Tusi Lesona ma le Taimi o Fetufaaiga a le Peraimeri

Lesona 36: Faaalia o le Alofa mo Iesu Keriso

Lesona 36

Faaalia o le Alofa mo Iesu Keriso

Faamoemoega

Ina ia fesoasoani i tamaiti e faaalia lo latou alolofa mo Iesu Keriso e ala lea i lo latou faia o mea o lo o finagalo o ia latou te faia.

Sauniuniga

Suesue ma le agaga tatalo ma ia saunia e faitau le Ioane 14:15.
Tusi faamatalaga nei i luga o ni fasi pepa se ono:
1. Faamatalaga 1: E alofa ia te i tatou.
2. Faamatalaga 2: Na papatisoina e ala i le faatofu e pei lava o i tatou.
3. Faamatalaga 3: Na aoao e fai galuega faakamuta ao laititi.
4. Faamatalaga 4: E alofa i tamaiti ma faamanuia i latou.
5. Faamatalaga 5: Na ia aoaoina i tatou ia alofa atu i isi.
6. Faamatalaga 6: Na ia maliu mo i tatou ma maua le avanoa mo le salamo.
Ao lei amataina le vasega, ia nana faamatalaga nei i soo se vaega o le potu.
Ia saunia e usu le “Alofa Atu i le Isi” (Tusipese a Tamaiti, itulau 136); o lo o maua upu i le pito i tua o le tusi lesona lenei.
O Mea e Manaomia:
1. Se Tusi Paia.
2. Se penitala ma se pepa mo tamaiti uma.
3. Ata 3-9, Iesu le Keriso (62572; Taga Ata o le Talalelei 240); ata 3-23, Tamaititi o Lo o Faitau Tusitusiga Paia; ata 3-25, Alu i le Lotu; ata 3-26, Tamaititi o Lo o Totogi Sefuluai; ata 3-27, Fetufaai le Uila Vilivaetolu 62317); ata 3-59, Tufaina o le Faamanatuga (62021); ma le ata 3-60, Teineititi o Lo o Tatalo (62310).
4. Laupapa, penisina, ma se solo.
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Alofa Iesu Keriso ia i Tatou

Gaoioiga faatosina

Ia faamatala atu o lo o e nanaina ni faamatalaga i totonu o le potu e talafeagai ma le lesona. Tuu atu i tamaiti latou te sueina ma le filemu ia faamatalaga. A maua uma ia faamatalaga, tuu atu i tamaiti pe e te fesoasoani foi iai i le faatulagaina lelei mai le faasologa e amata mai i le muamua seia oo i le ono. Faitau faatasi ma tamaiti ia faamatalaga. Fesili atu mo ni manatu pe a uma faamatalaga taitasi.

Gaoioiga faatosina

O ai o lo o faatatau iai nei faamatalaga? (Iesu Keriso.)

Ata ma le talanoaga

Faaali atu le ata 3-9, Iesu le Keriso.

Tau atu i le vasega tatou te iloa e alofa Iesu Keriso ia i tatou aua ua tele mea ua ia faia mo i tatou.

Ata ma le talanoaga

O le a se mea ua faia e Iesu Keriso mo i tatou? (Fesoasoani i tamaiti ina ia malamalama na tuuina mai e Iesu Keriso poloaiga, o perofeta, o lana ekalesia, ma sauniga o le perisitua. E ala atu i lana togiola, ua ia faia foi se avanoa mo i tatou ina ia tatou salamo ai mai a tatou mea sese ina ia iai se aso e mafai ai ona tatou toe foi atu ma mau faatasi ma le Tama Faalelagi ma ia.

Ia faamalamalama atu na faaalia le alofa o Iesu Keriso ia i tatou e ala lea i lona tuuina mai o nei faamanuiaga matagofie.

