Lesona 16

E Mafai Ona Tatou Faaali Atu Lo Tatou Faatuatua e Ala Lea i Lo Tatou Usiusitai

Faamoemoega

Ina ia fesoasoani i tamaiti ia latou malamalama e mafai ona faaalia atu lo latou faatuatua i le Tama Faalelagi ma Iesu Keriso e ala lea i le usiusitai i poloaiga.

Sauniuniga

1. Suesue ma le agaga tatalo le tala ia Liae ma lona aiga o lo o i le 1 Nifae 1-2.

2. O ata po o meatotino a le aiga o Liae na latou filifilia ao sauni i latou e malaga atu i le vao.

3. Ia saunia e usu pe faitau upu o le “Faatuatua” (Tusi Pese A Tamaiti, itualu 96).

4. O Mea e Manaomia:

   1. Se Tusi a Mamona.

   2. Ata 3-39, O Liae o Lo o Vavalo Atu i Tagata o Ierusalema (62517; Taga Ata o le Talalelei 300); ma le ata 3-40, Tuua o Ierusalema e le Aiga o Liae (62238; Taga Ata o le Talalelei 301); ma se ata o le perofeta o lo o iai nei.

   3. Le talita ma le mama a le FMT.

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

O Le Usitai O se Auala Lea e Faaalia ai le Faatuatua

Gaoioiga faatosina

Usu pe faitau upu o le pese “Faatuatua.” E mafai ona e faaaogaina taga nei mo vasega laiti.

Faatuatua e oso mai pea lava o le la, (fai se liʻo i lima i luga ae o le ulu)

Faatuatua e talia mai tatalo e Iesu (faaofuofu lima i tua o taliga ona tuufaatasi lea pei o loo tatalo)

A toto pei se laau: (faaofuofu le lima agavale ma faafoliga o loo toto se fatulaau i le lima taumatau)

O le a tupu pea. (ia faafoliga le lima taumatau o lo o tuputupu ae mai le lima agavale)

E tupu pea i lou loto. (tuu lima i luga o le fatafata)

Pe a ou fai mea tonu. (tusi le limatusi taumatau i luga)

A fetalai mai le Tama Faalelagi ma Iesu Keriso ia i tatou ina ia tatou faia se mea, e taua lena mea o se poloaiga. A tatou usiusitai i poloaiga, ua tatou faaali atu i le Tama Faalelagi ma Iesu tatou te faatuatuaina i laua. Tatou te iloa e alolofa i laua ia i tatou ma e le mafai ona poloaiina i tatou ina ia tatou faia se mea e tiga ai i tatou. Tatou te faaali atu lo tatou faatuatua pe a tatou usiusitai.

Faamanatu atu i tamaiti o le talitonu i le Tama Faalelagi ma Iesu o lona uiga ua iai lo tatou faatuatua. E ui tatou te le o vaaia i laua i o tatou olaga i lenei lalolagi, ae ua iai lo tatou faatuatua i molimau a isi o ē na vaai ia te i laua. Tatou te talitonu foi o le Agaga Paia e moni ma e leai sona tino o aano ma ivi ae o se peresona o le agaga i le tulaga o se tagata.

Mataupu faavae o le faatuatua

Fesoasoani i tamaiti matutua e tauloto le mataupu faavae muamua o le faatuatua. O tamaiti laiti e mafai ona faataitai atu ia te oe ma atonu e mafai foi ona taulotoina se vaega.

Na Faaalia Le Faatuatua o Liae e Ala Lea i Lona Usiusitai

Tala o tusitusiga paia ma le ata

Faamalamalama atu o i tatou o fanau a le Tama Faalelagi ma e mafai ona faaali atu e iai lo tatou faatuatua i le Tama Faalelagi ma Iesu Keriso. I le Tusi a Mamona, na faaalia e se perofeta e igoa ia Liae lona faatuatua i le Tama faalelagi ma Iesu e ala lea i lona usiusitai.

Faamatala atu le tala lenei mai tusitusiga paia i ni au lava upu:

I aso la ua leva, pe toe ono selau tausaga ao lei fanau mai Iesu, sa nofo ai i le aai o Ierusalema se perofeta e igoa ia Liae ma lona aiga. O le igoa o le toalua o Liae o Sarai. E toafa le la fanau tama, o Lamana, Lemuelu, Sama, ma Nifae.

