Lesona 5
O le Uluai Faaaliga
Faamoemoega
Ina ia fesoasoani i tamaiti taitoatasi ia latou iloa na vaai Iosefa Samita i le Tama Faalelagi ma Iesu Keriso.
Sauniuniga
-
Suesue ma le agaga tatalo le Iakopo 1:5 ma le Talafaasolopito o Iosefa Samita 1:7-20.
-
Afai e maua, ia saunia e faaali le ata o le Uluai Faaaliga (15 minute), o lo o maua i le kaseti vitio o le Moments From Church History (53145).
-
Ia saunia e usu pe faitau upu o le “Talosaga Muamua a Iosefa Samita” (Viiga, itulau 14); o lo o maua upu i tua o lenei tusi lesona.
-
O Mea e Manaomia:
-
Se Tusi Paia ma se Penina Tautele.
-
Penivali ma pepa.
-
Ata 3-8 Ua Sailia e Iosefa Samita le Poto i le Tusi Paia (Taga Ata o le Talalelei 402); ma le ata 3-10, O le Uluai Faaaliga (62470; Taga Ata o le Talalelei 403).
-
-
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.
Faalautelega Fautuaina o le Lesona
Na Vaaia e Iosefa Samita le Tama Faalelagi ma Iesu Keriso
Tofi se tamaititi e faia le tatalo amata.
Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.
Gaoioiga faatosina
Faaali atu le ata 3-8 Ua Sailia e Iosefa Samita le Poto i le Tusi Paia.
Gaoioiga faatosina
-
O ai lea? (Iosefa Samita.)
-
O le a lana mea lea e fai?
-
Aisea ua e manatu ai o lo o ia faitauina le Tusi Paia?
Ia faamalamalama atu i tamaiti, ina ua sefulufa tausaga o Iosefa Samita, sa latou nonofo ma lona aiga i se faatoaga. I le taimi lena na matuai fiafia ai lava tagata sa nonofo latalata ane i mataupu faalelotu. O faifeau o le tele o ekalesia eseese e faia a latou fonotaga e tele e tau faamalamalama ai o latou talitonuga. E fai mai lava le faifeau ia o lana ekalesia ua saʻo ma taumafai e avatu tagata ina ia auai iai. Talu ai ona o le manao o Iosefa Samita e fia iloa po o fea tonu le ekalesia e saʻo, o lea na ia alu atu ai i le tele o fonotaga a lotu eseese uma. Na ia mauaina ai e tofu lava le faifeau ia ma ona manatu e uiga i le Atua ma tusitusiga paia.
Gaoioiga faatosina
-
O le a sou manatu o le a se lagona na oo ia Iosefa Samita e uiga i nei talitonuga eseese uma? (Le malamalama.)
Talanoaina o mau
Afai o le tamaititi e mafai ona faitau o lo o iai i le vasega, ia fesoasoani atu ia te ia i le faitauina o le Talafaasolopito o Iosefa Samita 1:10 po o lou faitauina leotele e oe. Amata i upu “Na ou faapea ifo ai ia te au lava…”
Ia faamamafa atu o le tele o mataupu ma manatu na fenumiai ai Iosefa. Na ia manatunatu po o le fea o nei ekalesia e saʻo po o le sese uma foi. O le tina o Iosefa, o ona uso e toalua, ma lona tuafafine na auai atu i le ekalesia Peresipeteriana, ae leʻi auai atu Iosefa i se tasi o na ekalesia.
Faaali atu i tamaiti se Tusi Paia ma faamatala atu e masani lava ona faitauina e Iosefa le Tusi Paia. O se tasi aso na ia faitau ai i se mau na matuai faagaeetia ai lava o ia.
Ia faitauina leotele e se tamaititi matua le Iakopo 1: 5 po o lou faitauina leotele foi e oe.
Talanoaina o mau
-
O le a sou manatu o le a le uiga o le leai o se poto? (Ia mautinoa ia malamalama tamaiti o le leai o se poto o lona uiga o le lē malamalama po o le leiloa o se mea.)
