Lesona 11

Papatisoga

Faamoemoega

Ina ia fesoasoani i tamaiti taitoatasi ia malamalama lelei i le taua o le papatisoga.

Sauniuniga

1. Suesue ma le agaga tatalo le Mataio 3:13-17; 2 Nifae 9:23; ma le Mataupu Faavae ma Feagaiga 20:73-74.

2. Ia saunia e usu pe faitau upu o le pese “Ou te Fiafia i Ou Aso Fanau” (Tusi Pese a Tamaiti, itulau 104).

3. Aumai le siata “Avea ma Tagata o le Ekalesia a Iesu Keriso,” lea na faaaogaina muamua lava i le lesona 7. Ia faatulaga upu tusi o le “Faatuatua ia Iesu Keriso” ma le “Salamo” i luga o le siata. Ia saunia le upu tusi “Papatisoga” ina ia tuu i luga o le siata ao faagasolo le lesona.

4. Se polo taalo (e lē malō) po o se manu meataalo e utuina i ni vavae po o nisi mea faapena.

5. O Mea e Manaomia:

   1. Se Tusi Paia, se Tusi a Mamona, ma se Mataupu Faavae ma Feagaiga.

   2. Ata 3-13, Tamaititi o Lo o Papatisoina (62018); ma le ata 3-1, Ioane le Papatiso o Lo o Papatisoina Iesu (6213; Taga o le Talalelei 208).

6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faaaliga: Ia faafetaui lenei lesona pe a manaomia pe afai e iai nisi o tamaiti ua uma ona papatisoina.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaia i latou e faataunuuina se mea i le vaiaso talu ai.

E Mafai Ona Papatisoina i Tatou i le Valu Tausaga

Siata

Faaali atu le siata o le “Avea ma Tagata o le Ekalesia a Iesu Keriso.” Fai i se tamaititi na te tuuina le upu tusi “Papatisoga” i le laasaga lona tolu. Tau atu i tamaiti o le papatisoga o le laasaga lona tolu lea i le avea ma se tagata o le Ekalesia a Iesu Keriso.

Gaoioiga faatosina

Ia faamalamalama atu ao lei mafai ona papatisoina ia tamaiti, e iai se mea taua e tatau ona tupu. Fai atu iai e faalogo lelei ao e usuina po o le faitauina foi o upu o se pese e uiga i le papatisoga. Faamatala atu iai e tasi le upu ua e tuueseina. O lena foi upu o se fuainumera. Fai atu i tamaiti e faalogo lelei ma vaai pe mafai ona latou tauina mai le upu o lo o misi. E sii i luga o latou lima pe a latou iloaina le upu ua tuueseina.

Ou te fiafia i ou aso fanau, uma;

Ou te maua ai le fiafia.

Ae le mafai ona ou faatali seia ou ,

Ona ou papatiso ai lea.

Gaoioiga faatosina

• O le a le upu o lo o misi? (Valu.)

Ia faamalamalama atu, tatou te tulimatai uma atu i o tatou aso fanau, ae o lo tatou aso fanau lona valu e iai sona uiga taua tele aua o lona uiga ua lava lo tatou matutua tatou te papatiso ai.

Na Usiusitai Iesu Keriso i le Poloaiga Ina ia Papatisoina

Faamatalaga a le faiaoga

Ia faamanatu atu i tamaiti na poloaiina e le Tama Faalelagi tagata uma ina ia papatisoina. Na finagalo Iesu Keriso ina ia usiusitai i poloaiga uma a le Tama Faalelagi.

Mau

Faitau leotele le 2 Nifae 9:23. Ia faamalamalama atu o Lē Paia o Isaraelu o le isi suafa lena o Iesu Keriso.

Ia faamalamalama atu o lenei mau o lo o tauina mai ai le poloaiina o i tatou ina ia papatisoina. O lo o tauina mai foi i le mau e faapea, afai e le papatisoina i tatou, o le a le faasaoina i tatou i le malo o le Atua; i se isi faaupuga, e tatau ona papatisoina i tatou ina ia tatou toe mau faatasi ai ma le Tama Faalelagi ma Iesu.

Ata ma le talanoag

Faaali atu le ata 3-1, Ioane Le Papatiso o Lo o Papatisoina Iesu, ma faamatala atu le tala (tagai i le Mataio 3:13-17). Taumafai e faitau uma atu le mau lenei i tamaiti ina ia mafai ai ona latou malamalama.

Ata ma le talanoag

• O ai na papatisoina Iesu? (Ioane le Papatiso)

Ia faamanino atu na alu atu Iesu ia Ioane le Papatiso ina ia papatisoina o ia aua o Ioane o lo o iai le pule o le perisitua e papatiso ai.