Sa mauoloa le aiga o Liae ma faamanuiaina. Sa alofa Liae i le Tama Faalelagi ma Iesu. Na ia taumafai e aoao lona aiga ina ia alolofa ia i laua ma usitai ia la poloaiga.

Faaali atu le ata 3-39, O Liae o Loo Vavalo Atu i Tagata o Ierusalema.

I le taimi lena, o tagata sa nonofo i Ierusalema sa ese le amioleaga. Sa taumafai Liae e aoao i latou e uiga i le Tama Faalelagi ma Iesu ma poloaiga, ae sa le faalogo tagata ia te ia.

I se tasi aso ao tatalo ia Liae, na faia ai e ia se miti. Na ia vaai i le tele o mea matagofie eseese. Na ia vaaia foi o le a faatafunaina Ierusalema seiloga e salamō tagata. Na viia e Liae le Tama Faalelagi aua ua ia iloa o lo o finagalo le Tama Faalelagi e lapataiina tagata o Ierusalema. Na fetalai atu le Tama Faalelagi ia te ia e tauina atu i tagata mea na ia vaai iai. Sa faapea lava ona faia e Liae e pei ona poloaiina ai o ia. Na ia tau atu i tagata o Ierusalema o le a faatafunaina seiloga latou te salamō.

Tala o tusitusiga paia ma le ata

• O le a le mea na vaaia e Liae i lana miti? (E tele mea, e aofia ai le faatafunaina o Ierusalema; tagai i le 1 Nifae 1:13.)

• O le a se lagona na oo ia Liae ina ua mavae lana miti? (Na ia viia le Tama Faalelagi; na fiafia o ia; tagai i le 1 Nifae 1:14-15.)

O le tau atu i tagata e salamō mai a latou amioleaga e moomia ai le lototoa. Ae peitai, sa iai le faatuatua o Liae o le a puipuia o ia e le Tama Faalelagi, o lea na ia faia ai e pei ona poloaiina ai o ia. Sa le faalogo tagata ia te ia ma sa tauemu ia te ia ma taumafai e fasioti o ia aua sa latou le mananao e faalogo i lo latou amioleaga.

Tala o tusitusiga paia ma le ata

• O le a le mea na faia e Liae ina ia faaali atu ai lona faatuatua i le Tama Faalelagi? (Na ia usitai ma tau atu i tagata ina ia salamō; tagai i le 1 Nifae 1:4, 18.)

• O le a le mea na faia e tagata ina ua uma ona tau atu e Liae ina ia latou salamō? (Sa latou faifai ma tauemu ia te ia ma mananao e fasioti ia te ia; tagai i le 1 Nifae:19-20.)

• O le a se tou manatu o le a se lagona na oo ia Liae ina ua le faalogo tagata ia te ia?

Talanoaina o le mau

I se taimi mulimuli ane, na fetalai atu ai le Tama Faalelagi ia Liae. Fai atu i tamaiti e faalogo lelei po o le a le poloaiga na tuuina atu e le Tama Faalelagi ia Liae e faia. Faitau le 1 Nifae 2:1-2.

Talanoaina o le mau

• O le a le mea na poloaiina ai Liae e le Tama Faalelagi na te faia? (Tuua Ierusalema ma malaga atu i le vao.)

Ia faamalamalama atu o le vao o se nofoaga lea e leai se tasi e nofo ai ma e leai ni fale, po o ni auala. Na poloaiina Liae ma lona aiga e le Tama Faalelagi ina ia tuua uma tagata ae o atu i se nofoaga o le a latou nonofo ai lava na o i latou.

Talanoaina o le mau

• Aisea na poloaiina ai Liae e aveese lona aiga mai Ierusalema? (O lo o fuafua tagata leaga e fasioti ia Liae, ma o le a faatafunaina le aai.)

Fai atu i tamaiti e faalogo lelei po o le a le mea na faia e Liae; ona faitau lea o le 1 Nifae 2:3-4.

