Lesona 43
Faamamaluina o Suafa o le Tama Faalelagi ma Iesu Keriso
Faamoemoega
Ina ia fesoasoani i tamaiti taitoatasi ia latou faamamaluina ma faaaloalo i suafa o le Tama Faalelagi ma Iesu Keriso.
Sauniuniga
-
Suesue ma le agaga tatalo ma saunia e faitau le Mosaea 13:15, ia faagata i le taʻu fua muamua, ma le 1 Samuelu 3:1-10, 19-20.
-
Aveane se pepe meataalo ma afifi i se ie mafanafana laitiiti (pe faaaoga se palanikeke po o se solo e taai) e fai ma pepe.
-
Mea e Manaomia:
-
Se Tusi a Mamona.
-
Penisina, laupapa, ma se solo.
-
Ata 3-47, O Apinati i luma o le Tupu o Noa (62042; Taga Ata o le Talalelei 30); ata 3-67, Peresitene Spencer W. Kimball; ata 3-70, O Le Tama o Samuelu ua Valaauina e le Alii (62498; Taga Ata o le Talalelei 111).
-
-
Ia faia ni sauniuniga e talafeagai ai mo soo se gaoioiga e faamauoa mai ai e te manao e faaaoga.
Faalautelega Fautuaina o le Lesona
Tofi se tamaitiiti e faia le tatalo amata.
Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.
E Taua Igoa
Gaoioiga faatosina
Sii ma luelue le pepe meataalo i ou lima ma faafoliga o lo o e ataata atu i ai. Ea i luga lou ulu ma fai atu i tamaiti: “A o e pepe meamea, sa filifilia e ou matua se igoa mo oe. O se igoa e fiafia lava i ai, ma e mananao e te igoa ai.”
Gaoioiga faatosina
-
E te iloa le mea na aveatu ai e ou matua lena igoa? (Tuu sei tali mai tamaiti taitoatasi. O nisi atonu ua faaigoaina i nisi o o latou aiga po o augatama, po o nisi lava foi mafuaaga faapitoa. Fesoasoani ia lagona e tamaiti le fiafia i o latou igoa, tusa pe latou te iloa pe le iloa foi le mafuaaga ua igoa ai.)
-
O le a sou lagona pe a taʻuita atu e se tasi lou igoa, pe ula foi i ai, pe le saʻo foi ona taʻu?
Faamatala atu o igoa e taua tele. E iloa i tatou e tagata i o tatou igoa. O se igoa e iloa ai se tagata.
Talanoaga
Faamanatu i tamaiti e silafia e le Tama Faalelagi ma Iesu Keriso o tatou igoa. Faamanatu i ai, o le upu muamua lava na taʻu atu e le Tama Faalelagi i le tama o Iosefa Samita i le Togalaau Paia o le igoa, “Iosefa.” Sa valaau e le Tama Faalelagi o ia i le igoa. E mafai foi ona e faaalia le ata 3-70, O le Tama o Samuelu na Valaauina e le Alii, ma faamatala le tala i le Tusi Paia e uiga i le tama o Samuelu (tagai 1 Samuelu 3:1-10, 19-20), lea na valaau ai e le Alii Samuelu i lona igoa.
Faamalamalama o se igoa e iloa ai se tagata. O le taimi lava e te faalogoina ai le igoa o se tagata e te iloa, o le taimi foi lea e te mafaufau ai i lena tagata. E taua tele le taimi e tuuina atu ai se igoa i se pepe. E siosio le pepe e i latou ua umia le Perisitua Mekisateko ma tuuina atu i ai se igoa ma se faamanuiaga.
Talanoaga
-
A outou faalogoina le igoa o lo tatou epikopo (taʻu le igoa o le epikopo po o le peresitene o le paranesi), o le a le ituaiga tagata e te mafaufau i ai? (Faataga ona tali mai tamaiti, ma uunai tamaiti e mafaufau i ni mea lelei.)
