Tusi Lesona ma le Taimi o Fetufaaiga a le Peraimeri
Lesona 8: E Iai i le Ekalesia a Iesu Keriso ni Perofeta e Aoaoina i Tatou

Lesona 8

E Iai i le Ekalesia a Iesu Keriso ni Perofeta e Aoaoina i Tatou

Faamoemoega

Ina ia fesoasoani i tamaiti ia malamalama i le taua o le faalogo ma usitai i aoaoga a perofeta.

Sauniuniga

  1. Suesue ma le agaga tatalo le Luka 1:70.

  2. Fai atu i se tasi e umia le Perisitua Mekisateko mai la outou uarota po o le paranesi ina ia sau i le vasega ma taʻu atu i tamaiti o lo o ia faafoliga e pei o le Tupu o Peniamina. (Atonu e manao o ia na te ofuina se ofu talaloa po o se isi ofu e faafoliga ai i se ofu o se tupu.) Fai atu iai e faailoa atu o ia o le Tupu o Peniamina. Ia faamatala atu foi e ia i tamaiti sa avea o ia ma se tupu amiotonu tele, ma sa ia galue i ona lava lima e lagolagoina o ia ina ia le avea o ia ma avega mamafa i ona tagata. Fai atu iai e faamatala faapuupuu atu lona fausiaina o se olo ma o lea na o mai ai tagata mai nuu lata mai ma mamao e faalogologo i lana savali. Fai atu iai ina ia faapuupuu ona ia aoaoina tamaiti i se mataupu se tasi na aoaoina atu e le Tupu o Peniamina (tagai i le Mosaea 2-5).

  3. Tusi lolomi vaega taitasi nei o aoaoga mai perofeta ma Peresitene o le Ekalesia i luga o nisi fasipepa po o le aumaia o se ata e suitulaga ai. Tuu pepa i totonu o se atigi pusa ( po o le faafaō foi i luga o le laulau). Faaopoopo atu iai nisi aoaoga pe afai e manaomia ina ia mafai e tamaiti uma ona maua le avanoa.

    “Faia ni afiafi faaleaiga.”

    “Suesue tusitusiga paia.”

    “Alu i le lotu i Aso Sa taitasi.”

    “Tatalo i aso uma.”

    “Aua le aveina meatotino a isi.”

    “Ava i ou matua e ala lea i le fesoasoani iai i le fale.”

    “Totogi sefuluai.”

    “Alofa le tasi i le isi.”

  4. Faaali atu se kopi o se Mekasini a le Ekalesia lo o i ai se savali mai le perofeta i luga o le laulau po o se isi mea i luma o le vasega. A’o le’i amataina le vasega, ia nanaina solo i le potu ni fasi pepa o lo o iai ni faamatalaga e uiga i le mea o lo o iai le mekasini, e pei o lalo o se nofoa, le faamalama, ma luga o le laupapa. O faamatalaga taitasi e tatau ona ta’u atu ai i tamaiti le mea o lo o iai le isi faamatalaga. O le faamatalaga mulimuli lava e tatau ona taitaiina atu ai i latou i le mea o lo o faaalia mai ai le mekasini. Ia makaina se savali puupuu mai le perofeta e mafai ona malamalama ai tamaiti i totonu o le mekasini.

  5. O Mea e Manaomia:

    1. Se Tusi Paia.

    2. Se ata o le perofeta o lo iai nei.

    3. Ata 3-19, Peresitene David O. McKay

  6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

O Lo o Taitaiina le Ekalesia a Iesu Keriso e se Perofeta

Gaoioiga faatosina

Ta’u atu i tamaiti o lo o iai se tagata faapitoa o lo o asiasi atu i le latou vasega i le asō. Fai atu iai e faalogologo lelei i lana savali aua o le a ia faamatalaina atu ia i latou e uiga i se tupu ma se perofeta amiotonu. A maea le tautalaga a le tagata na asiasi mai, ia valaaulia tamaiti e faatalofa ma ia ma faafetai atu iai mo lona oo atu.

Talanoaina o le mau

Fai atu i tamaiti e faalogo lelei i se mau ma vaai pe mafai ona latou aoaoina se mea e uiga i perofeta. Faitau le Luka 1:70. Fesoasoani ia i latou ina ia malamalama o nisi taimi e aoaoina ai i tatou e le Alii e ala lea i lona ta’uina atu i ana perofeta o mea e tatau ona tatou iloa, ma e iai pea se perofeta e taitaiina le Ekalesia.

Talanoaina o le mau

  • O ai le perofeta muamua lava i lenei lalolagi? (Atamu.)

  • O ai le uluai perofeta o aso e gata ai? (Iosefa Samita.)