Talanoaga i le laupapa

Ia faamalamalama atu ua faaalia mai e Iesu Keriso lona alofa mo i tatou ma e mafai foi ona tatou faaali atu lo tatou alofa mo ia. Tusi le faaupuga “E mafai ona ou faaalia le alofa mo Iesu Keriso e ala -” i luga o le laupapa po o se fasi pepa, ma faitau leotele. Ona tau atu lea i tamaiti o le a outou talanoaina i le asō auala e mafai ai ona faaalia lo tatou alolofa mo Iesu Keriso. Mo tamaiti e mafai ona faitau, ia lisi nei auala i luga o le laupapa ao outou talanoaina ma i latou. Atonu e te tusia ni ata faigofie e faamatala ai le mataupu o lo o talanoaina mo tamaiti laiti.

Tatou te Faaali Atu Lo Tatou Alofa mo Iesu Keriso e Ala Lea i le Usitaia o Poloaiga

Mau ma le talanoaga i le laupapa

Fesili i le vasega mo se isi auala e faaali atu ai le alofa mo Iesu Keriso ao e faitauina le Ioane 14:15.

Na fetalai mai Iesu Keriso afai tatou te tausia ana poloaiga, o lona uiga ua tatou faaali atu foi lo tatou alolofa ia te ia. Pe a papatisoina i tatou, ua tatou folafola atu o le a tatou usitai i ana poloaiga. Pe a tatou usitai i ana poloaiga, ua tatou faaali atu lo tatou alofa mo ia. Tusi le “Tausi poloaiga,” po o le tusi o se ata o se foliga ataata, i luga o le laupapa po o le pepa o le lisi.

Talanoaina o le ata

O a poloaiga? (O tulafono mai le Tama Faalelagi ma Iesu Keriso e fesoasoani ia i tatou ia tatou fiafia.)
O a nisi o poloaiga e mafai ona tatou tausia e faaali atu ai lo tatou alofa mo Iesu Keriso?

Atonu e te manao e fai atu i tamaiti e tutu uma i luga; a uma ona tau mai e lea tamaititi ma lea tamaititi se poloaiga ona nofo lea i lalo. (Ia saunia e fesoasoani i tamaiti o ē atonu e le mafai ona mafaufau i se poloaiga.)

Faaali atu ata talafeagai ao tuuina mai e tamaiti ni manatu e pei o le auai i sauniga lotu, mafaufau ia Iesu Keriso i le taimi o le faamanatuga, totogi sefuluai, tau le mea moni, tatalo, aoao mai tusitusiga paia, fesoasoani i o tatou aiga, ma isi.

Tatou te Faaali Atu lo Tatou Alofa mo Iesu Keriso e Ala Lea i le Tausia Lelei o Meatotino a le Ekalesia

Tala

Ia faamalamalama atu e te manao i tamaiti ina ia faalogo lelei i le tala lenei pe na faapefea ona faaali atu le alofa o Kim mo Iesu Keriso:

Na agi se afa malosi lava i le vaega tonu lava e nofo ai Kim. Talu ai ona o le aiga o Kim e latalata i le falesa, o lea na talosagaina ai e le epikopo lona tama na te siakiina le falesa ina ua uma le afa. Na savavali faatasi atu Kim ma lona tama ma tau sue atu so la auala i le tele o laau na toulu i le malosi o le matagi. O nisi fale ua leai ni faamalama, ma sa la pasia foi ni taavale ua faaleagaina. Na popole Kim ona ai ua faaleagaina foi le falesa.

Ina ua la latalata atu i le falelotu, sa mafai ona la iloa atu se tasi faamalama tele lava ua taʻe i le matagi. O le vai ua lepa solo i totonu, faatasi ai ma le palapala, o lau laau, o lapisi, o lālā laau, ma tamai laau. Na fai atu le tama o Kim ia Kim e faatali atu i fafo ae sei alu e vaai pe mautinoa e saogalemu lo la o atu i totonu. Na toe vave foi mai, ma lipoti mai o le tele o le fale e le o faaleagaina. O lea na la o atu faatasi ai i totonu o le falelotu. Ao vaavaai solo le tama o Kim e sue pe iai nisi mea ua faaleagaina, ae ua amata foi ona pisi solo Kim i le taimi lea. Na amata ona ia faaputuina ia lau laau, o lapisi, lālā laau, ma tamai otaota ninii na lelea atu i totonu i le taimi o le afa e aunoa ma le tau faatonuina.