-
O le a le uiga o le ole atu i le Atua? (Tatalo atu i le Tama Faalelagi.)
Toe faitau le mau. Ia faamalamalama atu o le uiga o lenei mau e mafai ona tatou tatalo atu i le Tama Faalelagi ma ole atu ia te ia ina ia fesoasoani mai ia tatou malamalama ma aoao e uiga i se mea.
Na iloa lelei e Iosefa e leai se poto o ia te ia. Na matuai le malamalama lava o ia. Na ia le iloa po o fea le ekalesia e moni, o lea na ia mafaufau ai e faia le mea o lo o taʻuina mai i le Tusi Paia - o le tatalo atu lea i le Tama Faalelagi.
Kaseti vitio po o tala o tusitusiga paia
Faaali le ata o le Uluai Faaaliga, po o le faamatala atu o le vaega lenei:
I se tasi taeao po lava o le tautotogo, sa savalivali atu ai Iosefa i se togalaau i tafatafa ane o lo latou fale. Ina ua uma ona ia vaavaai solo ina ia mautinoa e na o ia lava o lo o iai, sa ia tootuli ifo loa ma tatalo.
Aʻo ia tatalo, na ia vaaia se malamalama uiga ese i luga aʻe o lona ulu. Na faamatalaina e Iosefa le tulaga na ia vaaia faapenei: “Ina ua oo ifo le malamalama i oʻu luga, sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea” (Talafaasolopito o Iosefa Samita 1:17).
Ata ma le talanoaga
Faaali le ata 3-10, O le Uluai Faaaliga.
Sa fetalai atu se tasi o i laua ma taʻu atu le igoa o Iosefa ma tusi ane lona aao i le isi, ma faapea mai, “O Loʻu Atalii Pele lenei. Faalogo ia te Ia!” (Talafaasolopito o Iosefa Samita 1:17).
Ata ma le talanoaga
-
O ai nei Tagata e toalua? (O le Tama Faalelagi ma Iesu Keriso.)
Na fesili atu Iosefa i le Tama Faalelagi ma Iesu Keriso po o fea le ekalesia e moni ae po o fea foi le ekalesia e tatau ona auai iai. Na taʻuina atu ia te ia e le tatau ona auai atu i se tasi o na ekalesia uma aua e sese uma lava. Na aoaoina ai e Iosefa e le o toe iai le ekalesia moni a Iesu i le lalolagi.
O le nofoaga na vaai ai Iosefa Samita i le Tama Faalelagi ma Iesu Keriso ua faaigoaina nei o le Togalaau Paia.
Ata ma le talanoaga
-
O le a sou manatu o le a se lagona na oo ia Iosefa Samita ina ua uma ona ia vaai i le Tama Faalelagi ma Iesu?
E Tele Mea na Aoaoina Mai e Iosefa Samita i Lana Faaaliga
Fesili atu i tamaiti po o a mea na aoaoina mai e Iosefa Samita i lana faaaliga. Ia taʻu mai ai vaega nei:
-
Na vaai Iosefa i le Tama Faalelagi ma Iesu. Na ia aoaoina ai e iai o laua tino o aano ma ivi.
-
Na ia aoaoina ai o le ekalesia moni a Iesu e le o toe iai i le lalolagi.
-
Na ia aoaoina ai e le tatau ona auai o ia i se tasi o ekalesia. Ia faamamafa atu e leai ma se ekalesia e moni. (E mafai ona e taʻuina atu i tamaiti, o le lesona o le a sosoo ai e faamatalaina atu ai pe na faapefea ona toe aumaia e Iosefa le ekalesia moni a Iesu i le lalolagi.)
-
Na ia aoaoina ai e tausia i tatou e le Tama Faalelagi ma Iesu ma e tali mai foi i tatalo.
Pese`
Usu pe faitau upu o le “Talosaga Muamua a Iosefa Samita.” Atonu e te manao foi e valaaulia se tasi e usuina lea pese mo tamaiti.
