Tusi Lesona ma le Taimi o Fetufaaiga a le Peraimeri
Lesona 12: O le Meaalofa a le Agaga Paia

Lesona 12

O le Meaalofa a le Agaga Paia

Faamoemoega

Ina ia fesoasoani i tamaiti latou te talisapaiaina le avanoa o le mauaina o le meaalofa a le Agaga Paia pe a faamauina i latou e avea ma tagata o le Ekalesia a Iesu Keriso o le Au Paia o Aso e Gata Ai.

Sauniuniga

  1. Suesue le Ioane 14:16-17, 26.

  2. Ia faasauni le siata mai le lesona 7, “Avea ma Tagata o le Ekalesia a Iesu Keriso.” Ao lei amataina le vasega, ia tuu le upu tusi “Faatuatua ia Iesu Keriso,” “Salamo,” ma le “Papatisoga” i luga o laasaga e tatau ai o le siata. Ia faasauni le upu tusi “Meaalofa a le Agaga Paia” e faaaoga i le taimi o le lesona.

  3. Tuu le ata 3-14, Teineititi o Lo o Faamauina (62020) i totonu o se pusa. Afai e mafai, ia afifi le pusa ia foliga o se meaalofa.

  4. Ia saunia e fesoasoani i tamaiti e usu pe faitau upu o le pese “O le Agaga Paia” (Tusi Pese a Tamaiti, itulau 105); o lo o maua upu i le pito i tua o le tusi lesona lenei.

  5. O Mea e Manaomia:

    1. Se Tusi Paia.

    2. Ata 3-14, Teineititi o Lo o Faamauina (62020); ata 3-22, O le Talisuaga Mulimuli (62174; Taga Ata o le Talalelei 225); ma le ata 3-10, O le Uluai Faaaliga (62470; Taga Ata o le Talalelei 403).

  6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Mafai Ona Tatou Mauaina le Meaalofa a le Agaga Paia

Gaoioiga faatosina

Faaali atu le “meaalofa” atigipusa ma fesili atu fesili nei:

Gaoioiga faatosina

  • Aisea tatou te tuuina atu ai meaalofa i isi?

  • O le a sou lagona pe a tuuina atu e se isi ia te oe se meaalofa?

Faamatalaga a le faiaoga

Ia faamalamalama atu o le aso lava e avea ai i tatou ma tagata o le Ekalesia a Iesu Keriso o le Au Paia o Aso e Gata Ai o se tasi lea o aso pito i sili ona taua i o tatou olaga. I lena sauniga matagofie, e tuuina mai ai e le Tama Faalelagi ma Iesu Keriso se meaalofa matagofie ia i tatou.

Faamatalaga taufaaataata

Tau atu i tamaiti o le a e tuuina atu ni faamatalaga taufaaataata e fesoasoani ai ia i latou e sailia po o le a lea meaalofa. Fai atu iai e faalogo lelei seia uma ona e tuuina atu faamatalaga uma.

Faamatalaga taufaaataata

  1. O le meaalofa e tuuina mai e le Tama Faalelagi ma Iesu Keriso e le mafai ona faatauina i ni tupe.

  2. E le mafai ona tatou uuina lea meaalofa i o tatou lima ma vaavaai atu iai e pei ona tatou faia i se tusi po o se meataalo.

  3. O lenei meaalofa e sili atu lona tau nai lo se isi meaalofa e mafai ona mauaina e se tagata.

  4. O tagata agavaa o le Ekalesia e fesoasoani ma faamafanafanaina e lea meaalofa i o latou olaga atoa.

  5. Tatou te mauaina lea meaalofa pe a faaee lima o alii o lo o umiaina le Perisitua Mekisateko i luga o o tatou ulu ma faamauina i tatou e avea ma tagata o le Ekalesia a Iesu Keriso o le Au Paia o Aso e Gata Ai.

Fai atu ia i latou uma o ē ua latou iloaina le meaalofa ina ia sii i luga o latou lima.

Faamatalaga taufaaataata

  • O le a lenei meaalofa? (O le meaalofa a le Agaga Paia.)