Na avatu e le tama o Kim le isi tagata o le uarota e fesoasoani, ma e lei pine ae ufiufiina atoa loa le faamalama lea na taʻe. Ao galulue tamaloloa i le puipuia o le faamalama, ae o lo o pisi foi Kim i le faamamaina o le falelotu. Na nofo ai o ia ma latou galulue faatasi i le fufuluina ese o le palapala ma fufulu puipui ma le fola.

Tala

Na faapefea ona faaalia le alofa o Kim mo Iesu Keriso? (Na fesoasoani o ia i le faamamaina o le falelotu.)
O le a so outou manatu o le a se lagona na oo ia Kim ina ua uma le galuega?

Ia faamalamalama atu e tele auala e mafai ona tatou fesoasoani atu ai i le tausia o le falelotu ma mea o lo o iai i totonu. E mafai ona tatou fesoasoani i le tausiga o le falelotu ma tatou faia le mea sili e faatumauina ai le mama ma le matagofie. E mafai ona tatou taeina ia pepa ma aua le tuua ni mea e faapaepae solo i le fale. E mafai ona tatou tausia ma le faaaloalo ia tusipese ma tusitusiga paia. O nisi taimi e mafai ona tatou fesoasoani i ni galuega fesoasoani i le faamamaina o le falelotu po o le lotoa. O tagata uma lava e mafai ona fesoasoani i le tausiaina o meatotino a le Ekalesia i so o se auala.

Tusi le “Tausiaina o meatotino a le Ekalesia,” po o le tusi o se ata faigofie o se falelotu i luga o le laupapa po o le pepa i lalo ifo o le faaupuga “E mafai ona ou faaalia le alofa mo Iesu Keriso e ala -.”

Tatou te Faaali Atu lo Tatou Alofa mo Iesu Keriso Pe a Tatou Alolofa i Isi

Pese

Fai atu i tamaiti e faalogo lelei ma aoao i se tasi o poloaiga sili ona taua.

Usu pe faitau faatasi ma le vasega upu o le pese “Alofa Atu i le Isi.”

Talanoaga

O le a le mea o lo o finagalo iai Iesu Keriso tatou te faia o lo o tau mai i lenei pese? (Alofa atu i le isi e pei ona faia e Iesu.)
O le a le poloaiga fou? (Alofa i le isi.)
O le a le uiga o le upu soo? (O se tasi e mulimuli ma talitonu ia Iesu Keriso.)
E faapefea ona iloa e tagata ua e mulimuli ma talitonu ia Iesu Keriso? (Pe a e faaali atu lou alofa i isi ma taumafai e fai le mea sao i mea uma e te faia.)

Ia faamalamalama atu o Iesu Keriso o le tagata pito sili atu lea ona alofa ma malamalama ua soifua i lenei lalolagi. E tatau ona tatou alolofa atu i isi pe afai tatou te alolofa e pei ona ia faia. O upu o lenei pese e moni, ma e sau mai le Tusi Paia. Na fetalai mai Iesu, “E faapei ona ou alofa atu ia te outou,… ia fealofani outou” (tagai i le Ioane 13:34; tagai foi i le Ioane 15:12, 17). Ua tatou iloa e alofa tele o ia ia te i tatou. E tatau ona tatou alolofa atu i isi tagata i lena lava ituaiga alofa e tasi. Tatou te faaali atu ia Iesu ua tatou alolofa ia te ia pe a tatou alolofa atu i isi.

Tusi le “Alofa i isi,” po o le tusi se ata o se fatu, i le pito i lalo o lau lisi.

Aotelega

Ia faamalamalama atu tatou te faaali atu tatou te alolofa ia Iesu Keriso pe a tatou fesoasoani i le tausiaina o meatotino a le Ekalesia, tausia poloaiga, ma le alofa i isi. Tatou te faaali atu lo tatou alofa mo Iesu e ala i mea tatou te faia.