Atonu e te manao e toe fai faalua pe faatolu lenei gaoioiga, ma faaaoga ai igoa o ni tagata lelei e iloa e tamaiti.
Talanoaga i le laupapa
Tusi lolomi le igoa Iesu Keriso i le laupapa, pe fai i tamaiti o le a e taʻuina se igoa faapitoa. Fai atu, “Iesu Keriso” ma le ava ma le faaaloalo. Ona outou fai faatasi lea ma tamaiti.
Talanoaga i le laupapa
-
O le a le ituaiga e te mafaufau i ai pe a e faalogo pe vaai foi i lenei igoa?
Tusi lolomi le igoa Tama Faalelagi i luga o le laupapa, po o le fai atu leotele e pei ona e faia i le igoa o le Faaola. Fai atu i tamaiti tou te tauina faatasi le igoa.
Talanoaga i le laupapa
-
O le a le ituaiga tagata tou te mafaufau iai pe a outou faalogo pe vaai i lenei igoa?
Ia faamalamalama atu e tele mea ua faia e le Tama Faalelagi ma Iesu Keriso mo i tatou. Tatou te alolofa ia te i laua. A tatou faalogo i o laua igoa, e masani lava ona tatou mafaufau i le tele o mea lelei na laua faia mo i tatou. Tatou te lagonaina le alofa ma le agaga faafetai pe a tatou mafaufau ia te i laua.
Tatou te faamamalu ma faaaloalo i ē tatou te alolofa iai. Tatou te faaalia atu lo tatou faamamalu ma le faaaloalo e ala lea i lo tatou faaaogaina o o latou igoa i se auala lelei ma le alofa.
Mataupu faavae o le faatuatua
Fesoasoani i tamaiti e fai faatasi le mataupu faavae muamua o le faatuatua.
Ua Poloaiina i Tatou e Faamamalu Suafa o le Tama Faalelagi ma Iesu Keriso
Talanoaina o le ata
Faaali atu le ata 3-47, Apinati i Luma o le Tupu o Noa.
Talanoaina o le ata
-
O le a le mea o lo o tupu i lenei ata?
Ia faamalamalama atu ina ua aoaoina e le perofeta o Apinati ia tagata, na ia tauina atu ia te i latou ia Tulafono e Sefulu, lea na aumaia mai le Atua.
O Tulafono e Sefulu o se taiala e fesoasoani ina ia tatou ola i le auala sao. O le tulafono e tolu o lo o tau mai ai e tatau ona tatou faamamalu ma faaaloalo i suafa o le Tama faalelagi ma Iesu Keriso.
Talanoaina o le mau
Fai atu i tamaiti e faalogo lelei ao e faitauina le tulafono e tolu. Faitau le Mosaea e 13:15, ia taofia pe a uma le upu tau fua i le taimi muamua lava o lo o tau mai ai i le fuaiupu.
Ia faamalamalama atu o le uiga o le “tau fua” o le faaaogaina lea o suafa o le Tama Faalelagi ma Iesu Keriso i se auala le taupulea po o le lē matuai mafaufau foi i le Tama Faalelagi ma Iesu Keriso.
Fai atu i tamaiti tou te faia faatasi upu o le mau.
Talanoaina o le mau
-
O a nisi igoa tatou te faaaogaina pe afai tatou te faauiga i le Tama Faalelagi po o Iesu? (Atua, Tama oi le Lagi, Ieova, le Alii, Keriso, le Faaola.)
Fesoasoani i tamaiti ia latou malamalama e so o se taimi lava tatou te faaaogaina ai se igoa o nei igoa e tatau ona tatou tautatala ma le faaaloalo. O nei igoa e le tatau ona tautala iai ma le ita pe faatausuai foi iai. O se tasi na te faaaogaina nei igoa i lea ituaiga auala o lona uiga o lo o palauvale o ia. O nei igoa e le tatau ona faaaogaina o ni upu palauvale. E tatau ona tatou faaaogaina suafa o le Tama Faalelagi ma Iesu Keriso na o le taimi tatou te tatalo ai po o le talatalanoa foi e uiga ia te i laua i se tulaga faaaloalo.