Ata ma le talanoaga

Ia tuuina atu i se tasi tamaititi na te tatalaina le meaalofa ma sailia le ata. Ona faaali atu lea o le ata o le tamaititi o lo o faamauina. Ia faamalamalama atu pe faapefea ona tuuina mai le meaalofa a le Agaga Paia. Pe a uma le papatisoga o se tagata, o alii o lo o umiaina le Perisitua Mekisateko latou te tuu o latou lima i luga o le ulu o le tagata, e pei ona faaalia i le ata. O se tasi o nei alii (e masani lava o le tama, o le epikopo, se faifeautalai, po o se uo foi a le tagata o le a faamauina) na te faia le tatalo. I le taimi o le tatalo, o le tagata o lo o faamauina e avea ma tagata o le Ekalesia na te mauaina le meaalofa a le Agaga Paia.

Ata ma le talanoaga

  • O le a se mea tou te iloa e uiga i le Agaga Paia?

Tuu atu i tamaiti latou te faamatalaina otootoina mai ni mea latou te iloa e uiga i le Agaga Paia. Ia taua mai ai vaega nei:

Ata ma le talanoaga

  1. O le Agaga Paia e leai sona tino o aano ma ivi e pei o i tatou. E iai lona tino agaga i totonu o le tagata.

  2. O le Agaga Paia na te aoaoina i tatou e uiga i le Tama Faalelagi ma Iesu Keriso ma molimau mai ia i tatou i mea na tatou aoaoina e uiga ia i laua.

  3. O le Agaga Paia e molimau mai ia i tatou pe a aoaoina i tatou i mea moni ma o mea tatou te faalogoina o mea moni.

  4. O le Agaga Paia na auina mai le Tama Faalelagi ma Iesu Keriso ina ia fesoasoani ia i tatou ia tatou filifilia le mea sao.

Siata

Faaali atu le siata “Avea ma Tagata o le Ekalesia a Iesu Keriso.”

Tuu le upu tusia “Meaalofa a le Agaga Paia” i luga o le laasaga lona fa o le siata. Tuu atu i se tamaititi matua na te faitauina leotele ia upu po o lou faitauina atu foi e oe; ona faataitai mai uma lea o tamaiti ia te oe.

Ia faamalamalama atu e le o tagata uma o lo o i le lalolagi latou te mauaina le avanoa e maua ai le meaalofa a le Agaga Paia. E na o i latou ua papatisoina ma faamauina o ni tagata o le Ekalesia a Iesu Keriso o le Au Paia o Aso e Gata Ai o lo o iai lena faamanuiaga. Ia faamamafa atu pe a tatou mauaina le meaalofa a le Agaga Paia i le taimi o le faamauga, ua avea aloaia i tatou ma tagata o le Ekalesia. Toe iloilo ma tamaiti laasaga o lo o i le siata, amata mai le faatuatua ia Iesu Keriso.

Iloiloga o le mataupu faavae o le faatuatua

Tusi upu o le mataupu faavae lona fa o le faatuatua i luga o le laupapa. Fai faatasi e outou ma tamaiti. Ona tapē ese lea o nisi upu ma toe fai foi. Faaauau pea ona titina ese nai upu i lea taimi ma lea taimi seiloga lava e sao lona taulotoina.

Na Folafola Mai e Iesu Keriso o le a Auina Mai le Agaga Paia

Ata

Faaali atu le ata 3-22, O Le Talisuaga Mulimuli. Faamalamalama atu, i le po ao lumanai le faasatauroga o Iesu Keriso, na ia taumafa faatasi ai ma le Au Aposetolo e Toasefululua i le talisuaga mulimuli. I le taimi lena, na ia aoaoina atu ai foi ia te i latou se mea taua lava. Na ia silafia a alu ese atu o ia o le a matua faanoanoa lava le Au Aposetolo. Na ia silafia foi o le a latou moomia lana fesoasoani. Na folafola atu e Iesu i le Au Aposetolo o le a ia le tuua ia latou na o i latou ae o le a ia auina mai se tasi e fesoasoani ma faamafanafana ia i latou.

Mau

Fai atu i se tamaititi matua na te faitauina po o le a le mea na tauina atu e Iesu i lona Au Aposetolo mai le Ioane 14:16 po o le faitauina atu foi e oe.

Mau

  • O le a le isi igoa o lē Faamafanafana lea na folafola mai e Iesu na te auina mai i le Au Aposetolo? (O le Agaga Paia.)

Faitau atu le Ioane 14:26 i tamaiti.