Gaoioiga

Tuu atu se penitala ma se pepa i tamaiti taitoatasi. Fai atu i tamaiti e mafai ona tusitusi e kopi lelei i lalo ia upu “E mafai ona ou faaalia le alofa mo Iesu Keriso e ala -” i luga o a latou fasi pepa. Atonu e te manao e tusi i luga o fasi pepa a tamaiti laiti le faaupuga lena. Ia valaaulia tamaiti e mafai ona tusitusi e tusi se ata o se mea se tasi o le a latou faia i lenei vaiaso e faaalia ai lo latou alofa mo Iesu Keriso. Ia faamalamalama atu o le vaiaso a sau e te manao ai e te faalogo pe na faapefea ona latou faataunuuina lea galuega. Ia uunaiina tamaiti e ave a latou pepa i le fale ma tuu i se mea e mafai ona latou vaai atu iai ma avea o se faamanatu i le vaiaso a sau.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Aumai se taga fatupi po o se isi mea vaivai. Fai atu i tamaiti e nonofo faataaliolio i luga o le fola. Fesili atu iai:

E te alofa ia Iesu? E faapefea ona e iloa?

Filifili le sao ma o le a e iloa.

Tauloto ma tamaiti le fuaiupu lenei; ona valaau atu lea o se igoa ma togi atu iai le taga fatupi i le tamaititi lena. O le tamatiti ua valaau atu lona igoa e tatau ona ia tauina mai se mea se tasi e mafai ona ia faia e faaali atu ai lona alofa mo Iesu Keriso. Ona toe togi atu lea o le taga fatupi ia te oe. Ia faaauau pea seia soo uma tamaiti.
Usu le pese “Alofa Atu i le Isi.” Ia faamalamalama atu i tamaiti, a oo i le vaega o loo iai le upu alofa, ona kolosi lea o o latou lima (ma uu a latou moto) i luga o o latou fatafata i taimi uma lava e tau ai le upu lena. O lona uiga o le alofa i le gagana faagugu (sign language). E tatau ona tatou faaali atu lo tatou alofa ma le malamalama i fanau uma a le Tama Faalelagi. Aoao atu i tamaiti pe faapefea ona faailoa atu ia te oe “Alofa ia te oe!” i le faia lea o le faailoga o le alofa, ona faasino atu lea i le tagata. Ia fautua atu iai latou te faaali atu lenei mea i tagata o o latou aiga pe a latou o atu i le fale. Ia faamanatu atu i tamaiti o le auala sili lava e faaali atu ai le alofa o le agalelei atu lea e pei ona faia e Iesu.
Usu pe faitau faatasi ma tamaiti le pese faitaga lenei: “Fetalai Mai Iesu E Alofa Atu i Tagata Uma” (Tusipese A Tamaiti, itulau 61).

Fetalai mai o Iesu

Ia e alofa atu (faaloloa lima i autafa)

E alofagia ai oe, (tuu lima i le fatafata)

E tagata uma. (faaloloa lima i autafa ona toe tuu lea i le fatafata)
ʻOti ni tamai fatu mai pepa se tolu mo tamaiti uma. Ia faamalamalama atu iai e mafai e le tamaititi ona faaaoga nei fatu i lenei vaiaso e faaali atu ai lona alofa. E tatau ona latou faia se mea lelei mo se isi tagata ma tuu atu iai se fatu. O le fesoasoani i isi o le mea lena e finagalo Iesu ia tatou faia. Tuu atu nisi faataitaiga o mea lelei e mafai e tamaiti ona faia. Atonu e te fuafua e faatino i ni taga se vaega o nei uiga agalelei ma tamaiti o le vasega.
Afai e iai ni tusipese a la outou lava uarota e le o tausiaina faalelei, ia faaali atu i tamaiti ma talanoaina ma i latou pe latou te tausia faapefea ae pe aisea foi.