E Fesoasoani le Agaga Paia ia Tatou Iloa le Mea Moni

Faamoemoega

Ina ia fesoasoani i tamaiti ia latou iloa e mafai e le Agaga Paia ona fesoasoani ia i latou ia latou iloa e moni aoaoga a Iesu Keriso.

Sauniuniga

Suesue ma le agaga tatalo le Mosaea 11; 12:17–19; 13:1–9; 17; 18:1–3; Moronae 10:4-5; MFF 130:22.
Ia saunia e usu pe faitau upu o le “Agaga Paia” (Tusipese a Tamaiti, itulau 105); o upu o lo o maua i le pito i tua o le tusi lesona lenei.
Ia saunia ni tamai pepa malō se sefulu e pei ona faaalia. Tusi le mataitusi i le isi itu ma numera i le isi itu. Mo tamaiti e le mafai ona faitau, ia faaopoopo atu togitogi e talafeagai ma numera.

Afai e talafeagai, ia faapipii pepa i le faasologa o numera i papatua o nofoa o tamaiti ao lei amataina le vasega.
Ia saunia e usu le fuaiupu muamua o le “Ou te Iloa o Lo o Soifua Lou Tama” (Tusipese a Tamaiti, itulau 5).
O Mea e Manaomia:
1. Se kopi o le Tusi a Mamona mo tamaiti uma e mafai ona faitau.
2. Mea faapipii pe afai e maua.
3. Laupapa, penisina, ma se solo; po o se pepa e tusi ai i luga.
4. Ata 3-47, Apinati i Luma o le Tupu o Noa (62042; Taga Ata o le Talalelei 308).
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Sa Fesoasoani le Agaga Paia ia Alema ia Ona Iloaina le Mea Moni

Gaoioiga faatosina

Tuu atu i tamaiti latou te sueina ia pepa o lo o nanaina, ma fesoasoani i ai latou ia maua le upu Agaga Paia. E mafai e tamaiti laiti ona faatulaga pepa i le faasologa e faitau ai; ona mafai lea ona e fuliina i luga ma faitau leotele ia upu. Fai faatasi ma le vasega ia upu.

Mataupu faavae o le faatuatua

Fai atu i tamaiti e tutu i luga ma outou taulotoina faatasi le mataupu faavae muamua o le faatuatua.

Mau, ata, ma le tala

Faaali atu le ata 3-47, Apinati i Luma o leTupu o Noa. Ao e faitauina atu le tala lenei i ni au lava upu, fai i tamaiti e faalogo pe na faapefea ona fesoasoani le Agaga Paia ia Alema.

Ia faamatala atu, i le tele o tausaga talu ona tuua e Liae ma lona aiga ia Ierusalema, sa avea ai se tagata amioleaga e igoa ia Noa ma tupu o Sa Nifaē. O le Tupu o Noa o se tupu leaga tele ma sa ia aoaoina Sa Nifaē ina ia latou fai agasala.

Na auina atu e le Alii se perofeta e igoa ia Apinati e talai atu i Sa Nifaē. Sa tau e Apinati ia Sa Nifaē o i latou ma lo latou tupu o ni tagata amioleaga ma ua finagalo le Tama Faalelagi ia i latou ina ia latou salamo.

Sa ita le Tupu o Noa ia Apinati ma o lea na pueina ai o ia. Ona aumaia ai lea o Apinati i luma o le tupu amioleaga lenei o Noa ma ana ositaulaga. Na aoaoina atu iai e Apinati ia aoaoga a Iesu Keriso. Sa le mananao i latou e faalogo, ae sa faamanuiaina e le Alii ia Apinati, ma sa leai se tasi sa mafai ona faatamaia o ia seia maea ona ia tuuina atu le savali na poloaiina ai o ia e tuuina atu. Na tau atu iai e Apinati o nei aoaoga e moni. Sa le talitonu le Tupu o Noa ma isi ana ositaulaga i upu a Apinati. Sa le mananao i latou e salamo mai a latou amioleaga. Ae peitai, sa mananao i latou e fasioti ia Apinati.

