ia te au epikopo

Fiafia tele lava ia i tamaiti uma

Ia lagolago la tatou epikopo.

E fiafia e auauna i le Alii

O le tama ia o le uarota

E fesoasoani ia fai mea sao

I le silafaga a le Atua.

Aotelega

Gaoioiga

Ia faamalamalama atu e te manao i ni tamaiti latou te faia se meaalofa faafetai mo le epikopo mo itula o lana auaunaga ua ia tuuina atu mo i latou. Tuu atu iai se fugalaau, se penitala, ma se fasilaau i tamaiti uma. Fai atu i tamaiti e tusi se auala e mafai ona faaali atu ai lo latou alofa mo Iesu i le isi itu o le fugalaau ma saini ai o latou igoa. Ona faapipii ai lea i le au po o le fasi laau.

A maea loa ona faatinoina e tagata uma, ona ao uma mai lea o mea na faia ma tuu atu i le tamaititi lava ia na te tuuina se fugalaau i totonu o le meatuuteu po o le fagu na e aumaia. Ia au faatasi ma tamaiti i le filifiliaina o se tamaititi na te aveina atu le teufugalaau i le epikopo pe a uma le vasega.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Faamatala atu le tala lenei ia Heber J. Grant, le Peresitene lona fitu o le Ekalesia, ma talanoaina pe na faapefea ona ia auauna atu i isi.

   Na maliu le tama o Heber ae faatoa iva tausaga o lona matua. Na matuai mativa lava lona tina ma sa faigata foi ia te ia le sailiga o se seleni mo ia ma Heber. Na maua tupe e tausia ai i laua e ala lea i le suiina o ofu o isi tagata ma le fonoina. O nisi taimi e suisui ai o ia mo se taimi umi e aunoa ma le malolo ma e toetoe lava a le mafai ona vili le laau suisui tuai. E masani ona tolotolo atu Heber i lalo o le laau suisui ma tulei le vae mo lona tina. O taimi o le taumalulu i Sate Leki e matuai malulu lava, ma e na o si ofu mafanafanafa manifinifi lava o Heber sa iai e faamafanafana ai o ia. Na manao o ia i sona ofu mafanafana lelei ae na ia iloa e le lava le la tupe mo a laua meaai. Na fiafia Heber i lona aso fanau ina ua tuuina atu iai e lona tina ia te ia se ofu mafanafana lelei na ia suiina mo ia. O lona ofu mafanafana fou o le mea pito sili atu lea ona taua ia te ia. I nai vaiaso mulimuli ane, ao faatelevave atu Heber i se feau, na ia vaaia ai se tamaititi e pei lava o ia o lo o tete i le malulu. O lo o ofuina e le tamaititi se ofu manifinifi, ma na manatua lelei e Heber le leaga o le leai o se ofu mafanafana. Na aveese e Heber lona ofu mafanafana ma taumafai atu lava i le tamaititi e faamaulu. Na fai atu i le tamaititi e ave ma ia aua o lo o iai le isi ona ofu i le fale.

   Atonu e te manao e faatino e tamaiti le tala lenei ona faamatala atu lea po o a lagona o tagata eseese o lo o faatinoina le tala.

2. Fai atu i tamaiti e nonofo faataaliolio ma pasi faataamilo se polo po o se isi mea vaivai ao e hamuina le “Pe a Tatou Fesoasoani.” O le taimi lava e te taofia ai le hamuina o le pese, o ai lava le tagata o lo o iai le polo po o le mea vaivai, o ia lena na te faamatalaina mai se auala e mafai ai ona ia fesoasoani atu i se isi. Ia mautinoa ia tofu oo uma iai tamaiti ma faamatala mai se auala e mafai ona ia fesoasoani atu ai.

3. Faapipii ia faau i lalo foliga ataata i tamaiti ae latou te lei tuua le vasega. Tau atu iai afai latou te faia se galuega fesoasoani mo se tasi, ona mafai lea ona latou liliuina foliga ataata i le tulaga sao e tatau ona iai.