Ina ia papatisoina Iesu, na aveina atu e Ioane le Papatiso o ia i lalo i le vai o Ioritana. Ina ua uma ona ia faia le tatalo o le papatisoga, ona faatofuina uma ai loa lea e Ioane o ia i lalo o le vai. Ona toe faatulai mai lea e Ioane o ia nai le vai.

Ia faamalamalama atu o le papatisoina ia lilofia i le vai ma le toe tulai mai nai le vai ua taua o le papatisoga i le faatofuina. Ia toe faia e tamaiti le upu papatisoga i le faatofuina.

E Mafai Ona Papatisoina i Tatou E Pei Lava O Iesu

Pese

Fai i tamaiti e faalogo lelei ao e usuina pe faitauina upu o le fuaiupu lona lua o le “Ou Te Fiafia i Ou Aso Fanau.” Ona latou usuina mai lea po o le faataitai mai foi ia te oe.

Ina ia papatisoina pei o Iesu

E le ua iai le perisitua moni

Ma usitai i tulafono a le Atua

O se mea ou te manao e faia.

Pese

• O le “a le mea ou te manao e faia,” e tusa ai ma lenei pese? (Ia papatisoina, “e pei o Iesu.”)

• E faapefea ona papatisoina i tatou pe afai e papatisoina i tatou e pei o Iesu? (e ala lea i le faatofuina e se tasi o iai le pule a le perisitua.)

Ata ma le talanoaga

Tuu le ata 3-13, Tamaititi o Lo o Papatisoina, e sosoo atu i le ata o Ioane le Papatiso o lo o papatisoina Iesu.

Ia faamalamalama atu ina ua papatisoina Iesu Keriso, na matuai lilofia uma o ia i le vai. I aso nei, ua faataunuuina papatisoga i totonu o falelotu i se faatanoa vai faapitoa ua taua o le vai papatisoga. Afai e leai se vai papatisoga e latalata ane, o vaitafe po o nisi vai e faaaogaina.

Ata ma le talanoaga

• O le a le pule sa ia Ioane le Papatiso na te papatiso atu ai? (O le Perisitua Arona.)

• O le a le pule e tatau ona iai i le tagata o lē na te papatisoina i tatou na te papatiso atu ai? (E tatau ona o se ositaulaga i le Perisitua Arona po o lona umiaina foi o le Perisitua Mekisateko.)

• Tou te iloaina se tasi o iai le perisitua ma e mafai ona papatiso atu?

Faamatalaga a le faiaoga

Ia faamanatu atu i tamaiti, ao faaliliuina e Iosefa Samita ma Oliva Kaotui le Tusi a Mamona, na oo mai ai Ioane le Papatiso ma aoaoina i laua i le ala sao e papatiso ai. Na ia tuuina atu ia i laua le perisitua ina ia mafai ona la maua le pule e papatiso atu ai. Na tuuina atu le perisitua i isi tagata ina ia mafai ai ona tatou maua le avanoa o le papatisoina e se tasi o lo o iai le pule sao.

Mataupu faavae o le faatuatua

Ia faamalamalama atu i tamaiti o le tagata na te papatisoina i latou uma taitoatasi o le a iai foi le perisitua e tasi lea sa ia Ioane le Papatiso. O le mataupu faavae e lima o le faatuatua o lo o tauina mai ai ia i tatou pe faapefea ona mauaina e se tagata lea pule.

Faitau leotele po o le faataitai mai uma foi o tamaiti le vaega lenei:

“Matou te talitonu e ao ina valaauina le tagata e le Atua … e i latou o iai le pule.”

O le Sauniga o le Papatisoga

Ata ma le faamalamalamaga

I le ata 3-13, Tamaititi o Lo o Papatisoina, tusi lou lima i le vaega o lo o iai lima. Ia faamalamalama atu i tamaiti taiala nei: pe a papatisoina ia oe, e te lua o atu ma le tagata o le a papatisoina oe i lalo i le vai papatisoga. E uuina e le tagata o le a papatisoina oe lou lima taumatau i lona lima agavale. E mafai ona e uuina lou isu i lou lima taumatau ma lou lima agavale e uu ai le lima agavale o le tagata o le a papatisoina oe. Ona sii lea i luga le lima taumatau o le tagata o le a papatisoina oe ma faia upu o le tatalo o le papatisoga.

Mau

Tau atu i tamaiti o le tatalo o le papatisoga o lo o maua i totonu o tusitusiga paia. Fai atu iai e faalogo lelei ao e faitauina atu ia i latou upu o le tatalo.

Faitau le Mataupu Faavae ma Feagaiga 20:73, e amata i upu “Ona ua tofia.”