O se tasi o ositaulaga e igoa ia Alema sa talitonu o ia i a Apinati. O le Agaga Paia na iloa ai e Alema o lo o tauina mai e Apinati le mea moni. Na faatoga atu Alema i le Tupu o Noa ina ia faatagaina ia Apinati e alu. O le talosaga a Alema na faateleina ai le ita tele o le Tupu o Noa. Na ia faatonuina Alema e alu ese. Ona ia auina atu lea o ana auauna e fasioti ia Alema. Ae sa sola ese ia Alema ma lafi mai le Tupu o Noa ma ana auauna. Sa lafi Alema ma le saogalemu mo le tele o aso. Ina ua uma ona tauina atu e Apinati i le Tupu o Noa mea na poloaiina ai o ia e tauina atu, ona fasiotia ai lea o Apinati e le Tupu o Noa.

Ao lafi ia Alema, sa ia tusia i lalo ia aoaoga na aoaoina atu e Apinati. Na iloa e Alema o nei aoaoga e moni. Na ia salamo mai ana agasala uma ma amata ona usiusitai i poloaiga. Na avea Alema ma se faifeautalai maoae i le fetufaai atu o le mea moni ua ia iloa i isi.

Mau, ata, ma le tala

Na faapefea ona iloa e Alema o upu a Apinati e moni?

Taulotoina o le mau

Fesoasoani i tamaiti e sue le Moronae 10:5, ma faamatala atu o lenei mau o le a tauina atu ai ia te i latou le tali. Tuu atu i se tamaititi matua na te faitauina atu i le vasega po o lou faitauina leotele atu e oe. Ia faamalamalama atu o le Agaga Paia na fesoasoani ia Alema ia ona iloa na tautala atu Apinati ma le moni.

Atonu e te manao e tusi le fuaiupu i luga o le laupapa po o luga o se pepa telē ma fesoasoani i tamaiti matutua e taulotoina. A maea ona faitauina faatasi le fuaiupu mo nai taimi, solo ese pe pupuni ni upu se lua ona toe fai lea e tamaiti le fuaiupu. Faaauau pea le tapēeseina o upu pe a uma ona faitauina e tamaiti seia tapēese uma lava le mau atoa. (Mo tamaiti e le mafai ona faitau, ia faifai soo faatasi le fuaiupu. Taofi ma tuu atu i tamaiti e faatumuina upu autu.) Tuu le avanoa i tamaiti latou te fai atu ai le mau i le vasega pe a latou mananao iai.

E Mafai e le Agaga Paia Ona Fesoasoani ia i Tatou ia Tatou Iloa le Mea Moni

Faamatalaga a le faiaoga

Ia faamamafa atu o le Agaga Paia na te tuuina ia i tatou se lagona lelei pe a tatou filifili le sao. E na te tuuina mai foi ia i tatou se lagona lelei ina ia fesoasoani tatou te iloa ai aoaoga moni.

Tala

Faamatala atu le tala lenei i se tamaititi o lē na ia iloaina le mea moni e ala i le mana o le Agaga Paia:

E fiafia tele Sefo e faalogologo i faifeautalai pe a o atu i lo latou fale. La te faamatalaina atu ni tala matagofie ia te ia ma lona aiga. E faapitoa lava lona fiafia i tala la te faamatalaina e uiga ia Iesu Keriso. Ina ua faamatalaina atu e faifeautalai ia te ia e faapea o le Ekalesia moni a Iesu Keriso ua toefuataiina i le lalolagi, na ia manatu ai o se manatu sili lea ua ia faalogo iai. Na tau atu e faifeautalai ia te ia ma lona aiga afai o le a latou tatalo atu i le Tama Faalelagi, o le a latou iloaina ai pe moni mea na aoaoina atu e faifeautalai. Na siiina mai e faifeautalai le Moronae 10:5: “O le mana foi o le Agaga Paia tou te iloa ai le tonu i mea uma lava.”

Sa lei mautinoa e Sefo pe faapefea ona ia iloa e moni le savali na tuuina atu e faifeautalai, ae sa ia faia le mea na la tauina atu. Ao tatalo atu Sefo i le Tama Faalelagi ina ia fesoasoani atu ia te ia ia iloa le mea moni, ma ao faalogologo atu o ia i aoaoga a faifeautalai, sa tupu ae ia te ia se lagona lelei ma le mafanafana. E lei pine ae le toe iai ni masalosaloga o Sefo. Na ia lagona ma le mautinoa o mea na aoaoina atu e faifeautalai e moni. Na ia mauaina se lagona lelei, o se molimau, mai le Agaga Paia.

