Lesona 46

O Iesu Keriso ua Mafai ai Ona Tatou Ola e Faavavau (Eseta)

Faamoemoega

Ina ia fesoasoani i tamaiti ia latou malamalama talu ai ona o le alofa o Iesu Keriso mo i tatou, ua ia saunia ai se auala ina ia mafai ai ona tatou ola e faavavau.

Sauniuniga

1. Suesue ma le agaga tatalo le Mareko 10:13-16, o tala i le maliu ma le toetu mai o Iesu Keriso o lo o maua i le Luka 23 ma le 24, ma le tala i le asiasiga a Iesu Keriso i Sa Nifaē i le 3 Nifae 11.

2. Ia saunia se fasipepa e tusia ai le upu ola pea i luga.

3. Tusi igoa o tamaiti taitoatasi i luga o ni fasi pepa eseese.

4. Ia saunia e aoao atu i tamaiti e usu pe faitau upu o le “Ua Toetu Mai Iesu” (Tusipese A Tamaiti, itulau 70).

5. O Mea e Manaomia:

   1. Se Tusi Paia ma se Tusi a Mamona.

   2. Se polo vaivai po o se taga fatupi.

   3. Mea faapipii.

   4. Se totinilima

   5. Ata 3-71, O le Faasatauroga (62505; Taga Ata o le Talalelei 230); ata 3-15, O Iesu Keriso Toetu (62187; Taga Ata o le Talalelei 239); ata 3-72, Ua Faaali Atu Keriso i Tagata Sa Nifaē (62047; Taga Ata o le Talalelei 315); ata 3-56, Keriso ma Tamaiti (62467; Taga Ata o le Talalelei 216); ata 3-17, Ua Aoao Atu Iesu i le Itulalolagi i Sisifo (62380; Taga Ata o le Talalelei 316); ata 3-73, Samuelu le Sa Lamanā i Luga o le Pa (62370; Taga Ata o le Talalelei 314); ata 3-74, Falelauasiga o Iesu (62180; Taga Ata o le Talalelei 231); ma le ata 3-75, Fafine i le Tuugamau.

6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Talu ai Ona e Alofa Iesu Keriso Ia i Tatou Ua Ia Fesoasoani Ia i Tatou

Gaoioiga faatosina

Tau atu i tagata o le vasega e alofa Iesu Keriso i tamaiti. Tau atu iai lona fiafia ma lona faafetai o le a iai pe a ia silafiaina o lo o latou o mai i le Peraimeri i lenei taeao o le Eseta.

Faaali atu le ata 3-15, O Iesu Keriso Toetu, i luga o le puipui, laupapa, po o se isi vaega.

Ia faamalamalama atu na e tusi lolomiina uma o latou igoa i luga o ni fasi pepa, ma e te manao latou te auauai mai i luga ma faapipii o latou igoa ia latalata i le ata o Iesu. Ao faapipiiina e le tamaititi lana fasi pepa, ia e faapea atu iai: “E alofa Iesu Keriso ia (tau le igoa o le tamaititi).”

Tala o tusitusiga paia

Faamatala atu le tala lenei mai le Mareko 10:13-16 i ni au lava upu:

Ao soifua Iesu Keriso i lenei lalolagi, na avatu e nisi o tina a latou fanau ia te ia. Na latou faamoemoe o le a ia tuuina atu taitoatasi ia te i latou se faamanuiaga. Na mananao uo a Iesu ina ia faia sana malologa, o lea sa latou fai atu ai i tina e toe ave a latou fanau ma aua le faalavelave ia te ia.

Ina ua faalogo Iesu i tala a ana uo, na ia faapea atu ai, “Tuu mai tamaiti e o mai ia te au, ma aua le vavao ia te i latou.” I nisi upu, na ia faapea atu, “Tuu mai tamaiti e o mai ia te au; aua le tuliesea i latou. Ou te alofa i tamaiti.” Ona ia ave lea o tamaiti i ona aao ma faamanuia ia te i latou.

Talanoaga

Faaali atu i luga le ata 3-56, Keriso ma Tamaiti. Ia faalatalata atu i tamaiti ina ia mafai ona latou vaavaai lelei atu iai ma maua le agaga o le ata. Fai atu ituaiga fesili e fesoasoani ai i tamaiti ia latou lagonaina le silisili ese o le alofa o Iesu Keriso mo i latou.

Talanoaga

• O le a so outou manatu o a ni lagona na oo i tamaiti?