  • O ai lo tatou perofeta ma le Peresitene o le Ekalesia o lo o iai nei? (Faaali atu lona ata ma faataitai e tamaiti le ta’uina o lona igoa.)

  • O ai ni perofeta o le Tusi Paia ma le Tusi a Mamona e mafai ona outou ta’uina maia?

  • E mafai ea e so o se tasi ona filifilia e avea ma perofeta? (Tagai i le Ioane 15:16.)

Ia faamalamalama atu e le o tagata uma e valaaulia e avea ma perofeta. O Iesu Keriso lava ia na te filifilia lana perofeta o le a iai. Pe a filifilia e Iesu Keriso se perofeta, na te tuuina atu ia te ia le pule uma na te manaomia e pule faamalumalu ai i le Ekalesia. O lea perofeta o le Peresitene foi lea o le Ekalesia.

Ua Tuuina Mai e le Tama Faalelagi ia Perofeta Ina ia Taitaiina ma Faamanuiaina i Tatou

Gaoioiga

Fai atu i tamaiti e faalogologo lelei i faamatalaga nei. Afai latou te malilie iai i le faamatalaga, ona tatau lea ona latou tutu i luga. Afai latou te le malilie iai, e tatau ona latou nonofo i lalo. Ia faaalu se taimi ina ia faamalamalama ai so o se faamatalaga e le malamalama ai tamaiti. (Talu ai ona o nei faamatalaga uma e “malilie” iai, ia faanonofo i lalo tamaiti i le va o faamatalaga taitasi. O le gaoioiga ua fuafuaina e gaioi ai i totonu o le potuaoga.)

Gaoioiga

  1. Tatou te mauaina ni savali mai lo tatou perofeta i konafesi aoao. (Malilie iai. Ia faamalamalama atu o fesoasoani o le perofeta ma le Au Aposetolo e Toasefululua o ni perofeta foi.)

  2. E le mafai ona tauina mai e lo tatou perofeta ni mea sese e faia. (Malilie iai. Ia faamalamalama atu tatou te talitonu o mea e saunoa mai ai le perofeta ia i tatou o le mea sao lava e faia.)

  3. O Peresitene (le perofeta o lo o iai nei) o se perofeta ma o le Peresitene o le Ekalesia. (Malilie iai.)

  4. Ua tauina mai e lo tatou perofeta ia i tatou mea e finagalo le Tama Faalelagi ma Iesu Keriso tatou te faia ina ia tatou fiafia ai ma ia mafaia ai ona tatou toe ola faatasi ma i laua. (Malilie iai.)

Faamatalaga a le faiaoga

Ia faamalamalama atu e tuuina mai e le perofeta ni savali i mekasini a le Ekalesia, saunoa mai i sauniga, ma taitaiina ma aoaoina isi taitai o le Ekalesia.

Ia faamalamalama atu o Iesu Keriso o le perofeta maoae lea sa soifua ai i lenei lalolagi. Sa ia aoaoina atu le talalelei ma faia vavega.

Ata ma le tala

Fai atu i tamaiti o le a e faamatalaina nei se tala e uiga ia Peresitene David O. McKay, o se tasi o perofeta o aso nei e gata ai. Ia faamalamalama atu o perofeta o aso nei e gata ai o i latou ia o e na soifua talu mai le taimi o Iosefa Samita, po o le latalata foi i le taimi lenei o lo o tatou ola ai. Faaali atu le ata 3-19, Peresitene David O. McKay, ao e faamatalaina atu le tala lenei.

Ao avea Peresitene David O. MacKay ma se perofeta, sa ia faimalaga atu i le tele o vaega ole lalolagi e feiloai ma taitaiina tagata o le Ekalesia. I se tasi taimi ao iai o ia i Siamani, sa ia faalogo ai i se tasi tina ua pē uma lona tino (e le mafai ona faagaoioi vaega o lona tino) ma sa le mafai ona sau o ia i le konafesi ina ia faalogologo ia te ia a’o lauga atu.

O lenei tina e toalua lana fanau, ma sa manao o ia ina ia o atu i laua i le konafesi ma vaai ma faalogo i le perofeta soifua. Faatasi ai ma lona faatuatua tele na ia faapea atu ai, “Ou te iloa afai ou te auina atu lau fanau ma faatalofa ma Peresitene McKay, ona la foi mai ai lea i le fale ma uu atu lou lima -ma afai e mafai ona ou uuina o la lima laiti i lou lima - ou te iloaina o le a ou malosi.”

Sa faia fuafuaga uma ina ia mafai ona auai atu lana fanau e toalua i le konafesi. Sa matuai faagaeetia lava tamaiti ma fiafia ao la malaga atu e vaai i le perofeta.