Ia faamalamalama atu o le uiga o le tofia “o le iai lea o le pule e sui ai.” Fesoasoani i tamaiti ina ia malamalama o le papatisoga moni lava ia e faatinoina e na o le tagata lava ua uma ona tuuina atu iai le pule e avea ai ma sui o Iesu Keriso i le faataunuuina o le papatisoga. O a latou papatisoga o le a tutusa lelei le taua e pei lava o Iesu pe ana faapea o ia na te papatisoina.

Faamatala atu, pe a maea ona faia le tatalo, o le tagata o lo o faia le papatisoga na te tuu lona lima taumatau i le tua o le tagata o lo o papatisoina ma tuutuu malie ifo lava i lalo i le vai seia oo ina lilofia uma o ia i le vai. Ona ia faatuina lea o le tagata mai le vai.

Fesoasoani i tamaiti ina ia malamalama o le a latou iai i lalo o le vai mo sina taimi puupuu ma o le a taofimauina i latou e le tagata o le a papatisoina i latou. O le a latou uuina lona lima ma o le a mafai ona latou uuina o latou isu ina ia aua nei o latou manava pe foloina le vai.

Se mea na tupu ia te oe lava ia

Afai e te manao iai, e mafai ona e faamatalaina atu lou lava papatisoga. Po o se tasi foi tamaititi o lau vasega ua uma ona papatisoina, ia valaaulia i latou e faamatala mai o latou papatisoga.

Ia tuu atu i tamaiti e fesili mai ni fesili ma fetufaai mai ni o latou lagona e uiga i le papatisoga. Fesoasoani ina ia latou malamalama o le papatisoga e mafai ona avea o se mea pito i sili ona matagofie ua latou iloa.

Tatou te Fiafia Pe A Papatisoina i Tatou

Fai atu i tamaiti o lo o iai ni au fesili e te manao e fesiliina atu ia i latou ina ia iloiloina ai mea na latou aoaoina e uiga i le laasaga taua o le papatisoga. Togi atu se polo po o se manu meataalo i se tamaititi ma fesili atu iai se fesili se tasi o fesili nei. Ia mautinoa ia oo ane uma tamaiti i le sapoina o le meataalo ma taliina se fesili.

• E fia o tatou tausaga ona mafai lea papatisoina i tatou? (Valu.)

• Aisea e tatau ai ona tatou papatiso? (O se poloaiga.)

• O fea o le a papatisoina ai i tatou? (I totonu o se vai papatisoga po o se isi faatanoa vai.)

• O le a le mea e tatau ona iai i le tagata ai e mafai ona ia papatiso atu ai? (O le perisitua.)

• E faapefea ona papatisoina i tatou? (E ala i le faatofuina.)

• Aisea e te manatu ai o le a e maua le lagona fiafia pe a e papatiso?

Tuu atu i tamaiti e tali mai ma fetufaai mai o latou lagona. Atonu e te manao e faamamafa atu o le a latou fiafia i le avea ai ma tagata o le Ekalesia a Iesu Keriso, o le a latou fiafia i lo latou iloaina o lo o latou mulimuli i lana faataitaiga, ma o le a latou fiafia e usitai i lana poloaiga.

Tala

Faamatala atu le tala lenei i se teineititi na manao e papatiso:

“Ina ua fuafua le tina o Alisa ma ona uso e avea ma tagata o le Ekalesia a Iesu Keriso o le Au Paia o Aso e Gata Ai, sa na o le ono tausaga o Alisa i le taimi lea ma e laititi tele o ia e lē mafai ona papatiso ma le toatele o lona aiga…. Talu ai ona e masani ona latou talanoa i le matagofie o le papatisoina ma le olioli i le avea ma tagata o le Ekalesia, o lea na le mafai ai e Alisa ona faatali le taimi e valu ai ona tausaga e mafai ai foi ona papatisoina o ia.

“Na fuafua e Alisa ma moemiti Alisa pe o le a faapefea ona papatisoina o ia i lona aso fanau. ‘E le o se isi taimi mulimuli,’ sa ia manatunatu pea iai, ‘ae o le aso lava lena.’

“Ae peitai, i le toe tolu aso atoa lona valu tausaga, na ala ae ai o ia ma se tiga uiga ese i lona ulu, ma o le aso na sosoo ai na le mafai ai ona alu atu o ia i le aoga.

“O le fomai na vaaia o ia na faapea mai o le a nofo o ia i le fale ma taoto i lona moega ia le itiiti ifo i le tasi le vaiaso. Na faatumulia mata o Alisa i loimata o le faanoanoa.