• Afai na e iai iina, o le a se mea e te manao e fai atu ai Iesu ia te oe?

• Afai e mafai ona outou faatasi ma Iesu e pei o nei tamaiti, o le a se mea e te fai atu ai ia te ia?

• O le a se mea tou te lagonaina ai ma outou iloa e alofa Iesu ia te outou e pei ona ia alofa i nei tamaiti?

Na Maliu Iesu Keriso mo i Tatou

Tala o tusitusiga paia ma ata

Faaali atu tusitusiga paia, ma faamalamalama atu o le faitauina o le Tusi Paia ma le Tusi a Mamona e mafai ai ona tatou aoao i mea na faia e Iesu Keriso e fesoasoani ai ia i tatou. Faamatala atu le tala lenei i ni au lava upu:

Na soifua Iesu Keriso i aso lava la ua leva. Na auina mai o ia e le Tama Faalelagi i lenei lalolagi ina ia fesoasoani i tama ma tina ma tama ma teine e fai le mea sao. O le tele o le taimi na soifua ai o ia sa mau ai o ia i le nuu ua taua nei o Isaraelu.

E alofa Iesu i tagata uma lava. O nisi o tagata sa amioleaga ma le mananao ia te ia. Sa latou faasatauroina o ia.

Faaali atu le ata 3-71, O Le Faasatauroga.

Na tigaina Iesu Keriso ma maliu. O tagata na alolofa ia te ia sa matuai faanoanoa lava. Na latou aveina lona tino mai le satauro ma afifi i se ie paepae matagofie. Na latou aveina atu lona tino i se tuugamau. O se tuugamau e pei o se ana e tanumia ai tagata. Na latou tuuina iai o ia ma le faaeteete.

Faaali atu le ata 3-74, Falelauasiga o Iesu.

Ona tapunia lea e uo a Iesu le gutu o le tuugamau i se maa tele lava o lo o i luma o le faitotoa.

Sa lei malamalama uo a Iesu Keriso o le a toe soifua mai o ia. O nisi o fitafita na o atu ma leoleo le tuugamau o lo o tanumia ai lona tino. I le aso lona tolu ina ua mavae lona maliu, ao lei oso mai le la, na o mai ai agelu ma aveese le maa mai le tuugamau. Ua le o iai iina lona tino. Na matuai fefefe lava fitafita ma ua le mafai ona gaoioi mo sina taimi. Ina ua toe mafai, ona latou tamomoe ese lea.

Faaali atu le ata 3-75, Fafine i le Tuugamau.

O le taeao lava lena na o atu ai ni fafine i le tuugamau. Na latou alolofa ia Iesu Keriso ma na latou o atu e tuu ni mea manogi i lona tino e pei ona faia e tagata i na aso. Na latou vaaia le maa ua fulieseina mai le faitotoa. Na latou o atu i totonu o le tuugamau ma vaaia ai se agelu o ofu mai i ni ofu papae, ma sa fefefe i latou. Sa faapea mai le agelu, “Aua tou te fefefe. Ua le o iinei o ia, a ua toetu o ia.”

Faasino atu i le ata o le Keriso toetu.

Tala o tusitusiga paia ma ata

• O le a so outou manatu o le a se lagona na oo i uo a Iesu Keriso ina ua latou iloa ua toetu o ia?

Talanoaga i le laupapa

Ia faamalamalama atu ina ua toetu Iesu Keriso, na ia toe mauaina lona tino ua faatasia ma lona agaga, ae ua suia nei lona tino.

Tuu atu i luga le upu ola pea o lo o tusia i se fasi pepa.

Talanoaga i le laupapa

• O le a le uiga o le ola pea?

Ia faamalamalama atu ina ua avea le tino o le Faaola ma tino ola pea, na suia ina ia le mafai ona toe oti ae ola pea e faavavau.

Tau atu i tamaiti ina ua toetu Iesu, na avea o ia ma tagata ola pea, ma ua faia foi e ia le auala mo i tatou uma ina ia mafai ona tatou toetutu ma ola pea. O lona uiga o lenei afai e maea ona tatou toetutu, tatou te le toe oti lava. E mafai ona tatou ola pea ma o tatou aiga e faavavau.

Faatinoga ma le talanoaga

Faaali atu lou lima e le o iai se totini lima ma faamatala atu i tamaiti ao tatou ola ai ma le Tama Faalelagi ae tatou te lei fananau mai, sa taua i tatou o ni agaga. Sa mafai ona tatou gaoioi (faagaoioi tamailima o le lima e le o iai se totini lima) ma mafaufau ma aoao.