I le faaiuga o le konafesi, sa faatalofa ai Peresitene McKay ma le toatele o tagata sa iai iina. Na ia silafia lelei o lo o malaga atu nei tamaiti e toalua, ma ina ua vaaia i laua, sa latou faatalofa ma faapea atu, “E mafai lava ona oulua aveina atu le solosolo lenei i lo oulua tina faatasi ai ma la’u faamanuiaga?”

Sa aveina atu e tamaiti le solosolo i lo la tina. Sa matuai fiafia lava o ia ma faafetai atu i le Alii i aso uma mo le solosolo ma le faamanuiaga na auina atu e Peresitene McKay e ala atu i lana fanau. E lei umi lava talu ona taunuu atu tamaiti i le fale, ae amata loa ona ia faalogoina ua malosi lona tino, ma e lei umi ae toe gaoioi lona tino ma ua mafai ona ia tausia lana fanau. (Tagai i le Cherished Experiences from the Writings of President David O. McKay, comp. Clare Middlemiss [Salt Lake City: Deseret Book. Co., 1955], pp. 149-51.)

E Mafai Ona Tatou Mulimuli i le Perofeta

Suega oloa

Fai se suega oloa faigofie. Amata i le faapea atu: “O se vaega o lenei potu o lo o iai se savali mai le perofeta o le Ekalesia i tagata uma o lenei vasega. Vaai pe mafai ona outou mauaina.” Ona tau atu lea i tamaiti le faamatalaga taufaaataata muamua. A mauaina uma faamatalaga taufaaataata taitasi, ia faitauina leotele po o le tuu atu foi i se tamaititi e mafai ona faitau na te faitauina. O le faamatalaga taufaaataata mulimuli e mafai ona tuu iai se faamatalaga faapea, “O lo o lomia i se pepa. O lo o iai faatasi ma itulau o pepa. E felanulanuai lona faavaa.” A mauaina e tamaiti le mekasini, faitau e oe po o le tuuina atu i se tamaititi na te faitauina le savali o lo o makaina mai le perofeta. Ona faamatala atu lea o se oloa taua lava saunoaga a le perofeta. E mafai e perofeta ona tau mai ia te i tatou pe faapefea ona tatou ola ina ia mafai ona tatou toe foi atu i le Tama Faalelagi.

Aotelega

Ia tuuina atu lau molimau i faamanuiaga ua oo mai ia te oe e ala lea i lou suesueina o aoaoga a perofeta i totonu o tusitusiga paia ma usitai i le perofeta soifua. Atonu e te manao e fetufaai atu se mea na oo ia te oe pe na faapefea ona aafia oe i se aoaoga mai e perofeta.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

  1. Ia faatutu tamaiti i se laina ma savavali faataamilo filemu i totonu o le potuaoga ao faia pe usuina upu o le tali o le pese “Mulimuli i le Perofeta” (Tusi Pese a Tamaiti, itulau. 110-11). A maea le tali i taimi uma lava, o le tamaititi o lo o pito i luma o le laina e tatau ona ia tauina mai pe faapefa ona ia mulimuli i aoaoga a le perofeta ona alu lea i le pito i tua o le laina. Ia mautinoa ua oo uma tamaiti i le pito i luma o le laina.

    Mulimuli i le perofeta, mulimuli i le perofeta

    Aua le alu ese.

    Mulimuli i le perofeta, mulimuli i le perofeta

    Na te iloa le ala.

  2. Ia faamalamalama atu afai tatou te mulimuli i le perofeta i lo tatou faia lea o mea ua fai mai tatou te faia, o le a faamanuiaina i tatou ma mafai ona tatou toe foi atu ma ola faatasi ma lo tatou Tama faalelagi ma Iesu Keriso. Tufatufa atu se kopi o le paso (o lo o i le isi itulau) i tamaiti taitoatasi ma fai atu iai e valivali le ala sao e toe foi atu ai i le Tama Faalelagi ma Iesu. O tamaiti e le mafai ona faitau atonu latou te moomia se fesoasoani.

  3. Ia fetufaai atu ni tala ma faamatalaga e uiga i le perofeta o lo o iai nei ao e faaaliina atu lona ata.

  4. Fesoasoani i tamaiti ina ia latou aoaoina le mataupu e lima o le faatuatua.

Ata
follow the prophet
Ata
maze lines
Ata
maze art

Usitai i poloaiga

Faia afiafi faaleaiga

Ia faamaoni

Ia avea ma faifeautalai

Totogi lau sefuluai

Alu i le lotu

Suesue tusitusiga paia

Ia ava i lou tama ma lou tina

Tatalo i aso uma

Tau le mea moni

Alofa le tasi i le isi

Lolomi