Lesona 1

Filifili Mea Tonu

Faamoemoega

Ina ia fesoasoani i tamaiti ia latou aoao o le filifilia o le mea tonu e mafai ona fesoasoani ia i latou e mulimuli atu ai ia Iesu Keriso.

Sauniuniga

1. Ia saunia ia tofu uma tamaiti ma se pine e le o iai se igoa o tusia ai ma se tasi ma oe. Ia tusi lolomi lou igoa i luga o se pine, ae aua le tusia se mea i luga o isi pine.

2. Ia saunia e usu pe faitau le “Filifili le Ala Sa‘o” (Liahona Iuni 1995); o lo o maua upu i tua o le tusi lesona.

3. O Mea e Manaomia:

   1. O se Tusi Paia.

   2. Ia tofu tamaiti ma se penivali po o se penitala.

   3. Ia tofu tamaiti ma se mea faapipii po o se pine.

   4. Se talita a le FMT mo tamaiti taitoatasi e valivali; o lo o maua le talita i luma o le tusi lesona lenei.

   5. Se mama a le FMT mo tamaiti taitoatasi o ē le‘i maua ni a latou mama i le tausaga ua tuanai.

   6. Ata 3-1, Ioane le Papatiso o Lo o Papatisoina Iesu (62133; Taga Ata o le Talalelei 208).

4. Ia faia ni sauniuniga e talafeagai ai mo soo se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Faamamaluina o Lo‘u Igoa

Gaoioiga faatosina

Faailoa atu oe i le vasega. Ta‘u atu lou igoa, ma faaali atu lau pine o iai lou igoa.

Tuu atu i tamaiti taitoatasi se pine o le igoa ma se penitala po o se penivali, ma ia latou tusia o latou igoa i luga o a latou pine. Fesoasoani ia i latou o ē le mafai ona tusia o latou igoa. Faapipii a latou pine i o latou ofu i se mea faapipii poo se pine.

Gaoioiga faatosina

• Aisea e taua ai igoa? (Fesoasoani i tamaiti ina ia malamalama o le igoa e faailoa atu ai se tagata i isi.)

Faalau leotele atu igoa o nisi tagata e iloa e tamaiti ma faaaloalo iai, e pei o igoa o o latou matua, o le epikopo, se faifeautalai, ma le Peresitene o le Ekalesia. Fai atu ia i latou po o le a se mea e mafaufau iai pe a latou faalogo i ni igoa faapena ae o le a foi so latou faalogona e uiga i tagata e iai o latou igoa na. Fesoasoani i tamaiti ina ia malamalama o se igoa e faailoa atu ai se tagata i isi; a iloa e se tamaititi se igoa o se tasi, e mafai ona ia faalogo i le igoa ma mafaufau pe faapeī foliga o lea tagata ma ona uiga.

Ia tuu atu i tamaiti taitoatasi e ta‘u leotele atu lona igoa i le vasega.

Gaoioiga faatosina

• O le a se mea e te manao i tagata e mafaufau iai pe a latou faalogo i lou igoa?

• E mafai faapefea ona e faia lou igoa ina ia ta‘uleleia?

Ia tuuina mai e tamaiti ni auala e mafai ai ona latou faamamaluina po o le lelei ai o o latou faalogona i o latou igoa, e pei o le faataunuuina o a latou vaega o galuega e faia, faaalia o le alofa, o le faaaloalo, o le faamaoni, o le usiusitai i matua, o le usiusitai i poloaiga, o le usiusitaia i tulafono. Ta‘u atu i tamaiti, e lelei o tatou faalogona ia i tatou lava pe a tatou filifili le sa‘o, ma o le a mafaufau foi tagata i mea lelei pe a latou faalogo i o tatou igoa.

O Le Filifilia o le Sa‘o e Fesoasoani ia te Au ia Lelei La‘u Faalogona i Lo‘u Igoa

Gaoioiga

Faaali atu le talita a le FMT mai le itu i luma o le tusi lesona.

Gaoioiga

• O le a le uiga o le FMT? (Fai Mea Tonu.)

Ia faamalamalama atu o le filifilia o le sa‘o o le a lelei ai faalogona o tamaiti i o latou igoa. Ia fai soo e tamaiti faatasi ma oe ia upu filifili le sa‘o.

Tala

Faamatala atu le tala lenei e uiga i se tamaititi na iai sana filifiliga taua na faia:

Sa taaalo Randy ma lana uo o David i le lotoa a lo latou tuaoi. E le‘i iai le aiga i lo latou fale, ma sa matuai fiafia lava le aualii lenei e taaalo i nisi o meataalo a tamaiti o le aiga. A‘o la tautulei i le suigi, sa motu ma pa‘u i lalo i le palapala. Sa leiloa e Randy ma David po o le a le mea o le a fai, o lea na la tamomoe ese ai loa. Na la talotalo e leai se isi na iloa maia i la‘ua iina.

Na faanoanoa Randy ona ua momotu e la‘ua ma David le suigi. Na ia mafaufau pea lava iai i le taimi atoa na totoe o le aso ae na ia le iloa se mea o le a fai. O le taeao na sosoo ai ina ua ia ala a‘e i luga, na manatua ai e Randy le uiga o le FMT. Sa tautala Randy i upu na ia aoaoina i le Peraimeri, “Filifili le Sa‘o”; ona mafaufau lea o Randy i le suigi a lo latou tuaoi.