“O le aso na sosoo ai na matuai faateteleina ai le tigaina o Alisa, ma ua maualuga foi lona fiva e ui lava i le vai na tusiina atu e le fomai. Sa le mautonu lona tina ma ua popole, ae sa faateteleina le tigaina o Alisa talu ai o lona le papatisoina tonu lava i lona aso fanau ua sili atu nai lo lona tiga ma lona fiva.

“O le aoauli o le aso na sosoo ai ma lona aso fanau, sa savali atu ai lona tina i lona potu. Ae sa faafuasei ona tu o ia i le faitotoa ina ua ia vaaia ia Alisa o lo o tootuli ma faia lana tatalo i tafatafa o lona moega. O lo o ole atu lenei teineititi i le Tama Faalelagi ina ia faataunuuina lona faamoemoega autu o le avea lea ma tagata o le Ekalesia a Iesu Keriso o le Au Paia o Aso e Gata Ai.

“I le taeao o lona aso fanau, sa nofo ae ai i luga ia Alisa, fai ona lavalava, ma sauni loa mo lona papatisoga. Ua leai sona fiva ma ua ia lagona lona malosi ma lona fiafia. I ni nai itula mulimuli ane, na siaki ai e lona tina lona fiva ma iloa ai o lo o lelei lava.

“Na talia mai e le Tama Faalelagi le olega faamaoni a Alisa. O le afiafi lava o le aso lena na papatisoina ai o ia!” (“A Birthday Baptism, “ Friend, Oct. 1974, p. 33).

Tala

• O le a se lagona e oo ia te oe pe ana faapea o oe o Alisa?

Fesoasoani i tamaiti ina ia latou malamalama atonu o le a le papatisoina tonu i latou i o latou aso fanau ae o se isi aso pe a mavae lo latou valu tausaga; e masani lava ona tasi le aso o papatisoga i le masina mo tamaiti uma i le uarota po o le siteki. Tau atu ia i latou o le a faatalanoaina i latou e le epikopo po o le peresitene o le paranesi ao lei papatisoina i latou. Tau atu ia i latou taimi e masani ai ona faia papatsioga i la outou eria. Tau atu iai lou faamoemoega o le a latou maua uma le lagona fiafia na mauaina e Alisa pe a papatisoina i latou.

Aotelega

Faamanatu atu i tamaiti o lo latou aso fanau lona valu e mafai ona matuai faapitoa lava aua o le a lava ai le matutua e papatisoina ai.

Usu pe faitau upu o le pese “Ou Te Fiafia i Ou Aso Fanau.”

Faasino atu i sitepu o lo o i luga o le siata, ma faitau atu ia i latou. Faamalamalama atu a mavae ona papatisoina tamaiti, o le a latou saunia loa e tauaveina le laasaga mulimuli o le avea ma tagata o le Ekalesia.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Kopi se ata o le keke mo le aso fanau mo tamaiti uma. Tuu atu i tamaiti latou te tusia ni moli gao se valu ona valivali lea. Faaigoa le ata, “Ou te le mafai ona ou faatali seia ou valu.”

   Afai e le masani lau vasega ma tu masani o keke o aso fanau, ia faamatala atu iai i le tele o atunuu, pe a faia se aso fanau o se tamaititi, e faia se keke o le aso fanau mo i latou. E tuuina se moligao i luga o le keke mo tausaga uma talu ona latou fananau mai. A atoa le valu tausaga, ona tuu lea o moli gao e valu i luga o le keke.

2. Talanoaina auala e manaomia ona faia e tamaiti e saunia ai mo le papatisoga. Ao faamatalaina manatu taitasi, ia faataatia se tulaga vae ua uma ona ʻoti i luga o le fola. Ia faatulagaina tulaga vae ia tau atu i le ata 3-13, Tamaititi o Lo o Papatisoina.

   • Auai i le Peraimeri ma sauniga faamanatuga i vaiaso taitasi.

   • Aoao e uiga i tusitusiga paia.

   • Ia faamaoni.

   • Tatalo i aso uma.

   • Totogi sefuluai.

   • Ia agalelei atu i aiga ma uo.

   • Mulimuli i faataitaiga a Iesu Keriso.

   • Ia valu tausaga.

   • Ia faatalanoaina e le epikopo po o le peresitene o le paranesi.

3. Ia valaaulia se alii o lo o umiaina le Perisitua Mekisateko e sau i le vasega ma tau atu i tamaiti mea o le a faia i o latou papatisoga. Ia faataitaiina e ia ma i latou le faatulagaga sao o latou lima ma taga o le papatisoga.

4. Faaali atu i tamaiti le ata vitio “Baptism-A Promise to Follow Jesus” (9 min.) o lo o i le kaseti vitio o le Primary Video Collection (53179).

cake

cake