Tusi Lesona ma le Taimi o Fetufaaiga a le Peraimeri

Lesona 33: E Faamanatu Mai e le Faamanatuga Ia Te i Tatou a Tatou Feagaiga o le Papatisoga

Lesona 33

E Faamanatu Mai e le Faamanatuga Ia Te i Tatou a Tatou Feagaiga o le Papatisoga

Faamoemoega

Ina ia fesoasoani i tamaiti ia latou iloaina o le taumamafa i le faamanatuga e mafai ona fesoasoani ia te i latou ia latou manatua ai a latou feagaiga o le papatisoga.

Sauniuniga

Faitau le Moronae 4:3 ma le 5:2.
Ia saunia e fesoasoani i tamaiti e fai pe aoao le mataupu faavae e tolu o le faatuatua.
O Mea e Manaomia:
1. Se Tusi a Mamona.
2. Talita ma le mama a le FMT.
3. Ata 3-13, Tamaititi o Lo o Papatisoina (62018); ata 3-59, Tufaina o le Faamanatuga (62021); ata 3-9, Iesu le Keriso (62572; Taga Ata o le Talalelei 240).
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Faamanatu Mai E Le Faamanatuga Ia Te i Tatou a Tatou Feagaiga o le Papatisoga

Gaoioiga faatosina

Fai atu i tamaiti e faalogo lelei. Afai e te tauina atu se mea e tatau ona latou faia po o le mafaufau iai i le taimi o le faamanatuga ona latou tutū sao lea i luga. Afai e te tauina atu se mea e le tatau ona latou faia pe le tatau foi ona mafaufau iai i le taimi o le faamanatuga, e tatau ona latou punonou.

Faitau auauai atu faamatalaga nei, ma tuu atu i tamaiti se taimi e tali mai ai.

Gaoioiga faatosina

Ia manatua e alolofa le Tama Faalelagi ma Iesu Keriso ia te i tatou. (Tutū i luga)
Mafaufau i le alu i se tafaoga. (Punou)
Ia manatua na toe faamalosi e Iesu tagata mamai. (Tu i luga)
Musumusu ma talanoa i lou tuaoi. (Punou)
Minoi ma tatemeteme solo i lou nofoa. (Punou)
Fai se tatalo i le Tama Faalelagi. (Tu i luga)
Tusi ni ata ma taalo i se meataalo. (Punou)
Manatua tala e uiga ia Iesu Keriso. (Tu i luga)

Gaoioiga o ata

Faaali atu le ata 3-13, Tamaititi o Lo o Papatisoina, ma le ata 3-59, Tufaina o le Faamanatuga. Fai atu i tamaiti e mafaufau i le taimi mulimuli na latou fetagofi atu ai i le faamanatuga. Fai atu iai e taumafai e mafaufau po o a mea na latou manatunatu iai i le taimi na tufaina atu ai le faamanatuga. Tau atu iai e tali mai fesili nei e i latou lava, aua le leotetele:

Gaoioiga o ata

Pe na outou faaaloalo ea i le taimi o le faamanatuga?
Pe na outou mafaufau ea i le Faaola i le taimi o le faamanatuga?
Pe na outou faalogo ea i upu o tatalo o le faamanatuga?

Mau ma le talanoaga

Faitau leotele le Moronae 4:3 ma fai atu i tamaiti e faalogo lelei mo folafolaga e lua latou te faia i le Tama Faalelagi pe a latou aai i le faamanatuga. Ia faamamafa atu upu, pe a talafeagai ai, ina ia fesoasoani ia mafai ona latou iloagofie nei folafolaga e lua.

Ua tatou folafola o le a -

Mau ma le talanoaga

Manatua pea Iesu Keriso. (Fai atu i se tamaititi e faaali atu le ata 3-9, O Iesu le Keriso.)
Usitai i poloaiga. (Fai atu i se tamaititi e faaali atu le talita ma le mama a le FMT. Toe iloilo ma tamaiti le uiga o le FMT.)

Ia uunaiina tamaiti e faalogo lelei i tatalo o le faamanatuga i vaiaso taitasi e faalogo iai i folafolaga e lua latou te faia:

Mau ma le talanoaga

Manatua pea Iesu Keriso.
Usiusitai i ana poloaiga.

Ia faamalamalama atu o folafolaga lava nei e lua tatou te faia pe a papatisoina i tatou. Fai atu i tamaiti e toe fai mai folafolaga nei e lua. Ia faamamafa atu e faamoemoeina i tatou e le Tama Faalelagi tatou te tausia a tatou folafolaga ia te ia, ma ua tatou iloa e tausia pea e le Tama Faalelagi ana folafolaga ia te i tatou.

Ia faamalamalama atu e le o se mea faigofie le manatuaina o a tatou folafolaga. O le aai i le faamanatuga i Aso Sa taitasi ma le faalogologo i tatalo o le faamanatuga e fesoasoani lea ia te i tatou ia manatua le tausiaina o a tatou folafolaga i le Tama Faalelagi.