Talanoaina o le mau

• O le a le mea na faia e Liae? (Na ia tapenaina mea uma e manaomia latou te ola ai i le vao ma aveese atu lona aiga mai Ierusalema.)

Tala o tusitusiga paia ma le ata

Faaali atu le ata 3-40, Tuua o Ierusalema e le Aiga o Liae.

E ui lava sa ola Liae i Ierusalema mo se taimi umi, ae na vave lava ona usitai o ia i le poloaiga e tuua lona aiga. Na tuua e Liae ma lona aiga lo latou fale, o lo latou fanua, o le tele o o latou lavalava, o a latou auro ma siliva, ma isi meatotino. Sa latou ave na o meaai, o nai lavalava, faleie, ma isi mea e talafeagai sa mafai ona aveina i luga o kamela po o asini. Ona latou malaga atu lea i le vao.

Ia faamanino atu sa lei faigofie ia Liae ona malaga ese atu, ae sa naunau lava o ia e usitai i lenei poloaiga.

Tala o tusitusiga paia ma le ata

• O le a le mea na faia e Liae e faaalia ai e iai lona faatuatua i le Tama Faalelagi ma Iesu Keriso? (Sa usiusitai o ia. Na ia lapataiina tagata amioleaga, ma sa ia tuua lona fale ma ana meatotino ma malaga atu i le vao aua sa poloaiina ai o ia ia faapea lava ona faia.)

Talanoaga

Fai atu i tamaiti e faafoliga e pei i latou o le aiga o Liae.

Fai atu iai e mafaufau po o a ni a latou mea e ave pe afai o lea o le a latou malaga atu i le vao. Ia tau atu ia te oe mea latou te mananao e ave ma mea o le a latou tuua. E mafai ona faaali atu nisi mea po o ni ata o mea na filifili le aiga o Liae e ave; mo se faataitaiga, o se mama e mafai ona sui ai maa taua, o sene o lona uiga o tupe, o se apu e mafai faaalia mai ai meaai. Tuu atu i tamaiti e filifili mai po o a mea na manaomia e le aiga o Liae. Ia faamanatu atu iai e na o ni nai mea e mafai ona aveina.

Gaoioiga

Tuu atu i tamaiti latou te filifilia po o a mea latou te mananao e ave pe afai o le a latou malaga atu i le vao faatasi ma Liae. Ona fai mai lea o le tamaititi muamua, “Afai ou te malaga faatasi ma Liae i le vao, ou te aveina .” (E faatumuina e le tamaititi le avanoa i so o se mea lava ua ia filifilia e ave.) Ona fai foi lea e le tamaititi lona lua le faamatalaga na fai e le tamaititi muamua ma faaopoopo atu iai le mea ua ia filifilia. O tamaiti uma lava e sosoo atu iai e na te toe tauina uma lava mea na tauina muamua ma faaopoopo atu iai sana ia lava mea. Ia faaauau pea seia soo uma tamaiti (ma le faiaoga).

Gaoioiga

• O le a so outou manatu o le a se lagona e oo ia outou pe afai o le a outou le toe vaai ia outou uo ma a outou meatotino?

• O le a so outou manatu o le a se lagona na oo i le aiga o Liae?

O le usiusitai i le Tama Faalelagi ina ia tuua Ierusalema sa tele se faatuatua na alu ai. Na mauaina e Liae ma lona aiga faamanuiaga ona o lo latou usiusitai.

Pe a Tatou Filifili le Sao, Ua Tatou Usiusitai

Gaoioiga o se tala e faatino

Faaali atu le talita ma le mama a le FMT.

Gaoioiga o se tala e faatino

• O le a le uiga o mataitusi F M T? (Filifili Mea Tonu.)

Tau atu i tamaiti o le filifilia o le sao o lona uiga o le faia lea o mea o lo o finagalo iai le Tama Faalelagi ma Iesu Keriso tatou te faia.

Faamatala atu i tamaiti tala nei i ni au lava upu, ma tuu atu i tamaiti latou te faatinoina ia tulaga uma.