O le a le mea na fesoasoani ai le Agaga Paia ia Sefo ina ia malamalama iai? (O mea na aoaoina atu e faifeautalai ia te ia e moni.)
Na faapefea ona fesootai le Agaga Paia ma Sefo? (O se lagona lelei ma le mafanafana na oo atu i lona loto.)
O le a le mea na faia e Sefo ina ia ona maua ai lenei lagona mai le Agaga Paia? (Na ia tatalo ina ia iloa pe moni le savali a faifeautalai.)

Tau atu i tamaiti e mafai ona latou lagonaina le Agaga Paia i le taimi o se lesona a le Peraimeri, se lesona o le afiafi faaleaiga, po o se isi lava taimi e tauina atu ai ia te i latou le mea moni. E toatele tagata latou te mauaina lea lagona pe a latou faitauina po o le faalogo foi i tusitusiga paia po o afioga a perofeta soifua. Ia faamamafa atu e le masani ona tatou fesootai ma le Agaga Paia e ala i ni upu e mafai ona tatou faalogoina i o tatou taliga. Ae peitai, na te tuuina mai se lagona lelei e uiga i le mea moni.

Ia faamalamalama atu talu ai o le Agaga Paia ua na o se agaga (tagai i le MFF 130:22), o se isi taimi e faaigoa ai o le Agaga. Tau atu i tamaiti atonu latou te faalogo i tagata o tatalo ina ia faatasi le Agaga o le Atua ma i latou. O lo o latou ole atu ina ia faatasi le Agaga Paia ma i latou. O le a faatasi mai e fesoasoani ia i tatou ina ia tatou lagona le latalata atu i le Tama Faalelagi, malamalama i ana poloaiga, ma filifili le sao.

Aotelega

Molimau

Afai e talafeagai, ia fetufaai atu se mea na oo ia te oe na fesoasoani atu ai le Agaga Paia ina ia e iloa po o le malamalama foi i le mea moni. Tuu atu lau molimau i tamaiti o le Agaga Paia o se tasi o le AigaAtua o lē o le a fesoasoani ia i latou ia latou iloa le mea moni ma le mea sao.

Pese

Tuu atu i le vasega latou te usuina pe faitauina le fuaiupu muamua o le “Ua Ou Mautinoa o Soifua Lo’u Tamā”:

Ua ou mautinoa o soifua lo’u Tamā
Ma Ia alofa ia te au ua musumusu pea
Le Agaga e sao lea.

O le a le mea o lo o tau mai i le pese e tauina mai e le Agaga Paia ia i tatou taitoatasi? (O le Tama Faalelagi e alofa ia i tatou.)

Ia toe usuina pe toe faitauina e tamaiti le pese.

Iloiloga o le mau

Tuu atu i tamaiti latou te taulotoina mai le Moronae 10:5, ma faamalosia i latou e fatefaai atu ma o latou aiga.

I faamalamalama atu i tamaiti, e ui lava e mafai e le Agaga Paia ona tuuina atu i soo se tasi se lagona lelei pe a ia faalogo i le mea moni, ae pe a mavae le papatisoga, e mafai e se tagata ona mauaina se meaalofa faapitoa pe a faamauina o ia e avea ma tagata o le Ekalesia. O lena meaalofa o le meaalofa a le Agaga Paia, o lona uiga o le a mafaia e lena tagata ona lagonaina le faatasi atu o le Agaga Paia i taimi uma pe afai e ola amiotonu. Tau atu ia i latou o le a latou aoao atili e uiga i le meaalofa a le Agaga Paia i isi lesona.

Pese

Usu pe faitau faatasi ma tamaiti upu o le “Agaga Paia.”

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Usu pe faitau laina e lua mulimuli o le “Leo Itiiti ma le Malū” (Tusipese a Tamaiti, itulau 106).

Faalogo, faalogo. (faaofuofu le lima i le taliga)

Le Agaga Paia o le a musmusu mai (tuu le lima tusi i luga o laugutu)

Faalogo, faalogo (faaofuofu le lima i le taliga)

I le leo itiiti ma le malū. (tuu le lima i luga o le fatafata)
Tuu atu i tamaiti latou te faatinoina le tala ia Apinati i luma o le Tupu o Noa ma ositaulaga. O le tamaiti o lo o faatinoina ia Apinati e mafai ona ia tauina mai se poloaiga a le Tama Faalelagi. Na mafai ona ioe Alema na talitonu ma talosaga atu i le tupu ina ia faasaoina le ola o Apinati. Ae peitai, na tulia i fafo Alema. Tuu atu i le tamaititi o lo o faatinoina Alema e lafi ma faafoliga o lo o ia tusitusia i lalo aoaoga a Apinati.