Ina ua o mai o tatou agaga i lenei lalolagi, ua tuuina mai ia te i tatou ni tino faalelalolagi. (Faamaulu le totini lima.) O lo o mafai lava ona tatou gaoioi (faagaoioi ou tamai lima i totonu o le totini lima) ma mafaufau ma aoao, ae ua tuuina mai e le Tama Faalelagi ia te i tatou ni tino matagofie mo i tatou ma tausi faalelei iai.

A oti i tatou, e tatau ona tuueseese le tino mai le agaga (aveese le totini lima). E le mafai e le tino ona gaoioi na o ia (faailoa atu le totini lima) ae o lo o ola pea le agaga.

A tatou toetutu, ua atoatoa le tino ma ua toefaatasia ma le agaga (toe faamaulu le totini lima). A mavae ona tatou toetutu, e le mafai ona tatou toe oti. O lona uiga e le mafai ona toe tuueseeseina le agaga ma le tino.

Ia faamamafa atu, talu ai ona o le alofa tele o Iesu Keriso mo i tatou ua ia maliu ai mo i tatou. O Iesu le tagata muamua lava na toe soifua mai. Talu ai ona o le mea ua ia faia mo i tatou, o le a tatou toetutu ma mafai ona toe mau faatasi ma le Tama Faalelagi. A tatou mafaufau i le Eseta, e tatau ona tatou mafaufau muamua lava i le uluai Eseta ma manatua le alofa o Iesu Keriso mo i tatou. Na ia tuuina mai lona soifua mo i tatou. Na ia toetu. O lea ua nofo nei o ia i le lagi faatasi ma lona Tama Faalelagi.

Ia faamanino atu o le toetu mai o Iesu Keriso o se mea matagofie i tausaga uma ma tatou te faamanatuina e faaali atu ai ia te ia lo tatou faafetai tele mo le mea na ia faia mo i tatou.

Gaoioiga

Togi atu se polo vaivai po o se taga fatupi i tamaiti, ia auauai ina ia mafai e tamaiti uma ona tau mai se mea na te manatuaina i le tala o le Eseta.

Na Asiasi Iesu Keriso i sa Nifaē ina ua Mavae Lona Toetu

Tala o tusitusiga paia ma ata

Faamatala atu i tamaiti ua tatou iloa na toetu mai Iesu Keriso aua o lo o tau mai e tusitusiga paia le toatele o ona soo ma e na mulimuli ia te ia na vaai ia te ia ina ua mavae lona toetu.

Ia faamalamalama atu na vaai tagata amiotonu o Sa Nifaē ma Sa Lamanā o e na nonofo i Amerika ia Iesu Keriso ma o lo o tau mai i le Tusi a Mamona lana asiasiga. Ina ua mavae lona toetu i Ierusalema, ona asiasi atu ai lea o Iesu i nei tagata. Na latou maua le avanoa e vaai, faalogo, ma pai atu ia te ia.

Ia faamalamalama atu na tau atu e perofeta i le tele o tausaga i Sa Nifaē o le a asiasi atu Iesu Keriso ia te i latou i se aso.

Faaali atu le ata 3-73, Samuelu le Sa Lamanā i Luga o le Pa.

Ia faamalamalama atu o se perofeta e igoa ia Samuelu le Sa Lamanā, o le sa ola i nai tausaga ao lei fanau mai Iesu Keriso, na ia tauina atu i tagata le ala latou te iloa ai le faasatauroina ma le toetu mai o Iesu i Ierusalema. Na ia faamatala atu iai a maliu Iesu, o le a iai se pouliuli tele e ufitia ai le laueleele; ma o le a iai mo aso e tolu seiloga e toetu mai o ia.

Tau atu i tamaiti na taunuu uma lava valoaga a le perofeta o Samuelu le Sa Lamanā. Ina ua maliu Iesu Keriso i Ierusalema, na ufitia uma lava le laueleele o Amerika i le pouliuli. Na fasiotia tagata amioleaga, ae o le toatele o tagata amiotonu na latou faapotopoto faatasi ma talatalanoa i le mea ua tupu ma le mea e tatau ona latou faia. Ao latou talatalanoa, sa faafuasei lava ona latou faalogoina se leo e foliga e sau mai le lagi. O se leo malu ma le alofa. Fai atu i tamaiti e faalogo po o le a le mea o lo o fai mai ai le leo. Fesoasoani i tamaiti e faitau le 3 Nifae 11:7, po o lou faitauina e oe.