Gaoioiga o se tala e faatino

1. Ina ua outou foi atu i le fale ma nisi o au uo, sa outou pasi atu ai i le fanua a lo outou tuaoi. O totonu o le fanua o lo o iai se laau ‘aina mata o lo o taufuifui ona fua. O lo o mananao au uo tou te o ma i latou ma tau mai ni fua tou te aai ai. Na latou fai atu ia te oe o lo o anoanoai fua o le a le misia lava ni nai fua iti.

   • O le a se mea e finagalo le Tama Faalelagi ma Iesu e te faia?

   Tau atu i tamaiti, pe a latou filifili le sao, ua latou usiusitai ma faaali atu lo latou faatuatua i le Tama Faalelagi ma Iesu Keriso.

2. O lo o e manao e te taalo i lau meataalo e sili ona e fiafia iai, ae o lo o i lou uso/tuagane.

   • O le a le mea e finagalo le Tama Faalelagi ma Iesu e te faia?

   Ia famalamalama atu, pe a tatou faia mea o lo o finagalo le Tama faalelagi ma Iesu tatou te faia, ua tatou filifilia le sao.

   Afai e lava le taimi, e mafai ona e faaali atu le ata o le perofeta ma fesili atu i tamaiti e tau mai nisi o mea ua ia poloaiina i tatou e faia. Ia talanoaina pe mafai faapefea ona oo mai faamanuiaga pe a tatou usiusitai i nei poloaiga.

Aotelega

Faaali atu le talita ma le mama a le FMT ma faamanatu atu i tamaiti ina ia latou filifili pea le sao. Pe a latou filifilia le sao, ua latou usiusitai. Pe a latou usiusitai, ua latou faaali atu i le Tama Faalelagi ma Iesu Keriso lo latou faatuatua ia te i laua.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Tuu atu i se tagata o la outou uarota po o le paranesi e faamatala mai pe na faapefea ona fesoasoani le usiusitai ia te ia. O se faifeautalai ua maea lana misiona, se tagata fou faatoa liliu mai, po o se tasi e lei leva talu ona ulu i le malumalu e mafai ona valaaulia mai. Ia maua mai se faatagaga mai le Peresitene o la outou Peraimeri ma le taitai perisitua ao lei fesili atu i se tasi e alu atu i lau vasega.

2. Ao mai ni mea e mafai ona maua mai ai le puipuiga, e pei o seevae, pulou, faamalu, ma isi mea faapena. Ia lava se taimi o lau vasega e mafai ona auai ai tamaiti. Fai atu i tamaiti, taitasi i le taimi, e filifili se mea ma faamatala mai po o le a le ituaiga puipuiga e maua mai ai (o seevae e puipuia ai vae, ma faapena ai lava). Tau atu i tamaiti, pe a tatou usiusitai i matua ma taitai, ua puipuia foi i tatou. Talanoa e uiga i nisi o tulafono ma pe mafai faapefea ona puipui ai i latou.

3. Sii i luga ou lima ma faaali atu i tamaiti pe mafai faapefea ona e faaminoiina ou tamatamailima. Ia faamatala atu iai e mafai lava e oe ia ona faaminoi ou lima ma tamatamailima, ae le mafai ona e faaminoiina tamatamailima o le isi tagata. Fai atu i tamaiti e sii i luga o latou lima, faaminoi o latou tamai lima, ma tatala ma faamapuni o latou lima. Fesoasoani i tamaiti ia latou malamalama, pe a latou fai atu i lo latou lima e filifili le sao, ua latou usiusitai.

4. Usu pe faitau upu o le fuaiupu lona lua o le “E I Ai Ou Lima Laiti e Lua.”

   Tama e, faafetai mo nai ou lima nei

   Ia e Faamanuia ina ia la iloa lelei

   E fiafia tamaiti i le aso atoa

   Pe a usitai nei lima e lua.

   (Tusi Pese A Tamaiti, itulau 272)

5. Sue uma auala e mafai ai ona tatou filifili le sao o lo o aafia ai i le mataupu e sefulutolu o le faatuatua. Ia aafia tamaiti i le faiga o lea vaega. Ia faitauina e i latou ia auala, faasino iai, po o le toe faitauina. Ia faamalosia tamaiti na e mafai ona taulotoina ina ia tauloto se laina e taua tele ia i latou.