Na faavave ona fai ona lavalava ma alu atu loa i le fale o le latou tuaoi. Na tutu i fafo o le faitotoa mo sina taimi aua ua fai si ona fefe e tuitui le faitotoa. Na iu lava ina ia tuitui.

Ina ua sau le tina i le faitotoa, na ia faamatala atu loa iai le mea ua tupu. A‘o ia faamatalaina atu le tala o le suigi ua motu, sa faalogologo lelei lava iai le tina. Ina ua maea, sa tuu atu le lima o lenei tina i luga o le tauau o Randy ma fesili atu mo lona igoa. Sa ia ta‘u atu o lona igoa o Randy. Sa vaai atu o ia i ona mata ma faapea atu, “Randy, soo se mea lava ou te vaai ai ia te oe pe ou te faalogo ai foi i lou igoa, o le a ou mafaufau pea i se tasi e faamaoni.”

Tala

• O le a le mea na filifili Randy e faia?

• O le a le mea na fesoasoani ia Randy e faia lena faaiuga?

Faaali atu le talita a le FMT i tamaiti.

Tala

• Na faapefea ona fesoasoani le filifili le sa‘o ia Randy ia tauleleia lona igoa?

Pese

Usu faatasi ma tamaiti pe faitau leotele upu o le “Filifili le Ala Sa‘o.”

E Finagalo Iesu Keriso Ia Ou Filifili Le Sa‘o

Talanoaga

Ia faamalamalama atu i tamaiti o lo o e mafaufau i se isi igoa. O le igoa o se tasi e manao ia latou filifili le sa‘o. Ia mateina mai e tamaiti po o ai lea e te mafaufau iai a‘o e tuuina atu ni faamatalaga tau ataata e pei o-

Talanoaga

1. E alofa o Ia ia te i tatou.

2. Na Ia aoao mai ia i tatou pe faapefea ona filifili le sa‘o.

Ta‘u atu i tamaiti o le tagata o lo o e mafaufau iai o Iesu Keriso. Na ia aoao mai i tatou ina ia tatou filifili pea le sa‘o. Na ia aoao mai foi i tatou ina ia tatou papatiso i le ala lava e tasi na papatisoina ai foi o ia.

Talanoaga

• O le a se mea e te manatua e uiga i le ala na papatisoina ai Iesu?

Talanoaga o ata

Faaali atu le ata 3-1, Ioane le Papatiso o Lo o Papatisoina Iesu. Faitau leotele le vaega muamua o le Mataio 3: 16, e faamuta pe a uma ia upu nai le vai. Ia faamalamalama atu, na papatisoina Iesu e ala lea i le faatofu, o lona uiga na tanumia o ia i lalo o le vai.

Talanoaga o ata

• E faapefea ona papatisoina oe e pei ona finagalo ai le Tama Faalelagi ma Iesu? (E ala i le faatofu, e pei lava ona faia ia Iesu.)

Fesili atu i tamaiti pe ua fia o latou tausaga. Ia faamanino atu, a valu loa tausaga o le tamaititi, ua tatau loa ona papatisoina. O le a faitalia foi i latou ma a latou filifiliga. O le a latou filifilia le sa‘o e ala i le papatisoina ma le usitaia o poloaiga.

Talanoaga o ata

• Aisea e taua ai le papatisoina?

• E faapefea ona faailoa mai i lou papatisoina ua e filifilia le ala sa‘o?

Ia faamalamalama atu, ina ua latou filifili ina ia papatisoina, ua latou filifili e avea ma tagata o le Ekalesia a Iesu Keriso ma ave i o latou luga lona suafa. Ua latou folafola atu o le a avea o latou igoa ma sui ia te ia. Na latou folafola atu foi o le a latou taumafai ia faapei o ia ma faia mea sa ia faia. Fesoasoani i tamaiti ina ia malamalama o le filifilia o le sa‘o, o le a lelei ai foi le latou faalogona i o latou igoa ma o le a latou faamamaluina ai foi le suafa o Iesu Keriso ma le igoa o lana ekalesia.

Molimau a le faiaoga

Ia tuuina atu lau molimau i tamaiti i le taua o le filifilia pea o le sa‘o.

Pese ma le mama

Fesoasoani i tamaiti e usu le pese o le vasega, “Filifili le Ala Sa‘o.” Ona tuuina atu lea o mama a le FMT i tamaiti uma o ē e le‘i mauaina ni a latou mama i le tausaga ua tuanai.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Ia valaaulia tamaiti taitoatasi e faamatala atu se taimi na ia filifili ai le sa‘o ma faamatala mai po o a ni ona lagona ina ua uma ona ia faia lena filifiliga.

2. Ia valivaliina e tamaiti taitoatasi se kopi o le talita a le FMT o lo o maua i le pito i luma o le tusi lesona.

3. Ia tusia e tamaiti ni ata e faaali mai ai ni auala e mafai ai ona latou filifili le sa‘o.

4. Ia auaua‘i tamaiti i lo latou faafoliga lea o lo o faia a latou galuega i aso taitasi na tuuina atu e o latou matua ia i latou ma faamatala mai pe faapefea ona filifilia le sa‘o i lea tulaga.