Ia faamamafa atu na auina mai e Iesu Keriso le Agaga Paia ina ia fesoasoani ma faamafanafana i lona Au Aposetolo. E ui lava sa le mafai ona vaaia e le Au Aposetolo le Agaga Paia, ae sa mafai ona latou lagonaina lona fesoasoani ma lana faamafanafanaga ia i latou. O le mafuaaga lena e taua ai o ia o le Faamafanafana.

Pese

Usu pe faitau upu o le pese “O le Agaga Paia.”

E Mafai e le Agaga Paia Ona Fesoasoani ia i Tatou

Faamatalaga a le faiaoga

Ia faamalamalama atu, i le avea ai ma tagata o le ekalesia a Iesu Keriso, ua tatou maua uma lava le avanoa e pei ona mauaina e le Au Aposetolo o le iai lea o le Agaga Paia e fesoasoani ma faamafanafana ia i tatou. Ia faamamafa atu o le faatasi mai o le Agaga Paia o se tasi lea o meaalofa silisili e mafai ona tatou olioli ai i lenei olaga. E mafai ona tatou mauaina pea lea mafutaga ma le Agaga Paia pe afai tatou te agavaa ma ola amiotonu.

Tau atu i tamaiti o le Agaga Paia e mafai ona fesoasoani ia i tatou ina ia tatou iloa le mea e fai pe a iai ni a tatou filifiliga e faigata ona faia. Ia uunaia tamaiti ina ia mulimuli i o latou faalogona mai le Agaga Paia pe a latou fefefe pe mafatia. O le a ia fesoasoani ina ia latou iloa le mea e tatau ona latou faia, e pei o le musuia o i latou e tau atu i se tasi e mafai ona fesoasoani atu.

Tala

Faamatala atu le tala lenei i ni au lava upu. Fai atu i tamaiti e faalogo lelei ma saili pe faapefea ona fesoasoani ma faamafanafanaina se teineititi e igoa ia Tiana e le Agaga Paia:

Sa ola ae Tiana i le tele o taimi o lona olaga i se tamai aai faifaatoaga. Na fiafia tele o ia i lenei aai ma tagata o lo o nonofo ai iina. E masani lava ona mafaufau Tiana i le matagofie o le nofo i se aai e tumu i tagata fefaauoai.

I se tasi aso, na foi mai ai le tama o Tiana i le fale ina ua uma lana galuega ma tau atu i lo latou aiga o ia ua suia nei lana galuega ma o le a latou siitia atu i se tasi aai tele.

Tala

  • O le a sou manatu o le a se lagona na oo ia Tiana?

Sa lagona e Tiana le le fiafia ma le tei tele i taimi uma lava e mafaufau iai i le siitia ese atu. E faigata tele ia te ia ona mafaufau atu i le vave tele ona ia tuua ana uo, o lo latou fale, aoga, ma le uarota.

Sa popole tele Tiana. Sa manatunatu o ia pe o le a faigata ia te ia ona sueina ni ana uo fou. Pe o le a faapeī lo latou fale fou ma le uarota? Pe o le a faigata foi le aoga mo ia?

Sa leai se tasi e mafai ona fesoasoani atu ia te ia e aveese ona lagona popole. Sa mafaufau Tiana e tatalo ma ole atu i le Tama Faalelagi mo se fesoasoani.

Sa tatalo atu Tiana i le Tama Faalelagi ma lona loto atoa. Ao tatalo o ia, sa iai se mea matagofie lava ua amata ona tupu. O lagona popole uma ma le fefe sa iai ua amata ona mou malie ese atu.

Sa lagona e Tiana e pei lava o i ai se tasi o lo o faamafanafana mai ia te ia.

Tala

  • O ai tou te manatu na faamafanafanaina ia Tiana? (O le Agaga Paia.)

Na siitia ese atu le aiga o Tiana, ma sa lelei mea uma. Na te manatuaina pea le fesoasoani agaalofa na ia maua mai le Tama Faalelagi e ala mai le Agaga Paia.

IManatu o le faiaoga ma lana molimau

Atonu e te manao e tau atu se taimi na faamafanafanaina ai oe e le Agaga Paia, e pei o se taimi na e fefe ai pe ina ua toesea se tasi e pele ia te oe. Ia tuuina atu lau molimau o le Agaga Paia e mafai ona faamafanafanafaina ma taitaiina i tatou. O le meaalofa a le Agaga Paia lea tatou te mauaina pe a mavae o tatou papatisoga o se tasi lea o meaalofa sili ua mafai ona tuuina mai e lo tatou Tama Faalelagi ina ia fesoasoani ia i tatou e filifili le sao i o tatou olaga atoa.