Mataupu faavae o le faatuatua

Fesoasoani i tamaiti e tauloto le mataupu faavae e tolu o le faatuatua. Ia faamamafa atu e mafai ona tatou toe foi atu ma mau faatasi ma le Tama Faalelagi ma Iesu Keriso pe afai tatou te usiusitai i a laua poloaiga.

Tala

Faamatala atu i ni au lava upu le tala lenei ia Ionatana, o se tamaititi na ia lagonaina le taua tele o le faamanatuga:

E nonofo Ionatana ma ona matua i se faatoaga tele lava. E iai sana ia lava tamai solofanua, ma e masani ona ia fesoasoani i lona tama i le tausiaina o le pa solofanua. I se tasi aso, na paū ese mai ai Ionatana mai lana tamai solofanua ma manua ai lona tua. Ina ua maea ona faia ona suesuega, ona faamatala atu ai lea e le fomai i matua o Ionatana o le a manuia o ia ae o le a tele ni vaiaso e taoto ai o ia i le moega.

E faatoa lua masina talu ona papatisoina Ionatana i le Ekalesia ae tupu loa le faalavelave lea. Na ia faia se feagaiga, po o se folafolaga ma le Tama Faalelagi o le a ia usitai i poloaiga. O le aai i le faamanatuga na fesoasoani tele ia Ionatana e faamanatu atu ai ia te ia lana feagaiga. Na ia faalogo lelei atu i tatalo o le faamanatuga ma nofo faaaloalo ao tufaina le faamanatuga. O taimi uma lava e faalogo ai Ionatana i upu o lo o tau mai ai lana feagaiga -ia manatua pea Iesu ma tausi ana poloaiga. Na iloa e Ionatana afai na te faa-”amene” ma tago atu i le faamanatuga, o lona uiga o le a ia taumafai i le mea a gata mai ai lona mafai e tausia lana feagaiga ma le Tama Faalelagi.

O lea ua taoto nei Ionatana i lona moega, ua le mafai ona toe alu atu i le lotu ma ua le mafai foi ona toe ai i le faamanatuga. Na misia e Ionatana na taimi filemu, ma faaaloalo ao faamanuiaina le faamanatuga ma tufatufaina. Na ia iloa le taua tele o le faamanatu atu pea ia te ia o ana feagaiga na ia faia. Na manao o ia ina ia faatasi le Agaga o le Tama Faalelagi ma ia. Na fuafua Ionatana e fesili atu i le epikopo pe mafai ona avatu le faamanatuga i lona fale i le Aso Sa.

Na fiafia le epikopo ina ua ia iloa e le o manao Ionatana e misi le faamanatuga ma o lo o manao o ia ia faamanatu atu pea ia te ia feagaiga na ia faia ma le Tama Faalelagi ma Iesu Keriso. Na ia fuafuaina ni perisitua se toalua e asiasi atu ia Ionatana i le faatoaga i Aso Sa ma saunia le faamanatuga mo ia.

Tala

Aisea na misia ai e Ionatana le alu i le lotu i Aso Sa? (Na manao o ia e ai i le faamanatuga.)
Aisea na manao ai o ia e ai i le faamanatuga? (Na manao o ia e faamanatu atu ia te ia ana folafolaga o lona papatisoga ma le folafolaga e mafai ona faatasi le Agaga o le Tama Faalelagi ma ia.)

E Fesoasoani Lo Tatou Manatuaina o Feagaiga o le Papatisoga ia Tatou Usitai Ai i Aoaoga a Iesu

Tulaga ma le talanoaga

Ia faamalamalama atu afai tatou te mafaufau i aso uma ia Iesu Keriso, e foliga mai o lo o tatou manatuaina ana aoaoga ma folafolaga po o feagaiga ua tatou faia e usitai ia te ia. Ia valaaulia tamaiti latou te faatinoina tulaga nei, ma fai atu iai e fuafua pe faapefea ona mafai ona latou foiaina tulaga taitasi:

Tulaga ma le talanoaga

O Ana ma Kelena o se auuso. Ua sau le uo a Ana la te taaalo. E manao Kelena latou te taaalo faatasi, ae le manao iai Ana ia te ia. O le a le mea e tatau ona faia e Ana?
- E mafai faapefea e le manatuaina e Ana o Iesu Keriso ona fesoasoani ia te ia e usitai i se poloaiga?
- O le a le poloaiga e tatau ona usitai i ai?
Na ofu e Taleni le ofutino o lona uso e aunoa ma se faatagaga ma ua pisipisia. O le a le mea e tatau ona faia e Taleni?
- E mafai faapefea e le manatuaina o Iesu Keriso ona fesoasoani ia Taleni e usitai i se poloaiga?
- O le a le poloaiga e ao ona usitai i ai?
Na mauaina e Ieni se taavale meataalo i fafo o lona fale. Na manao o ia na te teuina, ae na ia mautinoa o le meataalo a lana uo o Tii, e nofo e le mamao mai lo latou fale. O le a le mea e tatau ona faia e Ieni?
- E mafai faapefea e le manatuaina o Iesu Keriso ona fesoasoani ia Ieni e usitai i se poloaiga?
- O le a le poloaiga e ao ona usitaia?
Ua savali atu Iakopo i fafo e taalo. O lo o taumafai lona tina e faamama le fale. Ao alu atu Iakopo i fafo e taalo, na ia iloaina ai e foliga mai ua matuai vaivai lava lona tina. O le a le mea e tatau ona faia e Iakopo?
- E mafai faapefea e le manatuaina o Iesu Keriso ona fesoasoani ia Iakopo e usitai i se poloaiga?
- O le a le poloaiga na te usitaia?