Tala o tusitusiga paia ma ata

• O ai o lo o tautala? (Tama Faalelagi.)

Ia faamalamalama atu na vaai tagata i le lagi ma vaaia ai se tagata o ofu mai i se ofu talaloa paepae o lo o alu ifo mai le lagi. Na manatu i latou ua latou vaai i se agelu.

Faaali atu le ata 3-72, Ua Faaali Atu Keriso i Tagata Sa Nifaē.

Tala o tusitusiga paia ma ata

• O ai moni lava lea na alu ifo mai le lagi? (Iesu.)

Faitau le 3 Nifae 11:9-10. Ia faamalamalama atu ina ua tau atu e Iesu Keriso i tagata po o ai o ia, ona latou manatua lea o upu a perofeta na fai atu o le a asiasi atu o ia ia te i latou. Na fiafia i latou. Na ia valaaulia tagata e o atu ma pai atu i manua mai fao o lo o i ona aao ma le manua o lo o i lona itu. Na ia faia lenei mea ina ia malamalama ai tagata Sa Nifaē o le Iesu lava lea e tasi na faasatauroina ma ua toe soifua mai.

Faaali atu le ata 3-17, Ua Aoao Atu Iesu i le Itulalolagi i Sisifo.

Tala o tusitusiga paia ma ata

• O le a so outou manatu o a ni lagona o tagata ina ua latou faatasi ma Iesu Keriso?

Ia faamalamalama atu na faatumulia tagata i le fiafia ma le faafetai ma le alofa mo le Faaola ao latou alalaga, “Osana! Ia faamanuina le suafa o le Atua silisiliese!” (3 Nifae 11:17). Na pauu i latou i o latou tulivae ma tapuai atu ia te ia.

Ia faamatala atu na matuai mutimutivale le alofa o Iesu Keriso mo nei tagata o lea na nonofo ai o ia ma i latou ma faamalolo e mamai, faamanuia a latou fanau, ma aoao i latou. O lo o tauina mai e le Tusi a Mamona ia te i tatou e faapea e lei iai lava i le lalolagi ni tagata sili atu ona fiafia e pei o nei tagata.

Pese

Fesoasoani i tamaiti e usu pe faitau upu o le “Ua Toetu Iesu.”

Ua toetu Iesu,

La tatou uo.

Tatou fiafia,

Ua ia toetu mai.

Tatou vivii,

Lenei Eseta.

Ua toetu Iesu,

Le Faaola.

Ua toetu Iesu,

Le Faaola.

Aotelega

Molimau a le faiaoga

Ia tuuina atu lau molimau ma faaali atu lou alofa ma lau faafetai ia Iesu Keriso mo lona alofa ia i tatou ua mafai ai ona tatou toetutu ma maua pea o tatou tino e faavavau.

Ia valaaulia tamaiti e o i o latou aiga ma faamatala atu iai le mea na faia e le Faaola ina ia mafai ai e i tatou ona tatou maua o tatou tino e faavavau.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Ia saunia le pepa e tufaina atu “Lio o le Alofa o Iesu Keriso,” o lo o maua i le faaiuga o le lesona mo tamaiti uma.

   Tufa atu se kopi o le pepa e tufaina atu, se penitala, ma ni penivali i tamaiti uma. Fai atu iai e tusi lolomi o latou igoa i luga o a latou pepa i le tulimanu pito i luga taumatau.

   Faitau faatasi ma tamaiti upu o lo o faataamilo i totonu o le lio. Fai atu iai e tusi se ata o le tagata lava ia i totonu o le lio. Tusi lolomi le “E alofa Iesu Keriso ia te au” i luga o le laupapa, ma fai atu i tamaiti e kopi i luga o a latou pepa i lalo ifo o le lio.

2. Fai atu i tamaiti e tutu i luga ma fai faatasi ma oe le gaoioiga lenei.

   O le nofoaga lenei na falelauasi ai Iesu. (tusi le lima)

   Vaai, ua fuliese le maa! (toe tusi le lima)

   Punou i lalo. (punou)

   Vaai i totonu. (tuu lima e pei e ufiufi ai mata)

   Ua leai o ia iina! (tu i luga)

   Ua toetu Iesu!

   Ia fiafia ia! (patipati lemu lima)

Talu ai ona ua toetu Iesu Keriso,

o le a ou toe maua lou t ino e faavavau.