Afai e mafai e lau vasega ona faitau, ia valaaulia se tamaititi e sau i luga ma tusi upu faamamalu ma le faaaloalo i luga o le laupapa. Toe faamalosia le manatu afai tatou te alolofa i le Tama Faalelagi ma Iesu, o le a tatou faaalia lo tatou faamamalu ma le faaaloalo i o laua suafa e ala lea i le faaaogaina i le na o se auala alofa ma le lelei.
Faaaogaina Sao o Suafa o le Tama Faalelagi ma Iesu Keriso
-
O le a le taimi e sao ai le faaaogaina o le suafa o le Tama Faalelagi? (Pe a tatou tautatala ma le faaaloalo ma le migao ma pe a tatou tatalo.)
Tala
O se tasi tina na ia faamatalaina atu le tala lenei i lana tama ao avea o ia ma se teineititi. Toe faamatala atu le tala i ni au lava upu.
“ ‘Ao avea au ma se teineititi, ma te savavali faatasi mai ma lou tuagane mai le aoga i le fale. E masani lava ona ma oso mai i se auala puupuu e iai se maile uliuli lapoa lava e tulia maua pe a ma tamomoe ane i tafatafa o lona fale. Afai ma te tamomoe i le taimi sao, e mafai lava ona ma maua le pa ma faapea ai ona ma saogalemu. E tau mai lava e lou tuagane ia te au le taimi ma te tamomoe ai.
“ ‘I se tasi aso sa na o au ai ma ou te lei tamoe i le taimi sao. Sa faafefe au e le maile, ma sa ou matuai tetemū lava i luga o le auala i lou fefe. Ao tau oso mai ia te au, [o lou fefe tele] na ou faataio ai i le mea e gata ai lou leo: “Tama Faalelagi, fesoasoani mai ai te au!” ‘
Na taua e lana tama e faapea: “Na faapea mai lou tina, na faafuasei lava ona taofi le maile e pei o lo o iai se pa pupuni i lona auala, ma ia tolotolo atu loa i le pa mo lona saogalemu. Na ia iloaina na talia lana talosaga” (S. Michael Wilcox, “No Other Gods before Me,” Ensign, Jan. 1994, pp. 22-23).
Ia faamamafa atu le taua tele o lo tatou faaaogaina o suafa o le Tama Faalelagi ma Iesu Keriso ia na o le taimi tatou te tatalo ai po o le talatalanoa iai ma le faaaloalo.
Ata ma le tala
Faaali atu le ata 3-67, Peresitene Spencer W. Kimball, ma tau atu i tamaiti o ia o se perofeta alofagia ma o le Peresitene lona sefululua o le Ekalesia.
Faamatala atu le tala lenei:
I se tasi aso ina ua maea se taotoga, na tosoina mai ai i fafo ia Peresitene Kimball mai le potu o taotoga na toeititi ai lava a see ma pau le tagata na tosoina mai o ia. Na amata ona palauvale le tagata lea ma tau fua le suafa o le Alii. E ui lava o lo o mai tigaina ia Peresitene Kimball, ae na ia augani atu lava i le tagata lea, “Faamolemole! Faamolemole! O lou Alii lena ua e faaaogaina lona suafa [i se auala sese].”
Na filemu le tagata lea. Ona ia musumusu atu lea, “Malie lou finagalo i sou sese” (tagai i le “President Kimball Speaks Out on Profanity,” Ensign, Feb. 1981, p. 3).
Talanoaga
Talanoaga
-
O le a le tulafono e lei usitaia e le tagata lea?
-
Aisea na le manao ai Peresitene Kimball e faalogo i lenei mea?