Mataupu Faavae o le Faatuatua
Na tusi atu Iosefa Samita i se tasi tagata ma faamatala atu iai mea e aoaoina e le Ekalesia. O se tasi o vaega o lena tusi lea ua taua nei o Mataupu Faavae o le Faatuatua.
Fesoasoani i tamaiti e faataitai le mataupu faavae muamua o le faatuatua, o lo o taʻu mai ai faapea matou te talitonu i le Tama Faalelagi, Iesu Keriso, ma le Agaga Paia.
Aotelega
Molimau
Ia tuuina atu lau molimau na vaai Iosefa Samita i le Tama ma le Alo, ma faaalia atu lou agaga faafetai mo Iosefa Samita.
Molimau atu o le folafolaga o lo o i le Iakopo 1:5 e moni. Afai ua leai se poto ia i tatou, e mafai ona tatou ole atu i le Tama Faalelagi ma maua ai se tali.
Molimau atu e alolofa le Tama Faalelagi ma Iesu ia i tatou uma lava. O le a la fesoasoani ia i tatou e sailia tali i a tatou fesili e pei lava ona la fesoasoani ia Iosefa Samita. Atonu e le mafai ona faaali mai agelu ia i tatou; ae afai tatou te ole atu ma le faamaoni, o le a talia mai e le Tama Faalelagi a tatou tatalo i se auala e sili ona lelei mo i tatou.
Tofi se tamaititi e faia le tatalo faaiu. Fai atu iai e faafetai atu i le Tama Faalelagi mo Iosefa Samita ma mo lana faaaliga o le Tama Faalelagi ma Iesu.
Gaoioiga e Faamauoa Mai Ai
Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”
-
Fai i tamaiti e moeiini o latou mata aʻo e faitauina upu o le pese “O Le Togalaau Paia” (Tusi Pese a Tamaiti, itulau 87). Fai atu iai e mafaufau lelei e uiga i le malamalama na maua e Iosefa ina ia mafai ai ona latou tusia ai se ata.
O le Togalaau Paia e lanulauava,
Na susulu malosi le la i le taeao,
Aʻo tootuli Iosefa ma tatalo tauanau,
Aʻo tootuli Iosefa ma tatalo tauanau,
I lena eleele paia.
Na faaali mai le Tama ma le Alo.
Na fetalai mai ia te ia.
O le la savali ua teʻa ai lona fefe,
O le la savali ua teʻa ai lona fefe,
Ua tumu ai lona loto i le fiafia.
Ia tusia uma e tamaiti se ata o Iosefa Samita i le Togalaau Paia ma faaigoaina o “Iosefa i le Togalaau Paia.”
-
Toe faitau leotele atu le Iakopo 1:5 i tamaiti ma faamatala atu iai pe faapefea ona aoaoina i tatou e lenei mau ina ia sailia ai tali o o tatou faafitauli. Tuu atu i tamaiti ni tulaga atonu e “leai ai so latou poto” ma manaomia ai ona “ole atu i le Atua.” Fesoasoani ia i latou e mafaufau i ni auala e mafai ai ona fesoasoani mai le Tama Faalelagi i o latou faafitauli pe a latou ole atu ia te ia. Atonu e te faaaogaina ni tulaga faapenei:
-
Ua e faanoanoa ona e leʻi leva nei talu ona oulua fufusu ma lau uo. E te leiloa pe faapefea ona toe faaleleia lea tulaga.
-
Ua e maua le lagona o le tuua na o oe ma ua fefevale i luga o lou moega i le po.
-
O lo o mai lou tina ma ua foliga faanoanoa o ia. Ua e manao e fesoasoani ia te ia ina ia toe maua e ia le lagona fiafia.
Ia mautinoa ia faamamafa atu e talia mai lava e le Tama faalelagi ma Iesu ia tatalo e ala lea i le tuuina mai o se lagona filemu, lea o le a aoao atili iai tamaiti i le isi lesona o le a sosoo ai. E le tatau ona faamoemoe tamaiti o le a faaali mai le Tama Faalelagi ma Iesu ia i latou e tali a latou tatalo.
-