Aotelega

Ia faamamafa atu, i le avea ai ma tagata o le Ekalesia tatou te talitonu i le Agaga Paia. Tatou te iloa o le a ia tuuina mai ia i tatou le fesoasoani ma le faamafanafanaga tatou te moomia pe afai tatou te usiusitai i poloaiga.

Mataupu faavae o le faatuatua

Ia faamatala atu le mataupu faavae muamua o le faatuatua o lo o tau mai ai e uiga i le Agaga Paia. Toe fai faatasi ma tamaiti le mataupu faavae muamua o le faatuatua. Faaali atu le ata 3-10, O Le Uluai Faaaliga, ma le ata 3-14, Teineititi o Lo o Faamauina, i vaega talafeagai ao e taulotoina le mataupu o le faatuatua.

Tofi se tamaititi e faia le tatalo faaiu; faamanatu atu ia te ia le faafetai atu i le Tama Faalelagi mo lona tuuina mai o le Agaga Paia tatou te mauaina.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

  1. Ia valaaulia atu se malo faaaloalogia i lau vasega. Fai atu i lau malo e fetufaai mai se mea na tupu ia te ia na faamafanafanaina ai o ia e le Agaga Paia. (Ia maua mai se faatagaga mai le epikopo po o le peresitene o le paranesi pe afai o lea tagata e le auai i la outou uarota po o le paranesi.)

  2. Fesili atu i tamaiti pe iai se tasi na te faamafanafanaina , faafiafia, ma puipuia i latou, aemaise lava pe a latou faanoanoa. Ia faamamafa atu o tagata faapena e mafai i nisi taimi ona faamafanafana i tatou pe a tatou faanoanoa. Ia faamalamalama atu o le Agaga Paia i nisi taimi e taua o le Faamafanafana. E mafai ona ia tuuina se faamafanafanaga sili i o tatou olaga. Na auina mai o ia e Iesu Keriso ina ia tatou faatasi pe a tatou faanoanoa pe mafatia.

  3. Usu pe tauloto laina e lua mulimuli o le “Leo Malū ma le Itiiti” (Tusi Pese a Tamaiti, itulau 106:

    Faalogo, faalogo. (Faaofuofu le lima i tua o le taliga)

    O le Agaga e musumusu mai. (Tuu le limatusi i le gutu)

    Faalogo, faalogo (Faaofuofu le lima i tua o le taliga)

    I le leo malū ma le itiiti. (Tuu le lima i le fatafata)

  4. Fai le taaloga filemu lenei ma tamaiti ina ia faaali atu ai ia te i latou e mafai ona taitaiina i latou e se leo, malū ma le itiiti.

    Faaali atu i tamaiti le tamai mea lea o le a nanaina mo lenei taaloga. Tofi se tamaititi se toatasi e alu ese mai le potu mo sina taimi ao e nanaina le mea lea. Toe fai i le tamaititi e toe sau, ma fai atu iai e faalogo lelei i le auala na te sailia ai le mea lea. Ia faaaoga ni leo lemu, e pei o le faapaʻo o le penitala, patipati lemu ou lima, po o le hamuina o se pese, e tau atu ai i le tamaititi po o fea le itu e liliu iai mo le sueina o le mea lea. Ia mautinoa o leo e te faia e tatau ona lemu ma faaaloalo. Pati lemu pe a alu tonu le tamaititi i le itu sao. Faavavevave le pati pe a latalata atu iai i le mea o lo o nanaina ai, seia oo lava ina maua.

    Ia faamamafa atu i tamaiti e mafai ona taitaiina o latou olaga e ala lea i le faalogo atu i le leo malū ma le itiiti o le Agaga Paia.

  5. Musumusu atu i tamaiti ma fai atu iai se upu faapea, “Afai e te lagonaina mai au, tuu lou tamailima i lou alafau. Afai e te lagona mai au, tuu lou tamailima i lou auvae.” Ona faamalamalama atu lea i tamaiti e iai se tasi o lo o tautala atu i se leo lemu ma le itiiti, ma e tatau ona latou faalogo lelei po o le a le mea o lo o tauina atu e lena leo ia i latou. O lena leo e sau mai le Agaga Paia.