-
O a taimi e tatau ai ona tatou faaaogaina suafa o le Tama Faalelagi ma Iesu Keriso?
-
O le a se mea e mafai ona e faia pe afai o loo e iai i le aoga po o le tou vaiaai a e faalogoina ni tagata o taʻu fua ia suafa o le Tama Faalelagi ma Iesu Keriso?
Aotelega
Ia uunaiina tamaiti e faaaoga ma le faaaloalo ma le migao ia suafa o Iesu Keriso ma le Tama Faalelagi.
Tofi se tamaititi e faia le tatalo faaiu.
Gaoioiga e Faamauoa Mai Ai
Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”
-
Tauloto faatasi ma tamaiti le fuaiupu faitaga lenei:
Tautala ma le migao ia Iesu;
Faamolemole faamalu lou leo. (tuu le limatusi i laugutu)
Ia e faamamalu i lona suafa i au filifiliga tonu uma.
O le suafa o lo tatou Tama Faalelagi,
E pei o se tatalo (piilima ma punou le ulu)
E tatau ona tautala iai ma le alofa tele ma le faaeteete.
-
Valaau se tamaititi i se igoa sese, ma fai atu iai e faia se mea mo oe. Fai atu iai e famalamalama atu i le vasega le lagona na oo ia te ia ina ua valaauina o ia i le igoa sese. Faaaoga lenei mea e faamatala atu ai lo tatou le fiafia pe afai e sese ona faaleo, pe galo, po o le le sao foi ona faaaoga o o tatou igoa e se tasi. Ia faamalamalama atu tatou te le mananao e faalogo atu o valaau mai o tatou igoa ma le ita. Tatou te faanoanoa pe a tatou faalogoina o tatou igoa o lo o faaaogaina i se tulaga sese. E le fiafia foi iai le Tama Faalelagi ma Iesu Keriso i lea mea. Ua la aoaoina i tatou ina ia tatou faaaogaina o laua suafa ma le faaaloalo, pe a tatou tatalo po o le talatalanoa iai ma le migao.
-
Afai e mafai e tamaiti ona tusia lava e i latou o latou igoa, ona tuu atu lea iai e tusi lolomi o latou igoa muamua i le ogatotonu o se pepa avanoa, ona vali faatamilo ai lea i se isi lanu, ona sosoo ai lea ma se isi lanu, ma se isi, seia oo ai lava ina latou faia se “nuanua” lapotopoto i autafa o o latou igoa. Afai e le mafaia e tamaiti ona tusia o latou igoa muamua, e mafai ona e tusia o latou igoa i le ogatotonu o a latou pepa ona tuu atu lea ia te i latou e teuteu o latou igoa i lanu o le nuanua po o nisi auala.
-
Toe fai le faatinoga o le tala ia Apinati mai le lesona 20, ma fai atu i le tamaititi o lo o faatinoina ia Apinati e toe faitau atu le poloaiga lenei “Aua e te tau fua le suafa o le Alii lou Atua” i le Tupu amioleaga o Noa.
-
Usu pe faitau faatasi ma tamaiti upu “O le Talosaga Muamua a Iosefa Samita” (Viiga, itulau 14); o lo o maua upu i le pito i tua o le tusi lesona lenei.
-
Ia saunia se pepa telē e tusia ai upu o se paso mo le vasega ia foliga faapenei:
AtapuzzleAue e
te taʻu fua le
suafa o le
Alii lou
Atua.
Fai atu i tamaiti e te manao e te fia iloa pe na latou manatua le poloaiga taua na talanoaina i le lesona. Tuu atu i tamaiti se toalima se vaega se tasi o le paso na e sauniaina. Fesoasoani iai ina ia faatulagaina lelei upu o le mau i lona faatulagaga sao. Ona fai atu lea i le vasega e faitau faatasi le poloaiga.
Ia valaaulia so o se tamaititi e manao e tauloto lenei mau.