Faafetai atu i tamaiti mo o latou manatu lelei.

Aotelega

Ia faamanatau atu i tamaiti, a papatisoina i tatou ua tatou folafola atu o le a tatou manatuaina pea Iesu Keriso (sii i luga le tamailima e tasi). Ua tatou folafola atu foi e usitai i ana poloaiga (sii iluga tamailima e lua). Fai atu iai pe a latou vaai i o latou lima ma vaavaai i a latou mama a le FMT, o le vaai atu i tamailima e lua o lo o sosoo ma le tamailima o lo o iai le mama e mafai ona fesoasoani ia te i latou e manatua folafolaga e lua o le a latou faia pe a papatisoina i latou.

Toe iloilo faatasi ma tamaiti ia tala mai tusitusiga paia i le faamanuiaina ma le tufaina atu e Iesu Keriso o le faamanatuga mai le lesona 32.

Molimau a le faiaoga

Ia tuuina atu lau molimau i tamaiti e alofa Iesu Keriso ia te i tatou ma e finagalo o ia ina ia tatou manatua pea o ia. Ia uunaiina i latou e saunia mo feagaiga o le a latou faia pe a papatisoina i latou e ala lea i le faaaloalo i le taimi o le faamanatuga, mafaufau i le tatalo o le faamanatuga, ma le manatuaina o Iesu. Faamanatu atu ia te i latou pe a maea ona papatisoina i latou, o le a latou faaali atu i le Tama Faalelagi latou te mananao e tausia a latou folafolaga ia te ia i taimi uma latou te aai ai i le faamanatuga.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Tau atu i tamaiti e tatau ona latou o atu i sauniga faamanatuga ma nonofo filemu i le taimi o le faamanatuga ma mafaufau i le tele o le alofa o le Tama Faalelagi ma Iesu Keriso ia te i latou.

Aoao atu i tamaiti le solo lenei:

O le a piilima ou lima, ma punou lou ulu,

Ma filemu, matuai filemu;

Ao faamanuiaina le faamanatuga,

O le a ou manatua ai le Atua.

Fai atu le solo i tamaiti. Ona faataitai mai lea ia te oe, ia piilima ou lima ma punou lou ulu e pei ona tau mai ai.
- O a mea e tatau ona piilima? (O o tatou lima.)
- O le a le mea e tatau ona punou? (O o tatou ulu.)
- Pe tatau ea ona tatou fifilemu pe pisa i le taimi o le faamanatuga?
- O ai e tatau ona tatou mafaufau iai i le taimi o le faamanatuga? (Iesu.)
Toe fai atu le solo, ma tuu atu i tamaiti latou te faatutumuina upu ma taga seiloga latou te iloa lelei. Ona toe fai faatasi uma lea ma tamaiti.
Fesili atu i tamaiti po o le a se mea latou te iloa e uiga ia Iesu Keriso. O nisi nei o mea e mafai ona latou mafaufau iai i le taimi o le faamanatuga. Faaali atu le ata 3-46, Iesu o Lo o Tatalo i Ketesemane, ma faamatala atu i tamaiti le mea na tupu i le togalaau (tagai i le Mataio 26:36-46). Ia talia le Agaga e taitaiina oe i lou aoaoina atu i tamaiti o lenei tala taua.
Tufa atu seleulu, kulū faapipii, ma kopi o le pepa lenei e tufatufaina atu i tamaiti. Faitau faatasi ma vasega le pito i luga o le itulau faatasi ma le vasega. Faatonu tamaiti e ‘oti i luga o laina motumotu ma tuu upu i le faatulagaga sao. A maea ona faia e tamaiti lenei vaega, e tatau ona faitauina upu faapenei “ia manatua pea Iesu Keriso” ma “usitai i poloaiga.” Tuu atu ia i latou e faapipii ia upu i tulaga tonu e faaatoa ai le fuaiupu.

Manatua Iesu Keriso

Pe a ou tago atu i le faamanatuga, ua ou faafouina au feagaiga ma le Tama Faalelagi. Ua ou folafola atu e ma ia .

poloaiga

Iesu

usitai

manatua

pea

Keriso